NISA oo ka hortagtay dhaq-dhaqaaq Khawaarijta ka waday Hiiraan iyo Sh/hoose

By

-

February 28, 2026

Ciidanka Hay’adda Sirdoonka iyo Nabadsugidda Qaranka (NISA), oo kaashanaya saaxiibada caalamka, ayaa fuliyay howlgallo qorsheysan, kuwaas oo jab xooggan lagu gaarsiiyay maleeshiyaadka Khawaarijta oo abaabul iyo dhaq-dhaqaaqyo dagaal ka waday Gobollada Hiiraan iyo Shabeellada Hoose, waxaana la dilay in ka badan 40 dhagarqabe.

Howlgalka koowaad oo ka dhacay deegaannada Waab-weyn iyo Isgoyska Madaxyo-weyn ee hoostaga Degmada Maxaas ee gobolka Hiiraan, ayaa lagu beegsaday maleeshiyaad loo diyaarinayay in ay falal argagixiso ka fuliyaan deegaannada ku dhow Maxaas. Howlgalkan, oo lagu dilay ilaa 17 dhagarqabe, ayaa sidoo kale lagu burburiyay goobo ay gabbaad ka dhiganayeen Khawaarijtu.

Dhinaca kale, weerar guul ku dhammaaday oo Ciidanka NISA iyo saaxiibada caalamka ay ka fuliyeen howdka deegaanka Buulo-naagey ee Gobolka Shabeellada Hoose, waxaa lagu soo afjaray 23 Khawaarij ah oo lagu soo daabulay halkaas si ay u carqaladeeyaan saldhigyada ciidanka qaranka iyo isu-socodka amniga ee gobolka. Beegsigaas ayaana lagu wiiqay isku-daygii Argagixisada ee ahaa in ay Buulo-naagey u adeegsadaan marin u fududeeya carqaladeynta amniga.

Hay’adda Sirdoonka iyo Nabadsugidda Qaranka (NISA) waxa ay kor u qaadday dadaalka joogtada ah ee lagu ciribtirayo Argagixisada, isla markaana lagu xaqiijinayo amniga iyo xasilloonida dalka. Fadlan muwaadin, wixii khatar amni ah ama macluumaad la xiriira Al-Shabaab/Daacish la wadaag NISA:
199 / 0770747474 / 0620545454

Wasaaradda Duulista XJFS oo Jawaab ka bixisay Warar Been Abuur ah oo laga faafiyey

By

osman Dhiblawe

-

February 28, 2026

Muqdisho(Wargeyska Dalka):-Wasaaradda Gaadiidka iyo Duulista Hawada Soomaaliya waxay si Cad u Beeninaysaa Wararka Been Abuurka ah ee Maalmahan lagu baahinayay Baraha kala duwan, kuwaas oo si Khaldan ula xiriiriyay Shaqada iyo Adeegyada ay Wasaaraddu u hayso Muwaadiniinta Soomaaliyeed.

Gaar ahaan, Wararka la xiriira Bixinta Taargooyinka Gaadiidka, Wasaaraddu waxay Xaqiijinaysaa inaysan jirin wax Caqabad ah oo ka taagan Adeeggaas. Adeegyada Taargo-bixinta waxay u socdaan si Habsami leh, mana jiraan wax hakad ah oo ku yimid.

Sidoo kale, Wasaaraddu waxay caddeyneysaa in Wararkan Been Abuurka ahi ay yihiin kuwo si ula kac ah loo faafinayo, Ujeeddadooduna tahay in lagu Carqaladeeyo Amarkii ka soo baxay Hay’adaha Amniga ee ku saabsanaa qaadashada iyo ku xirnaanshaha Taargooyinka Rasmiga ah ee Gaadiidka.

Waxaa xusid mudan in ay jiraan Shakhsiyaad si Gaar ah Lacago loogu siinayo si ay u faafiyaan Wararkan, iyagoo u Adeegaya Cadowga Ummadda Soomaaliyeed isla markaana isku dayaya inay wiiqaan Kalsoonida Dadweynaha iyo fulinta Awaamiirta Sharciyeysan.

