Waxaa maanta si rasmi ah uga furmay magaalada Nairobi ee xarunta dalka Kenya, Shirkii Labaad ee Madasha Magaalooyinka Afrika.

Kulankan muhiimka ah waxaa Soomaaliya ku matalayay wafdi heer sare ah oo uu hoggaaminayo Wasiiru-dowlaha Wasaaradda Hawlaha Guud, Dib-u-dhiska iyo Guriyeynta, Mudane Saciid Maxamed Maxamuud (Xayd), iyo Safiirka JFS u fadhiya Kenya, Danjire Jibriil Ibraahim Cabdulle ahna Wakiilka Joogtada ah ee Hay’adda UN-Habitat.

Shirkan oo socon doona muddo saddex maalmood ah ayaa waxaa ka qaybgalaya in ka badan 10,000 oo qof oo ka kala socda dalalka Afrika.

Kulanka ayaa diiradda lagu saarayaa maareynta kororka degdegga ah ee magaalooyinka Afrika, kobcinta maalgashiga, xoojinta iskaashiga siyaasadeed, iyo hal-abuurka la xiriira qorshaynta magaalooyinka.

Wasaaradda Beeraha iyo Waraabka JFS. ayaa xarunta dhexe ee Wasaaradda ku qaabilay wafdi uu hogaaminayey madaxa ugu sareeya hey’adda FAO-Somalia.

Masuuliyiintaan ayaa Wasaaradda ku wareejiyay agab xafiiseed kaasoo loogu talagalay Xarunta Hal-abuurka iyo Horumarinta Ganacsiga Beeraha (CIAD), si loo xoojiyo howlaha xarunta iyo taageerada la siiyo dhallinyarada iyo hal-abuurka qaybta beeraha.

Hay’adda FAO ayaa door weyn ka qaadatay dhismaha iyo hirgelinta xaruntan, iyada oo ujeedadu tahay in la dhiirrigeliyo hal-abuurka dhalinyarada, la kobciyo ganacsiga beeraha, isla markaana la taageero dhallinyarada Soomaaliyeed si ay uga qayb qaataan horumarinta iyo casriyeynta beeraha dalka.

Ugu dambeyn, Wasiirka Wasaaradda Beeraha iyo Waraabka ayaa uga mahadceliyay hay’adda FAO taageerada iyo wada shaqeynta joogtada ah ee kala dhaxeysa Wasaaradda, isagoo ku amaanay doorka muuqda ee ay ka qaadaneyso horumarinta iyo kobcinta beeraha.

Guddiga Madaxa Bannaan ee Doorashooyinka Qaranka iyo Soohdimaha ayaa shaaciyay liiska ururrada siyaasadeed ee ka tartami doona Koonfur Galbeed Soomaaliya iyo degmooyinka ay ku tartami doonaan.

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud oo uu wehliyo Hoggaamiyaha Ku meel gaarka ah ee Dowlad Goboleedka Koonfur Galbeed, Mudane Jibriil C/rashiid Xaaji Cabdi ayaa magaalada Baydhabo ku guddoomiyay, shir ay yeesheen Golaha Wasiirrada Dowlad Goboleedka Koonfur Galbeed iyo Taliyeyaasha Ciidamada Qalabka Sida ee Soomaaliyeed.

Shirka ayaa looga hadlay xaaladda guud ee deegaanada Dowlad Goboleedka Koonfur Galbeed, dardargelinta howlaha xasillinta, sugidda amniga, la dagaallanka argagixisada, gurmadka abaaraha iyo isku dubbaridka dadaallada dowladeed ee lagu xaqiijinayo nabad iyo horumar waara oo ka hanaqaada guud ahaan deegaannada Koonfur Galbeed.

Madaxweynaha oo warbixinno faahfaahsan ka dhageystay Wasiirrada Dowlad Goboleedka Koonfur Galbeed iyo masuuliyiinta amniga dalka ayaa adkeeyay muhiimadda ay leedahay mideynta awoodda dowladda Federaalka iyo Dowlad Goboleedka, si loo dardar geliyo adeegyada bulshada, dib u dhiska hay’adaha maamulka iyo horumarinta kaabeyaasha dhaqaalaha deegaanka.

Wasiirka Dekedaha iyo Gaadiidka Badda, Cabdulqaadir Maxamed Nuur Jaamac, ayaa ku guuleystay kursiga Golaha Shacabka ee HOP#204, kadib markii uu tartanka doorashada ee ka dhacday Baydhabo ka tanaasulay Cabdirisaaq Cabdullaahi, oo ahaa musharraxii la tartamayay Wasiir Jaamac.