Muqdisho,(Wargeyska Dalka):- Ciidanka Qalabka Sida ee Soomaaliya oo ku guda jira hawlgallada ka dhanka ah kooxaha Khawaarijta ayaa Maanta oo ay taariikhdu tahay 29-03-2026, waxa ay cagta mariyeen jidgooyooyin u yaalay Maleeshiyaad ka tirsan Khawaarijta Al Shabaab, Nawaaxiga Deegaanka Daynuuneey ee Gobalka Bay.

Waxaa hawlgalkaasi lagu dilay in ka badan 20 Xubnood oo ka mid ah Khawaarijta, iyadoo sidoo kale lagu guulaystay in la burburiyo Isbaarooyinkii u yiilay halkaas.

Hawlgalkaan waxa uu qayb ka yahay hawlgalo sifayn ah oo ka socda Gobollada Shabeellaha Hoose, Shabeellaha Dhexe iyo Bay.

DFS waxay nasiib darro weyn u aragtaa in Shakhsiyaad ku tumanaya Dastuurka iyo Sharciga Dalka u degsan oo ku sugan Baydhabo ay faafiyaan Warar been abuur ah oo ay ku difaacayaan Khawaarijta kuna been abuuranayaan Ciidamada Qaranka iyo Saaxiibada Caalamka ee ka taageera dagaalka looga soo horjeedo Khawaarijta.

Hadalada iyo dacaayadaha raqiiska ah ee Shakhsiyaadkaasi waa kuwo aan sal iyo raad lahayn, oo la doonayo in lagu marin habaabiyo Shacabka Soomaaliyeed ee u heelan taageerada Dowladnimada iyo Dagaalka lagu ciribtirayo Argagixisada.

Dawladda Soomaaliya waxay u Mahadcelinaysaa dhammaan Saaxiibada Caalamka, Gacanta Walaalnimo ee ay siiyaan Ciidamada Qaranka ee ku aaddan ciribtirka kooxaha Khawaarijta ah.

DFS Waxaa Sidoo kale ka go’an inay sii waddo Hawlgallada lagu baacsanayo haraadiga Khawaarijta si Shacabka Soomaaliyeed loogu abuuro Fursado ay ku gaaraan Horumar iyo Barwaaqo, iyagoo haysta Nabad buuxda.

Muqdisho(Wargeyska Dalka):-Ra’iisul Wasaare Ku-Xigeenka Xukuumadda Federaalka Soomaaliya, Mudane Saalax Axmed Jaamac, ayaa guddoomiyey Madasha Bani’aadanimada Soomaaliya oo ay soo qaban-qaabisay Hay’adda Maareynta Masiibooyinka (SoDMA).

Intii uu kulanku socday, waxaa lagu soo bandhigay warbixin la xiriirta Xaaladaha Abaaraha ee saameeyey dalka, iyada oo ay madasha Goobjoog ka ahaayeen Masuuliyiin Sare oo ka socday Hay’adaha Gargaarka ee Qaramada Midoobay.

Mudane Saalax Axmed Jaamac ayaa sheegay in Xukuumadda DanQaran ay waqti badan gelisay wax ka qabashada Abaaraha, isla markaana la sameeyay dadaallo badan oo qaarkood guuleysteen.

Ra’iisul Wasaare Ku-Xigeenka Dalka, ayaa sheegay in Xukuumaddu sii dardargelin doonto ka hortagga Abaaraha soo noqnoqda ee Dalka, isla markaana ay jiraan qorshayaal ay Dowladdu waddo.

Muqdisho(Wargeyska Dalka):-Wasiiru-Dowlaha Wasaaradda Caddaaladda Soomaaliya, ahna Ku-Simaha Wasiirka, Mudane Ilyaas Sheekh Cumar, ayaa Maanta Xilka u kala wareejiyay Taliyihii hore ee Ciidanka Asluubta iyo Taliyaha Cusub S/gaas Maxamed Sheekh Xasan (Xaamud).

Taliyaha Cusub ee Ciidanka Asluubta Soomaaliyeed, S/gaas Maxamed Sheekh Xasan (Xaamud), ayaa si rasmi ah xilka ula wareegay, kaddib Munaasabad Xil-Wareejin ah oo ka dhacday Xarunta Taliska Ciidanka Asluubta, gaar ahaan Xabsiga Dhexe ee magaalada Mogadishu.

Xilka waxaa ku wareejiyay Taliye Ku-Xigeenka Ciidanka Asluubta, General Cilmi Waasuge Colow, oo wakiil ka ahaa Taliyihii hore ee Ciidanka Asluubta.

Munaasabadda xil-wareejinta waxaa ka qeyb galay Saraakiil ka tirsan Ciidamada Qalabka sida, Xildhibaanno, Xubno ka tirsan Golaha Wasiirrada, iyo Marti Sharaf kale.

Mas’uuliyiintii Goobta ka hadlay ayaa soo dhoweeyay Taliyaha cusub, iyagoo uga mahadceliyay Taliyihii hore shaqadii uu soo qabtay intii uu xilka hayay.

S/gaas Maxamed Sheekh Xasan (Xaamud) ayaa khudbad uu jeediyay ku sheegay in Ciidanka Asluubta Soomaaliyeed ay u baahan yihiin dib-u-habeyn iyo horumar guud si ay u gutaan waajibaadkooda Qaran.

Muqdisho(Wargeyska Dalka);- Maareeyaha Guud ee Hay’adda Isgaarsiinta Qaranka, Mudane Mustafa Yaasiin Sheekh, ayaa daahfuray Barnaamij Tababar ah oo loogu talagalay Shaqaalaha Dowladda si ay u helaan aqoonta, iyo Shahaadooyin Caalami ah oo ku saabsan Amniga Saaybarka.

