Muqdisho(Wargeyska Dalka):-Wasaaradda Hawlaha Guud iyo Guryeynta ee Dowladda Federaalka Soomaaliya ayaa Kulan muhiim ah ku qabatay Safaaradda Soomaaliya ee Kenya, iyadoo la yeelatay Hay’adaha UN-Habitat iyo ADHI Africa Holding Ltd. Kulanka waxaa hoggaaminayay Wasiiru-Dowlaha Wasaaradda, Siciid Maxamed Maxamuud (Xayd) iyo Danjiraha Soomaaliya ee Kenya, Jabriil Ibraahim Cabdulle.

Shirka ayaa diiradda lagu saaray xoojinta iskaashiga iyo horumarinta xalka Guryo waara oo adkaysi leh, isla markaana dabooli kara baahiyaha Barakacayaasha gudaha, Qoysaska dakhligoodu hooseeyo, iyo Bulshooyinka nugul.

Sidoo kale, Soomaaliya waxay sii waddaa dadaallada lagu dardargelinayo horumarinta Magaalooyinka iyo Miyiga, kor u qaadidda Kaabayaasha Dhaqaalaha, iyo hirgelinta qorsheyn loo dhan yahay si loo hubiyo helitaanka guryo ammaan ah oo la awoodi karo.

Kulankan wuxuu muujinayaa muhiimadda iskaashi mideysan oo u dhexeeya Dowladda, Hay’adaha Caalamiga ah, iyo Ganacsatada, si loo gaaro xal waara oo wax ku ool ah oo wax ka taraya baahiyaha Guriyeynta ee Bulshada.

Muqdisho,(Wargeyska Dalka);- Hay’adda Isgaarsiinta Qaranka (HIQ) ayaa qabatay kulan wadatashi Qaran ah si loo horumariyo Qaab-dhismeedka Maareynta Khataraha iyo Habraaca U-hoggaansanaanta Amniga Saaybarka, kaas oo ay kasoo qeyb galeen wakiilo ka socda Hay’adaha Dowladda, Bahda Waxbarashada, Shirkadaha gaarka loo leeyahay, Bulshada Rayidka iyo khubaro farsamo.

Kulankan ayaa ujeeddadiisu ahayd in la helo talooyin iyo aragtiyo lagu horumarinayo hannaan dhammaystiran oo xoojiya amniga Saaybarka Dalka, ilaaliya kaabeyaasha dhijitaalka ah ee muhiimka ah, isla markaana xaqiijiya maareynta khataraha iyo u-hoggaansanaan wax ku ool ah oo ka dhex jirta dhammaan qaybaha.

Isagoo ka hadlay kulanka, Maareeyaha Guud ee Hay’adda Isgaarsiinta Qaranka, Mudane Mustafa Yaasin Sheekh, ayaa ka hadlay muhiimadda in si qoto dheer loo eego Dukumentiyada: “Waxaan ku dhiirrigelinaynaa dhammaan daneeyayaasha inay waqti geliyaan, si taxaddar leh u eegaan Dukumentiyadan, si qoto dheer u falanqeeyaan, una soo gudbiyaan aragtiyo dhammaystiran oo ku saabsan qodob kasta.”

Wasiiru Dowlaha Wasaaradda Isgaarsiinta iyo Teknoolojiyadda, Mudane Xildhibaan Axmed Diiriye, oo si rasmi ah u furay kulanka, ayaa muujiyay muhiimadda sii kordheysa ee Amniga saaybarka xilli ay Teknoolojiyaddu si weyn u saameyneyso Nolosha:
“Adeegsiga Teknoolojiyadda waa mid si joogto ah u kobcaya, wuxuuna saameyn ku leeyahay dhinacyo badan oo Nolosha ah sida Waxbarashada iyo Ganacsiga. Haddii aan laga gaashaaman, horumarradu waxay keeni karaan khataro. Sidaa darteed, dejinta hannaanka maareynta khataraha iyo habraaca u-hoggaansanaanta Amniga saaybarka waa mid muhiim ah. Hay’adda Isgaarsiinta Qaranka ayaa loo xilsaaray inay hoggaamiso dadaalkan iyada oo matalaysa Dowladda.”

Kulanka ayaa muujiyay muhiimadda ay leedahay in la xoojiyo iskaashiga Hay’adaha si loo wajaho khataraha sii kordhaya ee saaybarka loona dhiso nidaam Dhijitaal ah oo adkaysi leh. Ka qaybgalayaashu waxay ka doodeen aqoonsiga khataraha, habraacyada u-hoggaansanaanta, iyo doorka Hay’adaha kala duwan.

Kulanka ayaa muujiyay doorka muhiimka ah ee dadaallada isku-dubaridka ah ee wax looga qabanayo qataraha Amniga saaybarka ee soo kordhaya iyo dhisidda nidaam dhijiitaal ah oo adkeysi leh. Ka qaybgalayaashu waxay ka doodeen aqoonsiga khataraha, habraacyada u-hoggaansanaanta, iyo kaalinta Hay’adaha kala duwan.

Natiijooyinka ka soo baxa kulankan wadatashiga ah ayaa gacan ka geysan doona dhammeystirka hannaanka Maareynta Khataraha iyo Habraaca U-hoggaansanaanta Amniga Saaybarka, kaas oo door muhiim ah ka qaadan doona xoojinta Amniga Dhijitaalka ah ee Dalka.

Muqdisho(Wargeyska Dalka):-Guddoomiyaha Aqalka Sare ee Baarlamaanka Federaalka Soomaaliya, Senator Cabdi Xaashi Cabdullaahi, oo ka qeyb galay Munaasabadda Caleema-saarka Ugaas Cabdirisaaq Ugaas Cabdullahi (Faracadde), ayaa si qoto dheer uga hadlay doorka Dhaqanka ee Dowladnimada iyo Bulshada.

Guddoomiyuhu wuxuu tilmaamay in munaasabaddan ay tahay mid ka duwan kuwii hore, islamarkaana muujineysa heerka ay gaarsiisan tahay Midnimada iyo Wadajirka Bulshada Soomaaliyeed.

Wuxuu xusay in isu imaatinka Madaxda, Culimada, iyo Duubabka Dhaqanka ay caddeyn u tahay sida Dhaqanku u yahay tiir mideeya Bulshada, kana qeyb qaata xasilinta iyo Horumarka Dalka.

Sidoo kale, Cabdi Xaashi Cabdullaahi ayaa carrabka ku adkeeyay in Dowladnimada casriga ah aysan ka maarmin kaalinta hoggaanka Dhaqanka, maadaama ay door weyn ku leeyihiin xalinta Khilaafaadka, Nabadaynta, iyo ilaalinta Wadajirka Bulshada.

Ugu dambeyn, wuxuu Hambalyo u diray Ugaas Cabdirisaaq, isaga oo Alle uga baryay inuu ku guuleeyo xilka loo doortay, islamarkaana uu noqdo hoggaan mideeya Bulshada, kana shaqeeya Nabad iyo horumar waara.