Wasaaraddu waxay sidoo kale Caddeyneysaa in Xirashada Taargada Rasmiga ah ay dan weyn ugu jirto Dhammaan Muwaadiniinta Soomaaliyeed, Maadaama ay Xoojinayso Amniga Guud, fududeynayso la socodka Gaadiidka, kana hortagayso falalka Amni-Darro ee lagu waxyeelleyn karo Shacabka. Taargadu waa Astaan Sharciyeysan oo kaalin muhiim ah ka qaadata Badqabka iyo Ilaalinta Hantida iyo Nafta Muwaadiniinta.

Intaa waxaa dheer, Wasaaraddu waxay si Cad u Shaacinaysaa inuusan jirin wax Khilaaf ah oo ka taagan Gudaha Wasaaradda, islamarkaana Howlaha Shaqo ay u socdaan si mideysan, nidaamsan, oo Waafaqsan Sharciga Dalka. Wararka sheegaya khilaaf Gudaha ah waa kuwo aan sal iyo raad toona lahayn, laguna doonayo in lagu jahawareeriyo Bulshada.

Wasaaraddu waxay faraysaa Hay’adaha Amniga inay si Degdeg ah dabagal ugu sameeyaan Shakhsiyaadka ku Lugta leh arrintan, isla markaana la horkeeno Sharciga cid kasta oo lagu helo falal lid ku ah Amniga iyo Danaha Qaranka.

Ugu dambayn, Wasaaraddu waxay ugu baaqaysaa Muwaadiniinta Soomaaliyeed inay ka feejignaadaan Wararka aan la hubin, ayna Xogaha Saxda ah ka qaataan Warbaahinta Rasmiga ah ee Wasaaradda.

Safaaradda Soomaaliya Magaalada Nairobi ee Dalka kenya oo Martigelisay Kulan Afur ah

By

osman Dhiblawe

-

February 28, 2026

Nairobi(Wargeyska Dalka):- Safaaradda Jamhuuriyadda Federaalka Soomaaliya ee Magaalada Nairobi ayaa martigelisay Cashadii Sannadlaha ahayd ee Afurka, taas oo Xalay lagu qabtay Xarunta Safaaradda.

Afurkan Qiimaha badan ayaa waxaa ka soo qaybgalay Danjireyaal kala duwan, Masuuliyiin ka socday Dowladda Kenya, Hoggaamiyeyaasha Ganacsiga iyo Bangiyada, Culumaa’udiin, Aqoonyahanno, Xubno ka Tirsan Jaaliyadda Soomaaliyeed ee Kenya, Mas’uuliyiin ka Tirsan Dowladda Federaalka Soomaaliya iyo Bahda Warbaahinta.

Munaasabaddan Afurka oo ku beegnayd Bisha Barakeysan ee Ramadaan ayaa ahayd mid lagu muujinayay Wadajir, Is-Ixtiraam iyo xoojinta Xiriirka Saaxiibtinimo ee ka dhexeeya Jamhuuriyadda Federaalka Soomaaliya iyo Jamhuuriyadda Kenya, iyo sidoo kale Bulshooyinka Walaalaha ah ee Labada Dal.

Bisha Ramadaan, oo ah Xilli lagu xoojiyo Cibaadada, is Milicsiga, Naxariista iyo is Garab Istaagga Bulshada, waxay xasuusinaysaa Muhiimadda ay leedahay Wadajirku. Wadajir u afuristu waa Astaan Muujinaysa Midnimo iyo Xiriir Qoto Dheer oo ka Dhexeeya Dalalka iyo Bulshada, Gaar ahaan Xilliyada Barakeysan.

Safaaradda Jamhuuriyadda Federaalka Soomaaliya waxay si weyn uga Mahadcelineysaa dhammaan Martidii Sharafta lahayd ee ka soo qayb gashay Munaasabaddan, isla markaana nala wadaagtay fiidkan Qiimaha Badan. Safaaraddu waxay rajaynaysaa in Bishan Barakeysan ay sii xoojiso Nabadda, Isfahamka, Deeqsinimada iyo Wadajirka Bulshada, ayna horseeddo Iskaashi iyo Xiriir sii kobca oo ka dhexeeya Labada Dal.

