Maareeyaha Dekedda Weyn ee Muqdisho, Danjire Maxamed Cali Nuur (Ameeriko), oo uu wehliyo Safiirka Soomaaliya u fadhiya dalka Ruushka, Maxamed Abuukar Subeer, ayaa intii uu socday Madasha Caalamiga ah ee Gaadiidka iyo Saadka ee lagu qabtay magaalada St. Petersburg ee Ruushka, waxa ay kulan dooceed la qaateen wafdi ka socday Wasaaradda Gaadiidka iyo Saadka ee Boqortooyada Sacuudi Carabiya, oo ay ka mid ahaayeen Naif Saleh Samkari, Agaasimaha Waaxda Deegaanka Badda, iyo Najla Alfarraj, khabiir ku takhasustay arrimaha deegaanka.

Kulanka waxaa diiradda lagu saaray xoojinta iskaashiga arrimaha badda, hirgelinta is-afgaradka labada dhinac, iyo istaraatiijiyadda IMO ee ilaalinta deegaanka iyo yareynta qiiqa.

Hoggaamiyaha ku meel gaarka ah ee maamulka Koonfur Galbeed, Mudane Jabriil Cabdirashiid Xaaji, ayaa kulan la qaatay qaar ka mid ah Odeyaasha Dhaqanka Koonfur Galbeed, kaas oo diiradda lagu saaray xoojinta nabadda iyo wadajirka bulshada.

Kulankan ayaa ujeedkiisu ahaa dardargelinta dadaallada nabadaynta, iyadoo hoggaamiyuhu uu Odeyaasha kala hadlay doorka muhiimka ah ee ay ku leeyihiin ilaalinta xasilloonida iyo dib-u-heshiisiinta bulshada dhexdeeda.

Hoggaamiye Jabriil ayaa adkeeyay in Koonfur Galbeed ay mudnaan gaar ah siinayso nabadda iyo wada noolaanshaha shacabka.

Odeyaasha Dhaqanka ayaa dhankooda soo dhaweeyay kulanka, iyagoo ballanqaaday inay si dhow ula shaqeyn doonaan maamulka si loo xaqiijiyo nabad waarta iyo horumar laga gaaro deegaanka.

Ugu dambeyn, hoggaamiyaha ayaa uga mahadceliyay Odeyaasha kaalintooda muuqata, wuxuuna ku boorriyay inay sii xoojiyaan dadaallada ay ugu adeegayaan bulshada.

Ciidanka Xoogga Dalka Soomaaliyeed, gaar ahaan Ururka 203-aad Guutada 20-aad ee Kumaandooska Gorgor, ayaa gacanta kusoo dhigay horjooge ka tirsan Khawaarijta oo lagu magacaabo Salaad Macalin Cusmaan Cabdiyow, loona yaqaan (Salaad Dheere).

Howlgalkan qorsheysan oo uu hoggaaminayay Taliye ku-xigeenka Ururka, Laba Xidigle Xasan Axmed Gaabow (Xasan Yare), ayaa ka dhacay tuulada Soo-Maray oo qiyaastii 5KM dhanka galbeed kaga beegan deegaanka Mubaarak ee gobolka Shabeellaha Hoose.

Taliye Xasan Yare ayaa xaqiijiyay in horjoogahan uu ku howlanaa maleegida falal amni darro ah oo uu la damacsanaa shacabka Soomaaliyeed, islamarkaana uu Khawaarijta u qaabilsanaa tuulooyinka kala ah Buula Cabdulle, Mudulow, Buula-doonka Ugunji Busley iyo Soo-Maray oo dhammaantood hoostaga deegaanka Mubaarak.

Baydhabo, Abriil, 03, 2026; Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud iyo wafdi uu hoggaaminayo ayaa maanta gaaray magaalada Baydhabo ee Xarunta KMG ah ee Dowlad Goboleedka Koonfur Galbeed, halkaasi oo ay si diiran ugu soo dhoweeyeen Hoggaamiyaha KMG ah ee Dowlad Goboleedka Koonfur Galbeed, Guddoomiyaha Golaha Shacabka BJFS, masuuliyiin kale oo heer federaal iyo heer dowlad-goboleed ah iyo Boqolaal ka mid ah shacabka Baydhabo.

