Wasiirka amniga gudaha dowladda FS mudane Cabdullaahi Sheekh Ismaaciil (Fartaag) ayaa kulan la yeeshay wakiilka Qaramada Midoobay ee Soomaaliya, James Swan. Kulankan ayaa lagu falanqeeyay dhowr qodob oo muhiim ah oo la xiriira xaaladda amni ee dalka.

Kulanka ayaa si gaar ah diiradda loogu saaray Caddeynta digniinaha iyo wargelinta Qaramada Midoobay la sheego in ay ka soo saarto amniga dalka, isweydaarsiga macluumaadka ku saabsan khataraha ay sababi karaan diyaaradaha aan duuliyaha lahayn iyo halista xeebaha, Ammaanka Muqdisho kaddib marxaladda kala guurka ee ATMIS, kulanka isku-xirka amniga ee FGS-ATMIS-UN-AAIA iyo Warbixin ku saabsan barnaamijka wadajirka ah ee booliska.

Xafiiska Qaramada Midoobay ee Soomaaliya ayaa iska fogeeyey in uu soo saaro warbixinno iyo digniino la xiriira amniga dalka, kuwaas oo muwaadiniinta looga digayo khataro amni in ay ku soo wajahan yihiin goobo la cayimay.

Wasiirka Amniga Gudaha ayaa sidoo kale uga digay shacabka Soomaaliyeed farriimaha noocaan ah ee lagu marin habaabinayo bulshada, laguna khal khal gelinayo amniga. Waxa uu carabka ku adkeeyay in amniga dalka uu yahay mid xasaasi ah loona baahan yahay in dhammaan dhinacyada ay si taxaddar leh uga shaqeeyaan.

Ra’iisul Wasaare Ku-Xigeenka XFS Mudane Saalax Axmed Jaamac ayaa guddoomiyay shir ku saabsan xasillinta deegaannada Hirshabelle oo uu goobjoog ka ahaa Madaxweynaha dowlad goboleedka Hirshabelle Mudane Cali Guudlaawe Xuseen.

Shirkan oo ku saabsanaa sidii adeegyada aasaasiga ah loo gaarsiin lahaa, loona qiimayn lahaa mashaariicda ka socota deegaannada Hirshabelle, ayaa lagu lafa-guray muhiimadda barnaamijka xasillinta iyo wax-ka-qabashada baahiyaha dadka Soomaaliyeed ee iska dulqaaday culeyska cadowga Khawaarijta.

Madaxweynaha Hirshabelle ayaa warbixin ka siiyay Xukuumadda safarkii uu dhawaan ku soo maray inta badan degaannada Hirshabelle oo ahaa u-kuur-gelidda xaaladda dadka degaannada la xoreeyey.

Ra’iisul Wasaare Ku-Xigeenka XFS ayaa dhankiisa xusay in Xukuumaddu ahmiyad wayn siinayso sidii dadkaas u heli lahaayeen adeegyada aasaasiga ah, sida waxbarashada, caafimaadka, biyo nadiif ah iyo dhismaha maamulka degmooyinka iyo laamaha amniga.

Guddoomiyaha Hay’adda maareeynta masiibooyinka mudane Maxamuud Macallin Cabdulle ayaa ka qayb-galay munaasabadda maalinta caalamiga ah ee Bani’aadannimada Adduunka oo la xuso sanad walba 19-ka Agoosto maanta oo kale, munaasabada ayaa lagu muujiyaa laguna sharfaa dadaalka iyo naf-hurnimada samafalayaasha.

Guddoomiya hay’adda SoDMA Maxamuud Macallin ayaa xusay muhiimadda ay maalintaan u leedahay adduunka, dalka iyo Hay’adda SoDMA, isagoo tilmaamay sida ay muhiim u tahay xusuusta shaqaalaha samafalka ee ku waxyeelloobay caawinta dadka kale.

Xuskan ayaa waxaa ka soo qayb-galay hay’addaha kala duwan ee ka shaqeeya Arrimaha Bini’aadantinimada dalka, daladda NGO-da Soomaaliyeed (Somali NGO Consortium) ku-xigeenka ergayga gaarka ah ee Qaramada Midoobay, George Conway iyo madaxa xafiiska UN-OCHA ee Soomaaliya.

Wasiirka wasaaradda maaliyadda dowladda FS mudane Biixi Iimaan Cige oo maanta ka hor hadlay golaha shacabka Jamhuuriyadda FS ayaa sheegay in cabashada ganacsatada Muqdisho aysan ahayn canshuur dheeraad ah oo lagu soo rogay, balse ay culeysyo ka muujiyeen lacago kale oo laga qaado.

Wasiirka ayaa xusay in ganacsatadu ay bixiyaan canshuurta ku waajibtay, taasna aanu ka jirin wax caqabad ah, balse dowladdu ay hadda ku hawlantahay in ganacsatada laga dul qaado culaysyada kale ee aan qaban.

Biixi ayaa sheegay in wax badan oo ka mid ah caqabadaha ay ka cawdeen ganacsatada la xaliyey, uuna la fariistay guddi ka socda, haatana la doonayo ilaa heer xukuumadeed in cabashadooda la gaarsiiyo, si go’aan mug iyo miisaan leh oo xal rasmi ah keeni kara looga soo saaro