Kismayo- Madaxweynaha Dowlad Goboleedka Jubbaland Mudane Axmed Maxamed Islaam, ayaa Xarunta Madaxtooyada ku qaabilay wafdi uu hoggaaminayay Guddoomiyaha Hay’adda Maareynta Musiibooyinka Qaranka Maxamed Macalin Cabdulle.

Kulanka waxaa qeyb ka ahaa Wasiirka Wasaaradda Gargaarka iyo Maareynta Musiibooyinka Jubbaland Axmad Xassan Cumar iyo Masuuliyiin kale oo ka tiran maamulka Jubbaland.

Intii kulanku socday waxaa laga wada hadlay sidii Jubbaland looga hirgalin lahaa xarunta Qaran ee Gurmadka deg dega ah taas oo maanta la dhagax dhigay iyo sidii deegaanada Shabaab laga xoreenayo loo gaarsiin lahaa gurmad iyo gargaar raashin ah oo dhameystiran, si lamid ah sida gobolada kale ee dalka ay u gaarsiisay Hay’adda Maareynta Musiibooyinka Qaranka.

Guddoomiye ku xigeenka labaad ee Golaha Shacabka Mudane Cabdullaahi Cumar Abshirow ayaa Shir Guddoomiyay Kalfadhiga 2-aad Kulankiisa 13-aad ee Golaha Shacabka BJFS.

Kulanka ayaa ajandihiisu ahaa; 1. Qeybinta Akhrinta 2-aad ee Hindise Sharciyeedka Hay’adda Sirdoonka  iyo Nabadsugidda Qaranka.

Furitaanka Aayadaha Qur’aanka kariimka maanta waxaa xildhibaanada Golaha shacabka BJFS ka hor Aqriyay Sheekh Xasan Al-Waajidi oo kamid ahaa xubnaha culimadii ka qeybgalayay Shirka Culimada Soomaaliyeed ee dhawaan ku soo gabagaboobay magaalada muqdisho.

Guddoomiye Ku-xigeenka Labaad ee Golaha Shacabka BJFS Mudane. Cabdullaahi Cumar Abshirow Ayaa soo xiray kulanka maanta Asigoona xildhibaanada siiyay muddo 3 maalin ah in ay ku soo Aqiryaan Hindise Sharciyeedka Hay’adda Sirdoonka iyo Nabadsugidda Qaranka ee maanta loo qeybiyay.

Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay Safiirka Dowladda Isutagga Imaaraadka Carabta ee Soomaaliya, Mudane Ahmed Jumah Alromaith.

Ra’iisul Wasaaraha iyo Safiirka ayaa ka wada hadlay xoojinta xiriirka iyo iskaashiga u dhaxeeya labada dal ee walaalaha ee Soomaaliya iyo Isutagga Imaaraadka Carabta.

Wasiiro Dowlaha Wasaaradda Caafimaadka Soomaaliya Dr Maryan Maxamed Xuseen iyo Agaasimaha Guud ee Isbitaal Hooyada iyo Dhallaanka ee Banaadir Fartuun Shariif Maxamed ayaa Mashiino kala duwan oo casriya oo  loogu talagalay Horumarinta Isbitaalka gaar ahaan qeybta sheybaarka kala wareegay Cutubka Ciidamada Talyaaniga ee taakuleynta ee loo soo gaabiyo (CIMIC).

Wasiiru Dowlaha Wasaaradda Caafimaadka Soomaaliya Dr Maryan Maxamed Xuseen ayaa ugu horeyn Talyaaniga uga mahadcelisay doorka weyn oo ay ka qaatyn dayactirka iyo qalabeynta Isbitaalka Banaadir, waxayna dhinaca kale xustay in mashiinadan casriga ah loogu adeegi doono Hooyada iyo dhallaanka oo ah kuwa bulshada ugu nugul.

Madaxa Cutubka ciidamada Talyaaniga ee Taakuleynta Colonel Domenico Di Carluccio ayaa sheegay inay qalabkaan ugu talagaleen horumarinta Isbitaalka Banaadir, isla markaana ay sii xoojin doonaan garab istaaga Isbitaalka oo si bilaasha ugu adeega Hooyada iyo dhallaanka.

Ugu dambeyn, mas’uuliyinta ayaa ayaa si wadajir ah u kormeermay qeybo ka mida ah Isbitaalka oo ay ka socdeen shaqooyinka maalinlaha ah ee u gargaarida iyo baxnaaninta bukaanada isbitaalka hooyada iyo dhallaanka ee Banaadir.

Senator Cabdi Xasan Cawaale Qeybdiid iyo Xildhibaan Cabdisalaan Axmed Dhabancad ayaa gaaray magaalada Wisil ee gobolka Mudug, halkaas oo ay si weyn ugu dhoweeyen Saraakiisha Ciidamada xoogga iyo Daraawiishta Galmudug.

Ujeedka socdaalka xildhibaanadan gaaray degmada Wisil ee Koonfurta gobolka Mudug ayaa salka ku haysa sidii ay kaalin muuqata uga qaadan lahaayeen dagaalka Khawaarijta looga sifeynayo deegaannada gobolada Mudug iyo Galgaduud.

Sidoo kale, Senator Cabdi Xasan Cawaale Qeybdiid iyo Xildhibaan Cabdisalaan Axmed Dhabancad ayaa degmada gaarsiiyay gaadiid iyo ciidan loogu talagalay in lagu xoojiyo amniga iyo dagaalka ciidamada xoogga iyo kuwa Daraawiishta Galmudg ay kula jiraan argagixisada Al-shabaab.

Aadan Isxaaq Xasan oo magaciisa afgarashada yahay (Jacfar) oo ka soo goostay Kooxda Khawaarijta Al-shabaab ayaa lagu soo bandhigay magaalada Baydhabo ee xarunta KMG ah maamulka Koonfur Galbeed.

Jacfar oo muddo 3-sano ka mid ahaa Khawaarijta ayaa u qaabilsanaa waxay ugu yeereen Jabhadaha, isagoona ka soo hawlgallay gobollada Baay, Bakool , iyo Jubbada Dhexe.

Taliska Qeybta 60aad ee xoogga dalka Soomaaliyeed ayaa Aadan Isxaaq Xasan ku soo bandhigay magaalada Baydhabo, wuxuuna sababta ku kaliftay inuu Al-shabaab ka soo baxo ku sheegay in ay tahay dhibaatada ay habeen iyo maalin ku hayaan shacabka Soomaaliyeed iyo ka been sheegida Diinta Islaamka.