Wasiirka Warfaafinta ee Xukuumadda Federaalka Soomaaliya mudane Daa’uud Aweys Jaamac oo wakiil ka ah Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa ka qeybgaley kulan quraan akhris iyo duco loogu sameeyay Jasiiradda Zanzibar Allah ha u naxariistee Al Xaaji Sheikh Ali Hassan Mwinyi oo ahaa Madaxweynihii 2aad ee Jamhuuriyadda Tanzania.

Wasiir Daa’uud Aweys Jaamac ayaa Madaxweynaha Jasiiradda Zanzibar Dr. Hussein Ali Mwinyi oo ah wiilka Madaxweyihii hore ee geeriyooday kana qeyb ahaa kulanka ducada la wadaagay tacsi uu uga siday madaxweyne Xasan Sheekh Maxamuud. Waxan marxuumka Ilaahay uga baryay inuu Jannatul Fardowsa ka waraabiyo, qoyskii, ehelkii iyo shacabka reer Tanzania ee uu ka baxay uu samir iyo iimaan ka siiyo.

Wasiir ku xigeenka Wasaaradda Caafimaadka iyo Daryeelka Bulshada Mudane ee Xukuumadda Federaalka Soomaaliya Dr. Maxamed Xasan Maxamed Bulaale, ayaa ka qaybgalay shirwaynaha labaad ee caafimaadka Midaysan oo lagu qabtay magaalada Muqdisho, isla markaana ay ka soo qaybgaleen xubno katirsan Xukuumadda JFS, labada Aqal ee Barlamaanka JFS, aqooyahano iyo xubno ka socday Hay’adda Caafimaadka Adduunka ee WHO.

Wasiir ku xigeenka ayaa waxa uu sheegay in ay muhiimtahay xoojinta Hal shaqaale oo Caafimaad ah si loo dhaqaajiyo isbadal wanaagsan oo la jaan qaadka hadafka Wasaaradda, waxa uuna  ka qaybgalayaasha ku dhiirigeliyay inay iska kaashadaan oo ay hal-abuuraan, iyadoo la isticmaalayo hab Caafimaad mideysan si loo hubiyo caafimaadka bulshada iyo deegaanka ee jiilasha mustaqbalka.

Barnaamijka Caafimaadka Midaysan waa barnaamij midaynaya iskaashiga qaybaha kala duwan ee caafimaadka si loo xaliyo dhibaatooyinka caafimaadka bulshada, loona helo caafimaadka ugu wanaagsan ee dadka, xoolaha, dhirta iyo degaanka. Wacyigelinta bulshada iyo dowladuba waxa ay asal u tahay horumarinta caafimaadka dadka, xoolaha, dhirta iyo deegaanka oo iyagane ka qayb qaadanaayo horumarinta dhaqan-dhaqaale ee Soomaaliya.

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa xafiiskiisa ku qaabilay Danjiraha Qatar ee Soomaaliya, Mudane Abdullah Salem Al Nuaimi, iyagoo ka wada hadlay xoojinta xiriirka iyo iskaashiga ka dhaxeeya labada dal ee walaalaha ah.

Mudane Xamsa ayaa uga mahadceliyey Dowladda Qatar taageerada ay siiso Soomaaliya, gaar ahaan dhinacyada amniga, tababarka ciidamada qalabka sida, horumarinta adeegyada asaasiga ah iyo gargaarka.

Dhankiisa, Danjire Abdullah, ayaa sheegay in ay sii wadi doonaan taageerada dhinacyada kala duwan leh ee ay mar walba la garab taagan yihiin Dowladda iyo shacabka Soomaaliyeed.

Faah faahin dheeraad ah ayaa ka soo baxaysa howlgal ay si wadajir ah uga fuliyeen gobolka Jubbada hoose Ciidamada Qaranka iyo kuwa dowlad gobolleedka Jubbaland.

Howlgalka oo loo qorsheeyey si heerkeedu sarreeyo laguna dilay in ka badan 30 Khawaarij ah ayaa ciidamadu ka fuliyeen deegaanno hoos taga degmada Jamaame ee gobolka Jubbada Hoose iyo Jiinka Wabiga.

Howlgalka ayaa lagu qabtay xubno maleyshiyaad ah oo 10 ku dhaw kuwaas oo dhibaato ku hayay shacabka deegaanka Baar sanguuni tobaneeyo kalena waa kagu dilay sida ay Warbaahinta Qaranka u xaqiijiyeen saraakiisha Ciidamadu.

Ciidamada Qaranka oo kaashanaya xoogagga deegaanka iyo ciidamada ammaanka dowlad goboleedyada ayaa kordhiyey howlgalada lagu beegsanayo Khawaarijta iyadoo guulo waaweyn laga gaaray howlgaladaas.

Zanzibar:- Wasiirka Warfaafinta, Dhaqanka iyo Dalxiiska, ee Jamhuuriyadda Federaalka Soomaaliya Mudane Daud Aweis Jama ayaa isagoo ka wakiil ah Madaxweyne Mudane Xasan Sheekh Maxamuud waxaa uu Jasiiradda Zanzibar ee  Jamhuuriyadda Tanzania uga qeybgaley munaasabadda aaska iyo tacsida Madaxweynihii 2aad ee Tanzania Allah ha u naxariisto Al Haji Ali Hassan Mwinyi oo geeriyooday maalintii Khamiista oo taariikhdu ay ku beegneyd 29 February.

Wasiirka ayaa Madaxweynaha Tanzania Samia Suluhu Hassan iyo shacabka Tanzania la wadaagey tacsi uu ka siday Madaxweyne Xaaan Sheekh Maxamuud.

Allah ha u naxariisto Al Haji Ali Hassan Mwinyi waxaa uu Tanzania Madaxweyne ka ahaa intii u dhexeysay 1985 ilaa 1995kii.

Innaa Lillahi wa Innaa Ileyhi Raajicuun

Wasiirka Arrimaha Gudaha, Federaalka iyo Dib u heshiisiinta Xukuumadda Federaalka Soomaaliya mudane Ahmed Macalin Fiqi oo ay wehliyaan wasiirro  xukuumadda Federaalka ah, xildhibaanno BFS ka tirsan iyo maamulka Machadka Heritage ayaa maanta garoonka caalamiga ah ee Aadan Cadde ee caasimadda Muqdisho ku soo dhaweeyey Wasiirka wasaaradda Arrimaha Dinta, Dhaqanka iyo Awqaafta ee dalka Djibouti Md. Muumuin Xasan Barre iyo wafdi uu hogaaminayo oo ka qeybalaya wajiga 2-aad ee dhammaystirka Madasha Aragti Wadaagga Sanadlaha ah ee Machadka Heritage oo magaalada Muqdisho lagu qaban doono 4 -5 bishan Maarso.

Mudane Axmed Macallin Fiqi, oo ka hadley munaasabadda soo dhaweynta Wasiir Muumin ayaa xusay xiriirka taariikhiga ah labada dal ee walaalaha ah ee Somaaliya iyo Djibouti, iyo in uu ku soo dhowaado gacmo furan dalkiisii labaad, una rajeeyey mudada uu ku sugan yahay magaalada Muqdisho kulamada uu la qaadan madaxda dawladda Soomaaliya kuwo miro dhal ah oo kor u qaadaya xiriirka labada dal ee walaalaha ah, ku guulaysto hawlaha kale ee uu u soo sodcaalay iyo joogitaan nabad ah.