Wasiirka Arrimaha Dibadda iyo Iskaashiga Caalamiga, Mudane Danjire Axmed Macallin Fiqi Axmed, ayaa maanta si rasmi ah u daah-furay Maktabadda buugaagta ee Machadka Diblomaasiyadda, xilli uu sidan oo kale dabayaaqadii toddobaadkii hore u daahfuray koorsooyin lagu baranayo afafka khalaad.

Wasiir Fiqi, ayaa caddeeyay daahfurka Maktabadda buugaagta ee Machadka Diblomaasiyadda in lagu gaarayo kaydinta iyo akhriska qoraallada, buugaagta iyo cilmi-baarista la xiriirta diblomaasiyadda iyo kuwa waxtarka leh.

Agaasimaha Machadka Diblomaasiyadda, Danjire Cabdulqaadir Amiin Sheekh, ayaa daahfurka Maktabadda ka shaaciyay inay u furantahay aqoonyahanka, qoraayaasha iyo cid walba oo buugaagta iyo qoraallada dhaxal-reeb aqooneed leh inay soo gaarsiin karaan Maktabadda, oo ku dhex taalla xarunta Wasaaradda.

Tallaabooyinkan ayaa qeyb ka ah qorshaha horumarinta iyo kobcinta aqoonta diblomaasiyiinta.

Guddoomiye kuxigeenka labaad ee Golaha Shacabka Baarlamaanka Jamhuuriyadda Federaalka Soomaaliya Mudane Cabdullaahi Cumar Abshirow ayaa ka qeyb galay kulan guddiga arrimaha dibadda iyo iskaashiga caalamiga ah ee Golaha Shacabka uu ku dooranayay guddoomiyaha cusub ee guddiga.

Doorashada oo u dhacday hab gacan taag ah waxaa xilka guddoomiyaha guddiga isku soo sharaxay laba musharax oo kala ah Xildhibaan Maxamed Jaamac Mursal Geelle iyo Xildhibaan Cabdisalaan Xaaji Axmed Dhabancad.

Xubnaha guddiga ayaa Xildhibaan Maxamed Jaamac Mursal Geelle u doortay inuu noqdo guddoomiyaha cusub ee guddiga arrimaha dibadda iyo iskaashiga caalamiga ah ee Golaha Shacabka.

Guddoomiye kuxigeenka labaad ee Golaha Shacabka Baarlamaanka Jamhuuriyadda Federaalka Soomaaliya Mudane Cabdullaahi Cumar Abshirow oo doorashada ka dib hadlay ayaa guddoomiyaha cusub ee guddiga kula dardaarmay inuu dardargeliyo shaqada guddiga ,isaga oo dhanka kale xubnaha guddiga ku booriyay in ay la shaqeeyaan.

Doorashada guddoomiyaha cusub ee guddiga arrimaha dibadda iyo iskaashiga caalamiga ah ee golaha shacabka ayaa waxaa goob joog ahaa habdhowre kuxigeenada golaha, xoghayaha guud ee Golaha Shacabka iyo sidoo kale qaar ka mid ah Guddiyada golaha.

New Delhi: Shirweynaha sannadlaha ee ganacsiga Hindiya iyo Afrika ee (Indian African conclave 19th CII) oo ka Sacdo magaalada New Delhi ee dalka Hindiya, islamarkaana ay martigaliso dowladda Hindiya oo ay sannadkan ka soo qeybgaleen masuuliyiin kala duwan oo ka socday dowladaha Afrika ayaa dowladda Federaalka Soomaaliya waxaa shirka uga qeyb galay wasiir dowlaha wasaaradda ganacsiga iyo warshadaha mudane Cabdisalaam shariif Xuseen oo uu wehlinayo siihayaha Safaaradda ahna safiir ku xigeenka safaaradda Soomaaliya ee dalka Hindiya mudane Cabdifatax CaAdullahi Nuur.

Shirka ayaa inta uu socday waxaa laga jeediyay qudbado kala duwan dhammaan Madaxweyne ku xigeenada qaar ka mida dalalka Afrika ayaa si isku mid ah uga hadlay kobaca ganacsiga iyo dhaqaalaha Qaarada Afrika.

Madaxweyne ku xigeenka dalka Hindiya Mudane Jagdeep Dhankar oo Shirka ka hadlay ayaa ku dheeraaday xiriirka Hindiya iyo Afrika maalgashiyada labada dhinac iyo sida ay wali diyaarka ugu yihiin in ganacsiga iyo suuqyada Afrika wax soo saarkooda kor looqaado.

Hindiya iyo Afrika ayaa inta badan waxaa ka dhexeeya iskaashi dhinacyada dhaqaalaha, ganacsiga iyo maalgashiga.

Ciidamada Hay’adda nabad sugida iyo sirdoonka qaranka Nisa ayaa fashiyay labo gaari oo ay khawaarijta al shabaab kasoo buuxiyeen waxyaabaha qarxa oo ay doonayeen inay ku dhibaateeyaan shacabka Soomaaliya.

Ciidamada ayaa ka hortagay gaari ay walxaha qarxa ay kasoo buuxiyeen waxaana lagu fashiliyay koorntalka degmada Garasbaaleey oo ka mid ah wadooyinka laga soo galo caasimada.

