Golaha Wasiirada XFS oo ansixiyay magacaabista Danjire Nuur Maxamuud Sheekh

By

-

April 13, 2026

Golaha Wasiiradda XJFS ayaa kulankoodii maanta cod aqlabiyad ah ku ansixiyay magacaabis Danjire , xilkaas oo loo magacaabay Mudane Nuur Maxamuud Sheekh , kadib soojeedinta Wasaaradda Arrimaha Dibedda iyo Iskaashiga Caalamiga ah .

Mudane Nuur ayaa horey xilal sarsare uga soo qabtay urur goboleedka IGAD, ahna dublumaasi xirfad sare u leh xiriirka caalamiga ah.

Ra’iisul Wasaare Xamsa Cabdi Barre oo ansixinta golaha kadib hadlay ayaa sheegay in kaadirka aqoonta durugsan u leh dublumaasiyadda uu xoojinayo siyaasadda Arrimaha Dibedda ee Soomaaliya, isaga oo Mudane Nuur u rajeeyay guul iyo xil-gudasho hufan.

Diiwaangelinta codbixiyeyaasha Doorashooyinka oo laga daahfuray Mahadaay

By

osman Dhiblawe

-

April 13, 2026

Guddiga Doorashooyinka Qaranka iyo Soohdimaha ayaa degmada Mahadaay ee gobolka Shabeellaha dhexe ka daah-furay diwaangelinta cod-bixiyeyaasha doorashooyinka qof iyo codka ah.

Shacab badan ayaa safaf dhaadheer u galay si u qaataan kaarka codbixinta, islamarkaana u doortaan mas’uuliyiinta hoggaamin lahayd.

Guddiga Madaxa Bannaan ee Doorashooyinka Qaranka iyo Soohdimaha ayaa ayaa dadaal xooggan gelinaya sidii doorashada qof iyo codka looga qaban lahaa dalka, waxaana agabka doorashada la geeyay meelo badan oo ka mid ah dalka si ay shacabka codkooda uga ciilbaxaan.

Golaha wasiirada oo ansixiyey agaasimaha cusub ee hay’adda socdaalka

By

ibrahim

-

April 13, 2026

Muqdisho (WARGEYSKA DALKA): Golaha Wasiirrada Xukuumadda Federaalka Soomaaliya oo maanta yeeshay kulan aan caadi ahayn ayaa lagu ansixiyey Agaasimaha Guud ee Hey’adda Socdaalka iyo Jinsiyadda, kaasi oo loo magacaabay Mudane Xuseen Khaasim Yuusuf, kadib soojeedinta Wasaaradda Amniga Gudaha JFS.

Kulanka golaha oo uu guddoomiyey Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa lagu soo bandhigay warbixinno ku saabsan amniga dalka iyo howlgallada ciidamada qalabka sida ay ku ciribtirayaan kooxaha Khawaarijta ah,deegaanka iyo dhir-beerista.

Golaha, ayaa ansixiyey Xeer-nidaamiyaha Cafiska Guud, kaasi oo aysoo gudbisay Wasaaradda Caddaaladda iyo Arrimaha Dastuurka Xukuumadda Federaalka Soomaaliya.

Ugu dambayn. Golaha Wasiirrada ayaa Darajada Safiirnimo u dalacsiiyey Mudane Nuur Maxamuud Sheekh, kadib soo jeedinta Wasaaradda Arrimaha Dibadda XFS.

Soomaaliya iyo Shiinaha oo ka wada hadlay xoojinta iskaashiga labada dal

By

ibrahim

-

April 13, 2026

Muqsisho(WARGEYSKA DALKA);-Wasiirka Wasaaradda Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya Mudane Abdisalam Ali, ayaa kulan wadahadal ah kula yeeshay xarunta Wasaaradda Ergayga Gaarka ah ee Shiinaha u qaabilsan Geeska Afrika, Mudane Hu Changchun.

Kulankaas ayaa diiradda lagu saaray isla markaasna si qotada dheer loogu falaanqeeyay muhiimadda istaraatiijiyadeed ee xiriirka laba geesoodka ah ee u dhexeeya labada dal.

Dhinaca Wakiilka Shiinaha ayaa mar kale caddeeyay taageeradiisa adag ee madax-bannaanida, midnimada, iyo wadajirka dhuleed ee Soomaaliya, iyadoo sidoo kale la xusay xiriirka taariikhiga ah ee labada dal iyo muhiimadda juqraafiyeed ee Soomaaliya oo ah marin istaraatiiji ah oo muhiim u ah ganacsiga iyo isku xirka caalamiga ah.

