Wasiirka Arrimaha Dibadda iyo Iskaashiga Caalamiga, Mudane Cabdisalaan Cabdi Cali, ayaa maanta oo Axad ah , xafiiskiisa Wasaaradda ee Caasimadda Muqdisho, ku qaabilay Wakiilka Xoghayaha Guud ee Qaramada Midoobey u qaabilsan Soomaaliya ahna Madaxa Howlgalka Kalaguurka ee Kaalmaynta Qaramada Midoobay ee Soomaaliya (UNTMIS), oo booqasho ugu yimid.

Danjire Swan ayaa ugu horrayn Wasiirka ugu hambalyeeyay xilka cusub ee dhowaan loo magacaabay, isagoo muujiyay taageerrada iyo kalsoonida Qaramada Midoobay ee ku aaddan wada-shaqeynta labada dhinac. Intaa kaddib, wuxuu Wasiirka la wadaagay qorshayaasha xilliga Kala-guurka ee Xafiiska Qaramada Midoobay ee Soomaaliya, kuwaas oo diiradda saaraya horumarinta dowlad wanaagga, doorashooyinka, ilaalinta xuquuqda aadanaha, iyo xoojinta xiriirka iskaashi ee ka dhexeeya dowladda Soomaaliya iyo Qaramada Midoobay.

Dhankiisa, Wasiir Cabdisalaan ayaa uga mahadceliyey Danjire Swan taageerrada iyo wadashaqeynta joogtada ah ee Qaramada Midoobay la leedahay Dowladda Federaalka Soomaaliya, isagoo xusay muhiimadda ay leedahay sii xoojinta iskaashiga labada dhinac.

Wasaaradda Kalluumeysiga iyo Dhaqaalaha Buluugga ah Xukuumadda Federaalka Soomaaliya ayaa waxay soo saartay Warsaxaafadeed ku saabsan digniinaha xilligaan ay baddu kacsantahay, iyadoo dhammaan kalluumeysatada iyo guud ahaan dadweynaha Soomaaliyeed ku wargelisay in kacsanaanta Badda ay keeni karto xaalado khatar ah oo halis gelin kara badbaadada doomaha iyo dadka ku sugan Badda.

           Halkaan Hoose ka Akhriso Warsaxaafadeedka:- 

Wasiir Ku xigeenka Wasaaradda Caafimaadka iyo Daryeelka Bulshada ee XFS Dr. Maxamed Xasan Bulaale ayaa maanta xafiikiisa ku qaabilay Wasiirka Caafimaadka ee Dawlad GobolLeedka SSC Khaatumo Dr. Yuusuf Saleebaan iyo Xildhibaan Cisman Cali Jubba.

Wasiirrada ayaa si qoto dheer uga wada hadlay sidii loo xoojin lahaa iskaashiga ka dhexeeya wasaaradda caafimaadka heer federaal iyo tan dowlad goboleedka SSC Khaatumo, si kor loogu qaado adeegyada caafimaadka ee shacabka Soomaaliyeed ay siiyaan.

Labada wasiir ayaa isla meel-dhigay in la dardar-geliyo adeegyada caafimaadka ee deegaanada SSC, iyadoo xoogga la saarayo tababarada iyo tayeynta shaqaalaha caafimaadka, baahinta adeegyada hooyada & dhallaanka, tallaalka iyo adeegyada deg-degga ah.

Wasiirka Arrimaha Dibadda iyo Iskaashiga Caalamiga, Mudane Cabdisalaan Cabdi Cali, ayaa maanta oo Sabti ah kaga guddoomay Caasimadda Muqdisho nuqul ka mid ah warqadaha aqoonsiga danjirannimo Safiirka cusub ee Boqortooyada Midowday (UK), Mudane Charles King.

Wasiirka ayaa soo dhoweeyay Safiirka, isaga oo u rajeeyay inuu ku guulaysto howsha diblomaasiyadeed ee loo igmaday, carabaabayna rajada uu ka qabo inuu xoojiyo xiriirka iyo iskaashiga u dhexeeya labada dal ee saaxiibada ah.

Wasiirka Gaashaandhigga XFS, Mudane Axmed Macallin Fiqi, ayaa maanta xafiiskiisa ku qaabilay Safiirka Dowladda Talyaaniga ee Soomaaliya, Mudane Pier Dacco Coppi, oo ay weheliyeen saraakiil ka tirsan safaaradda Talyaaniga.

Kulankan ayaa diiradda lagu saaray adkeynta iyo horumarinta iskaashiga dhinaca difaaca iyo amniga ee labada dal, iyadoo si gaar ah loo isla meel dhigay dardargelinta tababarrada iyo qalabaynta Ciidamada Xoogga Dalka Soomaaliyeed.

Wasiir Fiqi ayaa si gaar ah u bogaadiyey doorka muhiimka ah ee Dowladda Talyaanigu ka qaadato taageeridda, tayeynta iyo horumarinta awoodda ciidanka Soomaaliya, isagoo ku tilmaamay mid lama huraan u ah dadaallada dowladdu ugu jirto sugidda amniga iyo xasiloonida dalka.

Labada dhinac ayaa sidoo kale isku raacay in la sii ballaariyo xiriirka istaraatiijiga ah ee labada dal, iyadoo xoogga la saarayo iskaashiga dhinaca difaaca, xoojinta awoodda ciidanka iyo la dagaallanka argagixisada.

Ugu dambeyn, Wasiirka Gaashaandhigga ayaa Dowladda Talyaaniga uga mahadceliyey dadaalka joogtada ah iyo garab-istaagga ay la barbar-taagan tahay Soomaaliya, isagoo ku adkeeyay muhiimadda ay leedahay sii joogtaynta iyo xoojinta iskaashigan istaraatiijiga ah si loo xaqiijiyo amni iyo nabad waarta oo gobolka ka dhalata.