Guddoomiyaha gobolka Banaadir ahna duqa magaalada Muqdisho mudane Maxamed Axmed Amiir ayaa maanta xafiiskiisa ku qaabilay safiirka Dowladda Suudaan u fadhiya Soomaaliya Mr. Ammar Axmed Babiker, iyaga oo kawada hadlay xoojinta iskaashiga iyo wadda shaqeynta labada dhinac, Waxaana kulankan goob joog ka ahaa Gudoomiye ku-xigeenka Maamulka iyo Maaliyadda Gobolka Banaadir mudane Ciise Maxamuud Guure.

Safiirka Dowladda Suudaan u fadhiya Soomaaliya Mr. Ammar Ahmed babiker ayaa ugu horeyn ugu hambalyeeyay Guddoomiyaha Gobolka Banaadir ahna Duqa Magaalada Muqdisho Mudane Maxamed Axmed Amiir mas’uuliyada culus ee loo igmaday islamarkaana ilaahey uga rajeeyay in uu lagarab galo, iyadoo intaas kadib uu safiirka amaanay horumarada isdaba jooga ah ee ka socda Caasimadda, waxa uuna balan qaaday in safaarada Suudaan ay diyaar u tahay sidii Maamulka Gobolka Banaadir ugala shaqeyn laheyd dib u hagaajinta Bulaacadaha biyamareenka ah iyo hirgalinta warshadaha wax soo saarka.

Guddoomiyaha Gobolka Banaadir ahna Duqa Magaalada Muqdisho Mudane Maxamed Axmed Amiir ayaa ugu duceeyay ummada reer Suudaan in ilaahey uu dib ugu soo celiyo Xasiloonidii iyo Dowladnimadii looga dayan jiray, isaga oo uga mahadceliyay sida dad reer Suudaan ay ugarab istaageen dad Soomaaliyeed xiliyadii adkaa ee lasoo maray.

Ugu dambeyn Duqa Magaalada Muqdisho Mudane Amiir ayaa sheegay in uu soo dhaweynayo barnaamij kaste oo ay Safaarada Suudaan ee Soomaaliya uga qeyb qaadaneyso horumarinta bilicda Caasimadda iyo in fursada shao loo abuuro dhallinyada.

Ra’iisul wasaare ku xigeenka xukuumadda Federaalka Soomaaliya, Mudane Saalax Axmed Jamaac, ayaa maanta kormeer shaqo ku tagay Wasaaradda Gaashandhigga si uu u dhiirrigeliyo dadaallada joogtada ah ee lagu xaqiijinayo nabadda iyo xasilloonida dalka, loona taageero ciidamada qalabka sida ee Soomaaliyeed.

Mudane Saalax ayaa waxaa soo dhaweeyey Wasiirka Gaashandhigga mudane Cabdiqaadir Maxamed Nuur iyo saraakiisha sare ee wasaaradda, isagoo warbixin ka dhageystay mas’uuliyiinta Wasaaradda, oo ka warbixiyay horumarka laga sameeyey tababarka iyo qalabeynta ciidamada, iyo sidoo kale caqabadaha ku hor gudban dadaallada lagu xoojinayo amniga qaranka.

Ra’iisul wasaare ku xigeenka ayaa ku bogaadiyey mas’uuliyiinta iyo saraakiisha ciidamada sida ay uga go’an tahay difaaca dalka iyo ka hortagga khataraha argagixisada.

“Wasaaradda Gaashaandhiggu waa tiir muhiim ah oo lagu dhisayo mustaqbalka Soomaaliya oo nabad iyo horumar leh. Ciidamada qalabka sida waa halyeeyo u taagan difaaca sharafta iyo karaamada ummadda Soomaaliyeed.” ayuu yiri mudane Saalax Jaamac.

Intaa kadib, Ra’iisul wasaare ku xigeenka ayaa booqday qeybaha kala duwan ee Wasaaradda, halkaas oo uu la kulmay shaqaalaha iyo xubno ka tirsan ciidamada qalabka sida, una muujiyay taageero iyo dhiirigelin.

Booqashadan ayaa qeyb ka ah dadaallada Xukuumadda Federaalka ee ku aaddan xoojinta xiriirka ka dhexeeya hay’adaha dowladda iyo hubinta in howlaha qaranka lagu wado si hufan oo waxtar leh, iyadoo diiradda la saarayo dhismaha dowladnimada iyo sugidda amniga dalka.

