Ku simaha Ra’iisul Wasaaraha Ahna Ra’iisul wasaare ku-xigeenka XFS Saalax Axmed jaamac ayaa maanta Magaalada Muqdisho ka furay Shirweynaha Dib-u-qaabeynta Waxbarashada dalka oo ay wadajir u soo agaaasimeen Machadka Heritage iyo Jaamacadda City.

Shirweynaha oo socon doona muddo saddex maalmood ah waxaa ka soo qeyb galay Aqoonyahano isaga kala yimid dalka iyo dibadda waxaana xoogga lagu saarayaa hormarinta waxbarashada dalka oo muhiimad weyn uleh dowladda Jamhuuriyadda Soomaaliya ee uu hoggaamiyo Madaxweyne Dr Xasan Sheekh Maxamuud.

Madaxweynaha JFS Dr: Xasan Sheekh Maxamuud ayaa tilmaamay bilowgii dagaalka dalkeenna looga xoreyneyno Khawaarijta,  diyaar garowga  sidii la rabay in uusan  aheyn, islamarkaana dalka ku jiray xaalad abaareed oo ba’an, balse maanta ilaahay mahadiis Soomaaliya waxa ay heysataa Ciidan ka tayo iyo tiro badan markii dagaalka Khwaarijta la bilaabayay, diyaarna u ah inay naftooda u huraan dalkooda iyo dadkooda. Madaxweynaha JFS, ahna Taliyaha guud ee Ciidamada Qalabka Sida ayaa sheegay in  xilliyada dagaalka la kala barto dadka, gaar ahaan Madaxda, Saraakiisha iyo Askarta.“Runtii dagaal haddii la galo waa la kala bartaa dadka, Madaxdaa la kala bartaa, Saraakiishaa la kala bartaa, Askartaa la kala bartaa, dhammaan dadka waa la bartaa, qof walbana doorka uu qaata maalinta ay adag tahay waa la bartaa, maalinta fiican ee ay nabaddu jirto nin kastaa waa fiican yahay”.

Madaxweynaha oo muddo laba bil ah u jooga gobolada dhexe ee dalka howlgallada dalka looga sifeynayo Khawaarijta ayaa hoosta ka xariiqay in dagaalka ka dhan ah Argagixisada uu socon doono inta laga ciribtirayo guud ahaan dalka Soomaaliya. “Waxaan ku soconnaa deegaanno Khawaarijtu ku ukumeystay, waqti dheerna ku dhibaateynaysay shacabka Soomaaliyeed. Aragagixisada Khawaarijta ah goobo badan oo dalka ka mid ah waa ku jabeen, degaanno badanna waa laga xoreeyay, waxaana cadaatay in dadka Soomaaliyeed ay yihiin geesiyaal u huri kara naftooda xoriyadadooda iyo mustaqbalka caruurtooda, ilaalinta qaranimadooda, iyo difaaca karaamadooda”, sidaasi waxaa yiri:- Madaxweyne Dr: Xasan Shiikh Maxamuud.

Mudane Xasan Sheekh Maxamuud waxa uu ku taliyay in dhallinyarada la marinhabaabiyay ay ka soo laabtaan la shaqeynta kooxaha nabad-diidka ah,isla markaana ay wax la qeybsadaan bulshada Soomaaliyeed ee u xusul duubaya horumarkooda, isagoo mar kale shacabka ku adkeeyay in ay u midoobaan cadowga khawaarijta ee weli ku sugan gudaha dalka. Madaxweynaha ayaa kulan wadatashi ah Magaalada Dhusamareeb kula qaatay Guddoonka iyo Xildhibaanada BFS, Siyaasiyiin iyo Saraakiil ka tirsan Ciidamada Qaranka ee ka howlgala furimaha dagaalka, waxaana kulankaaasi dhinacyada ka qeybgalay ay ka arrinsadeen qaabka loo dardar galin karo dagaalka lagula jiro Kooxda Khawaarijta ah, iyadoo Madaxweyne Xasan Sheekh  oo ka hadlay kulankaasi uu xaqiijiyay sida ay dowladda uga go’an tahay la dagaalanka kooxaha khawaarijta ee weli ku sugan gudaha dalka.

Gudoomiyaha Aqalka sare Mudane  Cabdi Xaashi Cabdillaahi oo kulankaasi ka qeybgalay ayaa sheegay doorka looga baahan yahay Ummadda Soomaaliyeed inay ku wejahaan dagaalka lagula jiro Kooxda Khawaarijta ah ee Al-shabaab, ayaa yiri:-  ” Anigu da’ ayaan ahay oo tabar ma hayo laakin Afka ayaan dagaalka ku galay “, Guddoomiyuhu waxa uu caddeeayay doorka uu ka qaadanayo Gulufka lagu hayo cadowga Shacbiga Soomaaliyeed.

