Hantidhowraha guud ee JFS Abuukate Axmed Ciise Guutaale ayaa bogaadiyay kororka Miisaaniyadda Dowladda ee sanadkii lasoo dhaafay.

Waxa una xusay in labadii sano lasoo dhaafay uu xafiiska Hantidhowrka uu door firfircoon ka qaatay kororkaas muuqda islamarkaana ay jirtay isla xisaabtanka iyo dabagalka ay sal u ahaayeen in dakhliga dowladda soo gala si toos ah loogu xareeyo meelaha ku habboon,

Hantidhowraha guud ee JFS Abuukate Axmed Ciise Guutaale,oo ka hadlayay Munaasabadii daahfurka miisaaniyadda ee 2025 ayaa dhiirrageliyay tallaabooyinka cusub ee la qaadayo,isagoo sheegay in adeegyada lagu sameeyay fatashka ama dabagalka laga arki karo natiijada kasoo baxday dabagalkaas, kororka dakhliga iyo howshii ka socotay xafiisyadaas ama hay’adahaas.

“Dakhliga gudaha in uu isbaddelay ma ahayn wax iska dhacay ee waa wax ku yimid dedaal la sameeyay, sidii loo tallaabsaday 2024 ayaa la rabaa in 2025 loosoo kordhiyo”ayuu yiri Abuukaate Axmed Ciise Guutaale, Hantidhowraha guud JFS.

Wasaaradda Qorsheynta, Maalgashiga, iyo Horumarinta Dhaqaalaha ee Soomaaliya ayaa maanta qabatay kulankii labaad ee dib-u-eegista mashaariicda ay maalgeliso Dowladda Jarmalka, oo ay fuliyaan KfW Development Bank iyo GIZ.

Kulankan oo ka dhacay Xarunta Wasaaradda Qorsheynta Qaranka ayaa waxaa si wadajir ah u furay Agaasimaha Waaxda Kormeerka iyo Qiimeynta ee Wasaaradda, Mudane Maxamuud Siciid Nuur, iyo Agaasimaha Waaxda Iskuduwidda Deeqaha, Mudane Cabdifataax Cismaan Xasan (Gaandi).

Shirka ayaa diiradda lagu saaray qiimeynta heerka fulinta iyo saameynta mashaariicda socda, iyadoo la isla falanqeeyay sidii loo xoojin lahaa wada shaqeynta u dhaxeysa dowladda iyo hay’adaha caalamiga ah. Waxaa sidoo kale xoogga la saaray in la hormariyo hufnaanta, isla xisaabtanka, iyo tayada mashaariicda mudnaanta leh.

Kulanka waxaa ka soo qayb galay agaasimiyaal iyo mas’uuliyiin ka socda Wasaaradaha Federaalka iyo hay’adaha maxalliga ah ee dalka. Mas’uuliyiinta ayaa soo bandhigay warbixino ku saabsan waxqabadka mashaariicda socda iyo fursadaha lagu xoojin karo habka fulinta.

Ugu dambeyn, ka qayb-galayaasha ayaa bogaadiyay dadaalka Wasaaradda Qorsheynta ku bixiso hubinta tayada mashaariicda dalka laga fuliyo iyo dhiirrigelinta isla xisaabtanka hay’adaha caalamiga ah ee ka shaqeeya Soomaaliya.

Dowladda Jarmalka waxay ka mid tahay saaxiibada muhiimka ah ee Soomaaliya, iyadoo taageero joogto ah ku bixisa dhismaha hay’adaha dowliga ah iyo horumarinta dhaqaalaha dalka.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa kormeer shaqo ku tagay xarunta Wasaaradda Gaashaandhigga XJFS. Madaxwaynaha ayaa kulammo miro-dhal ah la qaatay Taliyeyaasha Ciidamada Qalabka Sida iyo Nabad Sugidda si loo dardargeliyo howlgallada lagu ciribtirayo khawaarijta.

