Wasaaradda Arrimaha Gudaha XJFS oo Maamul Cusub u magacawday Degmada Waajid

By

-

March 24, 2026

Muqdisho, 24 Maarso 2026 — Wasaaradda Arrimaha Gudaha, Federaalka iyo dib u heshiisiinta ee Xukuumadda Federaalka Soomaaliya (JXFS) ayaa si rasmi ah u magacawday Maamulka Cusub ee Degmada Waajid ee Gobolka Bakool.

Wareegto ka soo baxday Wasaaradda Arimaha Gudaha oo ku Taariikheysan 24-ka Maarso 2026 ayaa lagu sheegay in magacaabistan ay timid kadib qiimeyn lagu sameeyay xaaladda siyaasadeed iyo amni ee Deegaannada Koonfur Galbeed Soomaaliya, iyo sidoo kale talooyin ay soo jeediyeen Odayaasha Dhaqanka ee Degmada Waajid.

Maamulka cusub ee Degmada Waajid ayaa loo magacaabay sidan:
Xasan Cabdi Isaaq (Bootoole) ayaa loo magacaabay Guddoomiyaha Degmada Waajid.
Maxamed Cabdiraxmaan Maxamed (Jugle) ayaa loo magacaabay Guddoomiye ku-xigeenka 1-aad ee Amniga iyo Siyaasadda.
Aadan Cali Kulow ayaa loo magacaabay Guddoomiye ku-xigeenka 2-aad ee Arrimaha Bulshada.
Ayaanle Cabdi Dhuux Yare ayaa loo magacaabay Xoghayaha Dowladda Hoose.

Wasaaradda ayaa fartay mas’uuliyiinta la magacaabay in ay si degdeg ah ula wareegaan xilalkooda, isla markaana si hufan u maamulaan adeegyada iyo Arrimaha Bulshada ee degmada.

Sidoo kale, odayaasha dhaqanka iyo dhammaan dhinacyada ay khusayso ayaa lagu wargeliyay in ay taageeraan hirgelinta maamulka cusub si loo xaqiijiyo xasillooni iyo horumar ka hirgala Degmada Waajid.

Magacaabistan ayaa dhaqan gashay isla marka uu saxiixay Wasiirka Arrimaha Gudaha, Federaalka iyo Dib u Heshiisiinta JXFS Xil. Cali Yusuf Cali-Xoosh.

Tababar Aqoon kororsi oo ku saabsan hababka beerashada wanaagsan ee Dalagyada muhiimka oo Magaalada Muqdisho ka socda

By

osman Dhiblawe

-

March 24, 2026

Muqdisho(Wargeyska Dalka):- Agaasimaha Guud ee Wasaaradda Beeraha iyo Waraabka JFS. Eng.Maxamed Xassan Cabdulle ayaa furay Tababar Aqoon Kororsi ah oo ku saabsan Hababka Beerashada wanaagsan ee Dalagyada muhiimka u ah Shacabka Soomaaliyeed.

Tababarkaan oo socon doona 23-ka ilaa 27-ka March,waxaa ujeedku yahay in la xoojiyo Aqoonta iyo Xirfadaha Shaqaalaha,gaar ahaan kuwa qaabilsan fidinta Beeraha ,si loo kobciyo wax soosaarka Cuntada ee joogtada ah, iyadoo la adeegsanaayo nidaamyo beerasho oo adkaysi leh.

Tababarkaan waxaa mudada uu socda ka faa’ideysan doona Shaqaalaha fidinta Beeraha ee Wasaaradda Beeraha iyo Hay’adaha kale ee ka shaqeeya fidinta Seeraha,kuwaas oo iyaguna sii tababari doona Beeraleyda Dalka.

Barnaamijkaan waxaa iska kaashanaya Wasaaradda Beeraha, Jaamacadda Ummadda Soomaaliyeed iyo dalladda SomRep oo ay ku mideysan yihiin Hay’ado Caalami ah oo ka shaqeeya Horumarinta Beeraha.

Wasaaradda ganacsiga oo dhiirrigalinaysa kordhinta wax-soosaarka gudaha

By

osman Dhiblawe

-

March 23, 2026

Wasiirka wasaaradda ganacsiga iyo warshadaha dowladda FS mudane Jamaal Maxamed Xassan ayaa sheegay in wasaaraddu gacanta ku hayso siyaasad diyaarinta siyaasad jihaynaysa kordhinta wax-soosaarka gudaha dalka, si sare loogu qaado iskufilnaasha dalka.

Wasiirka ayaa xusay in dalka loo soo dhoofiyo waxyaabo badan oo gudaha laga soo saari karo, si taas looga jawaabaya Wasaaradda ganacsigu ay diiradda saarayso kordhinta wax-soosaarka warshadaha, taas oo dhinaca kale abuuraysa fursado shaqo oo ballaaran.

“Xoolaha la dhoofinayo in loo badalo hilib, neefka marka la qalo maqaarka waxbaa laga samayn karaa, lafahana waxbaa laga samayn karaa, halkaas shaqo abuur baa kandhalanaya” ayuu yiri wasiir Jamaal.

