Ra’iisul Wasaaraha Xukuumadda Jamhuuriyadda Federaalka ee Soomaaliya Mudane Hamza Abdi Barre ayaa xalay  waxa uu kulan doceed kula yeeshay magaalada Tunis ee uu ka socdo shirka caalamiga ee #TICAD8 – Wasiirka Arrimaha Dibedde ee Japan Yoshimasa Hayashi.

Labada masuul waxay ka wada hadleen xoojinta xiriirka taariikhiga ah, iskaashiga iyo wax wadaqabsiga u dhaxeeya labada dal ee Soomaaliya iyo Japan.

Ra’iisul Wasaare Xamse ayaa uga mahadceliyay dowladda Japan taageerada dhinacyada kala duwan leh ee ay siiso Soomaaliya.

Wasiir Hayashi ayaa sheegay in dowladdiisu ay diyaar u tahay xoojinta xiriirka ganacsi, amni iyo siyaasadeed – isagoo intaa raaciyay inay gacan ka geysan doonaan barnaamijyada horumarineed ee wax loogu qabanayo shacabka.

Ciidanka Xoogga Dalka, gaar ahaan Ururada 83-aad iyo 84-aad ee guutada 14-October ayaa howlgalo culus Argagixisada Shabaab uga saaray tuulooyinka Cabananey, Beeraha baay, Siigaale, Malable iyo Buulo aruundi oo dhamaantood hoostaga deegaanka Janaale ee Gobolka Shabeelaha Hoose.

    

Madaxda Wasaaradda oo uu ugu horeeyo Wasiirka Wasaaradda Arrimaha Gudaha, Federaalka iyo Dib-u-heshiisiinta XFS Mudane Axmed Macalin Fiqi, Wasiiru dowlaha Wasaaradda Mud.Ilyaas Cali Xasan iyo Agaasimaha guud ee Wasaaradda ayaa waxaa ay maanta kulan la qaatay wafdi ay Hogaamineysay Madaxa qaybta Soomaaliya ee Hay’adda Berghof Foundation Mss.Janel B.Galvanek.

Wasiirka Wasaaradda ayaa bogaadiyay Kaalinta ay hay’adda berghof ka qaadatay Arrimaha Xalinta khilaafaadka iyo Dib-u-heshisiinta Balan qaadayna in ay si dhow ula shaqayaan Hay’adda Berghof Foundation ee Soomaaliya.

    

Wasiir Gaadiidka iyo Duulista Hawada Soomaaliya , Xil. Fardowsa Cismaan Cigaal ayaa guddoomisay shirka amniga ee garoonka diyaaradaha ee Aadan Cadde, iyadoo warbixin ka dhageysatay Saraakiisha Amniga Dawladda iyo kuwa Midowga Afrika ee ATMIS.

Kulanka ayaa sidoo kale waxaa qayb ka ahaa Taliyaha Ciidanka Booliska Soomaaliyeed, Gen Cabdi Xasan Maxamed Xijaar, Wasiiru Dawlaha Wasaaradda Maxamed Cali Cumar , Wasiir ku-xigeenka, Sulub Axmed Firin , Maareeyaha Hay’adda Duulista Rayidka ah, Maareeyaha Garoonka Aadan Cadde iyo agaasimaha hay’adda socdaalka iyo jinsiyada.

     

Ra’iisul Wasaaraha Xukuumadda Federaalka Soomaaliya, Mudane Hamza Abdi Barre, ayaa kulan gaar ah kula yeeshay madasha shirka Tunis Ra’iisul Wasaaraha Jamhuuriyadda Jabuuti Mudane, Abdoulkader Kamil Mohamed.

Waxay ka wada hadleen xoojinta xiriirka walaaltinimo ee soo jireenka ah, isagoo uga mahadceliyey dowladda iyo shacabka Jabuuti taageerada ay la garab taagan yihiin bulshada Soomaaliyeed.

