MADAXWEYNE XASAN SHEEKH IYO WAFDI UU HOGGAAMINAYO OO GAARAY JABUUTI

By

-

March 11, 2026

Jabuuti- Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo wafdi uu hoggaaminayo ayaa gaaray magaalada Jabuuti ee Caasimadda dalka aan walaalaha nahay ee Jamhuuriyadda Jabuuti, halkaasi oo si diiran loogu soo dhoweeyay.

Booqashada Madaxweyne Xasan Sheekh ee dalka Jabuuti ayaa salka ku haysa aragti wadaag ku saleysan xaaladda gobolka, iskaashiga, wadajirka, danwadaagga iyo xiriirka soo jireenka ah ee ka dhexeeya labada shacab ee walaalaha ah ee Soomaaliya iyo Jabuuti.

Madaxweyne Xasan Sheekh ayaa muddada uu ku sugan yahay dalka Jabuuti, waxa uu la kulmi doona, dhiggiisa Jamhuuriyadda Jabuuti, Mudane Ismaaciil Cumar Geelle oo ay ka arrinsan doonaan xaaladaha siyaasadeed, amni iyo dhaqaale ee Gobolka, gaar ahaan danaha wadajirka ah ee ka dhexeeya Labada Jamhuuriyadood.
DHAMMAAD

Wasaaradda Cadaaladda oo Shaacisay Liiska Nootaayooyinka Sharciyeysan ee Sannadka 2026

By

osman Dhiblawe

-

March 11, 2026

Muqdisho- (Wargeyska Dalka)- Wasaaradda Cadaaladda iyo Arrimaha Dastuurka Soomaaliya ayaa si rasmi ah ula wadaagtay Dadweynaha iyo dhammaan daneeyaasha Liiska Nootaayooyinka si Sharci ah uga diiwaangashan Wasaaradda Sannadka 2026, kuwaas oo buuxiyay Shuruudaha iyo Habraacyada u degsan diiwaangelinta Nootaayooyinka.

Wasaaraddu waxay sidoo kale ku boorrisay dhammaan daneeyaasha iyo Shacabka inay la macaamilaan oo keliya Nootaayooyinka si rasmi ah u diiwaangashan, kuwaas oo loo oggolaaday bixinta adeegyada Nootaayada inta lagu jiro Sannadka 2026.

Ciidanka Xoogga Dalka Soomaaliyeed oo dib ugala wareegay Maleeshiyaadka khawaarijta Deegaanka Xawaadley

By

osman Dhiblawe

-

March 11, 2026

Muqdisho – SONNA- Ciidanka Xoogga Dalka Soomaaliyeed ayaa Howlgal Guuleystay ku xoreeyay Deegaanka Xawaadley ee Gobolka Shabeellaha Dhexe, kaas oo horey ay ugu dhuumaalaysan Jireen maleeshiyaadka Khawaarijta.

Howlgalka ayaa qeyb ka ah Hawlgalka Badar ee Bisha Barakaysan ee Ramadaan, kaas oo lagu bartilmaameedsanayo Goobaha ay Khawaarijtu ka dhigtaan Gabaad. Intii uu socday Howlgalka, waxaa la burburiyay Fariisimo iyo Bakhaarro ay Maleeshiyaadku isticmaali jireen.

Ciidamada Qaranka ayaa hadda ku howlan xaqiijinta Amniga Deegaanka, waxaana socda hawlo lagu baacsanayo Haraadiga Maleeshiyaadka iyo sifeyn lagu sameynayo Goobaha la xoreeyay.
Wasaaradda Gaashaandhigga iyo Taliska CXDS ayaa mar kale adkaynaya in Hawlgallada ka dhanka ah Khawaarijta la sii xoojin doono, si loo xaqiijiyo Amniga Shacabka, loona ciribtiro meel kasta oo ay isku dayaan inay Gabaad ka dhigtaan.