Dowladda Soomaaliyeed yaa dhankeeda ku celisay sida ay uga go’an tahay xoojinta xiriirka laba geesoodka ah iyo ballaarinta iskaashiga dhinacyada muhiimka ah.

Shiinaha ayaa isna muujiyay diyaar u ahaanshihiisa inuu si dhow ula shaqeeyo Soomaaliya si loo hormariyo danaha wadajirka ah, loona taageero dadaallada ay Soomaaliya hoggaamineyso, isla markaana loo xoojiyo iskaashiga arrimaha nabadda iyo amniga, gaar ahaan goobaha iskaashiga caalamiga ah.

Labada dhinac ayaa sidoo kale ka wada hadlay ballaarinta iskaashiga dhinacyada kalluumeysiga iyo dhaqaalaha buluugga ah, iyagoo aqoonsaday muhiimadda ay u leeyihiin kobaca dhaqaale ee waara iyo ka faa’iideysiga khayraadka badda ee ballaaran ee Soomaaliya.

Diiwaangelinta Codbixiyeyaasha Doorashooyinka oo laga Daah-furay degmada Galcad

By

ibrahim

-

April 13, 2026

Masagawaay(WARGEYSKA DALKA):-Maamulka iyo shacabka magaalada Masagawaay ee degmada Galcad ayaa si weyn ugu qulqulaya goobaha laga wado diiwaangelinta codbixiyeyaasha doorashooyinka dadweynaha.

Guddiga Madaxa-bannaan ee Doorashooyinka Qaranka iyo Soohdimaha ayaa maanta si rasmi ah uga daah-furay magaalada Masagawaay diiwaangelinta codbixiyeyaasha doorashada qof iyo codka ah, taas oo qeyb ka ah dadaallada lagu hirgelinayo nidaamka dimuqraadiyadeed ee dalka.

Munaasabadda daah-furka waxaa si rasmi ah u furay Guddoomiyaha degmada Galcad, Cismaan Cariif, oo ay wehliyaan masuuliyiinta maamulka Masagawaay. Masuuliyiintan ayaa iyaguna iska diiwaangeliyay xarumaha diiwaangelinta, iyagoo bulshada ku dhiirrigeliyay ka qeyb qaadashada howlaha doorashooyinka.

Qeybaha kala duwan ee bulshada deegaanka ayaa si weyn uga qeyb qaadanaya isdiiwaangelinta, iyagoo muujinaya farxad iyo diyaar garow ku aaddan ka qeybgalka doorashooyinka tooska ah ee qof iyo codka ah.

Maamulka degmada Galcad ayaa ugu baaqay shacabka in ay si firfircoon isu diiwaangeliyaan, si ay uga qeyb qaataan doorashada cidda hoggaamniyasana ay iyaga soo doortaan, si loo xoojiyaan hannaanka dimuqraadiyadeed ee dalka.

Ololaha todobaadka dhir beerista oo ka billaawday Muqdisho

By

ibrahim

-

April 13, 2026

Muqdisho(Wargeyska Dalka);-Wasiirka Wasaaradda Beeraha iyo Waraabka ee JFS, Maxamed Cabdi Xayir (Maareeye), ayaa maanta xarunta Wasaaradda ku soo dhaweeyay dhigiisa Wasiirka Wasaaradda Deegaanka iyo Isbeddelka Cimilada Bashir Mohamed Jama (Bashiir Goobe), Wasiirka Wasaaradda Ganacsiga iyo Warshadaha Jamal Mohamed Hassan iyo Xildhibaano kuwaas oo si wadajir ah uga qeyb qaatay beerista dhir lagu qabtay xarunta Wasaaradda.

Beerista dhirtaan ayaa qeyb ka ah ololaha qaran ee dhir beerista, kaas oo lagu dhiirigelinaayo ilaalinta deegaanka, yareynta xaalufinta dhirta, iyo dib u soo celinta bilicda cagaaran ee dalka.

Mas’uuliyiintaan ayaa xusay in beerista dhirta ay door muhiim ah ka qaadato ilaalinta deegaanka iyo la qabsiga isbeddelka cimilada, iyagoo bulshada ku boorriyay inay ka qeyb qaataan dadaallada lagu kordhinaayo dhirta iyo cagaarnaanta dalka.

