Muqdisho(Wargeyska Dalka):-Xildhibaannada Labada Aqal ee Baarlamaanka Jamhuuriyadda Federaalka Soomaaliya ayaa Maanta Kulan Wadajir ah ku yeeshay Xarunta Golaha Shacabka, kaas oo uu Shir-Guddoominayey Guddoomiyaha Golaha Shacabka ee Baarlamaanka JFS, Mudane Sheekh Aadan Maxamed Nuur (Madoobe). Kulanka waxaa sidoo kale Goob Joog ka ahaa Guddoomiye Ku-xigeenka Koowaad ee Golaha Aqalka Sare, Mudane Cali Shacbaan Ibraahim, iyo xubnaha kale ee guddoonnada labada aqal.

Kooramka kulanka oo ku furmay 180 Xildhibaan oo ka tirsan Golaha Shacabka iyo 31 Senator oo ka Tirsan Golaha Aqalka Sare, ayaa Mudanayaasha Labada Aqal loo qeybiyey Warbixinta soo jeedimaha wax-ka-beddelka Dastuurka, gaar ahaan Cutubyada 5-aad ilaa 9-aad. Sidoo kale, Xildhibaannada waxaa la siiyey Warbixin faahfaahsan oo ku saabsan soo Jeedimahaas, iyo soo jeedin kooban oo ku saabsan wax-ka-beddelka Qodobbada 49-aad, 50-aad iyo 54-aad ee cutubka 4-aad.

Guddoomiyaha Golaha Shacabka, Mudane Sheekh Aadan Maxamed Nuur (Madoobe), ayaa ku wargeliyey Xildhibaannada labada Aqal in ay si taxaddar leh u akhriyaan soo jeedimaha iyo Warbixinta la socota, si looga doodo Kulamada soo socda.

Muqdisho(Wargeyska Dalka):-Wasiirka Howlaha Guud ee Soomaaliya, Ayuub Ismaaciil; “ Israa’iil waxay u rogaysaa Marinnadii Ganacsi, Goobo ay Colaaddo ka jiraan, waana diidnay taas.”

Wasiirka Hawlaha Guud, Dib-u-Dhiska iyo Guriyeynta Xukuumadda Jamhuuriyadda Federaalka Soomaaliya, Xildhibaan Ayuub Ismaaciil Yuusuf ayaa barnaamij uu baahiyay Telefishinka Al Jazeera, wuxuu ku soo bandhigay Qorshaha ay Israa’iil ka leedahay Aqoonsiga ay siisay Somaliland oo uu ku tilmaamay mid qeyb ka ah Qorshaha Guud ee Israa’iil ay ku doonayso Qalalaase laga abuuro Mirannada Ganacsiga ee Muhiimka u ah Ganacsiga iyo isku xirka.

“Aqoonsiga Israa’iil ay siisay Dhul ka tirsan Soomaaliya oo ay u aqoonsatay Dowlad Madax-Bannaan, waa ku xadgudub halis ah oo ka dhan ah Madaxbannaanida Jamhuuriyadda Federaalka Soomaaliya, waana jebin Cad oo ka baxsan Shuruucda iyo Xeerarka Caalamiga ah,Dhanka Juqraafi-Siyaasadeedka, Israa’iil waxay doonaysaa inay Gacanta ku dhigto Albaabka Koonfureed ee Badda Cas, gaar ahaan Marinka Bab al-Mandab, si ay u maamusho marin caalami ah oo Istiraatiiji ah, taas oo si buuxda uga hor imaaneysa Danaha Soomaaliya iyo Gobolka, waana arrin aan si adag u diiddanahay.”
Wasiir Ayuub, ayaa sidoo kale sheegay ; “ Aqoonsigan wuxuu yimid xilli ay Badda Cas iyo Qaaradda Afrika gGud ahaanba ka jiraan Xiisado iyo kacsanaan sii kordhaya.Marka lagu daro waxyaabihii hore u dhacay, Israa’iil hadda si cad ayay u muujisay inay tallaabo hore u qaaday. Tallaabadan waxay gudbinaysaa farriin ah in Israa’iil ay diyaar u tahay inay Taageerto Dhaqdhaqaaqyada Gooni-Goosadka ah ee u Adeegaya Danahaheeda, isla markaana ay suuragal tahay inay Gobolka ku lug yeelato dhinac Siyaasadeed ama mid Militari.Waxaan ku jirnaa Xaalad la iskudayayo in dib loo qaabeeyo Marinnada Ganacsiga ee Badda Cas, si ay ugu Adeegaan Danaha Israa’iil, taas beddelkeedana ay halis u noqdaan Amniga Dadka ku nool Gobolka iyo Dhaqaalahooda.”

