Wasiirka Arrimaha Gudaha, Federaalka iyo Dib u heshiisiinta XFS mudane  Cali Yuusuf Cali  Xoosh oo isaga iyo wafdigiisa ay booqasho rasmi ah kujoogaan dalka Algeria ayaa maanta la kulmay Madaxweynaha Algeria mudane Cabdimajiid Tabuun, iyaga oo ka wada hadlay; xiriirka taariikhiga ah ee labada dal walaalaha ah, iskaashiga iyo guud ahaan danaha labada dhinac.

Inta uu kulanku socday, Wasiir Cali Xoosh ayaa madaxweyne Cabdimajiid guddoonsiyey barqiyad gaar ah uu ka siday Madaxweynaha Jamhuuriyadda Federalka ah ee Soomaaliya mudane Dr. Xasan Sheekh Maxamuud, isaga oo sidoo kale uga warbixiyey heerka iyo horumarada laga gaaray hortabinnada qaran iyo guud ahaan dedaallada dowladda Federalka ah Soomaaliya ee dhinacyada dimuqraadiyeynta, dib-u-heshiisiinta, dhismaha dowladnimada, dib-u-habaynta maamulka, xasilinta dalka iyo dib-u-soo kabashada deegaannada laga xoreeyay kooxaha argagixisada.

Kulankan uu sidoo kale qeyb ka ahaa Safiirka Soomaaliya u fadhiya dalkaasi ayaa ugu dambeyntii Wasiirka Arrimaha Gudaha Soomaaliya mudane Cali Xoosh wuxuu madaxweyne Cabdimajiid uga mahadceliyey martiqaadka iyo martigelinta qiimaha badan iyada sidoo kale dhanka Algeria ay kulanka goobjoog ka ahaayeen mas’uuliyiin sare sida; Mudane Ibraahiim Muraad oo Wasiirka dowlaha dowladaha hoose, mudane Axmed Cadhaaf oo ah Wasiirka Arrimaha Dibadda, mudane Saciid Sactuun Wasiirka Arrimaha Gudaha iyo Cammaar Ciba oo ah lataliye sare ee madaxweynaha ee dhanka Diblomaasiyadda.

Hantidhowraha Guud ee JFS Mudane Axmed Ciise Guutaale ayaa maanta magaalada Nairobi ee dalka Kenya, ka daah-furay Shirkii 4aad ee Guddiga Hagidda Mashruuca EU SFA TA.

Kulanka ayaa ku soo dhammaaday natiijo wanaagsan oo ku aaddan in la sii wado dadaallada lagu xoojinayo daahfurnaanta, isla-xisaabtanka, iyo hufnaanta maamulka maaliyadda guud ee Soomaaliyata isla-xisaabtanka maaliyadeed ee Soomaaliya.

Shirka ayaa si guud loogu falanqeeyey horumarka mashruuca, caqabadaha jira, iyo meelaha u baahan in la sii xoojiyo. Waxaa sidoo kale looga hadlay muhiimadda ay leedahay wada-shaqeynta ka dhexeysa hay’adaha Hantidhowrka Guud ee dalka iyo bahwadaagta taageerta hufnaanta maamulka maaliyadda guud.

Hantidhowraha Guud ayaa bogaadiyey taageerada Midowga Yurub ee ku aaddan dhismaha awoodda hay’adaha Hantidhowrka Guud. Waxa uu tilmaamay in wada-shaqeynta heer federaal iyo heer dowlad goboleed ay muhiim u tahay dhismaha hannaan baariseed oo xirfad ku dhisan, madax-bannaan, kana qayb qaata ilaalinta kheyraadka guud.

Guddoomiyaha Guddiga Qaranka Madaxbannaan ee Xuquuqul Insaanka, Dr Maryam Qaasim, ayaa maanta kulan la yeelatay Safiirka Midowga Yurub u fadhisa Soomaaliya, Marwo Francesca Di Mauro, oo ay ka wada hadleen xoojinta iskaashiga iyo wadashaqeynta labada dhinac ee Guddiga iyo Midowga Yurub.

Kulanka ayaa diiradda lagu saaray wadashaqeyn xooggan oo dhexmarta Guddiga iyo Midowga Yurub, gaar ahaan dhinacyada ilaalinta iyo horumarinta xuquuqda aadanaha, kobcinta awoodda shaqo ee Guddiga iyo Guud ahaan taageerada isla xisaabtanka, dowlad-wanaagga iyo ku dhaqanka sharciga.

Ra’iisul Wasaare Ku-xigeenka Xukuumadda Jamhuuriyadda Faderaalka Soomaaliya Mudane Saalax Axmed Jaamac, ayaa maanta xilka u kala wareejiyay Wasiirka cusub ee Wasaaradda Warfaafinta Dhaqanka iyo Dalxiiska Mudane Cabdifitaax Qaasim Maxamuud iyo Wasiirkii hore Mudane Daauud Aweys Jaamac.

Ra’iisul Wasaare Ku-xigeenka, ayaa kula dardaarmay Wasiirka cusub, in uu la yimaado, hufnaan shaqo, isaga oo Alle uga baryay in uu u fududeeyo masuuliyadda loo igmaday, isaga oo ku ammaanay Wasiirkii hore shaqadii wanaagsanayd ee uu soo qabtay muddadii uu joogay Wasaaradda.

Mudane Saalax, ayaa sheegay in Wasaaradda Warfaafinta kamid ah tahay hey’adaha muhiimka u ah shaqada Xukuumadda, isaga oo u mahadceliyay guud ahaan shaqaalaha Wasaaradda ee kaalinta weyn ka qaata shaqada Qaranka.