Ergayga gaarka ah ee madaxweynaha JFS u qaabilsan arrimaha bini-aadanimada iyo gurmadka abaaraha xildhibaan Cabdiraxmaan Cabdishakuur Warsame ayaa xalay magalaada Dhuusamareeb kaga qeyb galay shirweynaha gurmadka abaaraha Galmudug.

Shirkan ayaa diiradda lagu saaray u qareemidda iyo garab istaagga dadka abaaraha iyo colaaduhu wax-yeelleeyeen, ee ku dhaqan gobollada Mudug iyo Galgaduud iyo sidii gurmad deg deg ah loo gaarsiin lahaa.

Xildhibaan Cabdiraxmaan Cabdishakuur Warsame oo hadal kooban ka jeediyay shirka ayaan uga mahadceliyay hoggaanka Galmudug sida ay uga go’an tahay in xilligan muhiimadda 1-aad la siiyo u gurmashada dadka abaarta iyo colaadaha ay saameeyeen, una sii dheer tahay dhibaatada argagixisada Al-Shabaab kala kulmayaan.

Ergayga gaarka ah ee madaxweynaha JFS u qaabilsan arrimaha bini-aadanimada iyo gurmadka abaaraha Mr. Warsame ayaa dadka wax haysta gaar ahaan qurba joogta iyo ganacsatada Galmudug ugu baaqay in ay gurmadaan walaalahooda oo aysan gacan ajanabi iyo mid dowlad kaliya ku halleyn.

Shirweynaha gurmadka abaaraha Galmudug waxaa ka qeyb galay madaxweynaha Galmudug, gudoomiyaha Baarlamaanka Galmudug, gudoomiyaha Maxkamadda Sare ee Galmudug, Xeer ilaaliyaha Galmudug, gudoomiye ku xigeenka 2aad ee Baarlamanka Galmudug, Xubno ka tirsan labada gole ee Galmudug, ganacsatada, culimada, dhalinyarada iyo haweenka Reer Galmudug.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo Madaxtooyada Qaranka kulan wadatshi ah kula qaatay qaar ka mid ah culimada Soomaaliyeed, ayaa uga warbixiyey mudnaanta uu siinayo adkeynta xiriirka dowladda iyo culimada, isagoo tilmaamay muhiimadda ay u leeyihiin la dagaallanka fikirka xagjirnimada iyo toosinta dowladnimada.

Madaxweynaha ayaa culimada Soomaaliyeed ku bogaadiyey doorka wanaagsan ee ay ka qaataan wacyi gelinta, waxbaridda iyo dib u heshiisiinta dadka Soomaaliyeed, waxa uuna ku ammaanay kaalinta ay ka qaadanayaan gurmadka abaaraha iyo taakulaynta dadka danyarta ah.

Dhankooda, culimada ayaa la wadaagay Madaxweynaha talooyin ku aaddan dowlad dhiska, horumarinta dalka iyo la dagaallanka fikirka xagjirnimada ah, iyaga oo tilmaamay sida ay dowladda ugala shaqeynayaan xaqiijinta Soomaali heshiis ah.

Guddoonka golaha Shacabka ee Baarlamanaka Jamhuuriyadda Federaalka ayaa shaaciyay maalinta berri oo Axad ah inuu jiro Kulanka Golaha Shacabka ee cod u qaadista kalsooni siinta golaha Wasiirada magacaaban iyo Barnaamijka Xukuumadda, si dalku u yeesho Xukuumad Sharciyad buuxda u haysata howlaha fulinta.

Ra’iisal wasaaraha xukuumadda Federaalka Soomaaliya Mudane Xamsa Cabdi Barre ayaa sheegay in golaha wasiirada ee uu soo dhisay uu ku soo xulay aqoon, karti iyo waayo aragnimo, isagoo xildhibaanada golaha shacabka si xushmad iyo qadarin leh uga codsaday in ay ansixiyaan golaha si ay u gutaan waajibaadka qaran ee loo igmaday.

Guddoomiye ku-xigeenka degmada Gaalkacyo Eng: Maxamed Cabdi Cilmi ayaa maanta xarunta dowladda hoose ku qaabilay xubno ka socday Hay’adda WFP.

Xubnahaan ayaa maayar ku-xigeenka degmada Gaalkacyo kala hadlay xaaladaha abaaraha ee xiligaan ka jira deegaanada gobolka Mudug iyo sidii qiimeyn balaaran loogu soo sameyn lahaa dhibaatooyin ka dhashay abaaraha saameynta culus ku yeeshay dadka iyo duunyada.

Guddoomiye ku-xigeenka degmada Gaalkacyo Eng Maxamed Cabdi Cilmi ayaa sheegay inay aad u korortay dadka ay saameeyeen abaaraha ee ku nool deegaanada hoos yimaada Degmada Gaalkacyo ee xarunta gobolka Mudug.

Xafiiska Soomaliya ee Hay’adda Qaramada Midoobay u qaabilsan Cunnada iyo Beeraha FAO ayaa ku dhawaaqay si degdeg ah ugu baahan tahay 131.4 Milyan oo Doollar, si loogu caawiyo dad gaaraya 882,000 qof oo ku nool Geeska Afrika.

“Heerka maaliyaddu waa mid hoose” ayaa lagu yiri bayaan ay soo saartay hay’adda Qaramada Midoobay, iyadoo intaas ku dartay in dadaallada ka hortagga macluusha ee ka jira 55 ka mid ah 90-ka degmo ee Soomaaliya ay 46% kaliya wax laga qabtay,FOA ayaa sheegtay in abaartu saamaysay qoysas badan oo Soomaaliyeed.

“Ma sugi karno in macluusha lagu dhawaaqo; waa inaan hadda wax ka qabannaa si aan u ilaalino maciishada iyo nolosha,” ayey tiri FOA.

Sida laga soo xigtay Sanduuqa Carruurta ee Qaramada Midoobay, in ka badan 500 oo carruur ah ayaa ku dhintay Soomaaliya tan iyo bishii Janaayo sababo la xiriira nafaqo-xumo la xiriirta abaarta.

In ka badan 7 milyan oo Soomaali ah ayay abaartu saamaysay, sida ay sheegtay Qaramada Midoobay