Dowladda Soomaaliya oo Mar Kale Xaqiijisay sida ay uga go’an tahay ilaalinta Xuquuqda Aadanaha

By

osman Dhiblawe

-

March 11, 2026

Geneva(Wargeyska Dalka):- Khadra Mohamed Dualle, Safiirka ahna Wakiilka Joogtada ah ee Soomaaliya u fadhiya Magaalada Geneva ee Xarunta Qaramada Midoobay , ayaa muujisay sida ay Soomaaliya uga go’an tahay Horumarinta Xuquuqda Aadanaha iyo xoojinta Iskaashiga ay la leedahay Beesha Caalamka, xilli ay ka hadlaysay kulan ka dhacay Golaha Xuquuqda Aadanaha ee Qaramada Midoobay.

Safiir Khadra ayaa sheegtay in Dowladda Federaalka Soomaaliya ay sii wadi doonto hirgelinta isbeddello lagu xoojinayo Dowladnimada, Ilaalinta Xuquuqda Aadanaha, iyo Horumarinta Barnaamijyo horumarineed oo loo dhan yahay.

Waxay sidoo kale xustay in Soomaaliya ay qiimeyso Wada-Hadalka iyo Iskaashiga ay la leedahay Dalalka Xubnaha ka ah Qaramada Midoobay iyo Hay’adaha Caalamiga ah, iyadoo tilmaantay in Iskaashigaasi uu muhiim u yahay taageeridda Dib u Dhiska iyo Horumarinta Hay’adaha Dalka.

Safiir Khadra ayaa ugu dambeyn adkaysay in Soomaaliya ay sii wadi doonto la shaqaynta Qaramada Midoobay iyo Saaxiibada Caalamka si loo xaqiijiyo Nabad, Xasillooni iyo Horumar Waara.

Wasiirka Qoyska iyo Wafdi ay hoggaamineyso oo New Yorka uga qeybgalay kulan muhiim ah

By

osman Dhiblawe

-

March 11, 2026

Wasiirka Wasaaradda Qoyska iyo Hormarinta Xuquuqul Insaanka XFS Amb Khadiija Maxamed Al-Makhzoumi iyo wafdi ballaaran oo ay hogaamineyso ayaa Soomaaliya sanadkaan uga qeybgalaya shirka sanadlaha ah ee Haweenka Aduunka,kaas oo ka dhacay magaalada New York ee dalka Mareykanka.

Wasiir Amb Khadiija Maxamed Al-Makhzoumi ayaa khudbad ay ka jeedisay shirka uga hadashay guullaha iyo hormarrada ay Dowladda Federaalka Soomaaliya ka gaartay dhinacyada Hormarinta Xuquuqul Insaanka.

Wasiirka Wasaaradda Qoyska iyo Hormarinta Xuquuqul Insaanka Soomaaliya iyo wafdigeeda ayaa kulammo kala duwan la qaatay madaxdii ka qeybggashay shirkaasi,iyadoo uga warantay dhismaha guddiga Madaxa bannaan ee Xuquuqul Insaanka Qaranka, dib u soo celinta madax bannaanida Xuquuqul Insaanka iyo guud ahaan hormarada ay ku tallaabsadeen haweenka.

Degmada Hodan oo u gudubtay wareegga 3-aad ee Tartan cilmiyeedka Ramadaan

By

osman Dhiblawe

-

March 11, 2026

Degmada Hodan oo ka tirsan Gobolka Banaadir ayaa u gudubtay wareegga 3-aad ee tartan cilimyeedka bisha ramadaan, kaddib, markii 10 dhibcood ay kaga adkaatay Degmada Diinsoor oo iyaduna heshay 8 dhibcood.

Waa sanadkii lix iyo tobnaad ee warbaahinta qaranka ay qabaneyso tartan cilmiyeedka bisha Ramadaan,kaas oo sanadkaan ay si wadajir ah u taaba-gelinayaan maamulada Bangiga IBS iyo kan Gobolka Banaadir.

