Muqdisho, Maajo 20, 2026:- Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa Xafiiskiisa ku qaabilay Safiirka Cusub ee Jamhuuriyadda Jabuuti u fadhiya Soomaaliya, Danjire Col. Cusmaan Dubbad Sugulle, kaas oo dhawaan Warqadaha Aqoonsiga Danjirenimo uu ka guddoomay Madaxweynaha JFS, Mudane Xasan Sheekh Maxamuud.

Danjiraha Cusub ayaa Ra’iisul Wasaaraha u gudbiyay salaan uu ka siday Madaxweynaha Jamhuuriyadda Jabuuti, Mudane Ismaaciil Cumar Geelle, isaga oo xusay in uu sii adkeeyn doono xiriirka soo jireenka ah ee ka dhexeeya labada Dal, kaas oo ku dhisan Walaaltinimo iyo Iskaashi.

Ra’iisul Wasaare Xamsa ayaa ugu hambalyeeyay Danjiraha Cusub xilka loo soo igmaday, isaga oo u rajeeyay guul iyo in uu sii xoojiyo xiriirka labada Dal. Waxa uu sidoo kale hoosta ka xarriiqay muhiimadda ay leedahay adkeynta xiriirka Walaaltinimo iyo Iskaashiga dhinacyada Siyaasadda, Amniga iyo Dhaqaalaha ee u dhexeeya labada Dal.

Ra’iisul Wasaaraha ayaa safiirka la wadaagay Hambalyo uu u dirayo Ra’iisul Wasaaraha Cusub ee Dowladda Jabuuti Mudane Cabdiqaadir Kaamil Maxamed, isaga oo u rajeeyay guul iyo in uu Eebbe u fududeeyo Shaqada culus ee markale loo igmaday.

Mogadishu (Wargeyska Dalka) — Ciidanka Xoogga Dalka Soomaaliyeed (CXDS) ayaa howlgal lagu xaqiijinayo Amniga ka fuliyay Gudaha iyo Hareeraha Degmada Berdaale ee Gobolka Bay, iyadoo la xoojinayo sugidda Amniga Doorashada Madaxtinimada ee Maamulka Koonfur Galbeed Soomaaliya.

Saraakiisha Ciidamada ayaa sheegay in Howlgalka uu qeyb ka yahay dadaallada lagu ilaalinayo Shacabka, lagagana hortagayo Khataraha kaga imaan kara Kooxda Khawaarijta, xilli uu socdo diyaar garowga Doorashooyinka Maamulka.

Adkeynta Amniga ayaa ku soo beegantay kadib markii 13 Degmo oo ka tirsan Koonfur Galbeed ay Toddobaadkii hore si guul leh uga dhaceen Doorashooyinka Goleyaasha Deegaanka, kuwaas oo loo arko tallaabo muhiim ah oo lagu xoojinayo hannaanka Dimuqraadiyadda.

Sidoo kale, Magaalada Baydhabo ee Xarunta Koonfur Galbeed ayaa waxaa ka socda diyaar garowga Doorashada Madaxtinimada, iyadoo la filayo in ay qabsoonto dhammaadka Bishan.

Guddiga Doorashooyinka Qaranka ayaa dhankiisa sheegay in Hay’adaha Amniga iyo Maamulka ay si dhow isaga kaashanayaan xaqiijinta Doorasho Nabdoon oo xasilloon.

Baku (Wargeyska Dalka): Wasiirka Wasaaradda Hawlaha Guud, Dib-u-dhiska iyo Guriyeynta XFS, Mudane Xildhibaan Ayuub Ismaciil Yuusuf, oo uu wehliyo Safiirka Jamhuuriyadda Federaalka Soomaaliya u fadhiya Jamhuuriyadda Azerbaijan, Danjire Cabdinuur Daahir Fiidow, ayaa kulan-doceed muhiim ah oo ka tirsan Shirka Madasha Caalamiga ah ee Magaalooyinka Adduunka, kana socda magaalada Baku ee Dalka Azerbaijan, la yeeshay Xoghayaha Guud ee Golaha Iskaashiga Dalalka Khaliijka Carabta (GCC), Mudane Jaasim Maxamed Al-Budaywi.

Kulanka ayaa diiradda lagu saaray xoojinta Iskaashiga iyo isku-duwidda dhinacyada Horumarinta Magaalooyinka, Kaabayaasha Dhaqaalaha, Dib-u-dhiska iyo Horumarka waara, iyadoo si gaar ah loo falanqeeyay Fursadaha Iskaashi ee Soomaaliya u horseedi kara Horumar muuqda iyo dib-u-dhis ballaaran.

Wasiirka ayaa adkeeyay muhiimadda ay Dowladda Federaalka Soomaaliya siinayso Iskaashiga ay la leedahay Dalalka GCC-da, gaar ahaan dhinacyada Maalgashiga, Horumarinta Adeegyada Bulshada iyo tayeynta Kaabayaasha muhiimka u ah koboca Dalka.

Kulankan oo muhiimad gaar ah u lahaa Dowladda Federaalka Soomaaliya ayaa ku soo dhammaaday is-Afgarad iyo natiijooyin wax ku ool ah oo kor u qaadaya xiriirka iyo wada-shaqeynta labada dhinac.

Muqdisho (Wargeyska Dalka): Agaasimaha Hay’adda Sirdoonka iyo Nabad Sugidda Qaranka (NISA), Mudane Mahad Maxamed Salaad, ayaa Maanta Degmada Gubadley ee Gobolka Banaadir kulan kula qaatay Imaam Daahir Imaam Maxamuud, qaar ka mid ah Odayaasha Dhaqanka, Xubno ka socday Bulshada Rayidka, Saraakiisha Amniga iyo Masuuliyiinta Maamulka Degmada, kaas oo diiradda lagu saaray xoojinta Amniga iyo dardargelinta wada-shaqeynta Hay’adaha Ammaanka iyo Bulshada.

Agaasimaha NISA ayaa kulanka ka sheegay in Amnigu yahay mudnaanta koowaad ee Dalka iyo Dadka, isla markaana loo baahan yahay in Bulshada ay garab buuxa siiso Ciidamada Ammaanka, si looga hortago khataraha Khawaarijta iyo falalka Amni darrada ah.

Dhankooda, qeybaha kala duwan ee ka qeybgalay Kulanka ayaa bogaadiyay dadaallada Dowladda ee sugidda Amniga, iyaga oo ballanqaaday in ay sii xoojin doonaan kaalintooda ku aaddan Nabadgelyada, wada-shaqeynta Hay’adaha Ammaanka iyo Dowlad-dhiska.