Golaha Wasiiradda XFS ayaa ansaxiyay Hindise-Sharciyeedka Fasaxa Dhismaha Soomaaliya oo uu horgeeyay Wasiirka Wasaaradda Hawlaha Guud, Dib u dhiska & Guriyeynta XFS Xil. Maxamed Adaan Macalin (Soomaali).

Ujeedada Hindise- Sharciyeedka Fasaxa Dhismaha:

Wasaaradda Howlaha Guud iyadoo gudaneysa waajibkeeda shaqo ee kaga aadan xukuumadda federaalka Soomaaliya, waxay ku talaabsatay sidii loo diyaarin lahaa Sharci Fasaxa dhismo loo dhan yahay.

Ujedkeed kiisuna yahay:

(a) Maareynta dhismooyinka si loo ilaaliyo caafimaadka iyo badqabka
dadweynaha.

(b) Dejinta Siyaasad hanaan sharciyeed lagu mideenayo sharciga dhismooyinka
dhismooyinka Jamhuuriyadda Federaalka Soomaaliya.

(c) Dejinta halbeegyo lagu yareynayo khataraha dhismooyinka ka imaan kara, sida liidasho farsamo, agabyada dhisamaha ee aan wanaagsaneyn, dumid dhismo, wax-yeeleyn noolol maalmeedka dadweynaha, fogeynta qashinka, iyo khataraha daadadka iyo nabaad guurka carrada.

(d) Dejinta hanaanka bixinta fasaxa dhismaha oo ay ku jiraan adeegsiga qaabab casri ah, sida e-permit.

(e) Dhiiragalinta maalgashiga gudaha iyo midka shisheeye ee dhismooyinka kaasoo u hoggaansan shuruucda, xeer nidaamiyaasha iyo halbeegyada quseeya arrimaha qorsheynta, ka faaiideysiga dhulka iyo deegaanka.

(f) Hirgelinta nidaam mideysan oo lagu maareynayo dhismooyinka dalka iyo bixinta ruqsadaha fasaxa dhismaha.

(g) Horumarinta dhismooyin wax tar u leh dadka iyo deegaanka.

(h) Ilaalinta iyo tixgalinta dadka baahyaha gaar ah qaba ee habka dhismaha.

(i) La qabsiga isbedela cimilada aduunka qaababka dhismooyinka.

(j) Ilaalinta dhismooyinka taariikhiga ah.

Faa’idada Hindise – sharciyeedka Fasaxa Dhismaha:

(1) Siyaasadaan waxay wax weyn ka badalaysaa baahida habraaca iyo fasaxa dhismo ee dalka ka jira, waxay tayeynaysaa adeegyada bulsho mid dhaqaale iyo waxqabadka xukuumada heerar keeda iyo laamaheeda kala duwan ee u kala baxan:
a. Heer Federaal,
b. Heer Dowlad Goboleed
c. Heer Dowlad Hoose

(2) Hindisahaan sharci waxa uu nidaaminayaa habraacyada iyo fasaxa dhismo ee farsamo ahaan loo baahan yahay iyo heerka darajo maamul ee uu dalka u bahaan yahay.

Guddoomiyaha Gobolka  ahna Duqa Magaalada Muqdisho Mudane Cumar Maxamuud Maxamed (Cumar Filish) ayaa shir guddoomiyay shirka Guddoomiyasha Degmooyinka Gobolka Banaadir oo galabta lagu qabtay xarunta Aqalka Dowladda Hoose ee Xamar.

Kulankaan ayaa waxaa looga hadlay dar-dargalinta Amniga Caasimadda Nadaafadda iyo hormarinta adegyada loo qabto shacabka.

Wasaaradda Haweenka iyo Horumarinta Xuquuqda Aadanaha Soomaaliya ayaa Magaalada Muqdisho ka wadda ololaha wacyigelinta Cudurka COVID-19.

Waddooyinka Magaalada ayaa la surey boorar waa weyn oo ka turjamaya ololaha Wacyi galinta, dadweynaha ayaa lagu boorinayaa in ay raacaan tilmaamaha bahda Caafimaadka si loo xakameeyo Feyraska.

Ololaha oo ay iska kaashadeen wasaaradda haweenka iyo hey’adda UNICEF Soomaaliya ayaa sidoo kale waxaa dadweynaha lagu dhiirigelinayaa qaadashada tallaalka Safmarka coronavirus.

Wasiirka Amniga Galmudug Mudane Axmed Maxamed Fiqi ayaa maanta Magaalada Muqdisho kula kulmay Taliyaha ciidamada Nabad illaalinta AMISOM Lieutenant General Diomede Ndegeya iyo ku xigeenkiisa Maj. Generaal. William K Shume.

Wasiirka Amniga iyo taliska ciidamada AMISOM ayaa kulankooda iskula soo qaaday arrimo ku saabsan Amniga Galmudug iyo iskaashiga suurtagalka ah ee la xariirta la dagaalanka Argagixisada Shabaab, Amniga doorashooyinka iyo qodobo kale.

Wasiir ku-xigeenka Shaqada iyo Arrimaha Bulshada ee Xukuumadda Federaalka Soomaaliya , Marwo Sahra Xaaji Xuseen ayaa boggaadisay dadaallada Horumarinta adeegyada Bulshada , xilli ay maanta Wasaaradda caafimaadka kala wareegtay gaadiid gurmadka deg degga ah oo loogu talagalay degmada Dhoobley ee gobolka Jubbada Hoose.

Gaadiidkan oo qeyb ka ah mashruuca Midowga Yurub iyo IGAD ee ka jawaabidda COVID-19 iyo saameynta uu ku yeeshay Caafimaadka iyo Dhaqaalaha , ayaa sidoo kale waxaa la gaarsiin doonaa deegaannada kale ee ku yaal xadduuda Dalka.

Marwo Sahro Xaaji Xuseen oo bogaadisay dadaallada lagu horumarinayo adeegyada caafimaadka ayaa ku baaqday in la joogteeyo Wacyigelinta bulshada ee dhanka Caafimaadka iyo sidii looga hortegi lahaa cudurka COVID-19.

Ra’iisul Wasaaraha Xukuumadda Federaalka Soomaaliya Maxamed Xuseen Rooble ayaa kormeeray xarunta Wasaaradda Maaliyadda iyo Bangiga Dhexe ee Soomaaliya, isaga oo u kuurgalay howlaha shaqo ee ka socda labadan hey’adood ee muhiimka u ah Nidaamka Maaliyadda dalka.

Ra’iisul Wasaaraha ayaa warbixin ka dhageystay Wasiirka Maaliyadda, Guddoomiyaha Bangiga Dhexe, Xisaabiyaha Guud kuwaas oo faahfaahin ka siiyay nidaamka Maamulka Maaliyadda dalka.