Türkiye oo Dadaal Dhexdhexaadin ah ka Wadda Xiisadda ka dhaxeysa Wadamada Pakistan iyo Afghanistan

By

osman Dhiblawe

-

February 28, 2026

Ankara(Wargeyska Dalka):-Wasiirka Arrimaha Dibadda ee Türkiye, Hakan Fidan, ayaa Jimcihii khadka Telefoonka kula hadlay dhiggiisa Dalalka Pakistan, Afghanistan, Qatar iyo Sacuudi Carabiya, si ay uga wada hadlaan iska horimaadyadii hubeysnaa ee u dhexeeya Pakistan iyo Afghanistan, kuwaas oo sababay Dhimashada Tobanaan Askar iyo Dad Rayid ah.

Khamiistii, Afghanistan ayaa Weerarro ka fulisay Xadka Pakistan, iyadoo sheegtay in tallaabadaasi ay jawaab u tahay Duqeymo ay Ciidanka Cirka Pakistan ka fuliyeen Gudaha Afghanistan Axaddii, kuwaas oo sababay Dhimashada Dad Badan. Islamabad ayaa sheegtay inay Dishay 70 “Argagixiso,” Halka Mas’uuliyiinta Afghanistan iyo Qaramada Midoobay ay soo sheegeen khasaarooyin Rayid, arrintaas oo Pakistan ay beenisay.

Sida laga soo xigtay ilo Diblomaasiyadeed oo Turki ah, Fidan ayaa la xiriiray Wasiirka Arrimaha Dibadda Pakistan Ishaq Dar, Wasiirka Arrimaha Dibadda Afghanistan Amir Khan Muttaqi, Ra’iisul Wasaaraha ahna Wasiirka Arrimaha Dibadda Qatar Mohammed bin Abdulrahman Al Thani, iyo Wasiirka Arrimaha Dibadda Sacuudi Carabiya Faisal bin Farhan, si loo dejiyo Xaaladda.

Wadahadallada ayaa diiradda lagu saaray iska horimaadyadii ugu dambeeyay ee ka dhacay Xadka Pakistan iyo Afghanistan.
Xiriirka Labada Dal ayaa sii xumaanayay Bilihii la soo dhaafay, iyadoo Pakistan ay ku eedeysay Maleeshiyaad inay ka howlgalaan Gudaha Dhulka Afghanistan, arrintaas oo Kabul ay beenisay.

XiisaddaLlabada Dal ayaa Cirka isku shareertay Bishii Oktoobar ee Sanadkii Hore, markii Ciidamada Afghanistan ay weerareen Saldhigyo Xuduudeed oo Pakistan leedahay, Maalmo uun kadib markii Ciidanka Cirka Pakistan ay duqeymo ka fuliyeen Gudaha Afghanistan.

Türkiye iyo Qatar ayaa door dhexdhexaadin ah ka qaatay dejinta Xiisadda iyo gaarista Xabbad-Joojin u dhexeysa Labada Dal.
30-kii Oktoobar, War-Saxaafadeed ka soo baxay Wasaaradda Arrimaha Dibadda ee Türkiye ayaa lagu sheegay in Kulan lagu qabtay Magaalada Istanbul ay ka qeybgaleen Türkiye, Qatar, Afghanistan iyo Pakistan, si loo xoojiyo Xabbad-Joojintii Hore loogu gaaray Magaalada Doha, taas oo ku timid dhexdhexaadinta Türkiye iyo Qatar.

Xigasho: anadolu agency

Degmada Buulo burde oo ku soo baxday Tartan cilmiyeedka bisha Ramadaan.

By

osman Dhiblawe

-

February 28, 2026

Degmada Buulo burde oo ka tirsan Gobolka Hiiraan ayaa u gudubtay wareegga labaad ee tartan cilimyeedka bisha ramadaan, kaddib markii 14 dhibcood ay kaga adkaatay Degmada Shingaani ee Gobolka Banaadir,taas oo heshay 12 dhibcood.

