Qaahira- Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo booqasho rasmi ah ku jooga dalka Masar ayaa munaasabad si heer sare ah loo soo agaasimay oo ka dhacday Madaxtooyada dalkaas, waxa uu kulan miro dhal ah kula qaatay Madaxweynaha Jamhuuriyadda Masar Mudane Cabdulfataax Al-siisi.

Madaxweynaha ayaa la wadaagay dhiggiisa dalka Masar mudnaanta ay dowladda Soomaaliya siinayso xiriirka taariikhiga ah ee ka dhexeeya Labada dal, isagoo tilmaamay in booqashadan ay sal-dhig u noqonayso dib u xoojinta iskaashiga diblumaasiyadeed, dhaqaale iyo wax wada-qabsi ee ay wadaagaan labada shacab ee walaalaha ah.

Madaxweyne Xasan Sheekh oo uga mahadceliyey dowladda iyo shacabka Masar marti-gelinta kumannaan arday Soomaaliyeed ah oo dalkaas u jooga waxbarasho ayaa sheegay muhiimadda ay dowladda Soomaaliya u leedahay dib u soo celinta doorka dowladda Masar ay ka qaadato horumarinta waxbarashada dalka, dhismaha ciidamada iyo la-dagaallanka argagixisada.

Dhankiisa, Madaxweyne Cabdulfataax Al-siisi oo ugu hambalyeeyey Madaxweyne Xasan Sheekh Maxamuud dib u doorashadiisa ayaa ku bogaadiyey shacabka iyo Dowladda Soomaaliya dadaalka ay ugu jiraan dowlad dhiska iyo xasilinta dalkooda, waxa uuna sheegay in dowladda Masar ay si buuxda u garab taagan tahay xaqiijinta Soomaali heshiis ah, mideysan, xasillooni oo horumar ku tallaabsata.

Sidoo kale, labada Madaxweyne ayaa iska xog-wareystay xaaladda Gobolka iyo caqabadaha jira, iyadoo Madaxweyne Xasan Sheekh Maxamuud uu uga warbixiyey dhiggiisa Dalka Masar qorshehiisa ku saleysan Soomaali heshiis ah, dunidana heshiis lah, iyo in Dowladda Federaalka Soomaaliya ay higsanayso in xiriir wanaagsan oo ka tarjumaya iskaashi iyo wax wada-qabsi ay la yeelato dhammaan dalalka ay la tahay saaxiibka, dariska iyo dan wadaagta.

Ra’iisul Wasaaraha Xukuumadda Federaalka ee Soomaaliya, Mudane Xamse Cabdi Barre , ayaa ku guda jira kulamo iyo wadatashiyo muhiim ah oo uu la yeelanayo qaybaha kala duwan ee ururrada bulshada rayidka Soomaaliyeed.

Raiisul Wasaaraha ayaa qeybaha uu maanta qaabillay waxaa ka mid culamaa’udiinka Soomaaliyeed, oo uu ka dhageystay tallooyinkooda wax ku oolka ah ee ku wajahan xukuumadda.

Ra’iisul Wasaare Xamse ayaa sheegay, si uu u soo dhiso xukuumad tayo leh, isuna dheelli tiran, ay lagama maarmaan noqotay in waqti ku filan uu geliyo la tashiyada uu la sameynayo qeybaha kala duwan ee bulshada iyo siyaasiyiinta.

Kulan loogu mahad celinaayay laguna gudoon siinaayey shahaado sharaf Shirkadda Somprint ayaa lagu qabtay Wasaaradda Warfaafinta Soomaaliya oo ay ka soo qaybgaleen wasiirka warfaafinta, agaasimaha guud, agaasimaha Waaxda Wargaysyada iyo mas’uul kale.

Wasiirka Warfaafinta ayaa guddoonsiiyey shahaado sharaf Shirkadda Somprint waxa uuna ku ammaanay doorka weyn ay ka qaateen hawlaha qaran ee oo uu Wargeyska Dalku u hayo Bulsha weynta Soomaaliyeed.
Sidoo kale Wasiirka Warfaafinta ayaa xusay in Wargeyska Dalku uu yahay Wargeyska ugu weyn ee dalka ka soo baxa goob kastana laga heli karo sida diyaarada, xafiisyada, garoomada iyo goobo badan oo dalka ah, fariinta uu xambarsan yahayna uu yahay mid ka duwan fariimaha ku qoran baraha bulshada ama warbaahinnada kale ka baxada.

