‎‎Danjiraha Jamhuuriyadda Federaalka Soomaaliya ee dalka Ethiopia Mudane Cabdullaahi Maxamed Warfaa ayaa xarunta Safaaradda Soomaaliya ee Addis Ababa shir muhiim ah kula yeeshay guddiga arrimaha dibadda ee Baarlamaanka Ethiopia, kuwaas oo si rasmi usoo booqday xarunta safaaradda.

‎Danjire Warfaa oo ay weheliyaan qaar kamid ah Diplomaasiyiinta kala duwan ee safaaradda ayaa guddigaan ku soo dhoweeyey safaaradda isagoo uga xog waramay xaaladda dalka, wuxuuna u sheegay in Jamhuuriyadda Federaalka Soomaaliya ay guulo waaweyn ka gaartay tayeynta nidaamka Dawliga ah gaar ahaana arrimaha Amniga iyo Xiriirka Caalamka.

‎‎Kulankan waxaa sidoo kale ka qayb galay Xoghayaha Joogtada ah ee Wasaaradda Arrimaha Dibbada Jamhuuriyadda Soomaaliya Mudane Xamse Xaadoow, isagoo bogaadiyey booqashada guddiga arrimaha dibadda ee Baarlamaanka Ethiopia ay ku tageen Safaaradda.

‎‎Waxyaalaha kale ee diirada lagu saaray kulanka waxaa kamid ahaa, in lasii wado dedaalada la xariira xoojin xiriirka, wadashaqaynta iyo iskaashiga dhinacyada Dhaqaalaha, Ganacsiga iyo kobcinta Nabad-gelyada ee labada dal, waxayna guddigu ka mahadceliyeen sida diiran ee ay madaxda safaaradda Soomaaliya ugu qaabileen xarunta safaaradda ee Addis Ababa.

Wasiirka Batroolka iyo Macdanta XFS Mudane Daahir Shire ayaa magaalada Muqdisho ku soo dhaweeyey Wafdi uu hoggaaminayo Wasiirka Tamarta iyo Kheyraadka Dabiiciga ee dalka Turkiga Alparslan Bayraktar .

Wafdigaaan ayaa maanta  soo gaaray Magaalada Muqdisho,kadib markii ay ka soo dageen garoonka diyaaradaha ee Aadan Cadde,halkaasi oo loogu sameeyay soo dhaweyn.

.Wafdiga ayaa dalka u yimid, si ay uga qeyb galaan munaasabadda soo dhoweynta Markabka qodaya shidalaka Çağrı Be oo shalay ku soo xirtay Dekedda Muqdisho.

Dhinaca kale, Dekedda Muqdisho waxaa goor dhow ka bilaabanaya munaasabadda soo dhaweynta markabka Çağrı Bey, oo si rasmi ah u bilaabaya hawlaha qodista shidaalka Soomaaliya.

Shacabka Jamhuuriyadda aan walaalaha nahay ee Jabuuti ayaa saakay oo Jimca ah u dareeray doorashada Madaxweynaha ee dalkaasi hogaamin doona 5-ta sano ee socota,

Ololle doorasho oo in mudo ah soo socday ayaa waxaa isugu soo haray oo ku tartami doono musharaxiinta kala ah Madaxweynaha iminka talada dalka haya ahna Musharax Ismaaciil Cumar Geelle oo u tartamaya Xisbiga UMB iyo Shan xisbi Siyaasadeed oo kale kuwaas oo ku mideysan musharax Maxamed Faarax Samatar oo u tartamaya xisbiga CDU.

Doorashadaan waxaa ka qeybgeli doona oo codeyn doona Shacabka dalkan kuwaasi oo codadkooda ka dhiiban doona 413 goobood guud ahaan dalka oo dhan waxaana codeyntu ay socon doontaa ilaa 6-da maqribnimo ee caawa, ayadoo natiijadana ay guddiga doorashooyinka ku dhawaaqi doonaan 12:00AM saqda dhexe ee caawa.

Musharaxa ku guuleysta doorashadaan dadweyne ayaa dalkaan hogaamin doona 5-ta sano ee soo socota.

Masuuliyiin ka tirsan Safaaradda Soomaaliya ee Dalka Uganda ayaa ka qeyb galay munaasabad loo sameeyay arday Soomaaliyeed oo ka qallin jabiyay Jaamacadda Makerere oo ku taalla Dalka Yugaandha.

Xafladdaasi waxaa ka hadlay C/Ladiif Maxamuud Cali ku xigeenka Safiirka Soomaaliya ee Dalka Yugandha,kaas oo ka waramay ahmiyadda waxbnarashada iyo iyo kaalinta ardayda qallinjabisay ay ka qaadan karaan sii gudbinta aqoonta kala duwan ee ay u baahan yihiin dhallinyarada kale ee dalka.

Munaasabaddaan oo ka dhacday Magaalada caasimadda ah ee Kambaalla waxaa dhammaan ka soo qeybgalayaasha ay ku booriyeen ardayda qallin jabisay in aqoonta ay barteen ay ku celiyaan dalka,isla markaana loogu adeego bulshada.

Xafladdaasi waxaa soo qabanqaabiyay Jaaliyadda Soomaalida  ee ku dhaqan Uganda ,gaar ahaan waalidiinta ardaydaasi ee ka qallinjabiyay jaamacadaha Makerere.

Qaar kamid ah wasiirada dowladaha,Danjirayaal iyo xubno kale oo ka socday Qaramada Midoobnay ayaa ka qeybgalay kulan ku saabsanaa dadaallada caalamiga ah ee lagu doonayo helitaanka hooy nabad ah oo ku filan bulshada Afrika.

