Guddomiyaha Maxkamadda Sare ee Jamhuuriyadda Federaalka Soomaaliya, Mudane Baashe Yuusuf Axmed iyo Safiirka Dowladda Shacbiga ee Jamhuuriyadda Shiinaha, Mudane Wang Yu ayaa yeeshay kulan miro dhal ah.

Gudoomiyaha Maxkamada Sare iyo Safiirka aya ka wada hadlay sidii loo xoojin lahaa xiriirka labada dhinac ee ku aadan dhanka garsoorka.

Danjire Wang aya yidhi, “Waxaan kulan miro dhal ah la yeeshay Guddoomiyaha Maxkamadda Sare Mudane Baashe Yusuf Axmed oo aan ka wada hadalnay xoojinta xiriirka garsoorka ee labada dal”.

Khasaarooyin isugu jira dhimasho , dhaawac iyo burbur ayaa la sheegayaa in ay soo gaareen caasimadda Tel Aviv iyo deegaanno kale, kadib markii Xisbullah ay Israel ku tuurtay 340 gantaal.

Hezbollah ayaa sheegtay in 340 gantaal iyo diyaaradaha aan duuliyaha lahayn ay la beegsatay gudaha Israa’iil oo ay ku jirto caasimadda, sida laga soo xigtay wararka laga helayo ciidamada Israel.

khasaarooyin  ba’an ayaa lagu waramayaa in ay soo gaartay  Magaalada Tel Aviv,waxaana la soo gudbiyay dhaawacal 11 qof ,halka illaa hadda aan la ogeyn tirada dhimashada rasmiga ah.

Weerarrada cirka Israa’iil ee caasimadda Lubnaan ayaa sii socda, iyadoo Wasaaradda Waxbarashada Lubnaan ay joojisay dugsiyada Beirut ilaa laga gaarayo bisha Janaayo ee soo socota.

Ciidamada Israa’iil ayaa sidoo kale weerarro cusub ku qaaday cisbitaalka Kamaal Adwan ee waqooyiga Gaza, maalin kaddib weerar ay ku dhinteen laba qof ayna ku dhaawacmeen in ka badan 12 shaqaale caafimaad oo uu ku jiray agaasimaha xarunta la go’doomiyay.

Illaa hadda  dadka Gaza waxaa soo gaaray dhimashada 44,211 iyo dhaawaca 104,567,halka Israel ay  Lubnaan ka geysteen dhimashada 3,754 iyo dhaawaca 15,626.

Wasaaradda Arrimaha Dibadda iyo Iskaashiga Caalamiga ayaa maanta, oo Axad ah, kulan duco ah u qabatay Allaha u naxariistee Marxuum Danjire Yuusuf Xassan Ibraahim (Yuusuf Dheeg), Wasiirkii hore ee Arrimaha Dibadda. Kulanka oo ka dhacay xarunta Wasaaradda waxaa ka qaybgalay Wasiirka Arrimaha Dibadda, Danjire Axmed Macallin Fiqi, Wasiirka Maaliyadda, Mudane Biixi Imaan Ciige, Xoghayaha Joogtada ee Wasaaradda, Mudane Xamse Aadan Xaadow, iyo Agaasimayaasha Waaxyaha Wasaaradda.

Munaasabadda waxaa lagu soo bandhigay sooyaalka Marxuumka, oo muddo 47 sano ah u adeegayay dalka iyo dadka Soomaaliyeed. Wasiir Axmed Macallin Fiqi ayaa tacsi u diray ehellada, qaraabada, iyo guud ahaan bulshada Soomaaliyeed, isagoo Marxuumka ku tilmaamay mid ka mid ah saraakiishii ugu xil-dheeraa ee Wasaaradda Arrimaha Dibadda. Wasiirku wuxuu Alle uga baryay inuu Marxuumka u naxariisto oo hoygiisa ka dhigo Jannada Fardowsa.

Intaas kadib, Wasiir Fiqi ayaa si gaar ah ula kulmay qoyska iyo ehellada Marxuumka ee ka soo qaybgalay munaasabadda, isagoo tacsida iyo ducada la wadaagay qoyska. Wasiirku wuxuu xusay in Wasaaradda Arrimaha Dibadda ay leedahay sooyaal ay ku maamuusto mas’uuliyiinta muddada dheer u adeegay ee geeriyooda.

Wasiirka Wasaaradda Warfaafinta, Dhaqanka iyo Dalxiiska Soomaaliya Mudane Daa’uud Aweys Jaamac, Wasiir Ku-xigeenka Wasaaradda Warfaafinta, Cabdiraxmaan Yuusuf Cumar Al-Cadaala, Wasiirkii hore Arrimaha Dibadda Soomaaliya Yuusuf Garaad Cumar, Agaasimaha Guud ee Wasaaradda Cabdullaahi Xayir Ducaale, Agaasimeyaasha Waaxyaha iyo Hawlwadeennada Wasaaradda Warfaafinta, Dhaqanka iyo Dalxiiska waxa ay tacsi tiiraanyo leh u dirayaan qoyskii iyo eheladii uu ka geeriyooday Allaha u naxariistee Marxuum Cabdirisaaq Xaaji Maxamed Siraad oo ku geeriyooday magaalada Hargeysa.

Allaha u naxariistee Marxuum Cabdirisaaq Xaaji Maxamed Siraad oo ah saxafi rug cadaa ah waxa uu kasoo hawlgalay Idaacadaha Radio Muqdisho iyo Radio Hargeysa, sidoo kalena waxa uu mudo fog ka tirsanaa Idaacadda BBC laanteeda afka Soomaaliga.

Waxaan Allah uga baryeynaa inuu u naxariisto Marxuumka, kana waraabiyo Jannatul Fardowsa, qoyskii iyo ehelkii ay ka geeriyoodayna uu samir iyo iimaan ka siiyo. …Aamiin

INAA LILAAHI WA INAA ILEEYHI RAAJICUUN

Ra’iisal wasaare ku xigeenka 2-aad ee  dowladda Federaalka Soomaaliya mudane Cabdisalaam Cabdi Cali Dhaay ayaa maanta ka furay magaalada Muqdisho shirka Caafimaadka ee Tiknoolajiyada casriga ah ee Soomaaliya.

Shirkani ayaa diiradda saaraya horumarinta iyo isku xirka adeegyada caafimaadka iyadoo la adeegsanayo tiknoolajiyada casriga ah, si loo helo nidaam caafimaad oo ka jawaaba baahiyaha bulshada Soomaaliyeed.

Furitaanka shirkan ayaa muujinaya muhiimadda ay leedahay isbeddelka dhanka tiknoolajiyada iyo caafimaadka, iyadoo laga duulayo sidii loo hagaajin lahaa adeegyada caafimaad ee dalka iyo kor u qaadista tayada daryeelka caafimaad ee shacabka Soomaaliyeed.

Mudane Cabdisalaam Cabdi Cai Dhaay oo ka hadlay munaasabadda ayaa adkeeyay in horumarinta tiknoolajiyada iyo adeegyada caafimaad ay muhiim u tahay mustaqbalka caafimaadka bulshada, loona baahan yahay wada shaqeyn dheeraad ah oo ka dhaxaysa dowladda, hay’adaha caafimaadka iyo shirkadaha Tiknoolooyiada gaarka loo leeyahay iyo shacabka Soomaaliyeed.

Shirkan ayaa looga arrinsanayaa isticmaalka teknoolojiyada casriga ah si loo xoojiyo nidaamyada caafimaad ee Soomaaliya.