Safarka Madaxweynaha Jamhuuriyadda ee magaalada Baydhabo ayaa daaran, dardargelinta adeegyada bulsho ee loo hayo shacabka deegaanka, xoojinta nabadda iyo dib u heshiisiinta, adkeynta geeddi socodka dimuqraadiyeynta, gurmadka abaaraha iyo horumarinta dowladnimada.

Madaxweyne Xasan Sheekh ayaa kulamo la qaadan doonaa hoggaanka KMG ah ee dowlad goboleedka, Odayaasha Dhaqanka, Saraakiisha ciidamada qalabka sida iyo kuwa Daraawiishta iyo qeybaha bulshada, iyada oo diiradda la saaridoono adkeynta amniga, socodsiinta adeegyada dowladnimo ee bulshada loo hayo iyo hirgalinta doorashooyinka Qof iyo Cod, si loo xaqiijiyo himmilada shacabka soomaaliyeed ee nabadda, xasilloonida iyo horumarka waara.

Taliyaha Ciidanka Boliiska Gen. Asad Cismaan oo ka hadlay kulan looga hadlaayey amniga ayaa ka warbixiyay howlaha horyaalla ciidanka iyo sida ay muhiimka u tahay in shacab iyo ciidan lagu  baraarugo soo celinta amniga magaalada iyo deegaanada kale ee gobolka Baay.

“Isbadalka in la arko oo la dhadhamiyo ayaa la rabaa ee maahan in la wiiqo xasiloonida oo qof kasta ay doonto in ay sameyso wixii ay rabto”ayuu yiri Taliyaha Ciidanka Boliiska.

Gen. Asad Cismaan ayaa xusay in cadowga koowaad,kan labaad iyokan sadexaad ee ay leeyihiin shacbiga Soomaliyeed ay yihiin kooxaha khawaarijta,sidaa daraadeedna loo baahan yahay in meel looga soo wada jeesto cadowga nabad-didka ah.

Taliyaha Ciidanka Boliiska ayaa ciidanka ku ammaanay shaqada wanaagsan ee ay u hayaan umadda,wuxuuna kula dardaarmay in laga shaqeeyo nabad ku wada noolaanshaha iyo wadajirka shacabka.

Agaasimaha Guud ee Hay’adda Sirdoonka iyo Nabadsugidda Qaranka (NISA), Mudane Mahad Maxamed Salaad oo maalmahaan ku sugnaa Dalka Mareykanka ayaa kulammo muhiim ah la qaatay madaxda hay’adaha CIA iyo FBI ee ku sugan Magaalada Washington.

Kulamadaasi ayaa diiradda lagu saaray xoojinta iskaashiga dhinacyada sirdoonka, la dagaallanka argagixisada iyo horumarinta xiriirka taariikhiga ah ee u dhexeeya Soomaaliya iyo Mareykanka.

Sidoo kale, Agaasimaha ayaa booqday xarunta Ciidamada Howlgallada Gaarka ah ee Mareykanka ee Fort Bragg, oo ku taalla gobolka North Carolina, halkaas oo uu kulan muhiim ah kula yeeshay Korneyl Benander oo ah taliyaha ciidamada gaarka ah ee Mareykanka, isla markaana hore uga soo shaqeeyay Soomaaliya.

Taliyaha ayaa uga mahadceliyay Dowladda Mareykanka taageerada iyo iskaashiga ay la leedahay Soomaaliya, gaar ahaan dhinacyada amniga iyo la dagaallanka argagixisada, Iskaashigan ayaa horseeday guulo la taaban karo, oo ay ka mid yihiin howlgalladii ugu dambeeyay ee lagu bartilmaameedsaday horjoogeyaasha sare ee Khawaarijta.

Taliyaha Ciidanka Xoogga Dalka Gen. Ibraahim Maxamed Maxamuud oo la hadlay saraakiisha ciidaamada ee ka qeybgalay kulan la xiriiray soo celinta amniga ayaa ka warbixiyay xaaladda magaaladaasi iyo sida xilliggaan ay lagama maarmaanka u tahay in loogu howlgalo xaqiijinta nidaamka iyo kala dambeynta ay ku caanbaxay Beydhabo.

Taliyaha ayaa ku ammaanay ciidamada sida ay u burburiyeen kooxaha khawaarijta iyo sida nabaddgelyada ah ee ay uga qeybqaateen howlagaldii ka dhacay magaalada Beydhabo.

