Ururka Bangiyada Soomaaliyeed ayaa xalay munaasabad ballaaran waxa ay ku maamuuseen Wasiirka Maaliyadda XFS mudane Biixi Imaan Cige oo dhawaan ku guulaystay billadda Wasiirka Maaliyadda Afrika ee 2025-ka.

Munaasibadda ayaa waxaa ka qayb galay qaar ka mid ah goleyaasha dowladda, ururada bulshada rayidka, aqoonyahano iyo mas’uuliyiinta kale ee Wasaaradda Maaliyadda sida Wasiiru dowlaha wasaaradda Raaxo Maxamuud Janaqoow iyo wasiir Ku xigeenka wasaaradda mudne Cabdiqafaar Cilmi Xaange.

Munaasabadda ayaa intii ay socoday waxaa sidoo kale bilad-sharaf lagu guddoonsiiyay wasiirka maaliyadda XFS mudane Biixi Imaan Cige oo khudbad dheer ugu mahadceliyay bulshada Soomaaliyeed ee cashuur bixiye-yaasha ah iyo ganacsatada had iyo jeer u taagan ka qeyb qaadashada dib-u-dhiska dalkooda.

Wasiirka Maaliyadda XFS mudane Biixi Imaan Cige ayaa ugu dambayn halkaasi lagu guddoomsiiyay billad sharaf qaali ah, maaddaama loo aqoonsaday dhowaan wasiir maaliyadeedka ugu wanaagsan Afrika.

Algers: Wasiiru-Dowlaha Wasaaradda hawlaha guud, dib-u-dhiska iyo Guriyeynta, Mudane Siciid Maxamed Maxamuud-Xayd, iyo wafdi uu hoggaaminayo ayaa ka qeybgalaya Shirka Sanadlaha ah ee 44-aad ee Guriyeynta Afrika (44th Annual General Meeting of Shelter Afrique), oo maanta si rasmi ah uga furmay magaalada Algiers ee caasimadda dalka Algeria.

Wasiir Xayd iyo wafdigiisa waxay shirkan ku metelayaan Dowladda Federaalka Soomaaliya, gaar ahaan Wasaaradda Hawlaha Guud, iyaga oo ka qeyb qaadan doona wada-tashiyo muhiim ah oo la xiriira ajandayaasha shirka.

Inta uu socdo shirku, oo ah muddo afar maalmood ah, waxaa lagu falanqeyn doonaa arrimo ay kamid yihiin: sidii loo yareyn lahaa ku tiirsanaanta qalabka dhismaha ee laga keeno dibadda qaaradda Afrika, iyo sidii wada-shaqeyn iyo iskaashi ballaaran looga yeelan lahaa hirgelinta mashaariicda guriyeynta ee laga fulinayo dalalka Afrika, oo ay Soomaaliya kamid tahay, shanta sano ee soo socota.

Wasiiru-Dowlaha Wasaaradda Hawlaha Guud, Dib-u-dhiska iyo Guriyeynta, Mudane Siciid Maxamed Maxamuud-Xayd, iyo wafdi uu hoggaaminayo ayaa si diiran waxaa u soo dhaweeyay Agaasimaha Guud ee Wasaarada Howlaha Guud ee Dalka Aljeeriya Iyo Danjiraha dowlada Soomaaliya u fadhiya Dalka Aljeeriya Danjire Yusuf Axmed Xasan (Yusuf Jeego).

Agaasimaha qaybta hawada sare iyo Dayax-gacmeedyada ee Soomaaliya mudane Maxamed Abuubakar oo matalayey wasaaradda Isgaarsiinta iyo Teknolojiyadda ayaa ka qeyb galay kulanka 48-aad ee Arabsat oo si fogaan-arag ah lagu qabtay 15-kii Luulyo 2025.

Shirka waxaa lagu ansixiyay warbixinta sanadlaha ah ee miisaaniyadda xisaab-xirka sannadkii 2024, iyo doorashada xubnaha cusub ee golaha Maamulka, kuwaas oo shaqeyn doona sannadaha 2025 iyo 2026.