Tartankaan waxaa habeen kasta laga sii daayo Warbaahinta Qaranka Soomaaliyeed, iyadoo si toos ah looga daawadaa Telefishinka Qaranka iyo sidoo kale Radio Muqdisho oo laga baahiyo.

Sanad kasta barnaamijka tartan cilmiyeedka bisha ramadaan waxaa ka qeybgala 32 degmo oo kamid ah gobolada dalka Soomaaliya,waxaana degmadii ku guuleysata tartankaasi lagu abaalmariyaa koobab,lacago iyo abaalmarinno kale sida shahaadooyin muujinaya kaalinta aqoon ee ay gaareen dhallinyarada jiilasha cusub ee soo koroya.

Gudigga Doorashooyinka Qaranka oo Matabaan ka Bilaabay Diiwaangelinta Codbixiyeyaasha

By

osman Dhiblawe

-

March 10, 2026

Degmada Matabaan ee gobolka Hiiraan ayaa si habsami leh uga bilaabatay maanta diiwaangelinta codbixiyeyaasha, taas oo ay wadaan masuuliyiinta Guddiga Madaxa Bannaan ee Doorashooyinka Qaranka.

War saxaafadeed kooban oo guddigu soo saaray ayaa shacabka ku nool degmada ku booriyey inay isdiiwaangeliyaan si ay u helaan shahaadada diiwaangelinta codbixiyeyaasha iyo kaarka rasmiga ah ee codbixinta maalinta doorashada.

“Degmada Matabaan ee gobolka Hiiraan waxaa si habsami leh uga socota diiwaangelinta codbixiyeyaasha degmada.Fadlan muwaadin, haddii aad ku nooshahay degmada Matabaan, isdiiwaangeli oo qaado shahaadada diiwaangelinta codbixiyeyaasha si aad u hesho kaarka rasmiga ah ee codbixinta maalinta doorashada” ayaa lagu yiri warka Guddiga Doorashooyinka Qaranka.

Diiwaangelintu waa tallaabo muhiim ah oo xaqiijinaysa in codbixiyeyaashu ay ka qayb qaataan doorashooyinka mustaqbalka, iyadoo la raacayo nidaamka sharciga doorashooyinka.

Muwaadiniinta waxaa lagu dhiirigelinayaa inay soo galaan xarumaha diiwaangelinta ee degmada oo ay hubiyaan in xogtooda ay sax tahay ka hor inta aan la xidhin diiwaangelinta.

Guddoomiyaha SoDMA oo sheegay in Soomaaliya u socoto dhanka Nidaamyo Xooggan oo ka jawaaba Masiibooyinka

By

osman Dhiblawe

-

March 10, 2026

Muqdisho(Wargeyska Dalka):- Guddoomiyaha Hay’adda Maareynta Masiibooyinka Qaranka, Mudane Maxamuud Macalin Cabdulle, oo uu wehliyay Agaasimaha Guud ee Wasaaradda Maaliyadda XJFS ayaa sheegay in Soomaaliya ay ka gudubtay marxaladdii doodaha iyo qorsheynta, isla markaana loo gudbay dhisidda nidaamyo rasmi ah oo wax ku ool u ah ka jawaabista masiibooyinka.

Wuxuu xusay in Soomaaliya ay si joogto ah ula tacaasho Abaaro, Colaado iyo saameynta isbeddelka cimilada, sidaas darteedna aan la dhayalsan karin khasaaraha ka dhasha dib-u-dhaca Gurmadka Masiibooyinka.

Guddoomiye Maxamuud Macalin ayaa caddeeyay in Siyaasadda Cusub ee Maareynta Masiibooyinka Qaranka ay u aqoonsatay Nidaamka Badbaadada Bulshada ee ka jawaabista Masiibooyinka (SRSP) inuu yahay qayb muhiim ah oo ka mid ah Gurmadka Qaranka, isagoo uga mahadceliyay Hay’adaha FCDO ee UK iyo WFP taageerada ay

ka geysteen dhisidda nidaamkan.