Madaxwaynaha Jamhuuriyadda ayaa sidoo kale ka dhageystay hoggaanka Ciidamada Qaranka warbixinno ku saabsan xaaladda guud ee amniga dalka, dagaalka lagula jiro argagixisada iyo sidii loo sii xoojin lahaa, isaga oo ku bogaadiyey daddaallada geesinnimada iyo nafhurinimada leh ee ay muujiyeen Ciidammada Xoogga Dalku.

Wasiirka Wasaaradda Maaliyadda Xukumadda Federaalka Soomaaliya, Mudane Biixi Imaan Cige ayaa maanta si rasmi ah u daahfuray Miisaaniyadda Dowladda ee 2025-ka, kadib munaasabad kooban oo lagu qabtay magaalada Muqdisho.

Munaasibadda daahfurka Miisaaniyadda ayaa waxaa ka soo qeyb galay masuuliyiin kala tirsan dhammaan hey’adaha Dowladda, ururada bulshada oo ka kooban Aqoonyahano, Culimo iyo Waxgarad. Intii ay socotay munaasibadda ayaa waxaa faahfaahin ka mixiyay hab maamulka guud ee Miisaaniyadda iyo sida loo isticmaalayo, Agaasimaha Miisaaniyadda Wasaaradda Maaliyadda Mudane Axmed Cadi Adan (Iraad). Sidoo kale Agaasimaha Guud ee Wasaaradda Maaliyadda XFS Mudane Saleiman Sheekh Cumar ayaa ka hadlay ahmiyadda ay miisaaniyada u lee dahay Wasaaradda iyo habka hufnaanta Maamulka Guud ee Maaliyadda.

Wasiirka Wasaaradda Maaliyadda XFS Biixi Imaan Cige ayaa khudbad uu ka jeediyay munaasabadda ku sheegay sida ay Dowladda uga go’an tahay horumarinta Maaliyadda dalka taas oo uu ku tilmaamay in koroorka miisaaniyadda ay sabab u tahay casriyeynta ilaha dakhliga iyo hannaanka dib-u-habeynta dhaqaalaha dalka.

Miisaaniyadda Dowladda ee 2025-ka oo ah mid ka sareysa dhammaan Miisaaniyaddihii dowladda tan iyo markii kumeel gaarka laga baxay ayaa gaartay $1.3 Billion oo Doollar, taas oo mudnaan siinaysa arrimiha bulshada iyo amniga dalka.

Wasiirka Arrimaha Dibadda Soomaaliya Danjire Axmed Macallim Fiqi, ayaa xafiiskiisa kusoo dhaweeyey Agaasimaha Guud ee Rugta Ganacsiga Soomaalida Norway, mudane Maxamed Cabdulqaadir kulanka oo uu goobjoog ka ahaa Agaasimaha waaxda jaaliyadaha iyo Qurbajoogta Wasaaradda Arrimaha Dibadda Mudane Ibraahim Guure Maxamed.

Wasiirka ayaa aqbalay casuumad uu ka helay Rugta Ganacsiga si uu uga qaybgalo xafladda furitaanka shirweynaha ganacsi ee Somali Norwegian Business Summit, oo ay si wadajir ah u qabanqaabinayaan Rugta Ganacsiga Soomaalida Norway, Waaxda Jaaliyadaha iyo Qurbajoogta ee Wasaaradda Arrimaha Dibadda Soomaaliya, iyo Wasaaradda Arrimaha Dibadda ee Norway.

Wasiirka ayaa muujiyey taageero iyo bogaadin ku aaddan dadaalka ay wadaan Rugta Ganacsiga Soomaalida Norway ee ku saabsan xoojinta xiriirka dhaqaale iyo dhaqan ee Soomaaliya iyo Norway, sidoo kale, wasiirka ayaa rejo wanaagsan ka muujiyay shirweynaha Caalamiga ee Qurbajoogta Soomaaliyeed oo lagu qaban doono sanadkan magaalada Oslo ee dalka Norway.