Wasiirka Warfaafinta, Dhaqanka iyo Dalxiiska Mudane Daa’uud Aweys Jaamac ayaa soo xiray aqoon-isweydaarsi hal maalin ah oo ku saabsanaa habraaca xiriirka hay’adaha dowladda xilliyada xaaladaha degdegga ah.

Aqoon-isweydaarsigan waxaa furay Agaasime ku-xigeenka Madaxtooyada Jamhuuriyadda Maxamed Amiin Sheekh Cismaan, waxaana ka qeyb galay mas’uuliyiin kala duwan oo dhanka xiriirka iyo warbaahinta u qaabilsan dowladda. Waxaa lagu soo bandhigay tusaalooyin iyo tijaabooyin la xiriira mowduuca aqoon-isweydaarsiga.

Wasiir Daa’uud Aweys oo hadal ka jeediyay xiritaankii aqoon-isweydaarsiga ayaa tilmaamay in dowladdu mudnaan gaar ah siisay mideynta farriimaha ka soo baxaya hay’adaha, si ay u noqdaan kuwo degdeg ah, sugan, isla markaana xambaarsan xogaha ay shacabku sugayaan waqtiga ku habboon, si meesha looga saaro marin-habaabinta iyo been-abuurka ay fidiyaan Khawaarijta iyo kuwa la hal-maala.

Sidoo kale, Wasiiru Dowlaha Gaashaandhigga Cumar Cali Cabdi oo munaasabadda hadal ka jeediyay ayaa bogaadiyay isku xirnaanta sii xoogeysaneysa ee hay’adaha dowladda ee ku aaddan mideynta farriimaha dowladda.

Ugu dambeyn, Wasiir Daa’uud Aweys iyo Wasiiru Dowlaha Gaashaandhigga Cumar Cali Cabdi ayaa shahaadooyin guddoonsiiyay ka qeybgalayaashii aqoon-isweydaarsiga.

Aljeris: Wasiirka Wasaaradda Cadaaladda iyo Arrimaha Dastuurka ee Xukuumadda JFS mudane Xasan Macallin Maxamuud ayaa maanta kulan muhiim ah la yeeshay Ra’iisul Wasaaraha Jamhuuriyadda Shacbiga Dimuqraadiga ah ee Aljeeriya, Mudane Sifi Ghrieb.

Kulanka ayaa diiradda lagu saaray xoojinta xiriirka qotoda dheer ee taariikhiga ah ee ka dhexeeya Soomaaliya iyo Aljeeriya, adkeynta iskaashiga laba geesoodka ah, iyo horumarinta wada shaqeynta dhinacyada garsoorka, caddaaladda iyo is-dhaafsiga khibradaha. Labada dhinac ayaa isla qaatay muhiimadda ay leedahay sii ambaqaadidda iskaashiga ku dhisan walaaltinimo, is-ixtiraam iyo dan wadaag.

Wasiir Xasan Macallin ayaa uga mahadceliyey Dowladda iyo Shacabka Aljeeriya soo dhoweynta diirran iyo martigelinta heerka sare ah ee loo fidiyey asaga iyo wafdiga Jamhuuriyadda Federaalka Soomaaliya, isaga oo xusay in kulankan uu xoojinayo saldhigga xiriirka istiraatiijiga ah ee labada dal.

Kulankaan waxaa goobjoog ka ahaa Safiirka Soomaaliya u fadhiya Aljeeriya, Danjire Yuusuf Axmed Xasan (Yuusuf Jeego)

Riyaad: Wasiirka Gaashaandhigga Jamhuuriyadda Federaalka Soomaaliya, Mudane Axmed Macallin Fiq oo magaalada Riyaad ee Boqortooyada Sucuudi Carabiya ku jooga booqasho shaqo, ayaa kulan doceed la yeeshay Wasiirka Warshadaha Difaaca ee Jamhuuriyadda Azerbaijan, Mudane Vugar Mustafayev, intii uu socday Bandhigga Difaaca Adduunka 2026.

Kulankan ayaa ku soo beegmay iyadoo laga ambaqaadayo heshiiskii iskaashiga difaaca ee labada dal kala saxiixdeen bishii Febraayo 2024, kaas oo dhidibada u taagay xoojinta wada-shaqaynta dhinacyada gaashaandhigga iyo warshadaha difaaca.

Labada Wasiir ayaa ka wada hadlay hirgelinta qodobada heshiiskaas, gaar ahaan dhinacyada sanaacada difaaca. Wafdiga Soomaaliya waxaa la siiyey sharraxaad waafi ah oo ku saabsan awoodda wax-soo-saarka iyo agabka difaaca ee Azerbaijan ku soo bandhigtay bandhigga ka socda Riyaad.

Wasiir Fiqi ayaa carrabka ku adkeeyey muhiimadda ay leedahay in Soomaaliya ka faa’iidaysato waaya-aragnimada Azerbaijan ee dhinaca warshadaha difaaca, si loo taageero tayeynta, qalabaynta, iyo horumarinta awoodda Ciidanka Xoogga Dalka Soomaaliyeed.