Tartankaan oo habeen kasta laga sii daayo Warbaahinta Qaranka Soomaaliyeed, ayaa waxaa si toos ah looga daawadaa Telefishinka Qaranka,iyadoo sidoo kale laga dhageysto Radio Muqdisho.

Tartan cilmiyeedka bisha Ramadaan ayaa waxa uu galay sanadkii lix iyo tobnaad ,iyadoo sanadkaan ay si wadajir ah u taaba-gelinayaan maamulada Bangiga IBS iyo kan Gobolka Banaadir.

Sanad kasta barnaamijka tartan cilmiyeedka bisha ramadaan waxaa ka qeybgala 32 degmo oo kamid ah gobolada dalka Soomaaliya,waxaana degmadii ku guuleysata tartankaasi lagu abaalmariyaa koobab,lacago iyo abaalmarinno kale sida shahaadooyin muujinaya kaalinta aqoon ee ay gaareen dhallinyarada jiilasha cusub ee soo koroya.

Soomaaliya iyo Sacuudi Carabiya oo Xoojinaya Xiriirka Diblomaasiyadeed

By

osman Dhiblawe

-

February 27, 2026

Wasiiru Dowlaha Arrimaha Dibadda iyo Iskaashiga Caalamiga, Mudane Cali Cumar, ayaa kulan la qaatay Wasiirka ku xigeenka Arrimaha Dibadda ee Boqortooyada Sacuudi Carabiya, Mudane Waleed Elkhereiji. Labada dhinac waxay ka wada hadleen xoojinta iskaashiga ku aaddan xasilloonida gobolka, amniga, iyo kobcinta xiriirka dhaqaale.

Jamhuuriyadda Federaalka Soomaaliya waxay qiimeyneysaa doorka hoggaamineed ee mabda’a ku dhisan iyo dadaallada xasillinta ee ay Sacuudi Carabiya ka waddo gobolka. Labada dhinac waxay mar kale adkeeyeen ka go’naanshahooda horumarinta xiriirka laba geesoodka ah iyo sii qotodheeraynta iskaashiga istaraatiijiyadeed ee ku dhisan dan wadaag iyo barwaaqo la wadaago.

Warbixinta Toddobaadlaha ee Dowladda Federaalka Soomaaliya

By

osman Dhiblawe

-

February 27, 2026

Warbixinta Toddobaadlaha ee
Dowladda Federaalka Soomaaliya Muqdisho,

1- Madaxweyne Xasan Sheekh Maxamuud ayaa Madaxtooyada Qaranka ku qaabilay Marwo Sophie (Duchess of Edinburgh) oo ah xubin sare oo ka tirsan Qoyska Boqortooyada Ingiriiska.

2- Ra’iisul Wasaare Xamsa Cabdi Barre, ayaa qaabka fogaan aragga ah kaga qeybgalay Shir-madaxeedka Meertada 61-aad ee Golaha Xuquuqul Insaanka, isagoo xusay in Soomaaliya ay sii wadi doonto xoojinta horumarka laga gaaray arrimaha la xiriira Xuquuqda Aadanaha, iyo wax ka qabashada caqabadaha caalamiga ah,

3- Ra’iisul Wasaare Xamsa Cabdi Barre, oo kulan afur ah la qaatay mas’uuliyiinta iyo howlwadeennada Xafiiska Ra’iisul Wasaaraha, ayaa ku dhiirrigaliyey dadaalkooda naf-hurka ah ee ay ugu adeegayaan qaranka Soomaaliyeed.

4- Ra’iisul Wasaare Xamsa Cabdi Barre, ayaa kulan looga hadlay ajandayaasha qaran ee hor-u-tabinta leh la yeeshay hoggaanka ururrada siyaasadda ee ka qeybgalay doorashadii goleyaasha deegaanka ee Gobolka Banaadir.

5- Mudanayaasha Labada Aqal ee Baarlamanka Federaalka Soomaaliya ayaa soo gabagabeeyey ka doodista qaar ka mid ah cutubyada Dastuurka KMG ah.

