Maareeyaha Guud ee Hay’adda Isgaarsiinta Qaranka, Mudane, Mustafa Yaasin Sheekh, ayaa ka qeybgalay Madasha Caalamiga ah ee Hay’adaha Isgaarsiinta Adduunka (GSR-26).

Kulanka oo uu soo qabanqaabiyay Midowga Isgaarsiinta Caalamiga ah ayaa sanadkan ka dhacaya magaalada Ankara ee dalka Turkiga.

Shirweynaha sanadkan ayuu halku-dhiggiisu yahay “Hagidda Xudduudaha Dhijitaalka ah”, iyadoo diiradda la saarayo waddooyinka nidaaminta ee lagu gaari karo mustaqbal dhijitaal oo adkaysi leh oo loo dhan yahay.

Maareeyaha ayaa ayaa intii lagu guda jiray madasha ka qeyb galay dood-cilmiyeed heer sare ah oo ay isugu yimaadeen Madaxda Hay’adaha Isgaarsiinta Adduunka (Heads of Regulators’ Executive Roundtable), kaas oo ay madaxda hay’adahu kaga wada hadlayeen mudnaanta iyo caqabadaha waaweyn ee horyaalla qeybta dhijitaalka ah ee caalamka.

Kulanka ayaa loogu dooday horumarinta shuruucda isgaarsiinta ee ku dhisan habab tijaabo ah, waxaana ka qeyb galay madax ka socotay dalalka Koonfur Afrika, Poland, Sacuudi Carabiya iyo wakiil ka socday Golaha Dhaqaalaha Adduunka.

Maareeyaha ayaa sidoo kale waxa uu ka hadlay shuruudaha lagama maarmaanka u ah hirgelinta nidaamyada tijaabada xeer-nidaaminta, iskaashiga heer gobol ee adeegyada ka gudba xudduudaha sida internet-ka, dayax-gacmeedka, adeegyada maaliyadeed ee dhijitaalka ah iyo muhiimadda ay leedahay.

Wasiirka Wasaaradda Caafimaadka iyo Daryeelka Bulshada ee Xukuumadda Federaalka Soomaaliya Dr. Cali Xaaji Aadam oo uu wehliyo Wasiirka Caafimaadka Hirshabelle Saadaq Maxamed Maxamuud, Wasiirka Caafimaadka Koonfur-Galbeed Dr. Saciid Axmed Cali iyo mas’uulin kale ayaa kormeer ku tegay Isbitaalka weyn ee magaalada Jowhar, isaga oo u kuurgalay qeybaha kala duwan ee isbitaalka oo dib-u-dhis iyo dayactir ay ku sameysay Wasaaradda Caafimaadka iyo Daryeelka Bulshada XFS.

Wasiirka ayaa intii uu ku guda jiray kormeerka, waxa uu indha-indheeyay qeybaha dib-u-habeynta lagu sameeyay oo ay kamid yihiin qeybaha bukaan-jiifka, hooyada iyo dhallaanka, sheybaarka, iyo adeegyada gurmadka degdegga ah.

Mas’uuliyiinta Isbitaalka ayaa sheegay in dib-u-dhiska lagu sameeyay Isbitaalka ay sare u qaadayso tayada adeegyada Caafimaad ee loo fidinayo bulshada ku nool magaalada Jowhar iyo deegaannada ku dhow.

Sidoo kale,Wasiirku wuxuu warbixin ka dhageystay maamulka iyo shaqaalaha Caafimaadka ee isbitaalka, kuwaas oo la wadaagay adeegga caafimaad ee ay u hayaan bulshada ku dhaqan guud ahaan gobolka Shabeellaha Dhexe oo uu u adeego Isbitaalka.

Ugu dambeyn, Wasiirka Wasaaradda Caafimaadka iyo Daryeelka Bulshada ee XFS ayaa boggaadiyay dadaallada lagu horumarinayo adeegyada caafimaadka, isagoo xusay muhiimadda ay leedahay in bulshada ay helaan adeeg caafimaad oo tayo leh. Sidoo kale waxa uu dhiirrigeliyay shaqaalaha caafimaadka inay sii laba jibbaaraan adeegyada ay u hayaan shacabka.

Agaasimaha Dhaqanka iyo Cilmibaarista ee Wasaaradda Warfaafinta, Dhaqanka iyo Dalxiiska Dowladda Federaalka Soomaaliya, Mudane Aadan Cabdiqani Cawaale oo uu waheliyo Agaasimaha Xiriirka Dawlad goboleedyadda, Mudane Cabdiraxmaan Axmed Xuseen ayaa Maanta ka qaybgalay Shirka Wasiirrada Dhaqanka ee Dalalka Islaamka iyo Dowladda Federaalka Ruushka oo ka qabsoomay magaalada Kazan ee caasimadda Jamhuuriyadda Tatarstan ee Dalwaynaha Ruushka.

Shirkan oo qayb ka ah Madasha Kazan Forum oo soconaya 12-17 bishan May, ayaa waxaa ka soo qaybgalay Madaxwaynayaal, Wasiirro iyo wufuud ka kala socday dalalka Islaamka iyo Dowladda Federaalka Ruushka, iyadoo diiradda lagu saaray xoojinta iskaashiga dhaqanka, ilaalinta hidaha iyo horumarinta diblomaasiyadda dhaqanka.

Mudane Aadan Cabdiqani Cawaale oo madasha ka jeediyay khudbada rasmiga ah ee Dawlada Soomaaliya ayaa ugu horrayn gaarsiiyay wasiirrada iyo ka qaybgalayaasha shirka salaam iyo tahniyad uu ka siday Wasiirka cusub ee Wasaaradda Warfaafinta, Dhaqanka iyo Dalxiiska Dowladda Federaalka Soomaaliya, Mudane Dr. Cabdifataax Qaasim Maxamuud. Sidoo kale wuxuu si gaar ah salaan ugu gudbiyay Wasiirka Dhaqanka ee Dowladda Federaalka Ruushka, Marwo Olga Lyubimova.

Khudbaddiisa ayuu Agaasimuhu kaga hadlay muhiimadda uu dhaqanku u leeyahay xoojinta iskaashiga caalamiga ah, nabad-dhiska iyo isfahamka bulshooyinka. Wuxuu carrabka ku adkeeyay in loo baahan yahay iskaashi dhab ah oo ku saleysan is-qadarin, wadaag khibradeed iyo horumarinta diblomaasiyadda dhaqanka si loo xoojiyo xiriirka ka dhexeeya dalalka Islaamka iyo Dowladda Federaalka Ruushka.

Ugu dambeyn, wafdiga Soomaaliya ayaa muujiyay sida ay Dowladda Federaalka Soomaaliya uga go’an tahay horumarinta iskaashiga dhaqanka, ilaalinta hidaha iyo dhaqanka Soomaaliyeed, iyadoo la xoojinayo xiriirka caalamiga ah ee ku dhisan dhaqanka iyo iskaashi waara.