Ciidamada amniga Qaranka ee ku sugan afaafka deegaanka Bacaadweyne ee Koofurta Gobolka Mudug ayaa saaka fashiliyay weerar ismiidaamin ah oo loo adeegsanayay gaari land cruiser ah oo ay argagixisada Al-shabaab doonayeen inay ku dhibaateeyaan shacabka ku dhaqan deegaanka.

Ciidamada xoogga dalka ayaa toogtay dhagar qabihii waday gaari waxaana halkaasi ku qarxay gaarigii inau u soo gaareen halkii ay la damacsanaayeen argagixisadu

Inta la xaqiijiyay waxaa ku geeriyooday dhagar qabihii mana jiraan qasaare kale sida ay inoo sheegeen saraakiisha ciidamada xoogga dalka .

Sidoo kale ciidanka xoogga dalka,kuwa daraawiishta Galmudug iyo shacabka deegaanka oo kaashaya ayaa saakay howl-gal ka dhan argagixisada kawada deegaanno badan oo ka mid ah koofurta gobolka Mudug.

Ra’iisul Wasaaraha Xukuumadda Federaalka Soomaaliya mudane Maxamed Xuseen Rooble iyo dhiggiisa Dalka Qatar Sheekh Khaalid Bin Khalifa Bin Cabdilcaziz Aala Taani, oo khadka telefoonka ku wada xiriiray ayaa ka wada hadlay xoojinta iyo horumarinta xiriirka iyo iskaashiga labada dal ee walaalaha ah.

Ra’iisul Wasaare Rooble ayaa dhigiisa dalka Qatar uga warbixiyay horumarka ay dowladda ku talaabsatay ee dhinacyada Amniga iyo doorashooyinka dalka.

Guddoomiyaha Gobolka Banaadir ahna Duqa Magaalada Muqdisho Mudane Cumar Maxamuud Maxamed (Cumar Filish) ayaa ka qeyb galay Munaasabad lagu soo dhaweynayay Taliyeyaasha Booliska Maamul Goboleedyada dalka, laguna soo bandhigay  wax qabadka Ciidanka Booliska Soomaaliyeed oo maanta lagu qabtay Dugsiga Tababarka Ciidanka Booliiska ee Jeneraal Kaahiye.

Duqa Muqdisho ayaa ku amaanay Ciidanka Booliska Gobolka Banaadir shaqada ay ka hayaan Magaalada Muqdisho iyo sida ay isaga saaraan Mas’uuliyad dheeraad ah sidi ay Magaaladaan ku noqo laheed magaalo Nabad ah.

Guddoomiyaha Gobolka Banaadir ahna Duqa Muqdisho Mudane Cumar Maxamuud Maxamed (Cumar Filish) ayaa xarunta Aqalka Dowladda hoose ee Xamar kulan aan caadi ahayn kula qaatay Guddoomiyeyaasha Degmooyinka Gobolka Banaadir iyo Wakiilada Guddiga abaabulka iyo wacyigelinta Qaranka.

Kulanka ayaa looga hadlay Wecyigelinta Bulshada, Sugida Amniga Bulshada, ka hortaga Waxyaabaha Maanka dooriya iyo Bilicda Magaalada Muqdisho.

Kulanka ayaa waxaa goobjoog ka ahaa Guddoomiye kuxigeenka howlaha Guud ee maamulka Gobolka Banaadir, Xoghayaha Guud ee G/Banaadir, Guddoomiyaha Guddiga abaabulka iyo wacyigelinta Qaranka iyo Agaasimeyaal ka tirsan Dowlada hoose ee Xamar.

Masuuliyiinta ka qeybgalay shirka ayaa isla gartay in Guddiyo heer kala gedisan loo xilsaaro wacyigelinta, ka hortagga mukhaadaraadka iyo sugidda amniga Shacabka, kuwaasi oo todobaadyada soo socda ka howlgali doonna Muqdisho.

Garoowe-Wasaaradda Waxbarashada  Dawladda Federaalka iyo Wasaaradaha waxbarashada Dawladaha Xubnaha ka ah Federaalka iyo Agaasinka Waxbarashada Gobolka Banaadir oo Shir muddo dhawr bari ah uga socday xarunta Wasaaradaha waxbarashada Puntland magaalada Garoowe ayna hogaaminayaan Wasiirada Waxbarashada ayaa waxaa laga soo saaray qoddobo lagu heshiiyey kuwaas oo lagu midaynayo manhajka waxabarshada dalka.

