Wasiirka wasaaradda Maaliyadda ee Xukuumadda Federaalka Soomaaliya mudane Cabdiraxmaan Ducaale Beyle, ayaa maanta shir guddoomiyey kulanka billaha ee guddiga maamul wanaaga maaliyadda ee ( FGC), oo ay ku mideysan yihiin dowladda Federaalka Soomaaliya iyo Hey’addaha dhaqaalaha adduunka. Waxaana kulanka looga hadlay xaladda dib u habeynta maamulka maaliyadda ee dowladda iyo meelaha kale ee muhiimka ah sida habka qandaraasyadda, Iibka Qaranka (procurement), iyo heshiishyadda dowladdu gasho.

“ waxaan u mahadcelinayaa Hey’adihii nagala qeyb galay shirka oo ay ugu horreeyaan xafiisyadda Madaxweynaha, Ra’iisul wasaaraha, wasaaradda Badroolka, Bangiga Adduunka, IMF, iyo Bangiga dhexe ee Soomaaliya” ayuu yiri Cabdiraxmaan Ducaale Beyle.

Munaasabadda lagu xusayay maalinta Badaha Adduunka oo ay si wadajir ah u soo qaban qaabiyeen Wasaaraddaha Kheyraadka Badda iyo Gaadiidka Badda ayaa waxaa ka qeybgalay ururada iskaashatooyinka, Taliyaha Ciidanka Ilaalada Xeebaha Soomaaliya iyo  mas’uuliyiin ka socotay xafiiska Ra’isul Wasaaraha dalka.

Agaasimaha guud ee wasaaradda Kalluumeysiga iyo Kheyraadka Badda Soomaaliya Mudane Maxamuud Sheekh Cabdullaahi ayaa sheegay in xuska maalinta badaha Adduunka ay muhiimad gaar ah u leedahay shacabka Soomaaliyeed, isagoo ku baaqay in si wada jir ah looga faa’iideysto kheyraadka badda ku jiro, maadaama Soomaaliya ay leedahay xeebta ugu dheer Qaaradda Afrika.

Wasiirka Wasaaradda Kallkuumeysiga iyo Kheyraadka Badda ee Xukuumadda Federaalka Soomaaliya Mudane Cabdullahi Bidhaan Warsame oo soo xiray munaasabadda lagu xusayay maalinta caalamiga ah ee Badaha Adduunka, isla markaana si gaar ah ula hadlay Warbaahinta Qaranka ayaa sheegay in uu meel gabagabo ah marayo sharciga looga hortagayo kalluumeysiga sharci darrada ah, mustaqbalka dhawna gudaha dalka lagu maxkamadeyn doono ciddii sharciga jebisa .

Wasiiru-dowlaha Xafiiska Ra’iisul Wasaaraha XFS Mudane Cabdixakiin Xasan Ashkir ayaa la kulmay wefdi ka socday Wasaaradda Arrimaha Dibadda Boqortooyada Sacuudi Carabiya,

Wasiir Ashkir iyo wafdigan ka socday dalka sucuudiga ayaa ka wada hadlay xoojinta xiriirka & iskaashiga labada dal iyo dib u furista safaaradda Sacuudiga ee Soomaaliya.

Wasiirka Wasaaradda Howlaha guud & Guryenta ee Xukuumadda Federaalka Soomaaliya Maxamed Aadan macalin (Soomaali) ayaa ka hadlay xilliga sida rasmiga ah ee xariga laga jarayo dhismaha waddada isku xirta Muqdisho iyo Afgooye, isagoo sheegay in howsha dhismaha wadadaasi mar aan fogeyn lasoo gabo gabeyn doono.

Wasiirka oo la hadlay Warbahinta Qaranka ayaa sheegay in qorshuhu ahaa in xariga laga jaro dhismaha wadada Bishii Febaraayo ee la soo dhaafay balse sababao amni darteed uu dib ugu dhacay.

Waxaa sidokale wasiirka intaa hadalkiisa ku daray dhismaha wadada uu haatan yahay geba-gabo, isla markaana la gaarsiiyay Buundada degmada Afgooye ee Gobolka Shabeellaha Hoose, dhawaana xariga laga jari doono.

Qaar ka mid ah haweenka ku nool magaalada Muqdisho, kana soo jeeda gobolka Gedo ayaa cambaareyn dusha ugu tuuray dowladda Kenya iyagoo sheegay in Kenyaatigu si ulakac ah ay mar walbo duqeymo ula beegsadaan Shacabka ku nool magaalooyinka iyo baadiyaha gobolka Gedo.

Duqayn diyaaradaha dowladda Kenya ay ka geysteen gobolka Gedo 3-dii bishan ayaa sababay dhimasho iyo dhaawac soo gaaray dad shacab ah oo aan waxba galabsan iyagoo sidoo kale ay ka horreeyeen duqeymo kale oo waxyeelo kasoo gaareen shacabka ku nool deegaanaasi.

Haweenka ayaa ku nuux nuuxsaday in ay tahay wax aan la aqbali karin duqaymaha soo laab laabtay ee ay dowladda Kenya ka geeysanayso gobolka Gedo, waxayna ku baaqeen in dowladda Kenya lagula xisabtamo gaboodfallada ay geysaneyso.

Haweenkii kulanka ka qayb galay oo madasha ka hadlay ayaa sheegay in shacabka gobolka Gedo ay u baahanyihiin garab istaag, dhankoodana ay cambaareynayaan falkaasi foosha xun ee ay sameeyeen ciidamada Kenya, waxaana ay dowladda ka codsadeen inay wax ka qabato dhibaatada Kenya ay ku heyso shacabka Gobolka Gedo.

3-dii bishaan ayay ahayd markii diyaaradaha Kenya ay duqayn ka gaysteen gobolka Gedo, gaar ahaan deegaanka Ceel Cadde iyo tuulooyin hoostaga Degmada Beled Xaawo, taasi oo sababtay dhimasho iyo dhaawac dad shacab, waxaana ay u badnaayeen carruur iyo haween.

Dowlada Soomaliya ayaa magaalada Muqdisho keentay qaar ka mid ah dadkii ay dhaawacyadu ka soo gaareen duqeynta, kuwaasi oo iminka lagu daweynayo isbitaalada Muqdisho.

Madaxweynaha dowlad goboleedka Puntland Mudane Siciid Cabdullaahi Deni, ayaa daah furay Barnaamijka Qorsheynta dhulka magaalo madaxda dowlad goboleedka Puntland ee Caasimadda Garoowe.

Kulan oo ka dhacay xarunta Hay’adda Cilmi baarista Puntland ee PDRC, ayaa lagu soo bandhigay xog maqal iyo muuqaal ah oo hab farshaxameysan oo ay dowladda hoose ee Garoowe ku faah faahisay Qorsheynta dhulka caasimadda iyo sida loo hirgelinayo.

Mudane Deni ayaa u digay dadka inta badan dhulka xoogga ku qabsaday, isagoo faray laamaha amniga iyo Hay’adaha Garsoorka in ciddii lagu helo in ay boobayso dhul aysan laheyn la marsiinayo sharciga.

Madaxweynaha Puntland ayaa muujiyay muhiimada ay leedahay in Mustaqbalka Garoowe loo diyaariyo mid horumarsan oo ka qurux badan dhinac kasta sida dismaha waddooyinka, Guryaha iyo guud ahaan bilicda Magaalada, wuxuuna ku baaqay dowlad iyo shacab in taasi laga wada shaqeeyo.