6- Wasiirka Warfaafinta, Dhaqanka iyo Dalxiiska Mudane Daa’uud Aweys Jaamac ayaa ka qeyb galay Madasha Iskaashiga Soomaaliya iyo Turkiga oo diiradda lagu saarey guulaha uu xiriirka labada dal ku tallaabsadey 15kii sanno ee la soo dhaafey.

7- Wasiir ku xigeenka Warfaafinta Soomaaliya oo shir jaraa’id ku qabtay Muqdisho ayaa sheegay in dowladda ka go’antahay sii waddida wadahadalada arrimaha masiiriga, isaga oo tilmaamay in Golaha Mustaqbalka ay Gogasha uga baxeen kadib markii ay la yimaadeen ajande ka baxsan shirka.

8- Wasiirka Awqaafta iyo Arrimaha Islaamka Sheekh Mukhtaar Roobow Cali ayaa furay Tartanka Sanadlaha Heerka Qaran ee Xifdinta Qur’aanka Kariimka, kaasi oo ay ku tartamayaan sanadkii 4-aad, arday ka kala socota Dowlad Goboleedyada dalka.

9- Wasiirka Hawlaha Guud Mudane Ayuub Ismaaciil ayaa kormeeray dhismaha waddooyinka ee ka socda magaaalada Dhuusamareeb ee caasimadda Galmudug

10- Wasaaradaha Cadaaladda iyo Ganacsiga ee Xukuumadda Federaalka Soomaaliya ayaa ka wadahdley ilaalinta nidaamka sharci iyo horumarinta habka garsooridda kiisaska la xiriira ganacsiga.

11- Wasaaradda Amniga ayaa war rasmi ah oo ay soo saartay ku fartay Madaxda Hay’adaha Dowladda in ay gawaaridooda ku xiraan taargooyinka si kor loogu qaado hubinta amniga.

12- Madaxweynaha Dowlad Goboleedka Galmudug, Mudane Axmed Cabdi Kaariye iyo Wasiirka Hawlaha Guud ee Soomaaliya Mudane Ayuub Ismaaciil ayaa dhagax dhigay dhismaha waddo laami ah oo 60-km oo laga hirgelinayo Galmudug.

13- Qaar ka mid ah xubnaha Golaha Wasiirada ayaa shir Jaraa’id oo wadajir ah ku qabtey magaalada Muqdisho, iyagoo ka digay lacagaha baadda sharci darrada ah ee Khawaarijta xilligan oo kale isku dayaan in ay ka qaadaan ganacsatada.

14- Hay’adda NISA oo shaacisay in hawlgaladii u dambeeyey ee ay ka fulisay gobolada dalka iyada oo la kaashanaysa saaxiibada caalamka in ay ku dishay in ka badan 23 xubnood oo ka tirsan Khawaarijta.

15- Wasiirka Warfaafinta, Dhaqanka iyo Dalxiiska, Mudane Daa’uud Aweys Jaamac ayaa magaalada Ankara kulan kula yeeshay Wasiirka Warbaahinta ee Turkiga, iyagoo ka wadahadley xoojinta xiriirka labada dal ee dhinaca warbaahinta.

16- Wasiirka Arrimaha Dibadda iyo Iskaashiga Caalamiga Mudane Cabdisalaam Cabdi Cali, ayaa booqday xarunta Hay’adda SoDMA, isagoo ku baaqey in la iska kaashado gurmadka loo fidinayo dadka ay abaaruhu waxyeeleeyeen ee dalka ku dhaqan.

17- Wasiirka Arrimaha Dibadda iyo Iskaashiga Caalamiga Mudane Cabdisalaam Cabdi Cali, ayaa afur ugu sameeyay magaalada Muqdisho diblomaasiyiinta iyo wakillada ururrada caalamiga ah ee ku sugan magaalada Muqdisho.

18- Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, iyo George Conway, Ku-Xigeenka Wakiilka Qaramada Midoobay ee Soomaaliya ee Arrimaha Bani’aadannimada, ayaa qabtay shir jaraa’id oo lagu shaaciyay in xaaladda abaarta dalka ay gaartay heer aad u halis ah, isla markaana ay sii xumaaneyso maalinba maalinta ka dambeysa.

19- Agaasimaha Wakaaladda Wararka Soomaaliyeed ee SONNA Ismaaciil Muqtaar Cumar ayaa ka qeybgalay kulan weynaha Ururka Wakaaladaha Wararka ee dalalka ku bahoobay Ururka Iskaashiga Islaamka oo ka dhacay dalka Sacuudiga.

20- Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, ayaa qaabilay Masuuliyiin ka socday Hay’adda Cuntada iyo Beeraha ee Qaramada Midoobay (FAO), iyagoo ka wadahadley xaaladda Abaaraha Soomaaliya iyo gurmadka loo baahan yahay xilligani.

21- Hay’adaha SoDMA, Oman Charity iyo Maamulka Gobolka Banaadir ayaa si wadajir ah deeq afurin ah ugu qeybiyay qoysas danyar ah oo ku nool degmooyinka gobolka Banaadir.

22- Xildhibaan Mahad Cabdalla Cawad ayaa bogaadiyey amniga iyo horumarrada ka socda caasimadda Muqdisho, isagoo soo dhoweeyey go’aannada Wasaaradda amniga iyo hay’adaha ammaanka ee lagu xoojinayo hubinta amniga.

==========DHAMMAAD============

Wasiirka shaqada XFS oo ka qayb galay kulamo heer wasiir ah oo soo qaban qaabisay haya’adda shaqaalaha Adduunka

By

osman Dhiblawe

-

February 27, 2026

Wasiirka Wasaaradda Shaqada iyo Arrimaha Bulshada ee Xukuumadda Federaalka Soomaaliya, Prof. Saalim Caliyow Ibro, ayaa ka qaybgalay kulan-hoosaadyo heer Wasiir ah oo ka qabsoomay magaalada Qaahira ee dalka Masar, kuwaas oo ay soo qabanqaabisay Hay’adda Shaqaalaha Adduunka.

Kulamadan ayaa waxaa ka soo qaybgalay Wasiirrada Shaqada ee dalalka Soomaaliya, Suudaan iyo Koonfur Suudaan, iyadoo ujeeddadu ahayd xoojinta wada-shaqeynta dalalka gobolka, is-weydaarsiga khibradaha, iyo horumarinta siyaasadaha shaqada ee waafaqsan heerarka caalamiga ah.

Intii ay socdeen kulammada, waxaa si qoto dheer looga dooday doorka ILO, nidaamka maamulkeeda iyo qaab-dhismeedka go’aan-qaadashada, mudnaanta istaraatiijiyadeed ee hay’adda, iyo hababka wax ku oolka ah ee loo fuliyo barnaamijyada taageeraya shaqaalaha iyo loo-shaqeeyayaasha.

Sidoo kale, waxaa si gaar ah diiradda loo saaray:
• Dardargelinta hirgelinta Shaqo-sharaf (Decent Work)
• Xoojinta badqabka iyo caafimaadka goobaha shaqada
• Nidaaminta iyo maaraynta socdaalka shaqaalaha
• Horumarinta wada-hadalka bulshada (Social Dialogue)
• Ballaarinta ilaalinta bulshada (Social Protection)
• Ciribtirka shaqaaleysiinta carruurta

Wasiirka ayaa adkeeyay sida ay Dowladda Federaalka Soomaaliya uga go’an tahay xoojinta wada-shaqeynta caalamiga ah, si loo abuuro fursado shaqo oo waara, loo ilaaliyo xuquuqda shaqaalaha, loona dhiso suuq shaqo oo hufan oo kobcinaya horumarka dalka.

