Ciidamada daraawiishta Galmudug ee ku sugan deegaanka Cadakibir ee Gobolka Galgaduud ayaa iska caabiyay weerar ay galabta ku soo qaadeen kooxda argagixisada Shabaab, ayadoo wararka halkaas naga soo gaaraya ay sheegayaan in jab xooggan ay kala laabteen halkaas.

Kooxda argagixisada Al-Shabaab oo dagaallo ay la galeen ciidamada Galmudug iyo kuwa Qaranka labadii billood ee u danbaysay deegaanno badan looga qabsaday, isla markaana jab xooggan oo dhan walba ah lagu gaarsiiyey ayaa isku dayaya in ay soo qaadaan weeraro nafla-caari ah oo ay maleeshiyaadkooda si qasab ah lagu galinayo.

Magaalooyinka Cadaado, Baxdo iyo Godinlabe ayaa lagu soo waramayaaa in ay ka baxayaan gurmadyo ciidan oo ku wajahan aagga Cadakibir, waxaana la dareemayaa abaabul xooggan oo magaalooyinkaas iyo deegaannada hoostaga ka soconaya.

Munaasabad lagu soo xirayay tababarka mudo sadax maalmood ah Dhuusamareeb uga socday, 42 xirfadle caafimad oo ka kala yimid xarumaha caafimaadka ee degmooyinka Galmudug, kuwaas qaatay aqoon kororsi la xiriira  daweynta, xakamaynta iyo ka hortagga cudurada faafa ayaa maanta lagu qabtay magaalada Dhuusamareeb.

Tababarkaas waxaa si wadajir ah qabtay wasaaradda caafimaadka Galmudug iyo hey’adda caafimaadka aduunka ee WHO waxaana maanta munaasabadii lagu soo xiray ka qayb galay madax ka kala socotay wasaaradda caafimaadka Galmudug iyo hey’adda WHO.

Dr. Maxamed Bishaar Shire Faarax oo ah madaxa dhakhaatiirta Galmudug ayaa ka waramey kaalinta kor u qaadida  aqoonta xirfadlayaasha caafimaadka ee ka howlgala Galmudug ay ka cayaari karaan badbaadada bulshada Soomaaliyeed, isagoo codsaday in la soo kordhiyo oo muhiimad gaar ah la siiyo tababarrada dhakhaatiirta Soomaaliyeed.

Dhankiisa Cabdixakiin Maxamed Diiriye Agaasimaha waaxda qorshaynta iyo siyaasadda ee wasaaradda caafimadka Galmudug oo tababarka si rasmi ah u soo xiray ayaa ka dalbaday shaqaalaha in ay hirgaliyaan culuumta la siiyey oo ku timid baahi muuqatay oo dhanka xarumaha caafimaadka ka timid, taas oo ay muhiim tahay in deg deg looga soo kabto.

Ra’iisul Wasaaraha XFS Maxamed Xuseen Rooble oo safar shaqo ku jooga Magaalada Narobi ee caasimadda dalka Kenya ayaa maanta oo jimco ah waxa uu kulan la qaatay xildhibaanadda Soomaaliyeed ee ku jiro Barlamaanka Dalkaasi Kenya

Ra,isul wasaare Maxamed Xuseen Rooble ayaa kala hadlay sidii loo xoojin lahaa xiriirka labada dalka iyo sidoo kale danaha dadka Soomaaliyeed ee kuwada nool labada dalka.

Xunaha uu la kulmay waxaa ka mid ahaa Xildhibaan Yuusuf Xasan oo madax ka ah xaafada Islii oo ay Soomaali badan degentahay isla markaana ay ganacsiyo waa weyn ku leeyihiin.

Ra’isul wasaaraha xukumadda federaalka Soomaaliya Mudane Maxamed Xuseen Rooble oo booqasho rasmi ah ee uu ka helay Madaxweyne Uhuuro Kenyaata ku jooga dalka Kenya ayaa hore waxa uu kulamo kala duwa kula qaatay madaxda dalkaasi,ganacsatada Soomaaliya iyo sidoo kale jaaliyadda Soomaaliyeed ee ku nool dalkaasi Kenya waxaana uu dhamaan kala hadlay xoojinta xiriirka ay leeyihiin labada iyo iskaashiga dhinacyada ganacsiga iyo amaanka.