Ugu Dambeyntii ,Wasiirka Hawlaha Guud ee Soomaaliya, Xildhibaan Ayuub Ismaaciil Yuusuf wuxuu sheegay in xilligan lagu jiro Marxalad la wajahayo Qalalaase Caalami ah oo si qorsheysay loo abaabulay, kaasoo ujeeddadiisu tahay in Badda Cas laga beddelo halbowlaha Nolosha ee Ganacsiga iyo isku xirka Dunidda, lagana dhigo Goob Colaad iyo khilaaf uu ka taagan tahay.

Muqdisho(Wargeyska Dowladda ):-Horjooge Cabdiraxmaan Talxo Shuuke oo ka tirsanaa Khawaarijta ayaa Maanta isku dhiibay Ciidamada Daraawiishta ee Dowlad Gobolleed Galmudug, gaar ahaan Ururka Galayr ee ilaalada Madaxtooyada Galmudug oo Maalmahaan Howlgallo ka dhan ah Khawaarijta ka waday aagga Deegaanada Labadulle iyo Ceelahelay.

Ninkaan ayaa sheegay inuu ahaa Horjoogihii Maleeshiyaadka ay Khawaarijtu ugu yeeraan Jabhadda ee Gobolka Galgaduud, wuxuuna ka yimid dhanka Ceelgaras, isagoo wata Qori iyo Boosh.

Horjooge Cabdiraxmaan ayaa Saraakiisha Ciidamada uu isku soo dhiibay u sheegay in Maleeshiyaadka Khawaarijta ay hadda ku jiraan Xaalad kala firxad ah, maadaama ay ku jabeen Howlgallada Ciidamada Qaranka Soomaaliyeed ay ka wadaan Dalka oo weerarro culus ay uga socdaan cirka iyo Dhulka.

Muqdisho(Wargeyska Dalka):-Wasaaradda Gaadiidka iyo Duulista xukuumadda Federaalka Soomaaliya ayaa qabatay Kulan looga hadlayey Xaqiijinta Adeeg Hufan oo loo qabto Shacabka Soomaaliyeed, iyadoo la raacayo Hiigsiga fog ee Wasaaradda.

Wasiirka Wasaaradda Gaadiidka iyo Duulista Hawada ee Xukuumadda Federaalka Soomaaliya, Xildhibaan Maxamed Faarax Nuux, oo Kulanka Shir Gudoomiyey ayaa waxaa  ku weheliyey Wasiir ku-Xigeenka iyo Agaasimaha Guud ee Wasaaradda waxaana ka soo qaybgalay dhammaan Agaasime-Waaxeedyada kala duwan Wasaaradda.

Muhiimadda Kulanka ayaa diirada lagu saaray Xaqiijinta Adeeg hufan oo loo qabto Shacabka Soomaaliyeed, iyadoo la raacayo Hiigsiga fog ee Wasaaradda,sida Xoojinta xiriirka Shaqo ee u dhexeeya Hoggaanka Sare iyo Agaasime-Waaxeedyada Kulanka, Wasiirku waxa uu warbixin dhammaystiran ka dhegeystay Agaasimaha Guud ee Wasaaradda, Mudane Cumar Cali Afrax Agaasimaha ayaa si Faahfaahsan u soo bandhigay Habsami u socodka Howlaha Maalinlaha ah ee Wasaaraddu qabato sida Qorshaha Casriyeynta iyo Dib-u-Dhiska lagu samaynayo Xarunta Wasaaradda iyo Istaraatiijiyadda fog ee Horumarinta Gaadiidka iyo Duulista Hawada Dalka.