Baydhabo (Wargeyska Dalka): Hoggaamiyaha ku meel gaarka ah ee Dowlad Goboleedka Koonfur Galbeed Soomaaliya Jibriil Cabdirashiid Xaaji ayaa Aqalka Madaxtooyada ee Magaalada Baydhabo ku qaabilay Musharax Madaxweyne Maamulka Koonfur Galbeed Cabdicasiis Maxamed Sheekh Cusmaan (Jawaari).

Kulankan ayaa ahaa wadatashi siyaasadeed iyadoo labada dhinac ay ka wada hadleen xaaladda guud ee siyaasadeed, geeddi-socodka Doorashooyinka iyo muhiimadda ay leedahay in la xoojiyo wadajirka iyo xasilloonida Deegaannada.

Mudane Jibriil Cabdirashiid Xaaji ayaa soo dhoweeyay Musharaxa, isagoo adkeeyay muhiimadda ay leedahay in Doorashooyinka ay ku dhacaan jawi hufan, Caddaalad ah, isla markaana waafaqsan Shuruucda Dalka.

Musharax Madaxweyne Cabdicasiis Maxamed Sheekh Cusmaan (Jawaari) ayaa uga mahadceliyay soo dhaweynta diirran, wuxuuna carrabka ku adkeeyay sida ay uga go’an tahay ka qayb qaadashada Horumarinta Dowladnimada, Nabadda, iyo Dib-u-dhiska Soomaaliya.

Kulankaan ayaa qeyb ka ah dadaallada socda ee Hoggaamiye Jibriil ku xoojinayo wadatashiyada siyaasadeed iyo diyaar garowga Doorashooyinka Dalka.

Muqdisho,(Wargeyska Dalka):- Guddiga Doorashooyinka Madaxa Banaan iyo Soohdimaha Qaranka ayaa Maanta Diwaangalinta Codbixiyaasha ka bilaabay Deegaanka Galbarwaaqo ee Gobolka Mudug oo ka tirsan Degmada Hobyo.

Maamulka iyo qeybaha Bulshada ayaa saaka saf u galay Diwaangalinta Codbixiyaasha oo u diyaar garoobaya Doorashooyinka Qof iyo Codka alle Idinkii.

Guddiga Doorashooyinka ayaa wada dardargalinta Diwaangalinta Codbixiyaasha Deegaanada hoos yimaada Degmada hobyo.

Muqdisho,(Wargeyska Dalka):- Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud ayaa Munaasabad Casho Sharaf ah oo ka dhacday Xarunta Madaxtooyada Qaranka ku maamuusay Duubabka Dhaqanka Soomaaliyeed, kuwaasi oo isaga yimid guud ahaan Dhulka soomaaliyeed.

Madaxweynaha Jamhuuriyadda oo Odayaasha Dhaqanka ku bogaadiyey doorkooda togan ee nabadeynta, dib u heshiisiinta, Dowlad-Dhiska iyo ilaalinta Midnimada Ummadda Soomaaliyeed ayaa la wadaagay guulaha ay Dowladdu ka xaqiijisay dhinacyada Amniga, dimuquraadiyeynta, Dowlad-Dhiska iyo daadejinta Maamulka.

Madaxweyne Xasan Sheekh ayaa carabka ku adkeeyay in aan marnaba laga tanaasuli karin in Shacabka Soomaaliyeed dib loogu celiyo awoodda Doorashada hoggaamiyeyaashooda siyaasadda, isaga oo ku booriyay Hoggaanka Dhaqanka Soomaaliyeed in ay garab istaagaan hirgelinta Doorashooyinka loo dhanyahay ee Qof iyo Cod, si loo xaqiijiyo matalaad dhab ah iyo hannaan dimuqraadi ah oo hufan.

“Waxaan ku adagnahay oo aan marnaba laga tanaasulikarin in Dadka soomaaliyeed ay helaan Xuquuqdooda Dastuuriga ee Doorashada hoggaamiyaha ay doonayaan 57 sano kaddib. Doorashooyinkii aan loo dhammeyn ee Dalka kasoo dhacay waxaan ka dhaxalnay dhibaatooyin badan oo Amni-darro ugu horreysay”.

