Guddoomiyaha Hay’adda Maareynta Musiibooyinka Qaranka Soomaaliyeed ee (SoDMA), Mudane Maxamuud Macalin Cabdulle, oo ay weheliyaan Guddiga Abaaraha Galmudug, isla markaana safar shaqo oo la xiriira gurmadka abaaraha ku maraya deegaannada Galmudug, ayaa gaaray magaalada Cadaado ee gobolka Galgaduud.

Guddoomiyaha Hay’adda waxuu kulan la qaatay Guddiga Abaaraha Degmada, isagoo ka dhageystay warbixin ku saabsan xaaladda abaarta iyo saameynta ay ku yeelatay bulshada, wuxuuna ballan qaaday in Hay’addu sii xoojin doonto taageerada loo fidinayo dadka ay abaartu saameysay.

Sidoo kale, wafdiga uu hoggaaminayo Mudane Maxamuud Macalin Cabdulle ayaa u gudbay degmada Baxdo, halkaas oo uu Guddiga Abaaraha Baxdo ku wareejiyay 100 Booyadood oo biyo ah si loo gaarsiiyo qoysaska nugul ee ku nool degmada iyo deegaannada hoos yimaada.

Ugu dambeyn, Guddoomiyaha oo ku guda jira safarkiisa shaqo, ayaa qiimeyn iyo u kuurgalid ku sameeyay heerka ay abaartu u saameysay dadka xoolo-dhaqatada ah, si loo xoojiyo qorsheynta iyo dardargelinta gurmadka loo fidinayo bulshada nugul.

Taliyaha Ciidanka Xoogga Dalka Soomaaliyeed Gen. Ibraahim Maxamed Maxamuud ayaa faray dhammaan cutubyada kala duwan ee Ciidanka XDS in ay si buuxda uga qayb qaataan gurmadka iyo taakuleynta shacabka ay saameeyeen abaaraha ka jira qaybo ka mid ah dalka.

Agaasimaha Guud ee Wasaaradda Arrimaha Gudaha, Federaalka iyo Dib-u-Heshiisiinta Mudane Cabdulqaadir Cali ayaa kormeer iyo la socodka heerka shaqada ku tagay dhismaha cusub ee xarunta dhexe Wasaaradda Arrimaha Gudaha Federalka ah ee Degmada Boondheere, kaasi oo ay soo gaba-gabagabowday dib u dhiskeeda.

Intii uu booqashada ku guda jiray Agaasimaha Guud waxuu warbixin faahfaahsan ka dhageystay Injineerada gacanta ku haya howsha dhamaystirka kuwaas oo si joogto ah ula socda heerka dhismaha, baahiyada ay tahay in laga jawaabo si ugu dambeyn loogu guuro, Agaaaimaha Guud ayaa ku bogaadiyey shaqada socota isaga oo adkeeyey ahmiyadda in si degdeg lagu dhameystiro, loona qalabeeyo waxaa kale uu u mahadceliyey saxiibada caalamiga ah ee gacan ka geystay, weliba sii wada hirgelinta dhismahan.

Xarunta cusub ee Wasaaradda Arrimaha Gudaha Soomaaliya oo 35 sano burbursaneyd ayaa dib u howlgalinteeda waxay door weyn ka qaadan doontaa dardargelinta iyo tayeynta hawlaha Wasaaradda iyada oo fududeyn doonta isku-duwidda shaqada, kor u qaadi doonta hufnaanta maamulka, kana caawin doonta wasaaradda hirgelinta himilooyinkeeda iyo ujeeddooyinkeeda istiraatiijiyadeed, si adeegyo hufan oo wax ku ool ah loogu gaarsiiyo shacabka Soomaaliyeed.

Danjiraha Jamuuriyadda Federaalka Soomaaliya u fadhiya Dalka Koonfur Afrika, Maxamed Sheekh Isxaaq ayaa warqadaha aqoonsiga Safiirnimo ka guddoomay Wasiirka Arrimaha Dibada ee Dalka Botswana Dr. Phenyo Butale.

Danjire Maxamed Sheekh ayaa Wasiirka Guddoonsiiyay nuqul kamid ah warqadaha aqoonsiga Safiirnimo ee Dalka Botswana, halkaas oo uu ka noqon doono Safiir aan daganeyn.

Munaasabad kooban oo ka dhacday Xarunta Wasaaradda Arrimaha Dibada ee Dalka Botswana ayuu Danjire Maxamed Isaaq ku guddoonsiiyay Wasiirka Arrimaha Dibada Dalkaas nuqul kamid ah Warqadaha Safiirnimo, Waxaana sidoo kale uu gaarsiiyay Wasiirka salaan uu ka waday Wasiirka Arrimaha Dibadda ee Dowladda Soomaaliya.

Dhuusamareeb: Guddiga madaxa banaan ee doorashooyinka Qaranka ayaa maanta magaalada Dhuusamareeb ee caasimadda Galmudug soo gaarsiiyey Kaararka codbixiyaasha hore loo diiwaangeliyey, si la isugu diyaariyo doorashada tooska ah ee golayaasha deegaanka.

Cismaan Geelle Jaamac oo ka mid ah hawlwadeenada guddiga ayaa sheegay in kaararka codbixiyaasha laga qaybindoono degmooyinka Dhuusamareeb, Guriceel, Xeraale, Xarardheere, Cadaado iyo Gaalkacyo.

Guddiga ayaa hore doorasho toos ah uga qabtay gobolka Banaadir dhamaadka sanadkii 2025, haatana waxaa la diyaarinayaa doorashooyinka dowladaha hoose ee dowlad goboleedyada

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud ayaa kulan afur la qaatay qaar ka mid ah madaxda Ururrada siyaasadda dalka, kuwaasi oo uu kala hadlay xaaladda guud ee siyaasadda dalka iyo xoojinta hannaanka curdunka ah ee dimuqraadiyadda.

Madaxweynaha ayaa mas’uuliyiinta ka dhageystay talooyin iyo aragtiyo ku saabsan horumarinta nidaamka doorashooyinka iyo sidii loo xaqiijin lahaa ka qaybgal siyaasadeed oo loo dhan yahay, isaga oo ku booriyay in ay sii xoojiyaan wada shaqaynta, isla markaana ay si firfircoon uga qayb qaataan doorashooyinka qof iyo cod ee la qorsheynayo in laga qabto gobollada dalka.

Dhankooda, Madaxda Ururrada siyaasadda ayaa adkeeyey muhiimadda ay leedahay midnimada, wadatashiga iyo ilaalinta xasilloonida siyaasadeed, si loo xaqiijiyo dowladnimo dhameystiran iyo hannaan dimuqraadi ah oo ku dhisan rabitaanka shacabka Soomaaliyeed.

Kulanka waxaa ka qayb galay, Ra’iisulwasaare Kuxigeenka dalka, Mudane Saalax Axmed Jaamac, Wasiirka Arrimaha Gudaha Federaalka iyo Dib u heshiisiinta XFS Mudane Cali Xoosh, Wasiirka Cadaaladda iyo Dastuurka Mudane Xasan Macalin iyo Agaasimaha Guud ee Madaxtooyada Qaranka Mudane C/xakiim Maxamed Yuusuf.