“Xildhibaanno haddii aad dagaalka ku dhimataan maamuus ayaad helaysaan haddii kale guryihiinna ayaad ku dhimaneysaan maamuus qaranna ma heli doontaan”, sidaasi waxaa yiri:- Cali Jeyte Cusmaan oo ka hadlaayay kulankaasi ka dhacay Magaalada Dhuusemareeb,  Cali Jeyte & Dhuusmaareeb hadal heynta ugu weyn ayaa aheyd ” Al-Shabaab,  meeshaan yar ee  ka tirsan Galmudug ayay ku jiraan, waxaana kuu sheegaa Madaxweyne haddaad caawa fooraarto, adigoo fooraara Dhuusamareeb ka tagi maysid”, hadalkaasi ayaa ah mid niyad u dhisid iyo dhiirigalin u ah Madaxweynaha JFS, islamarkana uu ku sii dhiirado waddada xaqa ah ee uu ku taagan yahay ee ah in uu arko Soomaliya oo ka xor ah Argagixiso, waxaana loo ballan qaaday inuu Magaalada Muqdisho ku laaban doono, isagoo lugahiisa ku tego Degmooyinka CeelBuur iyo Galhareeri oo ah meelaha kaliya ay kaga harsan yihiin Khawaarijta Gobolkaasi.

Xildhibaan Cabdirahman Cabdishakur Warsame oo waayahaan lagu arag fagaarayaasha ama Aagga Dagaal ee lagula jro kooxda Khawaarijta ah ayaa beryhahaan ka soo muuqda saaxadda dagaalka, isagoo dhiirigalin ugu tagay Ciidamada Dowladda iyo kuwa Deegaannada ayaa yiri:-,  “Dagaalka lagula jiro Khawaarijta geesigii ku dhintaa waa shahiid sideey shareecada Islaamka na fartay, marka waa in lagu dhiiradaa galitaanka dagaalka lagula jiro”.

“90 jir Ahlul towxiid ah, oo magac leh, oo maal qabeen ah, oo mudane Baarlamaan ah, oo hoggaamiye ciidan ah, oo deegaankii uu ku dhashay jooga, isaga oo gacan ka dhaawacan,  gacanta kale qori candhalaab ah ku wata, intuu ifka ku noolaa aan weligii la ciilin ayaa furinta hore ee dagaalka ku jira, waa kuma kaasi?, waa Xildhibaan Cabdisalaan Dhabannacad, islamarkaana ah Xildhibaanka ugu Da’da weyn Xildhibaanada Federaalka Soomaaliya, marka maanta Wiil yar oo jasiiradda Komoros laga keenay Mudug ha ku ciilo! caqliga ka soo taliyey wallee caqli fayow ma’ aheyn”, sidaasi waxaa yiri:- Odey ka soo jeeda mid ka mid ah Deegaannada Goblka Mudug. Madaxweynihii Ummadda mar haddii uu ku sugan yahay furimaha hore ee dagaalka muddo laba bilood ah, iyo Waayeelada, maxaa dhiman oo aan sugnaa?

Dhinaca kale Aabbe iyo Ubadkiisa uu dhalay oo ku wada sugan Aagga hore ee dagaalka lagula jiro Kooxda Khawaarijta ah ee Al-shabaab, kaasi waa kuma ? waa Gaashaanle sare Maxamuud Ceyrow iyo Ubadkiisuba waxay u qalab-qaateen jihaadka maafiyo-diimeedka dalka looga xureynayo. Goobtu ay ku sugan yihiinna waa degmada faca weyn ee Xarardheere, waxayna leeyhiin ‘meel laghu kala haro ma joogno’, waa runtood, waana qoys ay ka go’an tahay dagaalka Khawaarijta, marka waxaan leenahay ‘Salaama Alle ha idin yeelo, meel lagu kala haro lama joogo e’. Xil Dhallaan gartay ma fududa ayaa la dhihi jiray.

