Awdheegle- Asad Shariif Abuukar, oo ka tirsanaa Al-shabab ayaa isku soo dhiibay Ciidanka Xoogga Dalka ee ku sugan degmada Awdheegle ee Gobolka Shabeellada hoose.
Ninkan ka tirsanaa Al-shabaab ayaanan la sheegin waxa uu u qaabbilanaa argagixisada.
Soo baxsashada Asad ayaa kusoo beegmaysa xilli uu maalin ka hor sidan oo kale isu soo dhiibay horjooge ka tirsanaa nabad-diidka qeybta 60-aad ee ciidanka xoogga dalka ee uu fadhigoodu yahay Baydhabo.
Ra’iisul wasaaraha xukuumadda Federaalka Soomaaliya mudane, Maxamed Xuseen Rooble oo safar shaqa ku jooga dalka Kenya ayaa bogaadiyay doorashada xubnaha Aqalka sare ee baarlamanka Soomaaliya ku matalaya Puntland oo manta lagu qabtay magaalada Garoowe.
“Waxaaan madaxweynaha, Baarlamaanka iyo Shacabka Puntland ugu hambalyeynayaa bilaabista doorashada kuraastii ugu horreeyay ee Aqalka sare. Waxaan kaloo hambalyo leeyahay xildhibaannada soo baxay, anigoo rajeynaya in howsha harsani ay si xasilloon ku soo idlaato.
Sidoo kale waxaan bogaadinayaa madaxweynaha Galmudug Axmed Cabdi Kaariye Qoor-qoor oo soo gudbiyay liiskii u horreeyay ee murashaxiinta Golaha Aqalka Sare ee BFS.
Dhammaan Dowlad-goboleedyada waxaan kula dardaarmayaa in ay dedejiyaan howsha doorashada maadaama waqtigu is gurayo, si loogu dul shaqeeyo jadwalkii lagu heshiiyay”.
Madaxweynaha Soomaliya iyo Amiirka dalka Qatar oo qadka telefoonka uga wada hadlay xoojiinta xiriirka labada dal.
Madaxweynaha Jamhuuriyadda Federaalka Soomaaliya mudane Maxamed Cabdullaahi Farmaajo ayaa maanta qadka teefoonka kula hadlay amiirka dowladda Qatar Shiikh Tamiim bin Xamad Al-thani.
Madaxweyne Farmaajo iyo Amiirka Qatar ayaa ka wada hadlay xoojinta xiriirka labada dal,Arrimaha gobalka iyo caalamka
Ra’iisul Wsaaraha xukumadda Federaalka Soomaaliya Maxamed Xuseen Rooble ayaa kulan la qaatay qaar ka mid ah jaaliyadda Soomaaliyeed ee magaalada Mombasa dalka Kenya.
Ra’iisul’wasaaraha ayaa uga warbixiyay jaaliyadda kulankii uu la qaatay xaaladda dalka iyo doorashooyinka dalka ka bilowday.
Guddoomiyaha gobolka Banaadir ahna duqa magaalada Muqdisho Cumar Maxamuud Maxamed (Cumar Filish) ayaa xilka ka qaaday Afar gudoomiye Degmo oo katirsan gobolka Banaadir.
Guddoomiyaasha xilka laga qaaday ayaa waxaa kamid ah.
1- Guddoomiyaha degmada Xamar Weyne Cabdiqaadir Maxamed Cabdiqaadir.
2- Guddoomiyaha Kaaraan Abshir Kaaraan.
3- Guddoomiyaha degmada Waabari Cabdicasiis Cismaan Jaamac.
4- Guddoomiyaha degmada Hiliwaa Cabdixakiin Cumar Cabdulle, Waxaana xilka guddoomiyaha degmadaas loo magacaabay Mire Salaad Dhuxulow.
muqdisho (Ilayska dalka):. Xubno ka mid ah Guddiga Xalinta Khilaafaadka Doorashooyinka Soomaaliya, ayaa saaka u safraya Dowlad Goballeedka Puntland.
lix xubnood oo ka mid ah Guddiga Xallinta Khilaafaadka Doorashooyinka ayaa ku wajahan Garowe si ay goobjoog uga noqdaan doorashada kuraasta Aqalka Sare ee Dawlad Goboleedka Puntland, oo maanta halkaas ku qabsoomi doonta.