  

Guddoomiyaha Golaha Shacabka BJFS, mudane Sheekh Aadan Madoobe iyo labadiisa ku-xigeen ayaa maanta kulankii ugu horeeyey la qaatay Guddiga joogtada ah ee Golaha Shacabka, kulanka ayaa waxaa warbixin looga dhageystay Habdhowraha Golaha Shacabka iyo howlwadeennadda Guddiyada iyagoo mid mid u sharaxay shaqada baaxada leh ay u hayaan Golaha Shacabka BJFS.

Kulanka ayaa sidoo kale looga hadlay sidii loo dardargelin lahaa shaqada Guddiga joogtada ah, Guddiyada Golaha Shacabka iyo diyaarinta shuruucda Golaha ee kalfadhiga labaad.

                  

Wasiirka Maaliyadda Xukuumadda Soomaaliya Dr Elmi Maxamuud Nuur ayaa xafiiskiisa ku qaabilay madaxda Guddiga Maamul-Wanaaga Maaliyadda ee (FGC).

Wasiirka iyo madaxda guddiga maamul-wanaaga maaliyadda ee (FGC) ayaa yeeshay wada-hadal mira dhal ah oo ku saabsan dadaalada Dowladda ee dib-u-habeynta iyo isbadalka Maaliyadda.

Sidoo kale, Wasiirka ayaa tilmaamay in wasaaradda Maaliyadda ay ka go’an tahay hagaajinta maamulka wanaagsan, iyada oo loo marayo hannaanka (PFM) maamulka maaliyadda dadweynaha.

Ra’iisul Wasaaraha Xukuumadda Jamhuuriyadda Federaalka ee Soomaaliya, Mudane Xamsa Cabdi Barre, ayaa waxa saaka madasha shirka caalamiga ee TICAD8 ku soo dhoweeyay madaxweynaha Tunisia, Mudane Qays Saciid, oo martigelinaya shirka oo si rasmi ah maanta uga furmay caasimadda Tunis.

Shirkan oo muddo labo maalmood socon doona ayaa lagu wadaa inuu khudbad ka jeediyo Ra’iisal wasaaraha Soomaaliya Mudanr Xamsa Cabdi Barre.

Wafdiga ra’iisul wasaaraha ee ka qaybgalaya shirka waxaa ka mid ah wasiirka wasaaradda Qorsheynta, Maalgashiga & Horumarinta dhaqaalaha, Mudane Maxamuud Cabdiraxmaan Sheekh Beene Beene, Wasiiru-Dowlaha Wasaaradda Arrimaha Dibadda & Iskaashiga Caalamiga, Mudane Cali Maxamed Cumar, La Taliyaha Ra’iisul Wasaaraha ee Xiriirka Caalamiga, Dr Hodan Osman, Ku Xigeenka Xoghayaha Joogtada ee Xafiiska Ra’iisul Wasaaraha Fadumo Cabdi Cali, iyo Afhayeenka Xukuumadda, ahna Agaasimaha Warfaafinta iyo Xiriirka Bulshada, Farxaan Jimcaale.

– Madaxweynaha maamul Koonfur Galbeed Mudane Cabdicasiis Xasan Maxamed Laftagareen ayaa Qaabilay Wafdi ka socday Hay’adda Boqor Salmaan oo uu hogaaminayey Yuusuf Bakiit Raxma oo ah Madaxa Bariga Africa ee Hay’adda Boqor Salmaan oo Maanta Baydhabo gaaray.

Madaxweyne Laftagareen ayaa wafdiga kala hadlay arrimaha saamaynta abaaraha iyo sidii gargaar loo gaarsiin lahaa Bulshada Saamaysay abaaraha ee ku nool guud ahaan deeganada Koonfur Galbeed.

Kulanka waxaa madaxweynaha Koonfur Galbeed ku wehelinayay wasiiro,agaasimaha madaxtooyada,gudoomiyaha degmada iyo mas’uuliyiin kale.