Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa xafiiskiisa ku qaabilay Kusimaha Safiirka Safaaradda Itoobiya ee Soomaaliya Ketema Haile Minuta oo ay ka wada hadleen xoojinta xiriirka labada wadan gaar ahaan baarlamaanada labada dal, waxaana Ku-simaha Safiirka Itoobiya ee Soomaaliya sheegay inuu ka shaqeyn doono xoojinta xiriirka labada wadan.

Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa kusimaha safiirka Itoobiya ee Soomaaliya uga mahadceliyay sida uu uga shaqeeyo xoojinta xiriirka baarlamaanada labada wadan.

Addis-ababa:- Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo ka qeyb-galaya Meertada 38-aad ee Shir-madaxeedka Midowga Afrika ayaa kulan-doceed la qaatay Ra’iisul Wasaaraha Dalka Itoobiya, Mudane Abiy Ahmed.

Madaxweynaha ayaa ka hadlay muhiimadda ay leedahay xasilloonida Gobolka iyo mideynta dadaallada lagu cirib-tirayo argagixisada, waxa uuna sheegay in Soomaaliya ay ka go’an tahay xaqiijinta iskaashiga heer gobol ee ku aaddan nabadda, daris-wanaagga iyo adkaynta xasilloonida.

Madaxweynaha Jamhuuriyadda iyo Ra’iisul Wasaaraha Itoobiya ayaa ka wada hadlay xoojinta xiriirka laba geesoodka ah ee ka dhexeeya Labada dal, iyadoo la dhiirri-gelinayo iskaashiga horumarineed ee ku salaysan daris-wanaagga iyo is-ixtiraamka, si waafaqsan danaha wadajirka ah ee labada dal, madaxbannaanida iyo midnimada dal kasta.

Addis ababa:-Madaxweynaha Jamhuuriyadda Federaalka Soomaaliya Mudane Xasan Sheikh Maxamuud iyo wafdi uu hogaaminayo ayaa si diiran loogu soo dhoweeyey magaalada Addis Ababa ee dalka Ethiopia.

Safarka Madaxweynaha iyo xubnaha wafdigiisa ayaa salka ku haya ka qaybgalka shirarka kala duwan iyo doorashada madaxda Midowga Africa.

Sidoo kale, Madaxweyne Xasan Sheikh ayaa kulamo doceedyo kala duwan la yeelan doona qaar kamid ah madaxda dalalka Africa oo uu kamid yahay Ra’iisul Wasaaraha Itoobiya Mudane Abiy Axmed Cali, kulamadaas oo looga hadli doono adkaynta xiriirka ay Soomaaliya la leedahay Dawladaha Africa iyo Caalamka.

Isu imaatin Dhallinyaro oo muujinaya Isbedelka iyo horumarka Amniga Caasimadda ka jira ayaa ka soconaya Tuullada Cayaaraha ee Stadium Muqdisho.

Kulan ciyaareedka Nabadda ayaa si gaar ah loogu soo dhowaynayaa Asad Xaajiyow oo ka mid ah dhalinyaradda Soomaaliyeed.

Shacabkii ugu tirada badnaa ayaa soo buuxiyey garoonka iyadoo ay ciidanka amaanku si weyn u sugayaan Amniga.

Wasiirka Warfaafinta, Dhaqanka iyo Dalxiiska ee Jamhuuriyadda Federaalka Soomaaliya Mudane Daa’uud Aweys Jaamac ayaa magaalada Kuwait ee dalka Boqortooyada Kuwait kaga qeybgaley munaasabadda daahfurka Caasimadda Warbaahinta iyo Dhaqanka ee Jaamacadda Carabta oo sannadkan loo aqoonsaday magaalada Kuwait.

