Guddiga horumarinta adeegga bulshada aqalka sare ayaa maanta kormeeray isbitaalka xoogga dalka oo ay ka socotay shaqada maalinlaha ah ee loogu adeegayo geesiyaasha Xoogga Dalka, iyagoo u kuurgelaya adeegyada caafimaad ee uu bixiyo Isbitaalka, baahiyaha ka jira iyo xaaladda bukaannada, ayay warbixin guud ka dhagaysteen Madaxa hoggaanka Caafimaadka Ciidanka Xoogga iyo Agaasimaha Isbitaalka oo uga warramay xaaladda guud ee Isbitaalka.

Xubnaha guddiga adeegga bulshada aqalka sare oo uu hoggaaminayay guddoomiyaha guddiga sanatar Dr Cismaan Maxamuud Maxamed {Dufle} ayaa intii ay ku sugnaayeen Isbitaalka waxay mid mid u booqdeen qeybaha uu ka kooban yahay Isbitaalka iyo dhawaacayada lagu daawaynayo.

Guddiga ayaa bogaadiyay shaqada socota iyo dadaalada ay muujiyeen bahda caafimaadka Isbitaalka xoogga, waxayna ballanqaadeen in ka guddi ahaan ay kala shaqayn doonaan maamulka Isbitaalka xal u helista baahiyaha caafimaad ee ka jira Isbitaalka xoogga dalka.

Dhuusamareeb-Hawlgallo ay fuliyeen ciidanka Qaranka iyo saaxiibbada caalamka oo ka dhacay deegaannada Dab Xagar iyo Dab Qurun oo hoos taga magaalada Wabxo iyo degaannada Oodaale iyo Ceel Sabaax oo hoos taga magaalada Ceel-Garas ayaa lagu dilay ilaa iyo 30 ka tirsan Khawaarijta.

Hawlgalladan oo lagu beegsaday meelo ay si qarsoodi ah isugu uruursanayeen cadawga Khawaarijta ah ayaa sidoo kale lagu burburiyay qaraxyo iyo saanado kale oo ciidan oo ay diyaarinayeen cadawga.

Ciidanka qaranka iyo geesiyaasha dadka deegaanka ayaa maalmihii ugu dambeeyay guulo waawayn ka gaaray hawlgallada ka dhanka ah Khawaarijta ee ka socda Galmudug, waxaana lagu guulaystay in gacanta cadawga laga saaro deegaanno badan oo muhiim ah.

Dowladda Soomaaliya waxa ay u mahadcelinaysaa shacabka geesiyaasha ah ee go’aansaday in ay cadowga ummadda Soomaaliyeed ee Khawaarijta ah iska dul-qaadaan garabna istaagaan ciidanka qaranka.

Waxaa ka go’an dowladda oo kaashanaysa shacabka Soomaaliyeed in la ciqaabo dhagar qabeyaasha Khawaarijta ah ee ku dhiirran falalka shacabka iyo dalka lagu dhibaateynayo, isla markaana ka dhaga adayga in ay ka haraan fikirka iyo ficilada Khawaarijta.

Guddoomiyaha Golaha Shacabka Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa maanta shir guddoomiyay Kalfadhiga 3-aad kulankiisa 23-aad ee Golaha Shacabka.

Kulanka oo ajandihiisu ahaa ansixinta Hindise Sharciyeedka Qaxootiga iyo Magangelyo-doonka Soomaaliya iyo hadal jeedinta Guddoomiyaha Golaha Shacabka Baarlamaanka JFS ayaa waxaa ogolaaday 134-Xildhibaan, waxaa diiday,1 Mudane, waxaa ka aamustay 6-Xildhibaan.

Wasiiru Dowladaha Arrimaha Gudaha Federaalka iyo Dib uheshiiniinta Xukuumadda Federaalka Soomaaliya Mudane Saadaat Maxamed Nuur Caliyoow, ayaa Xildhibaannada Golaha Shacabka uga mahadceliyay sida hufan ee ay u ansixiyeen sharcigan oo muhiimad gaar ah u leh Qaxootiga Soomaliya.