Idiris Cabdullahi Macalin ,Magaciisa Afgarashada ee Kooxda Argagixisada Al-shabab loo yaqaano (Food Cade ) oo Mudo 7-Sano ka Tirsanaa Al-shabab ayaa Maanta isku soo dhiibey Ciidanka Xoogga Dalka Soomaaliyeed Qeybta 60-Aad ee Magaalada Baydhabo.
Food cade Wuxuu Al-shabab u qaabilsanaa ilaalinta Xabsiyada ,isagoona sidoo kale kasoo qeyb qaatey Dagaalo Dhowr ah Wuxuuna haatan Argagixisada Al-shabab kaga soo goostey Degmada Xarardheer oo ka tirsan gobolka Mudug.
Idiris ayaa sidoo kale Saaxibadiisa Weli ku jira Kooxda Argagixisada Al-shabab ugu Baaqey in ay Dowladda isku soo dhiibaan isagoona sheegey in Al-shabab ay Yihiin kuwa ma naxayaal ah oo dadkooda gumaadaya.
Wasiirka Difaaca Isra’iil Benny Gantz, ayaa sheegay in Dowladda Iiraan ay tahay halista ugu weyn ee gobolka iyo caalamka intiisa kale.
“Caalamku waa inuu soo afjaraa halista Iiraan iyo Xisbullaah, si meesha looga saaro dhibka ay ku hayaan Caalamka, Suuragal ma aha in Gacmaha laga laabto inta Iiraan ay hormarineyso Mashruuceeda Nukliyeerka” ayuu yiri Benny Gantz.
Warkan ka soo baxay Israa’iil, ayaa ku soo beegmaya saacado kadib markii Waaxda Difaaca Mareykanka (Pentagon), ay sheegtay Talaadadii, in Iiraan ay khatar ku tahay Amaanka gobolka.
Waaxda Difaaca Mareykanka ayaa sidokale sheegtay in Dahraan ay sii waddo taageeridda iyo maalgelinta maleeshiyaadka kala duwan ee argagixisada ah.
Taliska Dhexe ee Mareykanka ayaa bayaan uu soo saaray Jimcihii ku sheegay in weerarkii lagu qaaday markabkii “Mercer Street” 29 -kii July, ay mas’uuliyadiisa la heed Iiraan.
Markabka Mercer Street oo laga lahaa Israa’iil, ayaa lagu weeraray Diyaarad kuwa aan duuliye laheen ah, waxaana ku dhintay laba ka mid ah shaqaalihii saarnaa.
Iiraan ayaa, iska fogeeysay edeeynta loo jeediyay ee ku saabsan in Ciidamadeeda ay weerareen Markabka Mercer iyo in ay xariir la leedahay Kooxo argagixisa ah.
Madaxweynaha dalka Mareykanka Joe Biden ayaa ku boorriyay madaxda dalka Afganistaan iyo hoggaamiyeyaasha bulshada ee dalkaasi inay midoobaan oo u dagaallamaan jiritaanka qarankooda.
Hadaladaasi ayaa yimid xilli madaxweynaha uu Aqalka Cad kula hadlay warbaahinta, wuxuu sheegay in inuusan ka qoomameyneynin go’aankii uu ciidamadiisa ugala baxay Afgaanistaan, wuxuuna intaa ku daray in dadka reer Afganistaan ay u dagaalamaan nafdooda oo meel uga soo wada jeestaan cadowgooda.
Mr.Biden ayaa yiri “Mareykanku uu sugayo ballanqaadyadii uu u sameeyay madaxda Afgaanistaan, sida bixinta kaalmo xagga cirka ah oo dhow, bixinta mushaaraadka milatariga iyo siinta ciidamada dalkaasi raashin iyo qalab kale”.
Daalibaan waxay qabsadeen ugu yaraan siddeed ka mid ah 34 -ka magaalo -madax ee gobollada dalka,waxaana suurtagal ah in caasimadda Kabul ay gacanta u geli karto Taliban muddo 90 maalmood gudahood ah sida lagu shaaciyay wargeyska Washington Post oo soo xigtay saraakiil aan la magacaabin oo Mareykan ah.
In ka badan 1,000 qof oo rayid ah ayaa lagu dilay dagaallo qaraar oo u dhexeeyay Taalibaan iyo ciidamada dowladda bishii la soo dhaafay.
