Wasiirka Wasaaradda Caafimaadka iyo daryeelka Bulshada Xukuumadda Federaalka Soomaaliya Dr Cali Xaaji Aadam ayaa maanta sedax Gaari oo labo ka mid ahi yihiim naaca gargaarka deg degga ah (Ambulance) halka kan sadexaadna uu yahay nooca Hartop-ka oo isgaguna loogu talagaley fududeynta adeegyada Caafimaadka ku wareejiyey Wasiirka Caafimaadka Dowlad goboleed Galmudug.

Munaasabadda Wareejinta Gawaarida waxaa goobjoog ka ahaa agaasimaha guud ee Wasaaradda Caafimaadka iyo daryeelka bulshada Xukuumadda Federaalka Soomaaliya Dr. Guuleed Abdijaliil, agaasimaha guud ee Wasaaradda Caafimaadka dowlad gobaleed Galmudug Cabdiwali Maxamed Axme iyo xubno kale.

Wasiirka Wasaaradda Caafimaadka iyo daryeelka Bulshada Xukuumadda Federaalka Dr. Ali Haji Aden ayaa sheegey in Gawaaridan qalabaysan ay wax wayn ka tari doonaan Caafimaadka dowlad goboleedka Galmudug, isagoona sidoo kale tilmaamey in Wasaaradda Caafimaadka iyo daryeelka bulshada Xukuumadda Federaalka Soomaaliya u taagan tahay xilli kasta horumarinta Caafimaadka guud dalkeen.

Dhankiisa Wasiirka Wasaaradda Caafimaadka dowlad goboleed Galmudug Dr. Yaasiin Cabdi Jaamac ayaa ka mahadceliyey Gaadiidka lagu wareejiyey, waxa uuna tilmaamey in loogu adeegi doono bulshada dowlad goboleed Galmudug si loo xaqiijiyo bedqabka bulshada iyo guud ahaan yoolka Qaranka ee Caafimaadka.

Wasaaradda Caafimaadka iyo daryeelka Bulshada Xukuumadda Federaalka Soomaaliya waxaa ka go’an wax ka qabashada baahiyaha Caafimaad ee ka jira Dalka iyo sidii lagu horumarin lahaa Caafimaadka Soomaaliya si loo gaaro yoolka horumarinta Caafimaadka ee Dowladda.

Rome- Madaxweynaha Jamhuiriyadda Federaalka Soomaaliya mudane Xasan Sheekh Maxamuud ayaa magaalada Rome ee dalka Talyaaniga kulamo kula qaatay Madaxweynaha dalkaasi mudane, Sergio Mattarella iyo Ra’iisul Wasaare Mss, Giorgia Meloni.

Labada dhinac ayaa waxay ka wada hadleen sidii loo sii xoojin lahaa iskaashiga iyo xiriirka taariikhiga ah ee ka dhexeeya Soomaaliya iyo Talyaaniga.

Guddoomiye ku xigeenka 1-aad ee golaha aqalka sare ee Baarlamaanka Jamhuuriyadda Federaalka Soomaaliya mudane Cali Shacbaan Ibraahim oo ay wehelisay Guddoomiye ku xigeenka 1-aad ee golaha shacabka Marwo Sacdiya Yaasiin Xaaji Samatar, ayaa maanta xarunta Aqalka sare kulan kula qaatay guddoonka guddiga Dastuurka Baarlamaanka JFS.

Guddoonka labada Aqal ee Baarlamaanka 11-aad ayaa xubnaha guddiga Dastuurka kala hadlay qaabka ay ugu diyaar garoobeen guda galka doodda afarta cutub ee ugu horraysa Dastuurka, qaabka loo hagayo maalmaha doodda iyo jadwalaynta afarata cutub ee ugu horraysa.

Kulanka waxaa goobjoog ahaa Guddoomiye ku xigeenka labaad ee aqalka sare Mudane Cabdullaahi Cali Xersi Timacadde iyo xoghayaha guud ee aqalka sare ee Baarlamaanka Jamhuuriyadda Federaalka Soomaaliya.

Kulanka oo looga hadlayey amniga dalka waxaa ka qaybgalay wasiiru dowlaha wasaaradda gaashaandhiga Soomaaliya mudane Cabdinuur Daahir Fiidow, agaasimaha guud ee wasaaradda warfaafinta, dhaqanka iyo dalxiiska XFS Mudane Cabdullaahi Xayir Ducaale, Agaasimaha guud ee wasaaradda Amniga Gudaha Soomaaliya Mudane Yuusuf Cali Maxamed, iyo mas’uuliyiin yihiin iyo lataliyiin ka kala socday hay’adaha dowladda, dhinaca Midowga Afrika kulanka waxaa uga qeyb galay Wakiilka Hawlgalka Midowga Afrika ee ATMIS Danjire Maxamed Al-amin Souef, Taliyaha Ciidanka ATMIS iyo wafti ka socda Midowga Afrika African oo uu hoggaaminayay agaasimaha maaraynta khilaafaadka, aririmaha siyaasadda, Nabadda iyo Amniga mudane Alhadji Sarjoh Bah.

Kulanka waxaa diiradda lagu saaray horumarka Amniga Soomaaliya, guulaha laga gaaray dagaalka lagula jiro Khawaarijta, iyo dhameystirka bixitaanka Ciidanka Hawlgalka Midowga Afrika ee dhammaadka sanadkan.

Mas’uuliyiinta dowladda Federaalka Soomaaliya ee kulanka qeyb galay ayaa bandhigay horumarka Ciidanka Qaranka ka sameeyeen dagaalka lagu ciribtirayo kooxaha Argagixisada iyo sida ay dowladda uga go’an tahay oa wareegista Amniga marka ay dalka baxaan ciidanka Hawlgalka Midowga Afrika December 2024.

Guddoomiyaha Hay’adda Maaraynta Musiibooyinka Qaranka Md, Maxamuud Macallim Cabdulle ayaa maanta furay shir looga hadlayo qorshaha ka jawaabista baahiyaha bini’adamnimo ee sanadkaan 2024.

Shirkan waxaa ka soo qayb-galay ku-xigeenka Ergayga gaarka ee xoghayaha guud ee Qaramada Midoobay ahna xiriiriyaha gargaarka bini’aadamnimo ee Soomaaliya George Conway, xubno ka socda wasaaradaha gargaarka dowlad goboleedyada, hay’addaha samafalka, deeq-bixiyayaasha iyo madax ka tirsan QM.

Hay’addaha dowliga iyo kuwa aan dowliga ahayn ee qaabbilsan arrimaha samafalka ayaa waxay dalbadeen lacag dhan $ 1.6 bilyan si loo caawiyo dad gaaraya 5.2 Milyan oo Soomaali ah sanadka 2024.

Guddoomiyaha SoDMA ayaa sheegay in sanadkii tagay dadka Soomaaliyeed ay aad u waxyeelleeyeen fatahaado ka dhashay roobabkii Elnino, kuwaas oo sababay barakac fara badan isagoo sheegay in 80% dadka ku barakacay ay yihiin Caruur iyo Haween.