Ololahaan ayaa muujinayo sida ay dowladda uga go’an tahay xoojinta wada shaqeynta Wasaaradaha si loo ilaaliyo deegaanka, loona abuuro mustaqbal cagaaran.

𝐌𝐀𝐀𝐌𝐔𝐋𝐊𝐀 𝐆𝐎𝐁𝐎𝐋𝐊𝐀 𝐁𝐀𝐍𝐀𝐀𝐃𝐈𝐑 𝐎𝐎 𝐃𝐀𝐀𝐇-𝐅𝐔𝐑𝐀𝐘 𝐌𝐀𝐒𝐇𝐑𝐔𝐔𝐂𝐀 𝐒𝐈𝐍𝐍𝐀𝐀𝐍

By

ibrahim

-

April 13, 2026

𝐌𝐮𝐪𝐝𝐢𝐬𝐡𝐨(Wargeyska Dalka):-Guddoomiye Kuxigeenka Howlaha Guud ee Maamulka Gobolka Banaadir Mudane Cabdimajiid Daahir Aadan, ayaa maanta si rasmi ah u daah-furay mashruuca SINNAAN, oo ah mashruuc diiradda saaraya xoojinta kaabayaasha aasaasiga ah, horumarinta qorsheynta magaalada, iyo tayeynta waaxaha injineeriyadda ee Gobolka Banaadir, si loo dhiso nidaam casri ah oo waara.

Mashruucan ayaa sidoo kale waxa uu fursad u yahay in la dardargeliyo adeegyada bulshada, islammarkaana kor loo qaado tayada dhismayaasha, lana xoojiyo iskaashiga hay’adaha kala duwan ee ka shaqeeya horumarinta caasimadda iyo in loo guuro nidaam digital ah oo casri ah, si loo soo jiito maalgashi caalami ah oo kor u qaada kobaca iyo horumarka magaalada.

Guddoomiye Kuxigeenka Howlaha Guud ee Maamulka Gobolka Banaadir Mudane Cabdimajiid Daahir Aadan, ayaa sheegay in mashruucan uu door muuqda ka qaadan doono dhismaha Muqdisho casri ah oo ammaan ah, qurux badan, isla markaana u adkeysan karta caqabadaha mustaqbalka.

Guddoomiyaha Gobolka Banaadir oo qaabilay Xildhibaan Faarax Macallin iyo wafdi la socday

By

ibrahim

-

April 13, 2026

Muqdisho(Wargeyska Dalka):- Guddoomiyaha Maamulka Gobolka Banaadir ahna Duqa Muqdisho, Xasan Maxamed Xuseen (Muungaab), ayaa caawa hoygiisa ku qaabilay Faarax Macallin oo ka tirsan Baarlamaanka dalka Kenya iyo wafdi uu hoggaaminayo oo booqasho ku jooga Soomaaliya.

Munaasabadda casho-sharafta oo si heer sare ah loo soo agaasimay ayaa waxaa ka soo qaybgalay xildhibaanno ka tirsan labada Aqal ee Baarlamaanka Federaalka Soomaaliya, wasiirro heer federaal ah, Guddoomiye Ku-xigeenka Amniga iyo Siyaasadda Maamulka Gobolka Banaadir Maxamed Axmed Diiriye (Yabooh), siyaasiyiin iyo odayaal dhaqan.

Kulanka ayaa ujeeddadiisu ahayd soo-dhoweyn sharafeed iyo is-xogwaraysi, iyadoo intii uu socday ay ka qaybgalayaashu si guud isaga wareysteen xaaladda dalka Soomaaliya iyo arrimo la xiriira xiriirka mandiqadda Geeska Afrika iyo Bariga Afrika.
Guddoomiyaha Gobolka Banaadir, Dr. Xasan Maxamed Xuseen (Muungaab), ayaa munaasabadda ka xusay muhiimadda ay leedahay xoojinta wadashaqeynta iyo is-dhexgalka bulshada.

Ugu dambeyn, mas’uuliyiinta uu hoggaaminayay Xildhibaan Faarax Macallin ayaa bogaadiyay doorka hoggaanka Gobolka Banaadir ee horumarinta caasimadda iyo xoojinta cilaaqaadka bulshada Soomaaliyeed.

R/W Xamsa “Maanta shuruucdii adduunka waa dhammaatay,dalna ma jiri karo haddii uusan lahayn awood ciidan oo looga cabsado”

By

osman Dhiblawe

-

April 13, 2026

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa caawa ka qayb galay munaasabad lagu maamuusayay sanadguurada 66-aad ee ka soo wareegtay aas-aaska Ciidanka Xoogga Dalka Soomaaliyeed, taas oo lagu qabtay Taliska Taakuleynta Ciidanka XDS ee Villa Baydhabo.

