Djibouti: Shir madaxdeedka dalalka ku midaysan urur goboleedka IGAD oo dalka Jabuuti ka furmay 12-June ayaa gabangabadiisa laga soo saaray war-murtiyeed taageero siinaya dowladda Soomaaliya, kaas oo nuxurkiisu ahaa:

1. In Ku-xigeenka Xoghayaha Guud ee IGAD uu noqdo Soomaali ay soo magacawdo Dowladda Federaalka Soomaaliya, halka muddo 4 sano ahna xilka loo kordhiyey Mudane Workneh Gebeyehu oo ah Xoghayaha haatan ee IGAD.

2. In dib u habeyn lagu sameeyo hannaanka maamul ee dallada IGAD, iyadoo si siman ay u shir guddoomin doonaan sannad kasta mid ka mid ah dowladaha xubnaha ka ah.

3. Madaxda IGAD ayaa bogaadiyay guulaha laga soo hooyay dagaalka ka dhanka ah argagixisada Al-Shabaab, iyagoo sidoo kalena ku baaqay in Soomaaliya laga qaado cuna-qabataynta hubka, taas oo caqabad ku ah dagaalka Ciidamada Qalabka Sida ee Soomaaliya ay kula jiraan argagixisada Al-Shabaab.

4. Madaxda ayaa Beesha Caalamka ugu baaqay in Dowladda Federaalka Soomaaliya taageero dhaqaale iyo mid siyaasadeedba lagu siiyo meelmarinta go’aammadii ay gaareen Golaha Wadatashiga Qaranka ee Soomaaliya.

5. IGAD ayaa dhinacyada dagaalka Laascaanood ugu baaqday in si degdeg ah loo joojiyo dirirta, iyo in wadahadal lagu xalliyo kala aragti duwan

Gudoomiyaha hay’adda maaraynta musiibooyinka ee SoDMA mudane Maxamuud Macallim Cabdulle oo ay wheliyaan agaasimaha waaxda maareynta musiibooyinka mudane Khadar Maxamed Sh Nuur iyo la-taliye sare Maxamed Macallim (Wayaaka) ayaa maanta kulan la yeeshay madax ka socotay hay’adda Start Network.

kulanka oo ka dhacay xarunta hay’adda SoDMA ayaa looga wada hadlay xoojinta xariirka labada hayádood, wada shaqeynta iyo sidii loogu diyaar garoobi lahaa qabsoomidda shirka ka hortogga aafooyinka oo ka dhici doona Muqdsiho 18 iyo 19 June 2023.

Sidoo kale waxaa kulanka lagu soo qaday sidii loo dar dar galin lahaa istraatiijyadda maaliyadda ee ka hortgga aafooyinka, waxaana ugu dambayn gudoomiyaha hay’adda maaraynta musiibooyinku u mahadceliyey madaxda ka socotay hay’adda Start Network, booqashada ay ku yimadeen xatunta hay’adda iyo wada shaqaynta ka dhalatay kulanka maanta.

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre,ayaa maanta oo daah-furay dhoofinta hilibka xoolaha Soomaaliya ee loo iibgeynayo dalka Sacuudiga.

Mudane Xamse Cabdi Barre ayaa ku tilmaamay tallaabo guul ah dhoofka hilibka Xoolaha Soomaaliya ee ay oggolaatay Boqortooyada Sacuudigu, waxuuna xusay in dadka Soomaaliyeed iyo ganacsatada ay ka heli doonaan dhaqaale iyo  shaqo abuur ka badan kii laga heli jiray dhoofka xoolaha nool.

Ra’iisul Wasaare Xamsa Cabdi Barre ayaa sheegay in dowladda Soomaaliya ay xoogga saari doonto maalgelinta kaabayaasha dhaqaalaha oo ay ka mid yihiin xoolaha, isagoo ugu baaqay ganacsataduna ay maalgashi ku sameeyaan khayraadka dalka, gaar ahaan dhinacyada Xoolaha, Beeraha, Kalluumeysiga iyo Tamarta.

Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) ayaa dhagax-dhigay Wadada Maxamuud Xarbi ee Degmada Warta Nabadda, taasi oo isku xirta Tuulada Cayaaraha ee Muqdisho Stadium iyo Isgoyska Folorensa, taasi oo muddooyinkii ugu danbeeyay aanan helin wax dib-u-dhis ah.

Munaasabada dhagax-dhiga ayaa waxaa goobjoog ka ahaa Guddoomiye Kuxigeenka Amniga iyo Siyaasadda Maamulka Gobolka Banaadir, Guddoomiyaha Degmada Warta Nabadda, Odayaasha Deegaanka iyo Bulshada Qeybahooda kala duwan.

Dib-u-dhiska lagu sameenaayo wadadaan Maxamuud Xarbi ee Degmada Warta Nabadda ayaa waxa uu qeyb ka yahay Mashruuca dalkaaga ku dhiso $1 oo uu dib u howlgaliyay Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale), taasi oo lagu hormarinaayo Caasimadda.

Wasiirka Warfaafinta,Dhaqanka iyo Dalxiiska XFS mudane, Daa’uud Aweys Jaamac oo tababar ku saabsan sida loo tabiyo wararka ku saabsan xaquuqda carruurta u furay qaar ka mid ah wariyeyaasha Soomaaliyeed.

Mudane, Daa’uud Aweys oo ka hadlayay furitaanka tababarka ayaa sheegay in carruurtu ay yihiin qeyb ka mid ah bulshada, taas oo muhiimad weyn ugu fadhido dowlad, Qaran ama Ummad jirta, kuwaas oo xaquuq buuxda u leh in ay helaan waxbarasho, caafimaad iyo dhammaan adegyada asaasiga ah.

“Dowlad, Qaran ama Ummad waxay wax ku noqotaa hadba sida ay carruurteeda daryeesho ama usoo koriso, waxayna xuquuq u leeyihiin carruurtu in ay helaan wax barasho, caafimaad, quudin iyo daryeel kasta oo ay bulshada u baahan tahay”

Wasiirka ayaa sheegay in dowladda Soomaaliya ay muhiimad gaar ah siineyso ilaalinta xaquuqda carruurta oo ay ka mid tahay in ay helaan waxyaabaha asaasiga u ah baahiyahooda guud, si ay mustaqbalka qeyb uga qaataan dhismaha dowladnimada.

Wasiirka ayaa wariyeyaashii ka qeyb galay tababarka u sheegay in ay muhiimaddu tahay sidii ay xil gaar ah isaga saari lahaayeen ilaalinta xuquuqda carruurta loona baahan yahay in ku dhiirri geliyaan in ay yihiin hoggaamiyeyaasha burrito, loona diyaariyo tacliin ahaan iyo dhaqan ahaanba.

Wasiirka Warfaafinta,Dhaqanka iyo Dalxiiska XFS mudane, Daa’uud Aweys Jaamac ayaa ugu dambayn sheegay in hadba sida loo diyaariyo carruurta maanta uu ahaanayo muuqaalka Soomaaliyda berri, loona baahan yahay in ay saxaafaddu door muhiim ah ka ciyaarto waadaama ay tahay halka ugu wanaagsan ee lagu gudbiyo farriimaha.