Taliyaha Ciidanka Xoogga Dalka Gen. Ibraahim Maxamed Maxamuud waxa uu ku baaqay in saraakiisha ay ka shaqeeyaan sugidda nabadgelyada iyo sidii dadka ay barakiciyeen khawaarijta dib loogu celn lahaa deegaanadii ay ka yimaadeen.

Taliyaha ayaa sheegay in ay socdaan qorshayaal  la doonayo in dib loogu xoreeyo deegaanada dalka ,gaar ahaan goobaha ay weli ka jooogaan kooxaha khawaarijta e caadeystay waxyeeleynta dadka rayidka ah.

Xubno ka socday Maamulka Safaaradda Soomaaliyaee  Kenya ayaa ka qeybgalay xaflad isbarasho oo ay soo qabanqaabiyeen ardyda Soomaalida ee wax ka barta Jaamaaad Daystar ee dalka Kenya.

Xafladdaan casho sharafta ah oo ahayd mid si heer sare ah loo soo agaasimay waxaa ka qaybgalay Xoghayaha 1aad ee Safaaradda Soomaaliya ee Kenya Mudane Cabdullaahi Maxamed Siyaad, Mardiya Abdi Mohamed oo kamid ah diblomaasiyiinta Safaaradda,ardayda Soomaalida iyo mart sharaf ale.

Hadal kooban oo ay halkaasi kas jeediyeen Xoghayasha 1aad, Mudane Abdullahi Mohamed Siyat iyo Mardiya abdi Mohamed waxa ay si gaar ah u ammaaneen ardayda Soomaaliyeed ee wax ka barata Jaamacadda Daystar, iyagoo bogaadiyay dadaalkooda waxbarasho iyo ka qaybgalka firfircoon ee ay ku leeyihiin hawlaha jaamacaddaasi.

Munaasabadda ayaa kusoo dhammaatay jawi wanaagsan oo ay ka muuqatay is-faham, is-ixtiraam iyo xiriir wanaag u dhexeeya ardayda iyo martida kale.

Guddoomiyaha Maxkamadda Ciidanka Qalabka Sida Mudane Xasan Cali Nuur Shuute ayaa Kulan looga hadlaayey sugidda amniga Magaalada Beydhabo la qaatay saraakiisha hoggaamineysa ciidamada federaalka iyo kuwa deegaanada ee K/Galbeed .

“Ma jirto cid adkaatay oo sameyn karta wixii ay doonto,mana jirto cid laga adkaaday oo lagu smeyn karo wixii la doono” ayuu yiri guddoomiye Shuute oo la hadlay saraakiisha ciidamada ee hoggaamineysa ciidanka ku sugan Beydhabo.

Taliyaha Maxkamadda Ciidanka Qalabka Sida mar uu ka hadlaayay xaaladda Beydhabo waxa uu ku goodiyay in cid kasta oo qeyb ka noqota fal dambiyeed la horgeyn doono maxkad,isla markaana loo ciqaabayo wixii ay geysteen,isagoo intaa raciyay in sharcigu uu yahay mid loo siman yahay

Mudane Shuute waxa uu ugu baaqay qeybaha ciidamada in ay xil iska saaraan sidii looga hortago lahaa isku day kasta oo keeni kara in la sameeyo khalalaaso,aargudsi iyo kicin dadweyne.

Saraakiisha ciidamada ee ku sugan Magaalada Beydhabo waxaa lagula dardaarmay in si wadajir ah ay uga shaqeeyaan soo celinta xasiloonida Magaalada Beydhabo.

Ciidanka Xoogga Dalka Soomaaliyeed oo wada hawlgalo lagu baacsanayo Khawaarijta ayaa deegaanka Abaar Cano-weyn oo u dhexeeya deegaanka Yasooman iyo degmada Moqokori ee bariga gobolka Hiiraan, waxay weerar dhabagal ah oo ay ka fuliyeen ku dileen maleeshiyo ka tirsan Khawaarijta oo watay gaari nooca Cabdi-bile ah. Hawlgalka waxaa lagu gubay gaarigiiay wateen, waxaana lagu dilay maleeshiyadii saarnaa, sida uu warbaahinta Qaranka u xaqiijiyay Taliyaha Qeybta 27-aad ee Ciidanka Dhulka XDS, Kornayl Cali Cagey.

Ciidanka hawlgalkan fuliyay ayaa si nabad ah ugu soo laabtay goobihii ay weerarka ka qaadeen, iyagoo la wareegay hubkii ay wateen argagixisadu.