Dhankooda, qaar ka mid ah Hoggaanka Dhaqanka Soomaaliyeed ayaa Madaxweynaha uga mahadceliyey Casuumaadda iyo Maamuuska uu siiyey ayaa ku bogaadiyay guulaha muuqda ee laga gaaray Amniga, dagaalka Khawaarijta, dhismaha kaabayaasha Dhaqaalaha, dimuquraadiyeynta iyo daadajinta Maamulka.

Muqdisho,(Wargeyska Dalka):- Wasiirka Wasaaradda Qoyska iyo Horumarinta Xuquuqul Insaanka ayaa Maanta magaalada Muqdisho ku daah furtay Mashruuca Barnaamijka Wadajirka Nabadda iyo Ilaalinta Haweenka ee (WPP-II), kaas oo socon doona muddo laba sano ah.

Waxaa kulanka daah furka kalmado ka jeediyay Goerge Conwey Ku-xigeenka Ergeyga Gaarka ah ee Qaramada Midoobay ahna Iskuduwaha Bani’aadannimada iyo Deegaanka ee Xafiiska Qaramada Midoobey Marwo Anna Mutavati, Isuduwaha Bariga iyo Koonfurta Qaaradda Afrika ee Hay’adda UN Women, Madaxa Hay’adda UNDP Mr Lionel Laurens, Madaxa Barnaamijyada Hay’adda UN Women Marwo Rukia, Wasiiradda Haweenka ee DXDFS iyo Marwo Sahra oo ku hadashay magaca bulshada Rayidka, waxaana si rasmi ah u daah furay Mashruuca Wasiirka Wasaaradda Qoyska iyo Horumarinta Xuquuqul Insaanka Marwo Khadiija Maxamed Al-makhsuumi.

Mashruuca Maanta la daahfuray ayaa loogu tagalaglay in wax looga qabto guud ahaan xaqiijinta Horumarinta Arrimaha Haweenka iyo in la xoojiyo ka-qaybgalka Haweenka ee Nabad-Dhisidda, Hoggaaminta, iyo go’aan qaadashada. Sidoo kale Mashruucu wuxuu diiradda saarayaa in Haweenka lagu taageero dhaqangelinta Sharuuc, siyaasado iyo hannaan nabadeed oo ka dhigaya ka-qaybgalkooda mid muuqda oo wax ku ool ah, si loo helo Nabad waarta iyo Bulsho loo wada dhanyahay.

Mashruucan waxaa hoggaamineysa Wasaaradda Qoyska iyo Horumarinta Xuquuqda Aadanaha ee Dowladda Federaalka Soomaaliya, iyadoo ay fulinayaan UN Women iyo UNDP, isla markaana ay taageerada farsamo ay bixinayso UNTMIS, waxaana Wajigiisa labaad ee Mashruucan uu ka dhashay casharradii iyo guulihii laga bartay wejigii koowaad, waxaana lagu xoojinayaa isku-duwidda hawlaha muhiimka ah ee ku saabsan Horumarinta Arrimaha Haweenka ee heer federaal iyo heer Dowlad-Goboleed, iyadoo kor loo qaadayo doorka Haweenka iyo adkaynta nidaamyada ilaalinta iyo ka hortagga xadgudubyada ka dhanka ah Haweenka.

Dhinaca kale Mashruucan waxaa uu si toos ah u gaari doonaa 6,000 oo Qof, halka saameyntiisa guud ay gaari karto ilaa 42,000 oo Qof, iyadoo mudnaan gaar ah la siinayo, gabdhaha, Dumarka Naafada ah, Dadka laga tirada badan yahay, iyo Barakacayaasha.

Mashruuca Waxaa laga fulin doonaa guud ahaan Dalka oo dhan muddo 24 bilood ah, taas oo ka dhigaysa Mashruuc leh saameyn Qaran oo xooggan oo kuna wajahan Nabad, Caddaalad, iyo xoojinta Xuquuqda Haweenka Soomaaliyeed.

Muqdisho,(Wargeyska Dalka):- Guddiga Doorashooyinka Qaranka iyo Soohdimaha ayaa soo saaray Warsaxaafadeed ku saabsan kordhinta muddada kama-dambeysta ah ee soo gudbinta Liisaska musharaxiinta iyo cayimidda Maalinta Doorashada Dowlad Goboleedka Koonfur Galbeed.