Ciidamada xoogga dalka Soomaaliya gaar ahaan ururka 5-aad aa ee Guutada 16 aad iyo Ciidanka Daraawiishta iyo Nabadsugida Jubbaland oo Isgarabsanaya ayaa howlgallo ka dhan ah Al-shabab ka fuliyey Deeganno ka tirsan Gobolka Jubada hoose.

Saraakiisha hoggamineysay howlgalka ayaa sheegay in howlgalka ay ku dileen Shan kamid ah Al-Shabaab, isla markaana ay ku qarxiyeen miinooyin gaaraya lix, kuwaas oo ay wadada ku aaseen Al-Shabaab.

Saraakiisha ayaa intaa ku daray in Ciidamada ay deegaanno badan ka saareen Al-Shabaab, kuwaasi oo kala ah Beerxaano,qoloshimbi, sariiraha, dharkayn urur, yaaqcaleen, yaaq dabayl, iyo kuwa kale.

Deegaannada ay Ciidamada howlgalka kula wareegeen ayaa waxaa ay Dhamaantood ku yaallaan duleedka Magaalada Kismayo, waxaana dhowr jeer lagu weeraray Ciidamada dowladda & kuwa Jubbaland.

Ugu dambeyn Saraakiisha Ciidanka ayaa waxaa ay sheegeen inay Howlgallada sii wadi doonaan ilaa ay Al-Shabaab ka saarayaan degannada iyo Degmooyinka ay weli kaga sugan yihiin Gobolka Jubbada Hoose.

Ciidamada xoogga dalka iyo kuwa Amniga degmada Walaweyn ayaa howlgal wadajir ah ka sameeyeen tuulooyin hoostaga Degmada Walanweyn ee Gobolka Shabeellaha Hoose.

Howlgalkaan oo ay horkacayeen guddoomiyaha gobolka Shabeellaha Hoose Cabduqaadir Maxamed Nuur Siidii, guddoomiyaha Degmada Wanlaweyn ayaa waxaa Ciidamadu ka sameeyeen tuulooyinka u dhow degmada Walanweyn, waxaana howlgalka uu ahaa mid wadooyinka iyo guryaha qaar laga sameeynayay.

Inta lagu gudi jiray howlgalkaasi amni ayaa waxaa la sheegay in lagu soo qabqabtay dhalinyaro aad u tira badan si loo xaqiijiyo xaalada amni ee guud ahaan Degmada Walanweyn ee Gobolka Shabeellaha Hoose.

Guddoomiyaha Gobolka Shabeellaha Hoose Cabduqaadir Maxamed Nuur Siidii ayaa sheegay in ujeedka howlgalka uu yahay in la xaqiijiyo amniga lagana sifeeyo Al-Shabaab lana dardar gelinaayo howlaha hor yaalla  Maamulada Degmooyiinka iyo Deegaanada Gobolka Shabeellaha Hoose.

Madaxweynaha Puntland Mudane Siciid Cabdullaahi Deni, ayaa madaxtooyada ee Garowe ugu sameeyay hab maamus guddiga doorashadda heer Federaal kan dowlad goboledka ee Puntland iyo 11-ka mudane ee Puntland ku metelaya Aqalka Sare ee DFS.

Kulankan waxaa kaloo ka qeybgalay Madaxweyne Ku-xigeenka Dowladda Puntland Mudane Axmed Cilmi Cismaan Karaash, Guddoomiye Ku-xigeenka Koowaad ee Golaha Wakiillada Puntland Mudane Cabdicasiis Cabdullaahi Cismaan, Guddoomiye ku-xigeenka Labaad ee Golaha Wakiillada Puntland Mudane Ismaaciil Maxamed Warsame iyo mas’uuliyiin kale oo ka socday maamulka Pontland.

Kulankaasi oo ku dhacay jawi wanagsan ,waxaa la isku dhaafsaday hadallo la xiriiray mahadnaq iyo dadaalkii loo soo galay ka miro dhalinta hannaanka doorasho ee Aqalka Sare.