Barnaamijku wuxuu diiradda saarayaa diyaarinta khubarada ICT-da ee Hay’adaha Dowladda si ay u helaan Shahaadooyin Caalami ah, taasoo kor u qaadaysa awooddooda ku aaddan ilaalinta xogta Qaranka iyo ka hortagga khataraha sii kordhaya, weerarrada iyo Burcada Internet-ka.

Maareeyaha Guud oo ka hadlay daahfurka “Tababarkan waxa uu qayb ka yahay dadaallada Hay’adda Isgaarsiinta Qaranka ee lagu xoojinayo ilaalinta kaabayaasha Dhijitaalka ah ee Dalka, sugidda Amniga Xogta, iyo ka hortagga khataraha sii kordhaya, weerarrada iyo Burcada Internet-ka. Sidoo kale, Barnaamijku wuxuu Gacan ka geysan doonaa dhisidda awoodda Shaqaalaha Dowladda si ay u ilaaliyaan nidaamyada iyo adeegyada Dhijitaalka ah ee Qaranka.”

Maareeyaha Guud ayaa sidoo kale la dardaarmay ka-Qaybgalayaasha, isagoo ku boorriyay inay si buuxda uga faa’iidaystaan fursaddan, isla markaana u adeegsadaan aqoonta ay helaan ee horumarinta Amniga Dhijitaalka ah.

Tababarradani Amniga Saaybarka waxa ay ka kooban yihiin Koorsooyin iyo Shahaadooyin Caalami ah, oo ay ka mid yihiin:

* CompTIA Security+
* Certified Incident Handler – EC Council
* Cloud Security Essentials – GIAC
* ISMS (ISO/IEC 27001:2022) Lead Auditor
* Certified Information Security Manager (CISM) ISACA
* Certified Information Systems Security Professional (CISSP) – ISC2

Tababarrada waxaa lagu qaban doonaa Muqdisho, qaab fogaan-arag (online), iyo Nayroobi, muddada u dhaxaysa 28 Maarso ilaa 8 May 2026.

Hay’adda Isgaarsiinta Qaranka ayaa hore ugu wargelisay Hay’adaha Dowladda inay soo magacaabaan Shaqaale heysta ugu yaraan Shahaadada koowaad ee Jaamacadda (Bachelor’s Degree) ee Culuumta Kombuyuurtarka, IT-da, iyo Engineering-ka ama wax u dhigma.

Sidoo kale Musharraxiinta ka qeybgalaya waa inay leeyihiin ugu yaraan khibrad laba (2) Sano ah ama ka shaqeeyaan Maamulka Nidaamyada (System Administration), Maamulka Shabakadaha (Network Administration).

Si loo hubiyo tayada iyo Horumarka Barnaamijka, kaliya ka-qaybgalayaasha ku guuleysta Imtixaannada koorsooyinka ayaa u gudbi doona heerarka xiga ee Shahaadooyinka.

Barnaamijkan Tababarka waxaa taageeraya Bangiga Adduunka (World Bank Group) iyada oo loo marayo Mashruuca SCALED-UP, waxaana fududeynaya Machadka Sare ee Isgaarsiinta ee Afrika (AFRALTI), tababarkan ayaa xoojinaya dadaallada lagu dhisayo awoodda Amniga Saaybarka iyo Shaqaalaha Dowladda ee Xirfad Sare leh.

Muqdisho(Wargeyska Dalka):-Guddoomiyaha Hay’adda Maareynta Musiibooyinka Qaranka (SoDMA), Maxamuud Macallin Cabdulle, ayaa ka hadlay furitaanka Shirka Arrimaha Bini’aadannimada Soomaaliya (CHF) oo ka qabsoomay Magaalada Muqdisho.

Guddoomiyuhu waxa uu si diirran u soo dhaweeyay Madaxda iyo Martida ka qeyb galeysa Shirka, isaga oo Carrabka ku adkeeyay muhiimadda ay leedahay  Dalka in laga gudbo habka kaliya ee ka jawaabista Deg-Degga ah, loona gudbo qorsheyaal waara oo diiradda saaraya ka hortagga Musiibooyinka iyo dhisidda adkaysiga Bulshada.

Waxa uu tilmaamay in Soomaaliya ay weli la daalaa dhacayso dhibaatooyin soo noqnoqda sida Abaaraha iyo Fatahaadaha, kuwaas oo si weyn u saameeya Nolosha Shacabka, isla markaana malaayiin Qof ay wajahayaan Cunto yari iyo Nafaqo Darro.

Sidoo kale, Guddoomiyuhu waxa uu caddeeyay in Dowladdu mudnaan gaar ah siinayso: Xoojinta isku-duwidda Hay’adaha Ka hortagga Musiibooyinka ka hor inta aysan dhicin

Horumarinta nidaamyada digniinta degdegga ah Adkeynta iskaashiga bah-wadaagta

Shirkan muhiimka ah waxaa ka qeyb galaya masuuliyiin ka kala socota Dowladda Federaalka iyo Dowlad Goboleedyada, Hay’adaha Qaramada Midoobay, Safiirrada, Deeq-bixiyeyaasha, NGO-yada gudaha iyo kuwa Caalamiga ah, Ganacsatada, Bulshada Rayidka, Jaamacadaha, Qurbajoogta iyo Khubaro leh aqoon iyo waayo-aragnimo ku saabsan arrimaha Abaaraha iyo Gargaarka Bini’aadannimo.