Ciidanka Xoogga Dalka ayaa saaka fashiliyay weerar fuleynimo ah oo ay Khawaarijtu ku dooneysay in ay ku qaadaan deegaanka Harboole ee degmada Afmadoow ee Gobolka Jubbada Hoose. Khawaarijta ayaa halkaas lagu gaarsiiyay khasaare lixaad leh welina geesiyaasha Qaranka ay sii baacsanaya firxadka howdka ku cararay.

Deegaanka Harboole oo ah meesha uu weerarka ka dhacay ayaa u dhexeeyo degmada Afmadow iyo deegaanka Janaay Cabdalle, waxaana marta waddo muhiim u ah oo isku xirta gobolka Jubbada Hoose iyo gobolka Jubbada Dhexe, halkaas oo maalmo kahor laga fara maroojiyay khawaarijta

Hirshabeelle:- Maamulka, dhaqanka, wax-garadka, haweenka, kooxaha hiddaha iyo dhaqanka, iyo bulshada degmada Cali Gaduud ayaa galabta si wadajir ah u soo dhaweeyay wafdi uu hoggaaminayay Madaxweynaha Dowlad Goboleedka Hirshabeelle Mudane Cali Cabdullaahi Xuseen (Cali Guudlaawe).
Arrintan ayaa qeyb ka ah socdaal uu ku dardargelinayay Madaxweynaha Hirshabeelle mashaariicda sii dhammaaneyso iyo kuwa cusub ee laga wado degmooyinka qaar.

Madaxweynaha Hirshabeelle ayaa sidoo kale kulan bulsho la qaatay shacabka degmada Cali Gaduud.

“Waan ka mahadcelinayaa soo dhaweynta aan lagu kala maqneyn. Farxad weyn ayay ii tahay xorreyntii kaddib inaan imaado Cali Gaduud oo degmo ah.”

Degmada Cali Gaduud ayaa ka mid ah degmooyinka awoodda looga saaray Khawaarijta haddana waxa ay cagta saartay waddada horumarka.

Wasiirka wasaaradda Shaqada iyo Arrimana Bulshada ee Dowladda Federaalka Soomaaliya, Mudane Xildhibaan Dr. Maxamed Cilmi Ibraahim ayaa maanta kulan miro dhal ah la yeeshey Mas’uuliyiin sare oo ka socday xafiiska UNICEF Soomaaliya oo ay hoggaaminaysay wakiilka hey’ada, Marwo Wafaa saeed.

Kulanka ayaa diiradda lagu saaray dhowr arrimood oo muhiim ah oo ay ka mid tahay sidii loo adkeyn lahaa iskaashiga ka dhaxeeya Hey’ada UNICEF iyo wasaaradda Shaqada iyo Arrimaha Bulshada, dardargelinta dadaallada wadajirka ah ee ilaalinta bulshada, iyo sida ugu wanaagsan loo gaarsin karo taageerada dadka aadka u nugul.

Wasaaradda Shaqada iyo Arrimaha Bulshada waxaa ka go’an dardargelinta iyo horumarinta adeegga bulshada iyo sidii wax looga qaban lahaa bulshada qeybaheeda kale duwan gaar ahaan dadka nugul.

Kulankan oo ka dhacay xarunta wasaaradda waxaa kasoo qeybagley Agaasimaha Guud ee wasaaradda Shaqada iyo Arrimaha Bulshada, Mudane Yussuf Wadani iyo qaar ka mid ah la-taliyaasha wasaaradda.

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre iyo wafdi uu hoggaaminayo ayaa galabta u ambabaxay magaalada Dooxa ee dalka Qatar.

Ra’iisul Wasaare Xamsa ayaa dalka Qatar kaga qeybgali doona shirweynaha Qurba-joogta Soomaaliyeed, waxa uuna hal kaas ka jeedin doonaa khudbad dhinacya badan taaban doonta.

Ra’iisul Wasaaraha ayaa sido kale kulamo muhiim ah la yeelan doona Ra’iisul Wasaaraha iyo madax kale oo ka tirsan hoggaanka dalka Qadar.

Wasiirka Cadaaladda iyo Arrimaha Dastuurka XFS Mudane Xasan Macallin Maxamuud ayaa maanta furay shirka Wadatashiga Qorshaha Istiraatijiyadda Asluubta Soomaaliyeed.

Shirkaan waxa ka soo qeybgalay Xeerilaaliyaha Guud ee qaranka iyo safiirka dowladda Mareykanka, Xoghayaha Joogtada Wasaaradda Cadaaladda, sakaariil ka tirsan Garsoorka, Xafiiska Raysalwasaaraha, Wasaaradda Amniga iyo xubno bulshada rayidka ah.

Wasiir Xasan Macallin ayaa ka dhawaajiyay in nidaamka asluubta dalka uu wajahaayo culeys badan oo ay ugu horreyso xabsiyada oo tiro yar, ciriirina ah. Sidoo kale wasiirka ayaa xusay in aan muddo dheer awoodda la saarin horumarinta Asluubta sidaas darteed ajandahiisa koobaad uu yahay horumarinta iyo tayenta Asluubta.

Dowladda Federaalka Soomaaliya ayaa dedaal weyn ugu jirta horumarinta guud ahaan caddaaladda, gaar ahaanna xabsiyadda dalkeena.