Wasiirka Wasaaradda Gaashaandhigga Soomaaliya Mudane Jibriil Cabdirashiid Xaaji ayaa ku bogaadiyay Ciidamada Xoogga dalka Soomaaliyeed, guulaha muhiimka ah ee ay ka gaareen dagaalka Khawaarijta, si gaar ah howlgalkii guuleystay ee Ciidanka Xoogga Dalka Soomaaliyeed iyo kuwa Daraawiishta Koonfur Galbeed ay ku dileen ku dhawaad 40 Dhagarqabe oo Khawaarijta ka tirsan iyo Horjooge Ajanebi ah, kaasi oo ka dhacay Tuulada Burujeed ee duleedka deegaanka Daynuunaay ee Gobolka Baay

” Waxaan ku bogaadinayaa Ciidanka Xoogga Dalka Soomaaliyeed iyo Daraawiishta Koonfur Galbeed howlgalka guuleystay ee ay ku naafeeyeen cadawga khawaarijta ee ka dhacay Degaanka Burujeed ee duleedka deegaanka Daynuunay ee Gobolka Baay, kaasi oo ahaa mid ka marqaati kacaya diyaar garwaga Ciidanka iyo bulshada iyo in la gaaray dhammaadka Kooxaha Khawaarijta ah ee dhibaatada xooggan ku haya shacabka Soomaaliyeed “.

Wasiirka ayaa Alle u weydiiyay naxariistiisa ballaaran halyeeyadii ku naf waayay dagaalka xaqa ee Khawaarijta, isaga oo bogsiino dagdag ah u rajeeyay kuwa ku dhaawacmay.

Ugu dambayn, Wasiirka ayaa ugu baaqay guud ahaan shacabka Soomaliyeed in si hagar la’aan ah u garab istaagaan Ciidamada naftooda u huraya in dalkeena ay ka xoreeyaan cadwga arxanka daran ee in muddo ah gumaadka ku hayay shacabkeena, isla markaana hortaagan in aan nabad iyo xasilooni ku noolaano.

War-Murtiyeed ayaa laga soo saaray Shirweynaha la-dagaalanka Khawaarijta oo maalmahaan magaalada Muqdisho ka socday,shirkan ayaa waxa ka soo qayb galay in ka badan 700 oo ergay kuwaas oo ka kooban qaybaha kala duwan ee bulshadda.

Ujeedka shirkan ayaa wuxuu ahaa in si weyn looga qayb galo dagaalka ka dhanka ah khawaarijta iyo sidii dalka looga xorayn lahaa loona garab istaagi lahaa Ciidanka Xoogga dalka Soomaaliyeed.

Shirkan ayaa waxa loogu baaqay bulshadda Soomaaliyeed ee ku dhaqan deegaanada kala duwan ee dalka in ay si weyn uga qayb qaataan sidii dalka looga xorayn lahaa khawaarijta,soo xiritaanka shirkan ayaa waxa ka qayb galay oo khudbado kala duwan ka jeediyey qaar ka mid ah Golaha wasiiradda Xukuummadda Federaalka Soomaaliya.

Wasiirka arrimaha dibedda oo ka hadlay shirka ayaa yiri Wasiir Fiqi “Waxa la dhibaateynaayo, oo la beegsanayo waa dadkii aad matasheen, baraarugaan iyo in loo midoobo dagaalka khawaarijta waan idinkaga mahadcelinayaa.”

Waxa sidoo kale shirkan khudbad ka jeediyey wasiirka caafimaadka isagoo yiri Wasiir Cali Xaaji “Khawaarij meel walba ayeey ka soo qaxeen, waxana ay isugu yimaadeen deegaanadeena, aan u midowno ciribtirka iyo soo afjarkooda .”

Hantidhowraha Guud ee JFS, Abukaate Axmed Ciise Guutaale, ayaa ka qeybgalay kulan lagu qabtay magaalada Madrid, looguna magac daray “Hindisaha Xirfadda Hal-Abuurka Sare (Mastery Initiative)”.

Barnaamijkan, oo socday muddo laba toddobaad ah, waxaa si wadajir ah u martigeliyay Xafiiska Hantidhowrka Guud ee Spain (SAI Spain) iyo Jaamacadda Madrid (Universidad Autónoma de Madrid), iyadoo ay taageero mug leh ka geysatay Xoghaynta Arrimaha Dhaqaalaha ee Switzerland (SECO Switzerland).

Barnaamijkan wuxuu ahaa madal lagu kobcinayay hoggaaminta, lagu xoojinayay iskaashiga caalamiga ah ee hay’adaha hantidhowrista, isla markaana la isku-weydaarsaday waayo-aragnimo ku saabsan sida Hay’adaha Hantidhowrada Guud ay uga jawaabi karaan duruufaha adag ee caalamiga ah.

Soomaaliya waxay si mug leh uga dhex muuqatay doodaha muhiimka ah ee barnaamijka, gaar ahaan kuwa la xiriira doorka Hay’addaha Hantidhowrada ee maaraynta qataraha maaliyaddeed, la dagaallanka musuqmaasuqa, iyo dhiirrigelinta iyo daahfurnaanta.

Baydhabo:-Boqolaal Shacabka Magaalada Baydhabo ee xarunta KMG maamulka Koonfur Galbeed ayaa isugu soo baxay bartamaha Magaalada, kuwaas oo ku faraxsan jabka khawaarijta looga geystay deegaanka Daynuunaay.

Bartamaha Magaalada ayaa waxaa la geeyay khawaarijta lagu khawaarijay howlgallada barakeysan ee saakay hore ka dhacay deegaanka Daynuunaay oo saakay weerar lagu fashiliyey ku soo qaadeen.

Qaar kamid ah Shacabka oo la hadlay warbaahinta ayaa ku bogaadiyey ciidanka Xoogga Dalka iyo kuwa Koonfur Galbeed howlgallada barakeysan ee lagu laayay khawaarijta arxanka daran, iyagoo sidoo kale tilmaamay in waqtiga khawaarijtu dhamaaday loona baahanyahay uun in la dhameystiro.

Khawaarijta ayaa waxaa ku socda howlgallo nadiifin ah oo ka socda guud ahaan deegaannada Koonfur Galbeed, Hirshabeelle, Galmudug iyo Jubbaland, iyadoo sidoo kale howlgallo ka dhan ah Khawaarijta Daacish aya ka socdaan Puntland.