Ku-simaha wasiirka ahna Wasiiru Dowlaha Wasaaradda Cadaaladda iyo Arrimaha Dastuurka XFS Amb Ilyaas Sheekh Cumar oo uu weheliyo Wasiir kuxigeenka wasaaradda Mudane Axmed Cabdiraxmaan Xasan ayaa Muqdisho ka furay kulan wada-tashi ah oo dhexmaray Wasaaradda Cadaaladda iyo Arrimaha Dastuurka XFS iyo Wasaaradaha Dastuurka ee Dowladaha xubnaha ka ah dowladda federaalka.

Shirka ayaa diiradda lagu saaray dib-u-eegista iyo dhammeystirka dastuurka dalka,xoojinta wada shaqeynta heerarka kala duwan ee dowladda, waxqabadkii hay’adaha dastuurka Labada heer sanadka 2024, caqabadihii jiray, guulihii la gaaray iyo qorshaha istiraatiijiyadda 2025, oo ay ku jirto hirgelinta qorshaha isbeddelka qaranka ee “NTP” iyo mudnaanta howlaha muhiimka ah ee sanadka cusub.

Wasiirada Dastuurka ee maamul-goboleedyada ayaa ballan qaaday xoojinta wada-shaqeynta iyo dhammeystirka dastuurka iyagoo uga mahadceliyay Wasaaradda dadaallada mudnaan siinta dastuurka, Wasiir Amb Ilyaas oo sheegay in madaxda dalka ka go’antahay dhameystirka dastuurka ayaa carabka ku adkeeyay muhiimadda iskaashiga heer federaal iyo dowlad-goboleed si loo xaqiijiyo dastuur wadatashi bulsho ku dhisan asaga ku ammaanay dardargelinta wada-shaqeynta iyo dadaalkooda ku aaddan daadajinta dastuurka ilaa heer degmo.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa ka qeyb galay munaasabadda sanad-guurada 25-aad ee aas-aaska Jaamacadda SIMAD.

Madaxweynaha ayaa ugu hambalyeeyey aas-aaseyaasha, maamulka, macallimiinta iyo Ardayda Jaamacadda SIMAD rubucu qarni ah ka soo wareegtay hirgelinta Jaamacaddan oo door muuqato ka qaadatay horumarinta aqoonta dhalinyarada Soomaaliyeed iyo kobcinta tacliinta sare ee dalka.

Munaasabadda waxaa sidoo kale ka qeyb galay madaxda dowladda, aqoonyahanno, iyo xubno muhiim ah oo bulshada ka tirsan, kuwaas oo dhammaantood xusay muhiimadda waxbarashada iyo doorka jaamacaduhu ku leeyihiin kobcinta bulshada iyo dhaqaalaha dalka.

Wasiir dawlaha wasaaradda Caafimaadka Dr. Maryama Maxamed Xuseen ayaa xarig jartay qeyb cusub oo loogu talagalay carruurta ee Isbitaalka SOS, munaasabadan ayaa ahayd mid ay goob joog ku ahaa Guddomiyaha degmada heliwa, agaasimaha guud ee ha’yadda Tuulada iyo Carruurta ee SOS, agaasimaha machadka umulisooyinka qaranka, agaasimaha isbitallada Keysaney, iyo agaasimayasha isbitaalada Danta guud ee Banadir, iyo Madino hospital.

Munaasabaddan Xarig jarka ayaa muujineysa dedaalka joogtada ah ee Wasaaradda Caafimaadka iyo hay’adaha kale ee ku lug leh caafimaadka carruurta, si loo hubiyo in carruurta Soomaaliyeed ay helaan adeegyo caafimaad oo tayo leh ayadoona Qeybta cusub ee carruurta la filaayo inay wax weyn ka bedesho adeegyada caafimaad ee loo fidiyo carruurta sidookalena la xoojinayo tayada daryeelka caafimaad.

Dr. Mariyama Maxamed Xuseen ayaa carabka ku adkeysay in qeybtaan cusub ay tahay tallaabo muhiim ah oo lagu hormarinayo caafimaadka carruurta Soomaaliyeed, isla markaana loo baahan yahay in la taageero dadaallada kor loogu qaadayo caafimaadka bulshada.

Wasiru dowlaha Wasaarada Caafimaadka Dr. Maryama ayaa ugu dambayn sheegtay in qeybtan cusub ay kaalin weyn ka qaadan doonto daryeelka caafimaad ee carruurta Soomaaliyeed waxayna horseed u noqon dontaa horumar iyo caafimaad wanaagsan.