Ugu dambeyn, wuxuu ugu baaqay saaxiibada Caalamka in wixii taageero ah hada kadib lagu shubo Sanduuqa Qaranka ee Maareynta Khatarta Masiibooyinka (National DRM Fund) si loo xoojiyo awooda Qaranka, korna loogu qaado ka jawaabista Xaaladaha Bini’aadannimo ee Dalka.

Jaaliyadda Soomaalida ee Gobolka Xadarmuut oo Afur u sameeyay Safiirka Soomaaliya ee Yemen

By

osman Dhiblawe

-

March 10, 2026

Xadarmuut(Wargeyska Dalka):- Safiirka Safaaradda Soomaaliya ee Dalka Yemen C/Xakiim Maxamed Axmed ayaa gaaray Gobolka Xadarmuud ee Dalka Yemen,halkaasi oo loogu sameeyay soo dhoweyn diiran.

Safiirka ayaa ka qeybgalay Xaflad Afurin ah oo ay soo abaabuleen Jaaliyadda Soomaalida,halkaasi oo la isku weydaarsaday Warbixinno ka hadlaya xaaladda Dalka iyo Arrimaha Dadka Soomaalida ah ee ku nool Dalka Yemen.

Hadal gaaban oo uu Xafladdii Afurinta ka jeediyay Danjire C/Xakiim Maxamed Axmed waxa uu sheegay in ay matalaan Shacabka,isla markaana ay diyaar u yihiin in meel kasta ay ku qaabilaan muwaadiniinta Soomaalida ,si loogu fududeeyo adeegyada kala duwan ee ay u baahan yihiin.

Safiirka ayaa ka dhawaajiyay in Gobolka Xadarmuud ay ka bilaabi doonaan bixinta Baasaboorada iyo Dukumiintiyada kale ee lagama maaarmaanka u ah Jaaliyadda Soomaalida ee Dalka Yemen.

Xafladdaasi Afurinta ah waxaa soo qabanqaabiyay Marwo Suleeq Cumar Cali oo ka shaqeysa isku xirka Arrimaha Jaaliyadda,gaar ahaan dhaqdhaqaaqyada Bulshada iyo Horumarkooda.

Buulo burde oo ku soo baxday Tartan cilmiyeedka Warbaahinta Qaranka

By

osman Dhiblawe

-

March 10, 2026

Degmada Buulo burde oo ka tirsan Gobolka Hiiraan ayaa u gudubtay wareegga 3-aad ee tartan cilimyeedka bisha ramadaan, kaddib, markii 12 dhibcood ay kaga adkaatay Degmada Yaaqshid oo iyaduna heshay 8 dhibcood.

Waa sanadkii lix iyo tobnaad ee warbaahinta qaranka ay qabaneyso tartan cilmiyeedka bisha Ramadaan,kaas oo sanadkaan ay si wadajir ah u taaba-gelinayaan maamulada Bangiga IBS iyo kan Gobolka Banaadir.

Tartankaan waxaa habeen kasta laga sii daayo Warbaahinta Qaranka Soomaaliyeed, iyadoo si toos ah looga daawadaa Telefishinka Qaranka iyo sidoo kale Radio Muqdisho oo laga baahiyo.

Sanad kasta barnaamijka tartan cilmiyeedka bisha ramadaan waxaa ka qeybgala 32 degmo oo kamid ah gobolada dalka Soomaaliya,waxaana degmadii ku guuleysata tartankaasi lagu abaalmariyaa koobab,lacago iyo abaalmarinno kale sida shahaadooyin muujinaya kaalinta aqoon ee ay gaareen dhallinyarada jiilasha cusub ee soo koroya.