Addis Ababa- Safiirka Jamhuuriyadda Federaalka Soomaaliya ee Ethiopia mudane Cabdullaahi Maxamed Warfaa ayaa Addis Ababa kula shiray kaaliyaha xoghayaha guud ee Qaramada Midoobay H.E Atul Khare iyo madaxa qaybta taageerada ee UNSOS H.E. Amb Aisa Kacyira.

Ugu horrayn danjire Warfaa ayaa mas’uuliyiintan warbixin guud ka siiyay xaaladda Soomaaliya, isagoo u caddeeyey in madaxda iyo bulshada Soomaaliyeed oo kaashanaya ciidanka xoogga dalka ay dedaal ugu jiraan xasilinta dalka iyo xaalufinta khawaarijta, isla markaana laga gaaray guulo waaweyn.

Kulankan ayaa sidoo kale lagu falanqeeyey dhowr arrimood oo muhiim u ah horumarka Soomaaliya oo ay ka mid yihiin xasiloonida, nabad-gelyada gobolka geeska africa iyo xoojinta taageerada joogtada ah ee aan gaabiska lahayn oo ay UNSOS la garab taagan tahay Soomaaliya.

Safiir Warfaa iyo xoghaye Atul ayaa si guud la isula qaatay in la dar-dar geliyo taageerada ay hay’adaha Qaramada midoobay gaar ahaan UNSOS siiyaan Soomaaliya.

Wasiirka Arrimaha Gudaha, Federaalka iyo Dib u heshiisiinta mudane Axmed Macalin Fiqi oo uu wehliyo mudane Cabdiraxmaan Cagaweyne oo ah xildhibaan ka tirsan golaha shacabka ee BF iyo  maamulka degmada Xarardheere ayaa maanta kormeeray goobo badan oo loogu adeego bulshada sida Isbitaalka, iskuulka,  saldhigga degmada iyo meelo kale.

Wasiirka Arrimaha Gudaha iyo Mas’uuliyiinta la socotay ayaa waxaa ay u kuurgaleen xaaladda goobahaasi, iyaga oo dhageystay qaabka shaqo, baahiyada adeeg ee jirta iyo sida wax looga qaban karo.

Dhammaan goobaha la booqday waxaa ka muuqatay dib u howlgelin iyo dayactir lagu sameeyay kadib markii degmada laga saaray kooxda khawaarijta ah, waxaase u dhimman qalabeyn, tayeyn iyo arrimo badan.

Wasiirka Arrimaha Gudaha ee Soomaaliya oo la hadlay maamullada kala duwan ee goobaha uu booqday ayaa ku bogaadiyay shaqada adag ee ay degmada u hayaan, haddii ay ahaan lahayd dabiibidda bukaanno meelo fog laga keenay, caruur xilli adag wax baraneyso iyo saldhig degmada oo wax badan ka tari doona amniga.

Dhanka kale, Mudane Axmed Macalin Fiqi, wasiirka Arrimaha Gudaha, Federaalka iyo Dib u heshiisiinta waxaa  ballanqaaday in ka dowlad ahaan ay gacan weyn ka geysan doonaan horumarinta goobaha adeegga bulshada, hortabinna ay u tahay xukuumadda Dan Qaran iyo barnamaijyadeeda Xasillinta sidii loo dabooli lahaa baahiyada deegaannada la xoreeyay iyo kuwa la xoreynayo.

Wasiirka Arrimaha Gudaha mudane Axmed Macalin Fiqi ayaa booqasho shaqo ku jooga Galmudug, isaga oo abaabul ka dhan Khawaarijta ka wada deegaannada kala duwan ee Galgaduud iyo Mudug,

Agaasimaha Guud ee Wasaaradda Kalluumeysiga iyo dhaqaalaha bulluugga ee Xukuumadda Federaalka Soomaaliya ayaa Maanta Muqdsiho ka furay shirka dhismaha waaxda Dhaqaalaha Buluugga ah ee wasaaradda Kaluumeysiga Soomaaliya, Shirka waxaa ka soo qeyb galay Agaasimeyaasha Wasaaradaha Kalluumeysiga ee dowlad goboleedyada dalka iyo gobolka Banaadir, Agaasime Waaxeedyada iyo qaar ka mid ah shaqaalaha Wasaaradda.

Agaasimaha Guud ee Wasaaradda Kalluumeysiga iyo Dhaqaalaha Buluugga ee Xukuumadda Federaalka Soomaaliya Mudane Maxamuud Sheekh Cabdullahi ayaa sheegay in loo baahanyahay in la dhiso madal daadihisa, iskuna daba ridda ka faa’ideysiga Dhaqaalaha Buluugga ah , madashaan ayuu sheegay ineey u adeegeyso dhammaan, kalluumeysatada, iyo dadka kale ee siyaabaha kala duwan uga faaideysto biyaha.

Agaasime Maxamuud ayaa sheegay in dhaqaalaha dalka ay dhibaato ku tahay kalluumeysiga sharci daradda ah, si looga hortago ayuu sheegay in wasaaradda ay xoojineyso qalab la socodka Maraakiibta soo gasha biyaha Soomaaliya, Qaar ka mid ah Agaasimyaasha Wasaaraddahdda Kalluumeysiga ee dowlad goboleedyada ayaa soo jeediyay in la kordhiyo wacyigelinta bulshada Soomaaliyeed si looga faa’ideysto Kheyraadka Badda.

Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa kormeer uu ugu kuurgalayo hawlaha shaqo ee socda ku tegay Xarunta Wasaaradda Gaashaandhigga.

Ra’iisul Wasaare Xamsa oo kulamo la qaatay Saraakiisha kala duwan ee Hoggaannada Ciidanka xoogga dalka Soomaaliyeed iyo Madaxda Wasaaradda Gaashaandhigga, ayaa sheegay in Xukuumadda DanQaran ay gacanna ku xoreyneyso dalka, gacanna ay ku dhiseyso ciidanka Qaranka ee dalka kala wareegi lahaa ATMIS marka la gaaro sanadka 2024.

Ra’iisul Wasaaraha oo ku dheeraaday heerarkii kala duwanaa ee uu soo maray dagaalka halka sano socda ee Khawaarijta looga sifeynayo dalka, ayaa sheegay in dadka Soomaaliyeed ay ka mideysan yihiin sidii la isaga dulqaadi lahaa culeyska argagixisada.

Ra’iisul Wasaare Xamsa waxa uu xusay in ciidanku yahay meesha uu ka dhismo waddan, isla markaana haddii ay sharfanaadaan uu dalkuna yeelanayo Sharaf.

Waxa uu sheegay in wax laga qaban doono baahiyaha kala duwan ee ay qabaan Ciidanka Xoogga Dalka Soomaaliyeed, si loo helo ciidan leh tayo iyo awood ay dalkooda ku difaacaan.

Guddoomiyaha Aqalka Sare Mudane Cabdi Xaashi Cabdillaahi ayaa maanta daahfuray tartanka Hirgeli Hibadaada oo ah tartan Suugaaneed Abwaaniinta Soomaaliyeed kaga qayb qaadanayaan dagaalka lagula jiro kooxda Khawaarijta,tartankan ayaa laga furay Xatunta Tiyaatarka qaranka.

Wasiirka Warfaafinta Dhaqanka Iyo Dalxiiska Mudane Daa’uud Aweys Jaamac ayaa faahfaahin ka bixiyey Ujeedka tartankan,Wasiir Daa’uud ayaa xusay in Wasaaradda warfaafintu tartankan uga gol leedahay sidii kaalin weyn Abwaaniinta Soomaaliyeed uga qaadan lahaayeen Dagaalka lagula jiro kooxda khawaarijta noqdona wejiga Saddexaad ee khawaarijta loogula dagaalamayo dhanka Fikirka.

Dagaalka lagula jiro khawaarijta ayey Shacabka iyo Dowladda Soomaaliyeed u midoobeen iyadoo Suugaantu ka mid tahay tiirarka ugu muhiimsan ee Soomaalidu fariimaha isku gaarsiiyaan,iyadoo Barnaamujkan qayb ka noqonayo qorshaha dowladda ee lagu ciribtirayo fikirka xagjirka.

Guddoomiyaha Golaha Shacabka BJFS Mudane Sheekh Aadan Maxamed Nuur (Madoobe) ayaa maanta shir guddoomiyay Kalfadhiga 3-aad kulankiisa 22-aad ee Golaha Shacabka Baarlamaanka Jamhuuriyadda Federaalka Soomaaliya.

Kulanka oo ajandihiisu ahaa akhrinta 3-aad ee Hindise Sharciyeedka Howlgabka iyo Liil-tirka Shaqaalaha Rayidka ee Dowladda, qeybinta warbixinta akhrinta 2-aad ee Hindise Sharciyeedka Qaxootiga iyo Magangaliyo doonka. Xildhibaannada Golaha Shacabka ayaa ku biiriyay talooyin ku saabsa liiltirka shaqaalaha rayidka ee dowladda, iyagoona sheegay in muhiim u yahay sharci qeexaya howlgabka dadka shaqaalaha ah.

Guddoomiye Sheekh Aadan Madoobe oo kulanka soo xiray ayaa Golaha u sheegay in la isku soo laabto maalinta Isniinta ah si loo sii amba qaado shuruucda hortaala Golaha Shacabka.

Ciidanka Booliiska Soomaaliyeed ayaa fashiliyey Qarax Gaari oo kooxda Khawaarijtu rabeen in ay ku haligaan Shacabka Soomaaliyeed ee ku nool Gobolka Banaadir,sida uu Warbaahinta u xaqiijiyey Afhayeenka Ciidanka Booliiska Soomaaliyeed.

Ciidanka saldhig Booliiska Degmadda Dayniile ayaa qabtay Gaariga qaraxa siday oo mareyey goob xaafaddo dhexdood ah kaas oo dhalisay shaki laga qaaday Gaariga,abaaro 10:30-kii Aroornimo ayaa la qabtay Gaarigan oo Khawaarijtu ka soo Buuxisay walxaha qarxa.

Waxa sidoo kale la qabtay laba Dhagarqabe oo waday Gaarigan,iyadoo dhagarqabayaasha ay hadda gacanta ku hayaan Haya’addaha Amnigu.

Haya’addaha Amniga iyo Shacabka Soomaaliyeed ayaa isu kaashaday sidii goobkasta loogu beegsan lahaa dhagarqabayaasha Khawaarijta loona fashilin lahaa dhagartooda.