Sidoo kale, Wasiirka ayaa xusay in Soomaaliya ay haysato fursado badan oo ka saacidaya inay wax-soosaarkeeda gudaha kobciso maadaama ay haysato suuqa weyn ee EAC ee dhowaan dalku ku biiray iyo suuqyada kale ee caalamka oo dalab badan uu ka jiro.

MADAXWEYNE XASAN SHEEKH OO KA TACSIYEEYAY GEERIDA MARXUUM MAXAMED FAARAX JIIS

By

osman Dhiblawe

-

March 23, 2026

Muqdisho(Wargeyska Dalka);-Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud ayaa Tacsi tiiraanyo leh u diray Qoyska, Ehellada iyo guud ahaan Ummadda Soomaaliyeed ee uu ka baxay Alle ha u Naxariistee Marxuum Maxamed Faarax Jiis oo ka mid ahaa Haldoorka Ganacsatada Soomaaliyeed.

Madaxweynaha ayaa sheegay in Marxuumku uu door muuqda ka soo qaatay dadaalladii lagu xoojinayay Nabadda, dib u dhiska Dowladnimada iyo Horumarinta Dhaqaalaha Dalka, isaga oo ku suntanaa Waddaniyad, karti iyo dadaal joogto ah oo uu ugu soo adeegayay Bulshada Soomaaliyeed.

“Waxaan guud ahaan Ummadda Soomaaliyeed, gaar ahaan Qoyskiisa uga Tacsiyeynaa Geerida Naxdinta leh ee ku timid, Alle ha u Naxariistee Ganacsade Maxamed Faarax Jiis oo ka mid ahaa Haldoorka Waddaniyiinta ah ee Dhaqaalahooda u huray Nabadeynta, dibu dhiska Dalka, isku-keenidda Bulshada kala irdhowday iyo xoojinta Dowladnimada Soomaaliyeed.”

Madaxweyne Xasan Sheekh Maxamuud ayaa Alle u weydiiyay Marxuumka in uu Hoygiisa ka dhigo Jannatul Firdowsa, Samir iyo Iimaanna ka siiyo Qoyskii, Eheladii iyo dhammaan Shacabka Soomaaliyeed ee uu ka geeriyooday.

Ciidanka Xoogga Dalka Soomaaliyeed oo Howlgal Qorsheysan ka fuliyay Gobolka Shabeellaha Dhexe

By

osman Dhiblawe

-

March 23, 2026

Muqdisho(Wargeyska Dalka);-Ciidanka Xoogga Dalka Soomaaliyeed, gaar ahaan Kumaandooska Gorgor, ayaa Howlgal Qorsheysan ka fuliyay Deegaanno hoos yimaada Warciise ee Gobolka Shabeellaha Dhexe, kaas oo lagu beegsaday Maleeshiyaadka Khawaarijta.

Howlgalkan oo qayb ka ah dadaallada joogtada ah ee lagu Ciribtirayo Kooxaha Argagixisada ayaa lagu beegsaday firxadka Khawaarijta ee ku dhuumaaleysanayay Deegaannadaasi.

Taliyaha Ururka 195-aad ee Guutada 19-aad, Dhamme Maxamed Cumar Dufaan, ayaa Warbaahinta Ciidamada u sheegay in ujeedka Howlgalka uu ahaa baacsiga iyo wiiqidda awoodda Maleeshiyaadka Khawaarijta, kuwaas oo dhibaato ku haya Shacabka ku nool Gobolka.

In ka badan 1,100 Qoys ayaa ka faa’iideystay Deeq Raashin ah oo la gaàrsiiyay

By

osman Dhiblawe

-

March 23, 2026

Muqdisho(Wargeyska Dalka);-In ka badan 1,100 Qoys ayaa ka faa’iideystay Deeq Raashin ah oo lagu qaybiyay Deegaanno hoostaga Degmada Guriceel ee Gobolka Galgaduud.

Deeqdan Raashiinka ah ayaa la gaarsiiyay Qoysaska ay Abaaruhu saameeyeen, kuwaas oo ku nool Tuulada Cal Xasan iyo Deegaanno kale oo hoostaga Degmada Guriceel. Gurmadkan oo isugu jira Biyo-dhaamin iyo Raashin ayaa ah Wajiga Labaad ee howlaha Gurmadka ee laga fulinayo Deegaanno badan oo ka tirsan Galmudug, halkaas oo Abaartu si weyn u saameysay Bulshada.

Boqolaal Qoys oo Danyar ah ayaa ka faa’iideystay Gurmadkan, iyadoo qaar kamid ah Qoysaskaasi ay si weyn uga mahadceliyeen Deeqda la soo gaarsiiyay.

Maalmihii u dambeeyay, Deegaannada Galmudug waxaa ka socday dadaallo Gurmad oo lagu caawinayo Qoysaska ku nool Miyiga ee ay Abaaruhu saameeyeen.

Xilheynta xilalka heer gobolka iyo degmo ee maamulka K/Galbeed

By

osman Dhiblawe

-

March 23, 2026

Wasaaradda Arrimaha Gudaha, Federaalka iyo Dib-u-Heshiisiinta Dowladda Soomaaliya ayaa war rasmi ah ka soo saartay xilheynta xilalka maamullada heer gobol iyo heer degmo ee Dowlad gobolleedka Koonfur Galbeed Soomaaliya.