Senator Samsam Daahir oo ka tirsan Aqalka sare ee Jamhuriyadda federaalka Soomaaliya iyo masuuliyiin ka tirsan maamul-goboleedka Galmudug oo abaabul ka dhan khawaarijta ka wada deegaanno hoos taga Degmada Xarardheere ee Gobolka Mudug, ayaa waxay safar ku tektay deegaanka Durdur ee hoostaga Degmadaasi, waxayna u sharaxday ujeeddada safarkooda, waxayna xustay in Dadka deegaanka ay sanooyin badan ka dambeeyaan Deegaanada kale ka xorta ahaa Argagixisada, taasina ay ugu wacan tahay dib u dhac ay u geysteen khawaarijtii muddo maamuleysay Deegaanka, kana reebtay asaagood.

Boosaso(SONNA):-Maxkamada Ciidamada qalabka sida ee Dowlad goboleedka Puntland ayaa xukun ku riday Saddex xubnood oo ka tirsanaa kooxda Khawaarijta Daacish.

Xubnahan ayey Maxkamada Ciidanka Puntland ku kala xukuntay xukuno kala duwan oo u dhigan sidatan soo socota.

1: Salmaan Faarax Maxamed waxay Maxkamadu ku xukuntay 15 sano oo xarig ah.

2: Mohamed Ahmed Mohamud waxaa lagu xukumay 10 Sano oo Xarig ah.

3: Abdullahi Shire Mohamud oo ahaa Nabadoon Daacishta damiinta waxaa lagu xukumay 5 sano oo xarig ah.

Dhammad.

Hey’adda Lacagta Adduunka ee IMF ayaa soo saartay Warbixinta horumarka Maaliyadda iyo Dhaqaalaha Soomaaliya, taas oo ay ka muuqato in ay Dowladda Soomaaliya ku guulaysatay dhammaan shuruudihii Barnaamijka Deyn-Cafinta.

IMF ayaa shaacisay in Dowladda Soomaaliya ay si guul ah uga soo baxday shuruudihii ku jiray hannaanka dib-u-eegista 6-aad oo muddo labo toddobaad ah ay ku shirayeen magaalada Nairobi Dowladda Soomaaliya iyo IMF/ Bangiga Adduunka.

Dhinaca kale Wasiirka Maaliyadda Xukumadda Federaalka Soomaaliya Mudane Biixi Iimaan Cige oo soo saaray qoraal kooban ayaa soo dhaweeyay Warbixinta IMF ee hannaanka dib-u-eegista 6-aad. Sidoo kale Wasiirka Maaliyadda ayaa balan qaaday in Dowladdu ay ka go’an tahay sii wadiidda iyo joogteynta hannaan walba oo lagu horumarinayo dhaqaalaha Soomaaliya.

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Hamza Abdi Barre ayaa xarunta Qaramada Midoobay ee New York kulan kula yeeshay Wasiirka Arrimaha Dibedda ee Dowladda Isutagga Imaaraadka Carabta Shiikh Cabdullaahi Bin Zayen Al Nahyan, oo ay ka wada hadleen xoojinta iskaashiga iyo xiriirka soo jireenka ah ee ka dhaxeeya labada dal ee walaalaha ah ee Soomaaliya iyo Imaaraadka Carabta.

Ra’iisul Wasaare Hamza Abdi Barre iyo wafdiga uu hoggaaminaayo ayaa kalfadhiga 78-aad ee Golaha Guud ee QM oo ka socda magaalada New York waxaa uu kulama doceedya la qaatay wafuuda heerka caalami ee shirka ka soo qeyb galay.

kalfadhiga 78-aad ee Golaha Guud ee Qaramada Midoobe ayaa sanadkan si gaar ah loogu gorfeynayey Hiigsiga Yoolasha Horumarka Waara ee ay dejisay Qaramada Midoobay.

Wasiirka Caafimaadka dowladda federaalka Soomaali Dr. Cali Xaaji Aadan oo ku sugan xarunta Qaramada Midoobay ayaa Markii labaad Ka qeybgalay kulan ay isugu tageen wasiirada caafimaadka ee Dunida.

Kulankaasi oo ka dhacay xarunta Qarmada Midoobay,waxa uu ahaa shir doceed heer sare ah ,kaas oo looga hadlay baahinta barnaamijyada kutalagal ee la xiriira Caafimaadka loo dhanyahay ee dunida.

Wasiirka Cali Xaaji Aadan oo khudbad ka jeediyey kulankaasi ayaa ka warbixiyay xaaladaha adag  ee ka jira dalka,gaar ahaan nuucyada cudurada faafa iyo sida ay lagama maarmaanka u tahay in gacan laga geysto horumarinta adeegyada caafimaad ee ay u baahan yihiin bulshada Soomaaliyeed.