Kulanka 12-Aad ee wadajirka oo ka dhacay xarunta Golaha Shacabka waxaa shir guddoominayay guddoomiyaha Golaha Shacabka Mudane Sheekh Aadan Maxamed Nuur Madoobe,waxa uuna kooramkiisa ku furmay 152-Xildhibaan oo Golaha Shacabka ah Iyo 28-Xildhibaan oo Golaha Aqalka sare ah taasoo wadarta guud ee guntanka ama Kooramka kulanka uu ku furmay ka dhigeysa 180-Xildhibaan.

Ajendaha Kulanka maanta waxa uu ahaa Dib-u-eegista Dastuurka,Marxlada labaad oo ah Ka Doodista Soo jeedimaha wax-kabadalka Dastuurka gaar ahaa cutubka koowaad op ka hadlaya baaqa Jamhuuriyadda Federaalka Soomaaliya qodobadiisa koowaad ilaa sagaalaad.

Xildhibaanada labada Aqal ee BJFS oo kulanka ka hadlay ayaa fikirkooda ka dhiibtay dooda maanta ee dib u eegista dastuurka gaar ahaan cutubka koowaad,waxaana arrimaha aadka looga dooday ka mid ahaa in qoondada haweenka ee ka qeyb galka siyaasadda in dastuurka lagu xuso Iyo Sidoo kale shaqada maxkamada sare Iyo tan dastuuriga ah.

Kulanka waxaa goob joog ahaa guddiga dib u eegsita Iyo la socodka hirgelinta dastuurka ee Baarlamaanka labadiisa Aqal,guddiga madaxa banaan ee dib u eegista iyo hirgelinta Dastuurka iyo Sidoo kale qubaro iyo qaar ka

Mid ah culimaa’udiinka Soomaaliyeed.

Kismaayo: Madaxweynaha Jamhuuriyadda Federaalka Soomaaliya mudane Xasan Sheekh Maxamuud oo soo gaaray magaalada Kismaayo ayaa waxaa si diiran ugu soo dhoweeyay Madaxweynaha D. goboleedka Jubaland mudane Axmed Maxamed Islaam, Madaxweyne ku xigeenada, xubnaha Xukuumadda Jubbaland iyo boqolaal ka mid ah bulshada deegaanka.

Madaxweyne Xasan Sheekh Maxamuud ayaa muddada uu ku sugan yahay magaalada Kismaayo waxa uu kulamo la yeelandoonaa Madaxda Dowlad goboleedka Jubaland iyo qaybaha kala duwan ee bulshada, isaga oo dhagaysandoona talooyinkooda ku aaddan dowlad dhiska, ilaalinta midnimada iyo madax-bannaanida dalka iyo horumarka dalka.

              

Ra’isul wasaare ku-xigeenka XFS Md. Saalax Cabdi Jaamac ahna ku simaha Ra’iisulwasraaha XFS ayaa maanta xarunta dhexe ee SoDMA waxa uu ku Guddoomiyey shir gaar ah oo u dhaxeeyey Xafiiska Ra’isulwasaaraha, Hay’adda Maareynta Musiiboyinka Qaranka, Wasaaradaha Gargaarka dowlad goboleedyada dalka, mas’uuliyiin ka socotay hay’addaha iyo NGO yada maxalliga ah.

Shirkan oo looga hadlay xaaladaha bini’aadanimo ee dalka ayaa waxaa ka soo baxay in SoDMA qabato shir aan caadi ahayn oo looga hadlayo xaaladaha bini’aadanimada, caqabadaha jira iyo sida looga gudbi karo, in la dhameystiro sharciyada iyo siyasaddaha looga hortagayo is-dabamarinta gargaarka.

Kulanka ayaa sidoo kale looga hadlay in la dhiso guddi gaar ah oo ka kooban SoDMA iyo hay’adaha maxalliga ah oo ka shaqeeya in inta aysan dadka soo barakicin deegannadooda wax loogu qabto.

Kampala-Sii-hayaha Safaaraadda Soomaaliya ee dalka Yugaandha Mudane, Cabdiladhiif Maxamuud Cali oo booqasho ku tagay safaaradda dowladda aan walaalaha nahay ee Turkey ku leedahay dalka Yugaandha ayaa waxaa halkaas kusoo dhoweeyay Ambassador, Fatih Ak.