Barnaamijkaan caalamiga ah oo ay soo qabanqaabisay hey’adda UN Habitat waxaa sanadkaan looga hadlay arrimaha mudnaanta leh ee sanadkaan iyo sanadaha soo socda,kuwaas oo la xiriira sidii madaxda dalalka Afrika ay isaga kaashan lahaayeen taabagalinta barnaamijka guriyenta oo muhiim u ah bulshada,gaar ahaan kuwa taagta daran.

Mas’uuliyiintii ka hadlay kulankaasi waxaa kamid ahaa Danjire Jibriil Ibraahim C/lle iyo dhiggiisa alka Aserbajaan Sulaan Hajif,kuwaas oo muddo kooban shir-guddoomiyay barnaamijka loogu magic daray mashruuca guriyeynta bulshada Afrika.

Kulankaan waxaa dhammaan xubnihii ka qeybgalay ay soo bandhigeen in la dardargaliyo qorshayaasha ku aadan sameynta magaalooyinka waara oo ku filan dadka liita ee Afrika.

Kulamada soo socda ayaa lagu wadaa in lagu kala qabto Magaaloyinka Nirobi,New Yorka,Gineva,Baku iyo kuwo kale.

Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaan Cabdi Cali, ayaa gaaray Magaalada Tripoli ee caasimadda dalka Liibiya,halkaasi oo loogu sameeyay soo dhaweyn diiran.

Wafdigaasi waxaa garoonka diyaaradaha ee Tripoli ku soo dhaweeyay Mudane Fathallah Abdel-Latif Al-Zani, Wasiiru-dawlaha Arrimaha Afrika ee Wasaaradda Arrimaha Dibadda dalka Liibiya.

Wasiirka ayaa kulan la qaatay madaxda wasaardda arrimaha dibadda ee Dalka Liibiya,kuwaas o ka wadahadlay xoojinta xiriirka labada dal

, kor u qaadista iskaashiga laba geesoodka ah iyo adkeynta xasilloonida iyo horumarka wadajirka ah ee qaaradda.

Wasiirka Wasaaradda Qoyska iyo hormarinta Xuquuqul Insaanka XFS Amb Khadiija Maxamed Al-Makhsuumi ayaa maanta kormeer howleed ku tagtay xarunta Tuullada Carruurta SOS ee magaalada Muqdisho halkaasi oo ay ugu kuurgashay xaaladaha ay ku sugan yihiin Carruurta ku jirta xarunta SOS iyo baahiyahooda.

Kahor kormeerka Wasiirka Wasaaradda Qoyska iyo Hormarinta Xuquuqul Insaanka XFS Amb Khadiija Maxamed Al-Makhzoumi ayaa goobjoog ka aheyd heshiis iskaashi oo u jeedkiisu yahay in lagu hormariyo adeegyada daryeelka carruurta, lana ballaariyo mashaariicda kor u qaadaya badbaadada, waxbarashada iyo faya-qabka carruurta nugul waxaana heshiiskaasi kala saxiixday Agaasimaha Maamulka iyo Maaliyadda ahna ku simaha Agaasimaha Guud ee Wasaaradda Qoyska Faysal Nuur Faarax iyo Madaxa Barnaamijyada Hay’adda SOS Bashiir Saciid Xasan.

Intii ay ku gada jirtay kormeerkeeda tuullada Carruurta SOS waxa ay Wasiirrada booqatay qeybaha kala duwan ee xarunta oo ay ka mid yihiin qeybta xannaaneynta Carruurta , qeybta isbitaalka, qeybta waxbarashada Jaamacadda SOS oo ay wax ku bartaan arday Soomaaliyeed iyo qeybta bukaan jiifka ee hooyada iyo dhallaanka.

Sidoo kale Wasiirka Wasaaradda Qoyska iyo Hormarinta Xuquuqul Insaanka XFS Amb Khadiija Maxamed Al-Makhzoumi ayaa xarigga ka jartay qeyb cusub oo lagu soo kordhiyay xanaaneeynta carruurta Tuulada SOS waxaana ay si gaar ah u dhiiri gelisay Carruurta Gabdhaha ah ee ku jira Tuullada SOS ayada oo ku boorisay iney isku diyaariyaan hogaaminta wadankooda.

Wasaaradda Qoyska iyo Hormarinta Xuquuqul Insaanka XFS ayaa mudooyinkii ugu danbeeyey aad u xoojisay dadaallada ay ku bixineyso Hormarinta iyo wax u qabashada carruurta Soomaaliyeed waxaana kormeerka Wasiirka Wasaaradda Qoyska iyo Hormarinta Xuquuqul Insaanka Soomaaliya ku tagtay Tuullada Carruurta SOS ku wehliyey Xoghayaha maamulka gobolka Banaadir Bilan Bile Maxamuud .

Madaxweynaha JFS, Mudane Dr. Xasan Sheekh Maxamuud, ayaa hambalyo u diray Garsoore Cumar Cabdulqaadir Cartan, kadib markii uu noqday garsoorihii Soomaaliyeed ee ugu horreeyay ee ka qayb gala tartanka caalamiga ah ee FIFA World.

“Guushan qiimaha leh waa mid kor u qaadaysa sumcadda Soomaaliya, isla markaana muujinaysa kartida iyo hibada ay leeyihiin dhalinyarada Soomaaliyeed ee ku hanweyn in ay dalkooda ku matalaan fagaarayaasha caalamka” ayuu yiri Madaxweyne Xasan Sheekh.

Waxaan ku bogaadinayaa dadaalka, xirfadda iyo hufnaanta uu muujiyay Garsoore Cumar, isaga oo noqday astaan dhiirrigelin u ah jiilka cusub ee Soomaaliyeed.