Sidoo kale, dowladaha xubnaha ka ah ururka ayaa lagu wargeliyay in si rasmi ah loogu soo diri doono faahfaahinta deymaha saaran dal kasta, si loo xaqiijiyo in xaaladaha maaliyadeed la waafajiyo, loona ilaaliyo xasilloonida hay’adda iyo sii wadista adeegyada si hufan.

Waxaa kale oo la isla gartay in Shirka Sanadlaha ah ee sannadka 2026 lagu qabto magaalada Riyaad ee Boqortooyada Sacuudi Carabiya, oo ah xarunta ARABSAT.

Sanadkaas 2026 waxaa sidoo kale loo dabaal-degi doonaa 50 sano guurada aasaaska ururka ARABSAT.

Xubnaha Golaha Maamulka ayaa sidoo kale soo bandhigay warbixin ku saabsan xaaladda guud ee ARABSAT sannadaha 2024 iyo 2025.

Agaasimaha Qeybta Hawada Sare, Mudane Maxamed Abuubakar, ayaa khudbad ka jeediyay shirka, isagoo carrabka ku adkeeyay sida ay uga go’an tahay Dowladda Federaalka Soomaaliya in ay kaalin muuqata ka qaadato horumarinta hawada sare ee Carabta.

Ka qeybgalka shirkan wuxuu qeyb ka yahay istaraatiijiyadda Wasaaradda Isgaarsiinta iyo Teknolojiyadda ee ku aaddan xoojinta xiriirka Carabta iyo horumarinta teknoolojiyadda hawada sare.

Shirka waxaa si rasmi ah uga qeyb galay Agaasimaha Qeybta Hawada Sare iyo Dayax-gacmeedyada, Mudane Maxamed Abuubakar, iyo xubnaha Abuubakar Xasan iyo Cali Afey.

Ku dhawaad 50 arday oo ka qaybgalaya Barnaamijka Tababarka Internet of Things (IoT) ee Beerashada Casriga ah ayaa booqasho waxbarasho ku yimid beeraha tijaabada ah ee ku dhex yaala xarunta Wasaaradda Beeraha iyo Waraabka JFS.

Booqashadan oo si hufan loo agaasimay ayaa qayb ka ah dadaalada lagu kobcinaayo aqoonta iyo hal-abuurka dhalinyarada Soomaaliyeed si ay door muuqda uga qaataan horumarinta nidaamka beeraha dalka, inta ay socotay booqashada, ardayda ayaa kormeer ku sameeyeen qeybo muhiim ah oo ay ka mid yihiin:-

– Beeraha Guryaha Dadan (Greenhouses)

– Nidaamyada Hydroponics ee aan ciidda ku salaysnayn

– Goobaha tijaabada abuurka kala duwan

– Nidaamka waraabka dhibicda (Drip Irrigation)

– Qalabka saadaasha cimilada iyo xog ururinta ee wasaaradda

Ujeedada booqashadan ayaa ahayd in lagu dhiirigeliyo maskaxda hal-abuurka ee ardayda si ay ugu fikiraan una horumariyaan xalal casri ah oo ku saleysan teknolojiyadda IoT, kuwaas oo lagu horumarin karo wax soosaarka iyo waxtarka beeraha Soomaaliyeed.

Wasiirka gaashaandhigga ee Xukuumadda Federaalka Soomaaliya, Mudane Axmed Macallin Fiqi ayaa maanta xafiiskiisa ku soo dhaweeyay Danjire Charles Nicholas King, safiirka cusub ee Boqortooyada Ingiriiska u fadhiya Soomaaliya, oo ay wehliyeen saraakiil ka tirsan safaaradda Ingiriiska.

Kulanka ayaa lagu lafaguray xoojinta xiriirka laba geesoodka ah ee Soomaaliya iyo Boqortooyada Ingiriiska, gaar ahaan iskaashiga dhanka amniga, tababarada iyo la dagaallanka argagixisada.

Wasiir Fiqi iyo Danjire Charles ayaa si qoto dheer uga wadahadlay sidii iskaashiga labada dal uu gacan uga geysan lahaa dadaallada Dowladda Federaalka Soomaaliya ee lagu xoojinayo amniga, la dagaalanka kooxaha Khawaarijta Al-Shabaab iyo Daacish, iyo sidii loo dardargelin lahaa hawlaha la xiriira taageerada hawlgalka Midowga Afrika ee AUSSOM.