Sii-hayaha iyo safiirka ayaa kawada hadlay muhiimadda uu leeyahay xiriirka heerkiisu sarreeyo ee ka dhexeeya Soomaaliya iyo Turkiga iyo sida uu xiriirkaasi muhiim ugu yahay xasilloonida iyo nabadda Soomaaliya.

Amb; Cabdiladhiif Cali ayaa uga warbixiyay waxyaabihii ugu danbeeyay ee kusoo kordhay geeska Afrika, isagoo tilmaamay in kaalinta dalka Turkigu tahay mid aad muhiim ugu ah nabadda Bariga Afrika iyo Caalamkaba.

Dhankiisa Safiir dalka Turkey, Fatah Ak ayaa tilmaamay in dowladdiisu ay ka go’antahay in ay Soomaaliya u fidiso taageero dhan walba leh, midnimada iyo wadajirka dhuleed ee Soomaaliyana uu yahay lama taabtaan.

Ugu danbayn labada mas’uul ayaa ku heshiiyay in kulamada iyo wada tashiyada Diblomaasiyiinta labada safaaradood la joogteeyo.

Guddoomiyaha Maxkamadda sare ee dalka Baashe Yuusuf Axmed ayaa sheegay in amniga iyo cadaaladdu ay yihiin laba aan kala maarmin dowlad la’aanna aysan shaqayn karin.

Guddoomiye Baashe oo furay shir sanneedka 6-aad ee Xeer ilaaliyayaasha Soomaaliyeed ayaa ku dheeraaday muhiimadda ay leeyihiin amniga iyo caddaaladda, wuxuuna tilmaamay in dhammaan adeegyada kale ee bulshadu ay cid kale qaban karto, balse bulshadu aysan ka maarmin garsoorka iyo ammaan, wuxuuna dowladda ku boorriyay in lagu bixiyo dedaal badan.

Guddoomiyaha ayaa dul istaagay waajibaadka ka saaran xeer ilaalinta dalka iyo hay’adaha la shaqeeya la dagaallanka dmbiyada abaabulan, wuxuuna ku tilmaamay in ay tahay mas’uuliyad wadareed.

Taliyaha Ciidanka Booliska Soomaaliyeed Sulub Axmed Firin ayaa sheegay in dhibaatada ugu badan ee haysata laamaha amnigu ay tahay Xabsi la’aan, wuxuuna intaa raaciyay in ka boolis ahaan aysan haysan meel ay geeyaan maxaabiista la qabto.

Taliyaha Ciidanka Asluubta S/Guuto; Mahad Cabdiraxmaan Aadan ayaa xeer ilaaliyeyaasha dalka ugu baaqay in ay dhowraan waxa loo igmaday ee ah xeerka dalka,wuxuuna ku boorrriyay in cadaaladda lagu dedaalo.

Xeer Ilaaliye Guud ee Qaranka Dr; Suleymaan Maxamed Maxamuud ayaa sheegay in xafiiskiisa uu ku guuleystay in uu xalliyo caqabado badan oo hortaagnaa in Cadaalad la helo.

Guddoomiyaha Maxkamadda gobolka Banaadir Saalax Cali Maxamuud ayaa sheegay in Xafiiska Xeer ilaaliyaha guud ee Qaranka uu ku guuleystay in la yareeyo dambiyada abaabulan oo ay ka mid ahaayeen Ciyaal weerada iyagoo kaashanaya laamaha amniga.

Shirkan sanadlaha ah oo uu furay Guddoomiyaha Maxakamadda sare Baashe ayaa waxaa goobjoog ka ahaa Wasiirka wasaaradda cadaaladdda XFS, Xasan Macalin Maxamuud, Taliyaha Ciidanka Booliska, Taliyaha Ciidanka Asluubta, Guddoomiyaha Maxkamadda Racfaanka, xeer ilaaliyayaasha maamul goboleedyada iyo gobolka Banaadir iyo xubno ka tirsan laba Aqal ee BFS.