Ra’iisul Wasaaruhu, waxa uu hoosta ka xarriiqay in dal aan lahayn ciidan awood leh uusan yeelan karin sharaf iyo karaamo, isaga oo carrabka ku adkeeyay baahida loo qabo dhismaha ciidan leh awood iyo caqiido wanaagsan oo ilaaliya diinta, dadka iyo dalka.

Ra’iisul Wasaaraha waxa uu hambalyo ku aaddan munaasabaddan u diray saraakiisha, saraakiil-xigeennada, alifleyda, dableyda Ciidanka iyo qoysaskooda. Isaga oo xusay in sugidda amniga xudduudaha dalka ay tahay tiirka koowaad ee amniga, isla markaana dal aan xudduudihiisa la ilaalin uu la mid yahay guri furan oo alaab qaali ah taallo cid walbana hunguri ka galayo.

Mudane Xamsa, ayaa bogaadiyay guulaha ay Ciidanka Xoogga Dalka Soomaaliyeed ka gaareen dagaalka ka dhanka ah cadowga Khawaarijta ah, gaar ahaan gobollada Bay, Bakool, Shabeellaha Hoose, Shabeellaha Dhexe iyo Jubbada Hoose, halkaas oo lagu gaarsiiyay jab weyn. Waxa uu sidoo kale mahadcelin u jeediyay taageerada caalamiga ah ee saaxiibbada Soomaaliya ay siiyaan ciidanka.

Ugu dambeyn, Ra’iisul Wasaaraha ayaa tilmaamay muhiimadda daryeelka agoonta, naafada iyo howlgabka ciidanka, isaga oo xusay in maanta la dhagax-dhigay xarun lagu daryeelayo, isla markaana la aas-aasay hay’ad u adeegta, si loo xaqiijiyo xuquuqdooda iyo daryeelkooda, taas oo mudnaanta koowaad u leh Xukuumadda DanQaran.

Munaasabadda oo ay si weyn uga soo qeybgaleen wasiiradda xukuumadda Dan Qaran ayaa abaalmarinno lagu guddoonsiiyay saraakiisha ciidanka, kuwaas oo ku muteystay sababo kale duwan, iyada si gaar ah loo maamuusay kooxda ciidanka ee Heegan oo goobta kusoo bandhigtay suugaan waddani ah.

Hoggaamiyaha KMG ah ee maamulka K/Galbeed oo la kulmay saraakiisha amniga

By

osman Dhiblawe

-

April 13, 2026

Hoggaamiyaha ku-meel gaarka ah ee Dowlad Goboleedka Koonfur galbeed Soomaaliya Mudane Jibriil Cabdirashiid Xaaji Cabdi, ayaa Aqalka Madaxtooyada iskugu yeeray Saraakiisha amniga ee ka howlgala Deegaanada Maamulka DKGS, Isagoo Faray inay dib uga howlgalaan Amaniga Nabadeynta Koonfur Galbeed.

Shirkaan waxaa ka soo qeybgalay Agaasimaha hay’adda sirdoonka iyo nabad sugidda qaranka Soomaaliyeed ee (NISA) Mahad Maxamed Salaad, Taliyaha Ciidanka Booliska Soomaaliyeed Sarreeye Guuto Asad Cismaan Cabdullaahi,, Wasiirka Wasaarada amniga ee (DGKS) Maxamed Xuseen Xasan, Guddoomiyaha degmada Baydhabo ahna duqa Magaalada Cabdullahi Cali Watiin, Ciidanka Daraawiishta iyo Booliska Maamulka Koofur galbeed, iyagoo isla gartay in si deg-deg ah looga wada shaqeeyo Xaalada guud ee Amniga dalka.

Hoggaamiyaha KMG Jibriil Cabdirashiid oo ku dheeraaday dhageesiga iyo Guulaha laga gaaray Kooxaha Nabad-diidka ee Khawaarinta, ayaa boggaadiyey Ciidamada Qaranka iyo Kuwa deegaanka oo dadaal Adag ku bixiyay sidee ay Shacabka Soomaaliyeed gaar ahaan Bulshada ku dhaqan Koofur galbeed u heli lahaayeen Nabad iyo Xasillooni Warta.