Shirkadda Somprit ayaa muddo lix sano ah waxa ay si dhow ula shaqeyneysay Wasaaradda Warfaafinta Dhaqanka iyo dalxiiska gaar ahaan Waaxda Wargeyska Dalka oo ay kala shaqeyneysay daabacadda Wargeyska oo maalinta Isniinta soo baxa.

Ugu danbeyn Wasiirka Wasaaradda Warfaafinta, Dhaqanka iyo Dalxiiska mudane Cusmaan Abokor Dubbe ayaa uga mahad celiyey Shirkadda Somprint sida hagar la’aanta ah ay ula shaqeysay Wasaaradda Warfaafinta sidoo kalena ay qeyb weyn uga qaadato dib u dhiska dalka.

Ciidamada Booliska Soomaaliya ayaa xalay howlgallo amniga lagu xaqiijinayay waxaa ay ka sameeyeen Xaafado katirsan degmada Kaaraan ee Gobolka Banaadir, halkaas oo ay maalmihi ugu dambeysay ay shacbku ka cabanayeen ciyaal weero dhibaata xoogga ku hayay.

Howlgalka inta uu socday ayaa lagu soo qabtay ciyaal weero iyo qalab isugu jira Mindiyo Baankado iyo Agab kale, kuwaas oo dhibaato weyn ay ku qabeen Shacabka degmada Kaaraan

Afhayeenka ciidanka Boliska Soomaaliyed Cabdifitaax Aadan Xasan oo Warbaahinta la hadalay  ayaa sheega in ciidamadu ay gacanta ku soo dhigeen 74-dhalinyaro ciyaal weero ah iyo in kabadan 50-Mindiyo Casri ah oo horay dalka aan loogu arag kuwaasi oo lagu dili jiray dadka,laguna dhici jiray

Afhayeenka aya dhanka kale ugu baaqay Waalidiinta dhalay ciyaal weerada ee dhibka xooggan ku hayo shacabka in ay cishtaan,ciidii howlgalada Booliska lagu soo qabatana Sharciga la’la tiigsan doono oo wax mar marsiya ah aan laga yeeli dooni

Qaahira- Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo booqasho rasmi ah ku jooga Dalka Masar ayaa magaalada Qaahira kulan kula qaatay Madaxweynihii hore ee Soomaaliya Mudane Cabdiqaasim Salaad Xasan.

Madaxweyne Xasan Sheekh ayaa la wadaagay Madaxweyne Cabdiqaasim Salaad, dadaallada ay dowladu ku bixineyso gurmadka abaaraha, xoojinta iskaashiga Soomaaliya ee waddamada Gobolka, horumarinta kaabeyaasha dhaqaalaha, adeegyada bulshada, adkeynta dowladnimada iyo la-dagaallanka argagaxisada.

Madaxweynihii 5-aad ee Jamhuuriyadda Soomaaliya Mudane Cabdiqaasim Salaad Xassan ayaa Madaxweynaha Xasan Sheekh Maxamuud uga mahadceliyay kulankan, isagoo ku ammaanaay hagaajinta xiriirka diblumaasiyadeed iyo iskaashi ee dalkeennu la leeyahay dalalka aanu saaxibka iyo dariska nahay.

Sidoo kale, Madaxweyne Cabdiqaasim ayaa sheegay inuu ku garab siinayo walaalkiis Madaxweyne Xasan Sheekh sidii looga wada shaqeyn lahaa dib u heshiisiinta, loona xaqiijin lahaa Soomaali heshiis la ah dunida, waxa uuna dadka Soomaaliyeed ugu baaqay in ay iscaawiyaan si loo samatabixiyo dadkeenna abaaruhu saameeyeen.

Xildhibaanada Gollaha Shacabka ayaa la isugu yeeray Kulan weyne ay yeelan doonaan barito, sida lagu daabacay bogga rasmiga ah ee Gollaha Shacabka.

Qoraalka ayaa u qornaa sida tan:- Beri oo isniin ah, taariikhdu tahay 25 July waxaa jira kulanweynihii Golaha Shacabka. Ajendaha kulanka Codsi ka yimid Xafiiska R/Wasaaraha XFS.

Goobta _ Xarunta Golaha Shacabka ee Villa Hargeisa