1.In la asaaso Golaha Iskaashiga iyo Wadatashiga Wasaaradaha waxbarashada.

2. In la mideeyo qalfoofta manhajka(Curriculum Framework) loona saaro guddi farsamo midaynta Qalfoofka Manhajka( Curriculum Framework).
3. In Maamul Goboleedyada iyo Gobolka Banaadir si madax bannaan u maamushaan imtixaanka dugsiga sare, lana sameeyo guddi madax banaan oo sameeya halbeegyada Guud.
4. In shahaadooyinka dugsiga sare laga qaato lagana bixiyo maamul goboleedyada iyo Gobolka Banaadir loona daabacan karo hab online ah.

Shirkan oo shalay ka furmay magaalada Moqdisho ayaa waxa looga hadlay arrimaha Garsoorka waxaana ka qeyb galay garsooreyaasha maxkamadaha degmooyinka Gobalka Banaadir, Maxkamadda Racfaanka, Guddoomiyaha Maxkamadda Gob.Banaadir, Guddoomiyaha Maxkamadda Sare, Xeer illaaliyaha Guud ee Qaranka.

Shirkan oo uu daah-furay Guddoomiyaha Mxakamadda sare dalka Baashe Yuusuf Axmed ayey ka qeyb galayaashu kaga doodeen islamarkaana isweydaarsadeen warbixino iyo su’aalo la xiriira dembiyada dacwad fullinta.iyo falanqeyn Guud ee Garsoorka iyo cadaalad sameynta

Shirka oo maanta la soo gebo gabenayo ayaa lagu wadaa in ay ku soo biiraan mas’uuliyiinta ka socda waaxda Cadaaladda iyo Garsoorka iyagoo hadallo ka jeedin doonaan dhammaadka shirka.

Dadka ku dhaqan tuulada Jiidoow oo hoos tagta degmada Warsheekh ee gobolka Shabeellada dhexe ayaa si weyn isaga caabbiyay isku day ay kooxda Al-Shabaab ku doonayeen in ay kaga qaataan xoolo sharci darro ah.

Qaar ka mid ah dadka degaankaas ayaa warbaahinta Qaranka Soomaaliyeed u sheegay in ay iska caabbiyeen malleeshiyaad ka tirsanaa Argagixisada Al-Shabaab oo watay laba gaari oo Mini Bus ah, kuwaas oo doonayay in ay boobaan xoolaha ay dhaqdaan shacabka ku dhaqan Tuulada iyo nawaaxigeeda.

Kooxda Al-Shabaab ayaa dadka ku dhaqan goobaha ay ku sugan yihiin ku qasba inay bixiyaan xoolo iyo lacago ay ku sheegaan Zakawaad, balse shacabka ku nool Tuulooyinka hoos taga Warsheekh iyo dhulka baaddiyaha ayaa billaabay inay iska caabbiyaan malleeshiyaadka Argagixisada, markii ay u adkaysan waayeen dhaca iyo boobka joogtada ah.

Ciidamada Daraawiishta Galmudug iyo kuwa Xoogga Dalka Soomaliyeed ayaa saaka Howlgalo lagu baacsanayo Argagixisada Al-Shabaab ka bilaabay Koonfurta Gobolka mudug

Ciidamada ayaa saaka ka ruqaansaday Fariisimo ay ku lahaayeen Deegaanada dhaghaye iyo Hareeri dheere halkaas oo ay Ciidanku ku lahaayeen Saldhigyo Ciidan ,Saraakiisha ayaa sheegay inay saaka Ciidanku wadaan Howlgal Argagixisada Al-shabaab looga sifaynayo Deegaanada ay ku dhuumaalaystaan ee  ka tirsan Koonfurta Gobolka mudug

Kooxda Argagixisada Al-Shabaab ayaa ka firxaday Koonfurta Gobolka mudug ka dib markii dhawaan jab xoogan kala kulmeen Dagaaladii ka dhacay Bacadweyne,Wisil iyo deegaanada ku hareeraysan oo dhamaantood Ciidamadda Dawladdu la wareegeen.