Wasiirka Tamarta iyo Kheyraadka Biyaha XFS,Mudane Cabdullaahi Bidhaan Warsame ayaa maanta kormeeray goobta laga qodayo ceel biyood loogu talagalay xarunta Wasaaradda.

Intii uu kormeerka ku guda jiray, Wasiirka ayaa ka xog-wareystay injineerada hawlaha la xiriira farsamada iyo hamsami u socodka ceelka.

Ceelkan cusub waxa uu qayb ka noqon doonaa dadaallada Wasaaradda ee lagu xaqiijinayo helitaanka biyo joogto ah oo ay Wasaaraddu u madax-bannaan tahay, isla markaana lagu dhimayo kharashka ku baxa Biyaha.

Wasiirka waxa uu sidoo kale kormeeray nidaamka laga dhaliyo tamarta ee cadceedda ku shaqeeya, (solar power system) ee dhowaan lagu rakibay xarunta Wasaaradda, kaas oo bixinaya koronto nadiif ah, joogto ah isla markaana hoos u dhigeysa ku tiirsanaanta ilaha kale ee korontada.

Mashruucyadan waxa ay ka tarjumayaan dadaallada Wasaaradda ee ku wajahan isku-filnaansho, hufnaan iyo xalalka waara, iyagoo sidoo kale qayb ka ah u diyaar-garowga xarig-jarka rasmiga ah ee xarunta Wasaaradda oo la qorsheeyay in la qabto bisha Ramadaan kaddib.

Wasiirka Wasaaradda Qoyska iyo Hormarinta Xuquuqul Insaanka XFS Khadija Mohamed Al-Makhzoumi ayaa si rasmi ah magaalada Mogadishu uga furtay Bandhigga Ganacsiga Haweenka Soomaaliyeed, kaas oo qeyb ka ah xuska 8-da Maarso iyo Todobaadka Haweenka Soomaaliyeed.

Wasiirka ayaa ka warbixisay ahmiyadda haweenka iyo kaalinta ay ka qaataan horumarka dalka,iyadoo sheegtay in bandhiggan uusan ku koobnayn ganacsiga oo kaliya, balse sidoo kale haweenka lagu siin doono baaritaanno iyo daaweyn caafimaad oo lacag la’aan ah, si loo garab istaago haweenka danyarta ah.

Guddoomiyaha Ururka Haweenka Ganacsatada Soomaaliyeed Xersiyo Abdulle Siyad iyo Duniyo Mohamed Ali oo matalayay ururrada haweenka ayaa uga mahadceliyay Wasaaradda hindisahaan lagu taageerayo haweenka ganacsatada iyo kuwa danyarta ah.

Bandhiggaasi waxaa kaloo ka hadlay Agaasimaha Guud ee Wasaaradda Mohamed Bashir Omar iyo Xoghayaha Guud ee Maamulka Gobolka Banaadir Bilan Bile Mahmoud,

Soomaaliya sanad kasta waxay xustaa Todobaadka Haweenka Soomaaliyeed iyo Maalinta Caalamiga ah ee Haweenka (8-da Maarso), iyadoo sanadkan diiradda la saaray abuurista fursado dhaqaale iyo taageero caafimaad oo loo fidinayo haweenka.

Degmada Cabdi Casiis  oo ka tirsan Gobolka Banaadir ayaa u gudubtay wareegga 3-aad ee tartan cilimyeedka bisha ramadaan, kaddib, markii 14 dhibcood ay kaga adkaatay Degmada Xudur oo iyaduna heshay 6 dhibcood.

Waa sanadkii lix iyo tobnaad ee warbaahinta qaranka ay qabaneyso tartan cilmiyeedka bisha Ramadaan,kaas oo sanadkaan ay si wadajir ah u taaba-gelinayaan maamulada Bangiga IBS iyo kan Gobolka Banaadir.

Tartankaan waxaa habeen kasta laga sii daayo Warbaahinta Qaranka Soomaaliyeed, iyadoo si toos ah looga daawadaa Telefishinka Qaranka iyo sidoo kale Radio Muqdisho oo laga baahiyo.

Sanad kasta barnaamijka tartan cilmiyeedka bisha ramadaan waxaa ka qeybgala 32 degmo oo kamid ah gobolada dalka Soomaaliya,waxaana degmadii ku guuleysata tartankaasi lagu abaalmariyaa koobab,lacago iyo abaalmarinno kale sida shahaadooyin muujinaya kaalinta aqoon ee ay gaareen dhallinyarada jiilasha cusub ee soo koroya.

Isku soo bax lagu taageerayo dhammeystirka iyo ansixinta Dastuurka Dalka ayaa caawa lagu qabtay magaalada Muqdisho ee caasimadda Soomaaliya.

