Safiirka Jamhuuriyadda Federaalka Soomaaliya ee Boqortooyada Biljimka iyo Midowga Yurub, Mudane Yoonis Yaasiin Xaashi (Ooga-Cadde), ayaa nuqul ka mid ah warqadihiisa aqoonsiga danjirannimo ku wareejiyay Agaasimaha Habmaamuuska ee Wasaaradda Arrimaha Dibadda Biljam, Danjire Olivier Belle.

Agaasimaha Habmaamuuska ee Wasaaradda Arrimaha Dibadda ee Biljimka ayaa u rajeeyay safiirka cusub ee Soomaaliya inuu si joogta ah ugu guuleysto waajibaadkiisa, wuxuuna dhinaca kale u ballanqaaday inuu siinayo dhammaan taageerada si sare loogu qaado xiriirka laba geesoodka ah ee labada dal .

Safiirka Jamhuuriyadda Federaalka Soomaaliya ee Boqortooyada Biljimka iyo Midowga Yurub, Mudane Yoonis Yaasiin Xaashi (Ooga-Cadde), ayaa ka mahadceliyay sida diiran ee loo soo dhoweeyay,wuxuuna caddeeyay  in si hufnaan ah uu uga shaqeyn doono iskaashiga labada dal.

Kulanka wareejinta nuqul ka mid ah waraaqaha aqoonsiga oo ka dhacay Caasimadda Brussels ,waxa uu qeyb ka ahaa munaasabad gogol-xaarka oo la doonayo in Boqorka Biljim, Boqor Philippe si rasmi ah loogu wareejiyo dukumiintigaasi oo dhameystiran.

DHUUSO-MAREEB- Madaxweynaha Dowladda Galmudug Mudane Axmed Cabdi Kaariye ayaa shir guddoomiyay shirka Golaha Wasiirada Galmudug oo caawa ka dhacay Xarunta Madaxtooyada DGM.

Kulanka ayaa diirrada lagu saaray qodobo ay ka mid ahaayeen.

• Xaaladda guud ee Amniga Galmudug
• Arrimaha Doorashooyinka

Dood iyo falanqayn dheer kadib Golaha wasiiradu waxay soo saareen qodobada soo socda.

1. Goluhu wuxuu go’aamiyay in la dardargeliyo Suggida Amniga iyo xasiloonida Galmudug,

2. Goluhu wuxuu ugu baaqay kooxaha ku howlan falalka amni daro inay ka waantoobaan, damacoodana ay ku doonaan si nabad ah.

3. Goluhu wuxuu soo saaray in la dardargeliyo howlaha doorashooyinka iyadoo loo gudbiyay dhinacyada ay khuseyso si ay gutaan waajibaadkooda kaga aadan.

Source: Sonna

Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble iyo wefdigii uu hoggaaminayay ayaa galabta dalka dib ugu soo laabtay, ka dib booqasho rasmi ah oo uu muddo seddex cisho ah ku joogay dalka Qatar, halkaas oo uu kulammo khuseeya xoojinta xiriirka labada dal kula yeeshay madaxda dalkaas.

-Xubno ka mida ah Guddiga Xallinta Khilaafadka doorashooyinka heer Federaal ayaa gaadhay magaalada Kismaayo ee xarunta dowlad goboleedka Jubaland.

Xubnahan oo kala ah Burhaan Cilmi Xirsi iyo Warfaa Maxamed Jaamac ayuu ujeedkooda yahay inay qeyb ka noqdaan doorashada xubnaha Aqalka Sare ee Jubbaland, gaar ahaan farta kursi ee dhowaan lagu dooran doono.

Xubnahan ayaa waxaa Kismaayo kusoo dhaweeyay mas’uuiyiin ka tirsan Guddiga doorashooyinka heer dowlad Goboleed iyo madax ka tirsan Jubbaland.

Ugu yaraan laba xubnood oo ka tiranaa Argagixisada Al-shabaab ayaa lagu dilay tiro intaa ka bandanna waa lagu dhaawacay, kadib markii ay kooxda nabad-diidka isku dayday in ay weerar gaadmo ah ku qaaddo saldhig ay ciidanka xoogga dalka ku leeyihiin degmada Jannaale ee Gobolka Shabeellada hoose.

Ciidanka xoogga ayaa sidoo kale ka furtay malleeshiyada Argagixisada ah ee Al-Shabaab Hub iyo saanad kale oo ay ka carareen.

Qaar ka mid ah Saraakiisha Ciidanka xoogga dalka ayaa warbaahinta Qaranka Soomaaliyeed u sheegay inay heleen xog ku saabsan weerar gaadmo ah oo ay kooxda Al-Shabaab la damacsanaayeen saldhigyo ay Ciidanka XDS ku leeyihiin Jannaale sidaa daraaddeedna ay sameeyeen ka hortag kuna jebiyeen cadawga.