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay Safiirka Dowladda Ciraaq u qaabilsan Soomaaliya Mudane Dr. Qahtan Taha Khalaf Al-Janabi, wax ayna ka wada hadleen xoojinta xiriirka taariikhiga ah iyo iskaashiga laba geesoodka ah ee ka dhexeeya labada dal ee walaalaha ah.

Kulanka ayaa diiradda lagu saaray horumarinta iskaashiga dhinacyada siyaasadda, amniga, dib-u-dhiska, iyo gargaarka bani’aadannimada iyada oo la adkeeyey muhiimadda ay leedahay in la ballaariyo fursadaha wada shaqeyneed si ay uga faa’iideystaan labada shacab.

Ra’iisul Wasaaraha ayaa bogaadiyey doorka Dowladda Ciraaq ee ku aaddan taageerada midnimada iyo madaxa-bannaanida dhuleed ee Jamhuuriyadda Soomaaliya, isaga oo xusay in Soomaaliya ay mudnaan gaar ah siinayso xoojinta xiriirrada diblomaasiyadeed iyo iskaashiga dalalka Carabta.

Dhankiisa, Danjire Dr. Qahtan, ayaa caddeeyey sida ay dowladdiisu uga go’an tahay garab istaagga Soomaaliya, isla markaana ay sii kordhin doonto taageerada dhinacyada horumarinta iyo maalgashiga.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa hambalyo iyo bogaadin u diray shacabka Soomaaliyeed iyo guud ahaan hay’adaha Qaranka, taas oo ku aaddan guusha taariikhiga ah ee dalkeennu uu ku hanatay kursiga Golaha Nabadda iyo Amniga Midowga Afrika, muddada 2026–2028.

Madaxweynaha ayaa tilmaamay in guushan ay astaan u tahay horumarka diblomaasiyadda Soomaaliya iyo dib u soo kabashada doorka hoggaamineed ee dalkeennu uu ku leeyahay heer qaaradeed iyo heer caalam iyo shaqada wanaagsan ee ay qabatay Wasaaradda Arrimaha Dibadda iyo Iskaashiga Caalamiga ah ee dalkeena.

“Kalsoonida iyo taageerada ay Soomaaliya ka heshay dalalka xubnaha ka ah Midowga Afrika waxay caddeyn u tahay isbeddelka togan ee dalka ka socda iyo xiriirka iskaashi ee sii xoogeysanaya. Horey waxaan xubin uga noqonay Golaha Ammaanka Qaramada Midoobey, maanta waxaynu fadhinnaa Golaha Amniga iyo Nabadda Afrika”.

Madaxweyne Xasan Sheekh Maxamuud ayaa si gaar ah ugu mahadceliyay dhammaan dalalkii taageeray una codeeyay Soomaaliya, isagoo xusay in guushan ay ka tarjumeyso wadajir, saaxiibtinimo iyo aragti mideysan oo ku aaddan Afrika nabad ah, xasilloon, isla markaana horumar leh.

Addis Ababa: Jamhuuriyadda Federaalka Soomaaliya ayaa loo doortay inay ka mid noqoto Golaha Nabadda iyo Ammaanka ee Midowga Afrika (PSC) muddada u dhaxeysa 2026–2028, taas oo ah guul taariikhi ah oo muujineysa horumarka diblomaasiyadeed ee Soomaaliya iyo dib u soo noqoshadeeda kaalinta ay ku lahayd saaxadda qaaradda iyo tan caalamkaba. Doorashada Soomaaliya waxay ka tarjumeysaa kalsoonida iyo taageerada ay dalalka xubnaha ka ah Midowga Afrika u muujiyeen.

Soomaaliya waxay u mahadcelineysaa dhammaan dalalkii taageeray una codeeyay musharaxnimadeeda. Taageeradan wadajirka ah waxay muujineysaa iskaashi xooggan iyo aragti mideysan oo ku wajahan Afrika nabdoon, xasilloon, isla markaana barwaaqo ah.

Nairobi: Danjiraha Jamhuuriyadda Federaalka Soomaaliya, Mudane Jabriil Ibrahim Cabdulle ayaa ka qeyb galay kulankii Sanadlaha ah ee Diblomaasiyadeed ee Bilowga Sanadka cusub oo ka dhacay Aqalka Madaxtooyada ee dalka Kenya. Kulanka ayaa waxaa martigeliyay Madaxweynaha Jamhuuriyadda Kenya, Mudane William Ruto, una dhaxeeyay safiirrada, wakiillada sare, iyo madaxda hay’adaha caalamiga ah ee ka howlgala dalka Kenya.

Danjire Jabril oo ka hadlay Kulanka ayaa uga mahad celiyay madaxweynaha Dalka kenya da’daaliisa uu ku doonayo in la iskugu furo ganacsiga wadamada Afrika, gaar ahaan dalalka ku bahoobay ururka Goboleedka Bariga Afrika.

Ganacsiga dadka Soomaaliyeed ayaa ku sii fidaya guud ahaan dalalka Afrika.