Xildhibaannada Golaha Shacabka oo  soo jeediyay in la taageero Musharaxa Madaxweynaha Baarlamaanka Adduunka Xil. Marwa Cabdibashiir Cali oo u tartameeysay xilka Madaxweynaha Inter-Parliamenty Union oo ay ku midoobeen Xildhibaannada Dowladaha Adduunka, waxaana Xildhibaanadu cod aqlabiyad leh ku ansixiyeen in laga jaro Xildhibaan kasta $200 Doolar.

Guddoomiyaha Golaha Shacabka oo hadal ka jeediyay xiritaanka Kalfadhiga Seddaxaad ee Baarlamaanka Jamhuuriyadda Federaalka Soomaaliya, kaas oo ku saabsan xiritaanka Kalfadhiga 3-aad ee Golaha Shacabka oo afartii bilood mar la fasaxo si Xildhibaannada ay ugu laabtaan deegaan doorashooyinkooda.

Guddoomiyaha ayaa dul istaagay waxqadka Kalfadhiga Seddaxaad, waxaana ka mid ahaa ansixinta hindise sharciyeedyo kuwaas oo kala, Hindise Sharciyeedka Hantidhowrka Guud ee Qaranka, Hindise Sharciyeedka Howlgabka iyo Liiltirka Shaqaalaha Rayidka, iyo Hindise Sharciyeedka Qaxootiga iyo Magangaliyo-doonka ah ee Soomaaliya. Sidoo kale waxaa Golaha horyaala hindise sharciyeedyo tiro badan oo aan weli la ansixin.

Guddoomiyaha Golaha Shacabka BJFS ayaa gunaanadka khudbadiisa ku faafaahiyay dagaalka lagula jiro kooxda Khawaariijta Al Shabaab, kuwaas oo degaano iyo degmooyin ka tirsan dhulka Jamhuuriyadda lagala wareegay, waxaana hada socdo degaano dhowr ah oo ay ku sugan yihiin Khawaariijta, isagoo tilmaamay in isku soo noqoshada Kalfadhiga 4-aad uu noqdo mid laga Xorreeyay Khawaariijta Al-Shabaab, waxaana Xildhibaannadda ugu baaqay in Xildhibaannada ay soo xaadiraan kalfadhiga xiga si looga doodo Dastuurka KMG ee dalka.

Baydhabo- Horjooge, Xasan Musdhaf Dhaayoow oo loo yaqaanno (Shiniyey ) ayaa maanta isku soo dhiibay Ciidanka Xoogga dalka Soomaaliyeed ee uu fadhigoodu yahay deegaanka Goof-gaduud Buurey ee gobolka Baay.

Horjooge Dhaayoow ayaa tababar kusoo qaatay degmada Jilib ee gobalka Jubbada dhaxe, wuxuuna ka tirsanaa Maxadka isqarxinta khawaarijta ee degmada Bu’aale.

Horjoogayaasha iyo malleeshiyaadka khawaarijta ayaa muddooyinkan dambe isa soo dhiibaya markii ay u adkaysan waayeen howl gallada Ciidanka xoogga dalka.

Qaahira-Madaxweynihii hore ee Jamhuuriyadda Soomaaliya Mudane, Cabdiqaasim Salaad Xasan ayaa bogaadiyay ay Ciidanka xoogga dalka ka wadaan gobollada dalka, wuxuuna ugu baaqay in sii laba laabaan dedaallada lagu sifeynayo khawaarijta.

“Ciidamadu kheyr Allaha siiyo guulo ayay soo hooyeen, si fiican bayna u dagaallameen, waana u hambalyeyn hayaa, waxaanan leeyahay Allaha idin garab istaago”

Mudane, Cabdi qaasim ayaa shacabka Soomaaliyeed ugu baaqay in ay garab istaagaan dowladdooda lana shaqeeyaan Ciidanka xoogga dalka.

“Madaxweynuhu dedaal badan buu wadaa, dowladdana waa dedaalaysaa, is garab taaga, gacmaha is qabsada, Allana barya”