Qaahira- Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre ayaa Khudbad dheer oo dhinacyo badan taabanaysa ka jeediyayay kulan aan caadi ahayn oo ay isugu yimaadeen madaxda ururka Jaamicadda Carabta oo ka dhacay magaalada Qaahira.

Shirkan ayaa si gaar ah diiradda loogu saaray arrimaha Falastiin, gaar ahaan dib u dhiska iyo sidii xal waara loogu heli lahaa xaaladda adag ee ka jirta Gaza iyo guud ahaan sidii loo garab istaagi lahaa shacabka Falastiin.

Mudane Xamsa waxa uu xusay sida xooggan ee ay dowladda Soomaaliya u uga soo horjeeddo hadalladii ka soo baxay Israaiil ee la xiriiray barakicinta shacabka reer Falastiin, taas oo xad-gudub cad ku ah qawaaniinta iyo heshiisyada caalamiga ah iyo xuquuqda aadanaha.

Ra’iisul Wasaaruhu waxa uu bogaadiyay dhabar adeyga shacabka reer Falastiin, isagoo sheegay in dowladda Federaalka ee Soomaaliya iyo shacabkeeda ay taageerayaan xaqa ay u leeyihiin dhismaha dowlad u gaar ah oo madax bannaan.

Waxaa kale oo khudbaddiisa uu uga hadlay xaaladaha dalalka Suudaan iyo Suuriya, oo uu sheegay in Soomaaliya ay taageereyso xasilloonida iyo midnimada dhuleed ee dalalkaasi Carbeed iyo in aan la soo fara gelin arrimhooda gudaha.

Ugu dambeyn, Ra’iisul Wasaare Xamsa waxa uu uga mahadceliyay dalalka Carbeed ee walaalaha aan nahay taageerada ay siiyaan Soomaaliya ee dhinacyada amniga iyo bini’aaninada, isagoo ugu baaqay in ay maalgashadaan dhinacyada dhaqaalaha ee muhiimka ah ee ka jira Soomaaliya sida beeraha, xoolaha iyo tamarta, si loo xoojiyo horumarka waara, aanna u abuurno fursado.

Guddoomiyaha hay’adda maareynta musiibooyinka Maxamuud Macallin Cabdulle iyo ku xigeenka ergeyga gaarka ah ee xoghayaha guud ee Qaramada Midoobay u qaabilsan Soomaaliya George Conway ayaa wadajir u guddoomiyay kulan ay isku yimaadeen dhinacyada ka shaqeeya hawlaha bani’aadannimo ee dalka.

Shirka ayaa looga hadlay xaaladda abaaraha, caqabadaha taagan, saamaynta ka dhalan karta is-beddelka ku yimid taageerada dhanka banii’aadannimo ee Maraykanka, xoojinta iskaashiga ka dhaxeeya wada-howlgalayaasha ka shaqeeya howlgallada gargaarka iyadoo Hay’adda SoDMA qaadanayso doorkeeda hoggaaminta si loo helo jawaab hufan oo waxtar leh.

Guddoomiyaha hay’adda SoDMA Maxamuud Macallin oo dhammaan daneeyayaasha uga mahadceliyay dadaalka ay bixiyeen ayaa xusay in si loo xalliyo caqabadaha banii’aadamnimo ee dalka loona hubiyo jawaab isku-xiran oo wax-ku-ool ah xilligan adag loo baahan yahay in dib loo eego hannaanka maalgelinta si loo hubiyo joogteynta taageerada logama maarmaanka ah ee dadka nugul.

Boosaaso: Ciidanka daraawiishta Puntland ee ku sugan deegaanka Turmusaale ee gobolka Bari ayaa maanta hawlgal lagu baacsanayay firxadka Khawaarijta Daacish ka sameeyeen Togga Jaceel iyo Togga Ina Cidoole ee gobolka Bari

Inta uu socday hawlgalka ciribtirka nabadiidka, ciidamada soo saaray miinooyin Khawaarijtu dhulka ku aaseen oo ay doonayeen inay ku dhibaateeyaan shacabka.

Sidoo kale Ciidanka daraawiishta Puntland ayaa la wareegay talisyadii Daacish ay ku lahayd Togaga ay howlagallada ka sameeyeen, iyadoo ciidanku soo bandhigeen sawirrada difaacyadii kooxda Daacish laga saaray.

Guddoomiyaha gobolka Banaadir ahna duqa magaalada Muqdisho mudane, Maxamed Axmed Amiir ayaa daah furay tartanka Quraan aqriska bisha Ramadaan ee maamulka gobolka Banaadir iyo dowladda hoose ee Xamar.

Tartankaan oo ah mid sanadkiiba mar la qabto ayaa waxaa ku tartamaya ardey ka kala socda dugsiyadda Quraanka Kariimka ee degmooyinka gobolka Banaadir.

Munaasabadda waxaa goobjoog ka ahaa Xildhibaan Xaadoole oo ka tirsan BFS, Guddoomiye Kuxigeenka Arrimaha Bulshada iyo Wacyigelinta maamulka gobolka Banaadir Cabdicasiis Cusmaan Maxamed, Agaasimeyaal, Guddoomiye kuxigeenada arrimaha bulshada degmooyinka gobolka Banaadir, culuma’udiin, macallimiinta dugsiyadda, waalidiin iyo marti sharaf kale.

Dhuusamareeb- Maxamed Cabdi Xasan (Afweyne) ayaa loo doortay xildhibaan ka tirsan golaha shacabka baarlamaanka Soomaaliya.

Xildhibaanka ayaa ku guuleystay kursiga tirsigiisu yahay GSH 248 kadib doorasho saaka ka dhacday maagalada Dhuusamareeb ee caasimadda dowlad goboleedka Galmudug.

Kursigaan waxaa hore ugu fadhiyay Saadaq Cumar Xasan (Saadaq John) oo xubinnimadii golaha shacabka ku waayay qabashada xilka agaasime ku xigeenka hay’adda NISA ee xilligaa.