Abijdan: Wafdi heer sare ah oo ka socda Dowladda Federaalka Soomaaliya, oo uu hoggaaminayo Maareeyaha Guud ee NIRA, Mudane Cabdiweli Cali Cabdulle (Timacadde), ayaa ka qeyb galay Shirka ID4Africa 2026 oo ka furmay magaalada Abidjan ee dalka Côte d’Ivoire. Wafdiga waxaa qeyb ka ah masuuliyiin ka socda NIRA, SPS, SBA iyo hay’ado kale oo dowladeed.

Shirka ayaa diiradda lagu saaraya hirgelinta nidaamyo dhijitaal ah, iyadoo ka qeyb-galka Soomaaliya uu muhiim u yahay horumarinta Aqoonsiga Qaranka, adeegyada dhijitaalka ah iyo xoojinta iskaashiga caalamiga ah.

Kampala: Madaxweynaha Jamhuuriyadda Federaalka Soomaaliya, ahna Taliyaha Guud ee Ciidamada Qalabka Sida, Mudane Xasan Sheekh Maxamuud, oo uu wehliyo Wasiirka Gaashaandhigga XFS, Mudane Axmed Macallin Fiqi, ayaa maanta magaalada Kampala kaga qeybgalay munaasabadda caleemo-saarka Madaxweynaha dib loo doortay ee Jamhuuriyadda Uganda, Mudane Yoweri Kaguta Museveni.

Madaxweynaha Jamhuuriyadda ayaa Madaxweyne Museveni ugu hambalyeeyay dib-u-doorashadiisa, isaga oo u rajeeyay shacabka iyo dowladda Uganda horumar, xasillooni iyo barwaaqo.

Madaxweyne Xasan Sheekh Maxamuud ayaa sidoo kale uga mahadceliyay dowladda iyo shacabka Uganda soo dhoweynta diirran ee loo sameeyay wafdiga Jamhuuriyadda Federaalka Soomaaliya, isagoo adkeeyay muhiimadda sii xoojinta xiriirka walaaltinimo, iskaashiga difaaca iyo amniga, iyo danaha istiraatiijiga ah ee labada dal. 

Qaahira: Agaasimaha Wakaaladda Wararka Qaranka Soomaaliyeed ee SONNA, Mudane Ismaaciil Mukhtaar Cumar “Orojo”, ayaa Soomaaliya ku metelay Madasha Sare ee Koonfurta Adduunka ee Warbaahinta iyo Hay’adaha Fikradda, oo maanta ka furantay magaalada Qaahira ee dalka Masar.

Madashan oo ay si wadajir ah u qabanqaabiyeen Wakaaladda Wararka Shiinaha ee Xinhua iyo Ururka Jaamacadda Carabta, ayaa waxaa ka qeyb galay masuuliyiin sare, diblomaasiyiin, khubaro warbaahineed iyo wakiillo ka socday dalalka Carabta iyo Shiinaha.

Munaasabadda furitaanka waxaa goob joog ka ahaa Xoghayaha Guud ee Ururka Jaamacadda Carabta, Mudane Axmed Aboul Gheit, Madaxweynaha Wakaaladda Wararka Xinhua Fu Hua, Safiirka Shiinaha ee Masar Liao Liqiang, iyo marti sharaf kale.

Ka qeybgalka Agaasime Oronjo ayaa muujinaya dadaalka Soomaaliya ay ugu jirto xoojinta doorkeeda warbaahineed ee caalamiga ah iyo ka mid noqoshada doodaha la xiriira horumarinta warbaahinta Koonfurta Adduunka.

Sidoo kale, madashan ayaa diiradda lagu saarayay hal-abuurka dijitaalka ah, isbeddellada tiknoolajiyadda saxaafadda, iyo sidii loo dhisi lahaa iskaashi warbaahineed oo casri ah. Dowladda Soomaaliya ayaa madasha ka faa’iideysaneysa is dhaafsiga khibradaha farsamo iyo xoojinta xiriirrada xirfadeed ee kor u qaadaya tayeynta warbaahinta qaranka.

Intii uu socday shirka, waxaa sidoo kale lagu soo bandhigay nuqulka afka Carabiga ee buugga “Maamulka Shiinaha”, iyadoo la falanqeeyay warbixino ku saabsan fursadaha iskaashiga Carabta iyo Shiinaha, gaar ahaan doorka warbaahinta ee la tacaalidda caqabadaha caalamiga ah iyo dhiirrigelinta dheelitirka warbaahinta caalamka.

Wasiirka Wasaaradda Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaam Cabdi Cali, ayaa maanta ka qeyb galay kulanka heer wasiir ah oo looga hadlayay dib u habeynta Golaha Ammaanka ee Qaramada Midoobay iyo isticmaalka awoodda diidmada qayaxan ee loo yaqaano (Veto), intii uu socday Shir madaxeedka Africa Forward ee ka dhacaya magaalada Nairobi ee dalka Kenya.

Wasiirka waxaa kulanka ku wehlinayay Safiirka Soomaaliya ee Kenya, Mudane Jibriil Ibraahim Cabdulle, iyo diblomaasiyiin kale oo sar sare.

Dowladda Soomaaliya ayaa markale caddeysay taageeradeeda ku aaddan dib u habeynta Golaha Ammaanka ee Qaramada Midoobay si loo helo matalaad juqraafiyeed oo cadaalad ah, isla markaana loo xoojiyo codka dalalka soo koraya, gaar ahaan kuwa Afrika.