Guddoomiye Cabdi Xaashi Cabdillaahi oo markii labaad noqday guddoomiyaha aqalka sare ayaa markii ugu horeysay wareysi gaar ah siiyay Warbaahinta Qaranka dib u doorashadiisii kadib, ayaa sheegay in nidaamka Aqalka sare uu Soomaaliya ku cusbaa shantii sano ee la soo dhaafay maaddaama uu qayb ka ahaa nidaamka Faderaalka ee dalka uu qaatay kadib Dowladdii Ku-meel-gaarka.

Afartii sano ee muddo xileedkii hore ee Aqalka sare ayuu sheegay in ay wax ka barteen, waayo aragnimo badana ay ka faa’iideen. Waxa uu rajeeyay in afartan sano ee soo socota ay ka duwanaan doonto afartii hore, “Gollahii hore ma jirin meel uu wax ka tix raaco laakiin hada wax walba waa ay qoran yihiin, xataa xeer hoosaadkii ayuu leeyahay. Hawlaha Dastuuriga ee uu u xil saaran yahay sidii uu u qaban lahaa waa uu yaqaanaa. Wax badan oo mugdi ku jiray hadda waa ay cad yihiin. Kolka maanta waxa aan rajaynayaa in aad iyo aad ay uga duwanaan doonto afartii hore”.

Mar wax laga weydiiyay wada shaqeynta labada aqal ee Baarlamaanka ayaa Guddoomiye Cabdi Xaashi waxa uu sheegay in muddo xileedkii tagay uusan wanaagsanayn wada shaqeynta labada aqal balse waayo aragnimo ay ka heleen arintaa, haddana muhiimaddooda koowaad ay tahay in ay ka shaqeeyaan sidii labada golle ay u wada shaqeyn lahaayeen. Sidoo kale waxa uu sheegay Senetarka in ay diyaarsan yihiin sharciyadii ay ku wada shaqeyn lahaayeen, Guddoomiyaha cusub ee Aqalka Hoose na uu diyaar u yahay wada shaqeynta labada Golle.

Mar uu fariin u dirayay Musharixiinta Madaxtinimada Soomaaliya ee loo asteeyay doorashadooda in ay dhacdo 15ka bishan May ayuu yiri Guddoomiye Cabdi Xaashi “Waxaan filayaa in Musharax walba waxa uu u socdaa ay noqoto dan guud oo aanay noqon dano gaar ah, dalka iyo dadka horumarkoodana Maskaxda lagu heysto”.

Dhanka kale, Xildhibaanada wax dooranaya ayuu kula dardaarmay in ay noqdaan kuwa Maslaxada dalka eegaya, ayna doortaan qofka ay is leeyihiin waxa uu wax ka qaban karaa danta guud ee dalka.

Shantii sano ee la soo dhaafay ayuu Guddoomiye Cabdi Xaashi sheegay in ay jirtay tix galin la’aanta Sharciga, “Dal wuxuu ku hor maraa Sharciga oo loo hogaansamo” ayuu yiri.

Senetor Cabdi Xaashi Cabdillaahi ayaa noqonaya Guddoomiyihii Koowaad iyo labaad ee Aqalka sare, tan iyo markii gollahaasi la aasaasay.

Xigasho: SONNA

Guddiga isku dhafka ah ee qabanaya doorashada Madaxweynaha Soomaaliya ayaa soo saaray Shuruudaha laga rabo Musharaxa u tartamaya Qabashada xilka Madaxweynenimo ee Soomaaliya.

Halkan ka aqriso qoraalka Guddiga.

Guddoomiyaha Aqalka Sare ee Baarlamaanka Dalka Senator Cabdi Xaashi Cabdullaahi ayaa maanta xafiiskiisa ku qaabilay Taliyaha Ciidanka Xoogga Dalka Gen. Odawaa Yuusuf Raage iyo Taliyaha Ciidanka Booliiska Soomaaliyeed S/gaas Cabdi Xasan Maxamed (Xijaar).

Taliyeyaasha iyo Guddoomiyaha ayaa ka wada hadlay adkaynta sugidda Amniga Doorashada iyo midka guud ee Dalka.

Guddoomiyaha Golaha Shacabka  Baarlamaanka Federaalka Soomaaliya  mudane Sheekh Aadan Maxamed Nuur (Madoobe) ayaa maanta hoygiisa Muqdisho ku qaabilay Mohamed Ahmed Othman Al Hammadi oo ah  safiirka dalka Imaaraadka Carabta ee Soomaaliya.

Guddoomiyaha ayaa safiirka ka guddoomay hambalyo uu uga siday dalkiisa oo ku aaddan Guddoonka Golaha Shacabka ee Baarlamaanka 11-aad.

Guddoomiyaha ayaa danjiraha Imaaraadka Carabta kula dardaarmay in ay sii laba jibbaaraan dadaalada horumarineed ay dalka ka wadaan iyo sii xoojinta xiriirka labada dal ee walaalaha ah.

Ciidanka Xoogga dalka iyo Ciidanka ATMIS, gaar ahaan  kuwa Burundi  ayaa howlgallo ka wado Gobolka Shabeellaha Dhexe, gaar ahaa degaanada hoos yimaado degmada Mahadaaay.

Ciidamada ayaa hawlgalkooda ku beegsanayo degaanno ay ku dhumaleeysanayaan Maleeshiyaad ka tirsan  argagixisada Al-Shabaab, kuwaas oo dhawaan dagaal ku qaaday saldhig ay Ciidanka ATMIS halkaas ku lahayeen.

Maamulka degmada Mahadaay ayaa sheegay in waxii ka danbeeyay weerarkii argagixisada Al-shabaab ay ku soo qaadeen saldhig Ciidanka Burundi ay ku lahaayeen degaanka Ceelbaraf ee gobalka Sh/Dhexe ay gabi ahaanba dadkii halkaasi deganaa ay ka barakaceyn.

Madaxweyne ku-xigeenka maamulka Hirshabeelle Mudane Yuusuf Axmed Hagar Dabageyd ayaa maanta safar shaqo kusoo gaaray Magaalada Muqdisho.

Madaxweyne ku-xigeenka waxaa garoonka diyaaradaha magaalada Muqdisho ku soo dhoweeyay xildhibaano ka tirsan labada Aqal ee Baarlamaanka federaalka Soomaaliya iyo mas’uuliyiin kale.

Mudada uu Muqdisho ku sugan yahay Mr. Dabageed wuxuu kulamo kala duwan la qaadan doono qeybaha kala duwan ee Bulshada iyo madaxda ugu sareysa Dowladda.