Wasiiru Dowlaha Arrimaha Dibadda XFS oo Jiddah uga qeybgalay kulanka Ururka Iskaashiga Islaamka

By

osman Dhiblawe

-

February 27, 2026

Wasiiru Dowlaha Arrimaha Dibadda XFS Mudane Cali Maxamed Cumar ayaa Magaalada Jiddah uga kulan looga hadlaayay qodobbo dhowr ah oo ay kamid ahaayeen waxqabadka ururka Ururka Iskaashiga Islaamka iyo xaaladda dadka reer Falastiin.

Kulankaasi waxaa isugu yimid Wasiirada Arimaha Dibadda ee Ururka Iskaashiga Dalalka Islaamka OIC kaas oo wadahadal dheer iyo dodo waxgal ah ,kadib laga soo saaray qodobbo muhiim ah oo taageeraya qadiyadda Falastiin,isla markaana Israel ugu baaqaya in ay joojiso dagaalada Gaza iyo barakicinta dadka reer Falastiin.

Wasiiru Dowlaha Arrimaha Dibadda iyo Iskaashiga Caalamiga JFS Mudane Cali Maxamed Cumar oo ka hadlay kulankaasi ayaa warbaahinta qaranka u sheegay in uu halkaasi ku gudbiyay mowqifka Dowladda Soomaaliya ee ku aadan taageerada dadka Falastiin iyo in la helo dowlad ay leeyihiin Falastiin.

Wasiiru Dowlaha ayaa mudadii uu socday kulankaasi waxa uula kulmay R/Wasaare ku xigeenka Pakistan,ahna Wasiirka Arrimaha Dibadda,Wasiir ku xigeenka Arrimaha Dibadda ee Sacuudi Carabiya iyo mas’uuliyiin kale.

Kulankaasi waxaa wasiiru dowlaha kala qeybgalay xubnaha joogtada ee Soomaaliya ku matalaya Ururka Iskaashiga Islaamka.

Wasiirka Warfaafinta XFS oo ka tacsiyeeyay geerida Allaha u Naxariistee Marxuum Saciid Maxamuud Axmed (Saciid SONNA)

By

osman Dhiblawe

-

February 27, 2026

Wasiirka Wasaaradda Warfaafinta, Dhaqanka iyo Dalxiiska Soomaaliya Mudane Daa’uud Aweys Jaamac ayaa dhambaal tacsi u diray qoyskii, qaraabadii, asxaabtii iyo guud ahaan ummadda Soomaaliyeed ee uu ka baxay Allaha u naxariistee Saciid Maxamuud Axmed (Saciid Sonna).

Sidoo kale tacsi taa lamid ah waxaa diraya Wasiir Ku-Xigeenka Wasaaradda Warfaafinta Mudane Cabdiraxmaan Yuusuf Cumar Al-Cadaala, Agaasimaha Guud ee Wasaaradda Mudane Cabdullaahi Xayir Ducaale iyo madaxda Waaxyaha ee Wasaaradda Warfaafinta.

Dhammaan mas’uuliyiinta wasaaradda Iyo howlwdeenada waxay Alle ka baryeen inuu marxuumka ka waraabiyo Jannatul Fardowsa, dambigiisana dhaafo, iyagoo sidoo kale qoyskiisa faray samir iyo iimaan.

Marxuumku waxa uu ahaa saxafi iyo masuul sare oo caan ka ahaa warbaahinta Soomaaliya. Waxa uu soo noqday Agaasimihii hore ee Wakaaladda Wararka Soomaaliyeed (SONNA), isaga oo door muuqda ka qaatay hoggaaminta, dib-u-habaynta iyo horumarinta wakaaladda.

Marxuum Saciid Sonna waxaa kale oo uu ka mid ahaa shaqaalihii ugu horreeyay ee lagu aasaasay SONNA, taasoo muujinaysa kaalintiisa taariikhiga ah ee dhismaha warbaahinta qaranka.

Intii uu ku jiray mihnaddiisa saxafinimo, waxa uu si weyn ugu caan baxay falanqaynta arrimaha amniga qaranka ,ka hadalka maslaxadda guud, midnimada iyo xasilloonida dalka, isaga oo raad muuqda ku reebay saxaafadda Soomaaliyeed.

INAA LILAAHI WA INAA ILEYHI RAAJICUUN.