Nairobi: Waxaa magaalada Nairobi si rasmi ah uga furmay shirweynaha IGAD ee Dhallinyarada, Nabadda iyo Amniga, oo socon doona 13 iyo 14 August, 2025.

Shirkan ayaa isu keenay boqolaal hoggaamiyeyaal dhallinyaro, khubarro iyo siyaasiyiin ka kala yimid dalalka xubnaha ka ah IGAD, si loo xoojiyo doorka dhallinyarada ee dhismaha nabadda iyo go’aan-qaadashada gobolka.

Munaasabadda furitaanka waxaa ka qeybgalay Xoghayaha Guud ee IGAD, Mudane Workneh Gebeyehu, Madaxa IGAD ee Kenya, Dr. Fatuma Adan, Agaasimaha Waaxda Nabadda iyo Amniga IGAD, Com. Abebe iyo Wasiirka Dhallinyarada, Hal-abuurka iyo Isboortiga Kenya, Mudane Salim Mvurya, oo marti sharaf ka ahaa.

Doodaha Maalinta Koowaad

Shirku wuxuu ku furmay khudbad dhiirrigelin ah oo uu jeediyay Wakiilka Dhallinyarada IGAD, Sam Ogwal, kaas oo ku baaqay in dhallinyarada noqdaan hormuudka nabad-dhisidda, hal-abuurka iyo xalalka waara ee gobolka.

Waxaa maalinta koowaad ee shirkan waa qabsoomay saddex gole doodeed (Panel Discussions) oo muhiim ah:

1. Ka qeybgalka dhallinyarada ee hannaanka nabadda rasmiga ah, caqabadaha, fursadaha iyo dariiqooyinka lagu horumarin karo, oo ay ka hadleen wakiillo ka socda Sudan, Kenya iyo South Sudan.

2. Doorashooyinka iyo nabadda, kaalinta dhalinyarada ee ilaalinta dimuqraadiyadda, ka hortagga rabshadaha iyo dhismaha kalsoonida bulshada, iyadoo wakiil ka socda Soomaaliya uu ka qeyb qaatay.

3. Doorka baraha dijitaalka ee dhismaha nabadda, adeegsiga warbaahinta bulshada, sheekooyinka dhallinyarada iyo la-dagaallanka marin-habaabinta si loo xoojiyo nabadda iyo wadajirka bulshada.

Shirka oo ay soo qabanqaabisay xafiiska Jinsiga ee IGAD oo kaashanaya waaxda Nabadda iyo Amniga iyo waaxda Horumarinta Caafimaadka iyo Bulshada, ayaa lagu wadaa in uu soo saaro talooyin siyaasadeed oo lagu xoojinayo ka qeybgalka dhallinyarada ee go’aan-qaadashada iyo nabad-dhisidda, iyadoo la waafajinayo Qorshaha Dhalinyarada IGAD (2021–2030) iyo ajandaha Dhallinyarada, Nabadda iyo Amniga ee Qaramada Midoobay.

Cape Town: Wafdi ka socda Dowladda Federaalka Soomaaliya oo uu hoggaaminayo Ra’iisul Wasaare ku xigeenka labaad ee dalka mudane Jibriil Cabdirashiid Xaaji Cabdi, ayaa ku sugan magaalada Cape Town ee dalka Koonfur Afrika, iyagoo ka qaybgalaya Shirka Maalgashiga Biyaha ee Qaaradda Afrika.

Shirkaan waxaa isugu imaanaya hoggaamiyeyaasha Afrika, siyaasiyiin, iyo la-howlgalayaasha horumarinta, si loo dardargeliyo maalgashiga iyo sugnaanta biyaha ee guud ahaan qaaradda Afrika.

Soomaaliya, maalgashiga biyuhu waa mudnaan istiraatiiji ah, waxaana uu muhiim u yahay adkeysiga ka dhanka ah saameynta cimillada sii xumaaneysa, la qabsiga iyo yareynta isbeddelka cimilada, kobaca dhaqaalaha waara, iyo xasilloonida muddada-dheer.

Madaxweynaha JFS Mudane Xasan Sheekh Maxamuud oo ka tacsiyadeeyay dadkii ku geeriyooday dagaalkii dhawaan ka dhacay gobolka Gedo, ayaa faray ciidanka ka tallaabay xuduudda dalka aan dariska nahay ee Kenya inay dib ugu soo laabtaan deegannadoodii, isagoo xaqijiyay in cidna aan ciqaab la mari doonin, isla markaana loo ballan qaadayo badqabka iyo nabad gelyadooda.

Madaxweyne Xasan Sheekh, ayaa sidoo kale faray Xukuumadda Federaalka Soomaaliya in ay gargaar caafimaad iyo taageero bani’aadannimo gaarsiiso dadka ay saameysay xaaladda ka taagan gobolka Gedo.

Kuwait: Wasiirka arrimaha Dibadda iyo Iskaashiga Caalamiga mudane Cabdisalaan Cabdi Cali oo booqasho rasmi ah ku jooga dalka Kuwait ayaa maanta oo talaado ah kula kula kulmay Caasimadda Kuwait, dhiggiisa, Wasiirka arrimaha Dibadda Dowladda Kuwait mudane Cabdullaahi Cali Cabdullaahi Al-Yahya.

Intii lagu guda-jiray kulanka, waxaa labada wasiir ay ka wada hadleen xiriirka xooggan ee ka dhexeeya labada dal ee walaalaha ah, waxa ayna ay isla qaadaa-dhigeen siyaabaha kor loogu qaadi karo iskaashi dhinacyo kala duwan leh, iyaga oo is-dhaafsaday aragtiyo ku aaddan xaaladihii ugu dambeeyay ee heer gobol iyo heer caalami.

Kulanka kadib, waxaa la kala saxiixday dhowr heshiis iyo is-afgarad, taasi oo caddayn u ah sida ay labada dal uga go’an tahay qoto-dheereynta iskaashiga. Is-afgaradyada la saxiixay waxaa ka mid ah, unkidda guddi wadaag ah oo dardargeliya iskaashiga labo dhinaclaha, heshiis ku saabsan wadatashiyada labo geesoodka iyo is-afgarad iskaashi oo u dhexeeya Machadka Diblomaasiyadda Saud Al-Nasser Al-Sabah ee Dowladda Kuweyt iyo Machadka Daraasaadka Diblomaasiyadda ee Wasaaradda arrimaha dibadda iyo Iskaashiga Caalamiga.

Wasiirka wasaaradda Isgaarsiinta iyo Teknoolojiyadda Maxamed Aadan Macallim ayaa xafiiskiisa ku soo dhaweeyay Safiirka Shiinaha ee Soomaaliya, Mudane Wang Yu.

Kulanka ayaa diiradda lagu saaray xoojinta iskaashiga labada dal iyo horumarinta fursadaha waxbarasho iyo teknoolojiyadeed.

Safiir Wang Yu ayaa bogaadiyay shaqada Wasaaradda, isagoo xusay xiriirka taariikhiga ah ee labada dal iyo taageerada Shiinaha ee dhinacyada aqoonta iyo tiknoolojiyadda. Waxa uu sheegay in deeqaha waxbarasho ay door muhiim ah ka qaataan horumarinta shaqaalaha.

Wasiir Maxamed Aadan ayaa uga mahadceliyay Safaaradda taageeradaas, wuxuuna ku baaqay in la kordhiyo deeqaha iyo barnaamijyada is-weydaarsiga, si loo xoojiyo iskaashiga wax ku oolka ah ee labada dal.