Halkan hoose akhriso war-saxaafadeedka:-

DF oo shacabka Soomaaliyeed ku wargelisay inuu dalka galayo marxalad Doorasho loo dhan yahay

By

osman Dhiblawe

-

March 22, 2026

Wasaaaradda Arrimaha Gudaha, Federaalka iyo Dib-u-heshiistinta ee (DFS) waxay si rasmi ah ugu wargelinaysaa shacabka Soomaaliyeed in dalku uu galayo marxalad doorasho loo dhan yahay, daahfuran, saldhigeeduna yahay shuruucda dalka.

Doorashadu waa xaq dastuuri ah oo muwaadin kasta leeyahay, isla markaana door muhiim ah ka qaata kalsoonida dadweynaha, kor u qaadista hufnaanta iyo ka qaybgalka bulshada in ay doortaan cidda ku matalaysa hey’adaha kala duwan ee heerarka dawladda.

Wasaaaradda Arrimaha Gudaha, Federaalka iyo Dib-u-heshiisiintu waxay caddeyneysaa in geeddi-socodka doorashooyinku uu yahay mid toos ah, xor iyo xalaal ah (free and fair), kuna saleysan mabaadi’da dimuqraadiyadda, isla xisaabtanka iyo ilaalinta xuquuqda muwaadiniinta.

Sidoo kale, Wasaaradda Arrimaha Gudaha, Federaalka iyo Dib-u-heshiisiintu waxay xaqiijinaysaa in dhammaan hay’adaha ku shaqada leh geeddi-socodka doorashooyinka ay dhowaan gudan doonaan waajibaadkooda si waafaqsan shuruucda dalka.

Ugu dambeyn, Dowladda Federaalka Soomaaliya waxay mar kale ku celinaysaa ka go’naashaheeda ku aaddan xoojinta dowladnimada, dimugraadiyadda iyo hirgelinta nidaam doorasho oo hufan.

Guddoomiyaha Golaha Shacabka BFS, oo Kulan La Qaatay Odayaasha Dhaqanka ee Koonfur Galbeed.

By

osman Dhiblawe

-

March 22, 2026

Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya, Mudane Sheekh Aadan Maxamed Nuur (Madoobe), ayaa kulan la qaatay odayaasha dhaqanka iyo waxgaradka Koonfur Galbeed. Kulanka ayaa looga hadlay xaaladda ka taagan deegaanada Dowlad Goboleedka Koonfur Galbeed.

Odayaasha dhaqanka ayaa Guddoomiyaha Golaha Shacabka la wadaagay xaaladaha ka jira deegaanada maamulka Koonfur Galbeed, iyagoo xusay muhiimadda ay leedahay in xal waara laga gaaro dhibaatooyinka halkaas ka jira.

Guddoomiyaha Golaha Shacabka, Mudane Sheekh Aadan Maxamed Nuur (Madoobe), ayaa ugu horreyn uga mahadceliyey odayaasha kaalintooda ku aaddan horumarka deegaanadaasi, wuxuuna ku boorriyey in ay sii xoojiyaan doorkooda ku aaddan adkeynta dowladnimada iyo horumarinta deegaanada Dowlad Goboleedka Koonfur Galbeed.

Kulanka waxaa sidoo kale ka qeyb galay Wasiirka Wasaaradda Dekadaha iyo Gaadiidka Badda, Mudane Cabdulqaadir Maxamed Nuur (Jaamac), iyo xildhibaano ka tirsan Golaha Shacabka ee Baarlamaanka Jamhuuriyadda Federaalka Soomaaliya.

Xulka Qaranka Soomaaliya ee Kubadda cagta oo dalka Mozambique u amba-baxay

By

osman Dhiblawe

-

March 21, 2026

Xiddigaha Xulka Qaranka Soomaaliya ee kubadda Cagta ayaa maanta ka ambabaxay garoonka diyaaradaha ee Aaden Cadde International Airport, iyagoo ku sii jeeda caasimadda Dalka Mozambique ee Maputo.

Safarka Xulka ayaa qeyb ka ah diyaar garowga kulanka muhiimka ah ee ay la ciyaari doonaan dhigooda Mauritius, kaas oo ka tirsan kulamada Hordhaca ah ee isreeb-reebka tartanka AFCON 2027, Ciyaartan oo la qorsheeyay inay dhacdo 27-ka bishan, ayaa ah mid muhiim u ah rajada Xulka Soomaaliya ee u soo bixista tartanka Qaramada Afrika, iyadoo ciyaartoydu ay muujiyeen diyaar garow wanaagsan iyo kalsooni sare ka hor safarkooda.

Xidigaha Ocean Stars ee maanta safray oo ah kuwa laga soo xulay gudaha Dalka ayaa la midoobi doona ciyaartoy ka imaan doonta Dibadda, kuwaas oo uu waajibaadka xulka ugu yeeray tababare Yuusuf Cali Nuur Yuu Cali.