Sidoo kale ciidamada ayaa fashiyay gaari kale oo ah nuuca leylo calaawi oo lagu soo raray waxyaabaha qarxa kadib ay markii ay xogta ka haleen shacabka deegaanka sidaas aya ugu suuragashay ciidamada inay fashiliyaan dhagar kale oo khawaarijta la damacsanaayeen shacabka Soomaaliyeed

Waa haraadiga qeyb ka mid ah gaari saakay ay ciidamada amaanka ku fashiyeen halkaan oo ah xaafamada arbacoow ee duleedka deegaanka ceelasha biyaha

Inkastoo aysan jirin dad ku dhintay hadane waxa uu bur buriyay guryo kooban oo ay dadka shacab ah degenaayeen waxaana mid ka mid dhagaraha khawaariju ku beegsato shacab an waxba galas an.

Taliyaha Hay’adda Sirdoonka iyo Nabad Sugidda Qaranka ee NISA Cabdullaahi Maxamed Cali Sanbaloolshe ayaa tegay xaafadda Arbacow ee deegaanka Ceelasha Biyaha waxaana uu dhiirigeliyay saraakiisha ciidamada hay’adda nabad sugida ee halkaasi ku sugan

Sidoo kale Taliyaha Hay’adda nabad sugida C/llaahi Maxamed Cali Sabaloolshe waxa uu tagay koorntaroolka kale ee lagu fashiliyay gaariga kale oo la doonayayay in lagu dhibaateeyo shacabka.

Taliyaha Hay’adda nabad sugida iyo sirdoonka qaranka ayaa kulan la qaatay saraahsiika waxaana sidoo kale uu ka dhageystay warbixino saraakiisha nabad sugida ee utaagan ka hortaga cadawga

Guddoomiyaha golaha shacabka ee Baarlamaanka Jamhuuriyadda Federaalka Soomaaliya mudane Sheekh Aadan Maxamed Nuur (Madoobe) oo uu wehliyo Guddoomiye ku xigeenka 2-aad ee golaha shacabka mudane Cabdullaahi Cumar Abshirow ayaa shir guddoomiyay kulanka 15-aad kalfadhiga 5-aad ee Golaha Shacabka.

Kulanka ayaa ku saabsanaa sii amba qaadida dooda ku saabsaneyd arrimaha canshuuraha iibka, cabashada ganacsatada kala duwan iyo sida lagu xalin karo.

Xildhibaanada golaha shacabka ayaa aragtidooda ka dhiibtay habka canshuurta loo qaadayo, hanaanka loo maray, cabashada ganacsatada iyo sidoo kale habka lagu xalin karo, waxaana inta badan Xildhibaanadu ay ka sinnaayeen muhiimadu ay qarankeena u leedahay bixinta canshuurta.

Guddoomiyaha golaha shcabka ee Baarlamaanka Jamhuuriyadda Federaalka Soomaaliya mudane Sheekh Aadan Maxamed Nuur (Madoobe) oo kulanka soo xiray ayaa sheegay in dooda ay sii socon doonto isla markaana la dhameystiri doono kulanka kan xiga ee dhici doona maalinta Sabtiga ah.

Ra’iisul Wasaaraha Xukuumadda Jamhuuriyadda Federaalka Soomaaliya mudane Xamsa Cabdi Barre, ayaa maanta dhagax dhigay Laanta bixinta adeegga Baasaboorada oo laga hirgeliyey degmada Boondheere, taas oo wax weyn ka tari doonta bixinta adeegga ay hey’adda Socdaalka iyo Jinsiyadaha Soomaaliya siiso dadwaynaha Soomaaliyeed.

Ra’iisul Wasaaraha ayaa kula dardaarmay howlwadeennada hey’adda in ay si hufan ugu adeeggaan bulshada, isaga oo intaas ku daray in Xukuumadda DanQaran ay ka go’an tahay in shacabka loo dhaweeyo adeegyada muhiimka ah ee ay u baahan yihiin.

Mudane Xamsa waxa uu xusay in hirgelinta xaruntani ay qeyb ka tahay dadaallada Xukuumaddu DanQaran ay ku doonayso in ay kor ugu qaaddo tayada iyo helitaanka adeegyada dadweynaha Soomaaliyeed ay uga baahan yihiin dowladooda.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa maanta warqadaha aqoonsiga Safiirnimo ka guddoomay Danjiraha cusub ee ay dowladda Shiinaha usoo magacowday dalkeenna Mudane, Wang Yu.

Madaxweynaha ayaa ku bogaadiyay Safiirka cusub sida diirran ee uu u soo bandhigay doonista uu u qabo inuu xoojiyo xiriirka ka dhaxeeya Soomaaliya iyo Shiinaha, isagoo tilmaamay ahmiyadda ay leedahay xoojinta iskaashiga istaraatiijiyadeed ee labada dal, gaar ahaan dhinacyada horumarinta dhaqaalaha, ganacsiga iyo amniga.

Safiirka cusub ee Shiinaha Mudane Wang Yu, ayaa uga mahadceliyey shacabka iyo dowladda Soomaaliya soo dhaweynta diirran, waxa uuna soo gaarsiiyey Madaxweynaha Jamhuuriyadda salaan iyo farriin uu ka siday Madaxweynaha dalkiisa mudane Xi Jinping.