Kulanka daahfurka  oo ay ka soo qeybgaleen Wasiirrada Warfaafinta iyo Dhaqanka ee waddamada xubnaha ka ah Jaamacadda Carabta, ayaa waxaa si rasmi ah u furay Wakiilka Boqorka, ahna Wasiirka Warfaafinta iyo Dhqanka ee Boqortooyada Kuwait, Mudane Cabdulraxmaan Al Mutairi.

Kulankaasi daahfurka ah waxaa looga hadlay sida ay madaxda Jaamacadda Carabta uga go’an tahay horumarintooda iyo iskaashiga,gaar ahaan ee dhinacyada warfaafinta ee dalalka ku jira Ururka Jaamacadda Carabta.

Wasiirka Warfaafinta Soomaaliya Mudane Daa’uud Aweys Jaamaca ayaa kulamo gaar gaar ah la qaatay qaar ka mid ah Wasiirrada Warfaafinta iyo Dhaqanka ee Jaamacadda Carabta, isagoo u sharaxay siyaasadda Dowladda Federaalka Soomaaliya ee dhinacyada warbaahinta iyo dhaqanka.

Ciidanka Xoogga ayaa Howlgal qorsheysan oo ka dhacay Sh/Hoose cagta ku mariyay Maleeshiyaad ka tirsan Khawaarijta oo ku sugnaa deegaanno ku teetsan Degmada Aw-dheegle ee  Gobolkaasi.

Howlgalkaan oo dhacay shalay iyo xalay ayaa waxaa ka qeybgalay ciidamada Ururada 175-aad iyo 146-aad,gaar ahaan guutada 17-aad ee Gorgor iyo guutada 14-ka ee October,iyadoo tuulada Gumeysidiid lagu bur-buriyay baro Koontorool oo Khawaarijta ay ku qaadi jireen lacagaha baadda ah ee ay ku soo rogeen Shacabka iyo gaadiidka.

Taliyaha Guutada 14-ka October ee Ciidanka Dhulka Xoogga Dalka Soomaaliyeed G/sare Nuur Maxamed Gaabow Nur Farey ayaa Xaqiijiyay intii uu socday howlgalkaasi in ay jab gaarsiiyeen khawaarijta,isla matkaana ay sii daayeen gaadiid iyo shacab ay Khawaarijta ku xayireen tuulada Gumeysidiid.

“Ma Aqbaleyno inay Khawaarijta dulsaar kusii ahaadaan shacabka oo ay sii dhibaateeyaan bulshadeenna iyo qarannimadeenna, waxaanna markasta diyaar u nahay inaan uga daba tagno goob kasta oo ay gabbaad ka dhigtaan” ayuu yiri G/sare Nur Farey, Taliyaha Guutada 14-ka October ee Ciidanka Dhulka Xoogga Dalka Soomaaliya

Wasiirka Wasaaradda Howlaha Guud, Dib u dhiska iyo Guriyeynta XFS Dr. Cilmi Maxamuud Nuur ayaa shir muhiim ah magaalada Nirobi kula yeeshay Madax ka socotay Bangiga Horumarinta Afrika.

Shirkaasi oo ka dhacay xarunta Bangiga Horumarinta Afrika ee Dalka Kenya ayaa waxaa labada dhinac ay uga wada hadleen socodsiinta mashaariicda wax ku oolka ah ee ay isla wadaan Wasaarada Howlaha Guud iyo Bangigga Horumarinta Afrika.

Shirkaasi waxaa si gaar ah looga hadlay xoojinta iskaashiga istiraatiijiga ah ee ka dhexeeya Wasaaradda iyo bangiga horumarinta Afrika ,iyadoo diiradda lagu saaray mashruuca dhismaha waddooyinka ee isku xira gobolada dalka

Wasiirka Wasaaradda Howlaha Guud Dr. Cilmi Maxamuud Nuur ayaa u mahadceliyey madaxda Bangiga Horumarinta Afrika, isagoo bogaadiyay dadaallada ay ugu jiraan sidii ay gacan uga geysan lahaayeen dib u dhiska dalka.