Addis Ababa- Wasiiru Dawlaha ahna ku simaha Wasiirka Wasaaradda Arrimaha Dibadda XFS mudane Cali Cumar Cali (Balcad) iyo wafdi uu hoggaaminayo ayaa magaalada Addis Ababa kaga qayb galay shir looga arrinsanayay guulaha laga gaaray howlgalka geba-gebada ah ee ATMIS, kaasi oo uu soo qaban-qaabiyay golaha amniga iyo nabad-gelyada midowga Africa.

Wasiirka waxaa shirka ku wehelinayay danjiraha Soomaaliya Mudane Cabdullaahi Maxamed Warfaa, la taliyaha amniga ee Ra’iisal Wasaaraha XFS mudane Kamaal Guutaale, Xoghayaha koowaad ee Ssafaaradda JFS ee Addis Ababa u qaabbilsan midowga Africa mudane, Shaafici Nuur Calas, diplomaasiyiin ka tirsan safaaradda iyo mas’uuliyiin kala duwan oo kamid ahaa wafdiga wasiirka.

Shirka waxaa sidoo kale goob joog ahaa dhamaan dalalka taageera horumarka iyo xasilinta Soomaaliya, hay’adaha Qaramada Midoobay iyo Midowga Yurub iyo khuburada Dowladda Soomaaliya kala shaqaynaysa meelmarinta iyo dhamaystirka hawl-galka ATMIS oo sanadkan 2024-ka si rasmi ah loo soo geba-gebayn doono.
Shirkan oo qaatay saacado badan, ayaa si qota dheer looga dooday natiijooyinka dhaxal-galka ah ee laga gaaray qorshaha Qaran ee la xiriira in ciidamada xoogga dalka Soonaaliyeed ay si buuxda ula wareegaan amniga Soomaaliya.

Wasiir Cali Cumar Cali (Balcad) oo shirka khudbad ka jeediyay ayaa hoosta ka xarriiqay in Soomaaliya ay si dhab ah ugu guulaysatay in Ciidamada xoogga dalka loo carbiyo xasilinta nabad-gelyada Soomaaliya iyo xaalufinta kooxaha Khawaarijta, isla markaana ay DFS kalsooni buuxda ku qabto tayada iyo tababarrada ay qaateen CXDS ayna si buuxda ugu diyaarsan yihiin la wareegidda amniga guud ee Soomaaliya.

Wasiirka ayaa dalalka Africa iyo saaxiibbada Soomaaliya uga mahadceliyay dedaalka iyo garab istaagga ay ku bixiyeen marxaladda wanaagsan ee ay xiligan Soomaaliya soo gaartay.

Guddoomiyaha Golaha Shacabka Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) oo xalay booqday Safaraadda Dwladda Imaaraatka Carabta ee Muqdisho ayaa kulan tacsiyeyn ah la qaatay Amb. Axmed Jumca Al-Rumeysi.

Guddoomiye Sheekh Aadan Madoobe ayaa Danjiraha Dalka Imaaraadka uga tacsiyadeeyay saraakiishii ku geeriyootay weerarkii argagixisanimo ee Xerada Gen. Gordan kuwaas oo dalkeenna u joogay in ay gacan ka geystaan dib u dhiska Ciidamada Qalabka-sida.

Guddoomiye Sheekh Aaden Madoobe ayaa uga mahadceliyay dowladda iyo shacabka aan walaalaha nahay garab istaagooda walaalnimo.

Marka- Cutubyo ka tirsan Guutada Cumar binu-khadaab ee CXD iyo booliska gaarka ah ee Haramcad ayaa howlgal qorshaysan ka fuliyay degaannada Godka kubash, Galka Geeriyaan, Galka Saalimow, Mara-cadde oo u dhexeeya tuulooyinka Gendershe iyo Arbacow ee gobolka Shabeellada hoose.

Ujeedka howlgalkaas ayaa ahaa Burburinta maxkamad beenaad ay ka halkaasi ku lahaayeen khawaariijta iyo goobo ay kaga dhuumalaysanayeen duqeymaha iyo weerarrada kaga imanaya CXD iyo saaxiibada caalamka.

Khawaarijta arxanka daran ayaa caado ka dhigatay isku dhex qarinta dadka shacabka ah, maadaama aysan ka hortagi karin awoodda ciidamada Qaranka.