Dadweyne aad u fara badan ayaa isugu soo baxay isgoyska Taleex ee degmada Hodan, halkaas oo ay shacabka ku muujinayeen dareenkooda ku aaddan sida ay ugu faraxsan yihiin ansixinta Dastuurka.

Qaar ka mid ah shacabka ka soo qeyb galay isku soo baxa ayaa ku ammaanay Dowladda Federaalka sida geesinimada leh ay uga dhabeysay go’aankeedii ahaa dhammeystirka iyo ansixinta Dastuurka.

Guddoomiyaha Dhallinyarada Gobolka Banaadir Cumar Faaruuq ayaa yiri”Madaxweyne Xasan Sheekh waxaa uu jabiyay darbi aan cidna maleysaneyn in la jabinayo dastuurkii muddo soo jiitamayayna waa dhameystiray.”

Sidoo kale, Maxamed Ismaaciil Yuusuf ayaa dhankiisa sheegay inuusan fileyn in isaga oo nool Dastuurka oo muddadaas soo jiidamayay la ansixinayo.

“Isma dhaheyn maanta adigoo nool ayaa dastuurkii mudadaas soo jiitamayay la ansixinayaa balse Madaxweyne Xasan Sheekh ayaa ku dhiiraday.”

Arusha:- Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud ayaa kaga qayb galay, magaalada Arusha ee dalka Tanzania, Meertada 25-aad ee Shir Madaxeedka caadiga ah ee Madaxda Ururka Bulshada Bariga Afrika, halkaas oo Madaxda dalalka xubnaha ka ah ay kaga wada hadleen xoojinta iskaashiga gobolka iyo dardargelinta isdhexgalka dhaqaale.

Madaxweynaha Jamhuuriyadda ayaa Madasha kusoo bandhigay guulaha muuqda ee Soomaaliya ka xaqiijisay dhinacyada amniga, dimuquraadiyadda, dowlad-wanaagga iyo dhammeystirka Dastuurka dalka, isaga oo muujiyay sida Soomaaliya ay ka go’an tahay xoojinta iskaashiga gobolka iyo dardargelinta isdhexgalka dhaqaale ee dalalka Bariga Afrika.

Intii uu Shirku socday, waxaa madasha kulanka lagu dhaariyay, Garsoore Cabdiwaaxid Warsame Cabdullaahi oo ka mid noqday Garsoorka Maxkamadda Caddaaladda Ururka Bulshada Afrika, kaasi oo fagaaraha Caddaalladda Ururka ku matalidoono Soomaaliya.

Shir Madaxeedka Urur EAC ee sanadkan ayaa diiradda lagu saaray Xoojinta Isdhexgalka Gobolka iyo fududeynayo Ganacsiga Xuduudaha ka Gudba, waxaana hoggaaminta sanadlaha ah ee shir guddoonka Ururka Bulshada Bariga Afrika la wareegay, Madaxweynaha Jamhuuriyadda Uganda Mudane Yoweri Museveni oo xilka kala wareegay Madaxweynaha Jamhuuriyadda Kenya Mudane William Samoei Ruto.

Taliyaha Ciidanka Xoogga Dalka Soomaaliyeed S/Guuto Ibraahin Maxamed Maxamuud oo ay wehliyaan Guddoomiyaha gobolka Banaadir Xasan Maxamed Xuseen Muungaab Iyo Xildhibaan Cismaan Xaadoole ayaa booqasho dhiiragalin ah ugu tagay geesiyaasha Kumaandooska Gorgor ee ku sugan degaanka Jabad Godone ee gobolla Shabeellaha Dhexe.

Ciidanka Gorgor ayaa maalmahii lasoo dhaafay jabweyn gaarsiiyey Khawaarijta, kuwaas oo laga saaray deegaanno ay ku dhuumaaleysanayeen.

Wasiirka Arrimaha Dibadda iyo Iskaashiga Caalamiga ah ee XFS Mudane Cabdisalaam Cabdi Cali ayaa maanta booqasho shaqo ku gaaray Degmada Diinsoor ee gobolka Baay.

Wasiirka, ayaa degmada gaarsiiyay deeq isugu jirta dawooyin caafimaad, gaari ambalaas ah iyo raashiin noocyo kala duwan leh oo loo qaybiyey 500 qoys oo ka mid ah bulshada degmada gaar ahaan kuwa danyarta ah.

Dhanka kale Wasiirka ayaa si rasmi ah u daahfuray mashruuca dhismaha terminalka cusub ee garoonka diyaaradaha Diinsoor, kaas oo kor u qaadi doona isku socodka, adeegyada safarka iyo horumarinta dhaqaalaha deegaanka.

Tallaabadan ayaa qeyb ka ah dadaallada Wasiir Cabdisalaan uu ku doonayo inuu ku xoojiyo adeegyada bulshada ee Degmada Diinsoor ee gobolka Baay.