Madaxwaynaha Jamhuuriyadda Federaalka Soomaaliya Mudane Xasan Sheekh Maxamuud ayaa ka qaybgalay casho sharaf uu martigaliyay Madaxwaynaha Maraykanka Mundane Donald Trump taasi oo lagu maamuusay madaxdii ka qaybgashay Meertada 80aad ee Fadhiga Golaha Guud ee Qaramada Midoobay.

Madaxweynaha ayaa magaalada New York uga qeybgalay fadhiga 80-aad ee Golaha Guud ee Qaramada Midoobay, halkaas oo uu ku soo bandhigay duruufaha adag ee Soomaaliya ay ka gudubtay, isagoo tilmaamay in dowladdu ay dadaal ku bixisay xaqiijinta amniga, dardar gelinta dagaalka ka dhanka argagixisada, xoojinta dimuqraadiyadda iyo dhammeystirka Dastuurka.

Taliyaha Ciidanka Dhulka Xoogga Dalka Soomaaliyeed, Jeneraal Sahal Cabdullaahi Cumar, ayaa kormeer ku tegay deegaanno ka tirsan gobolka Shabeellaha Hoose.

Taliyaha ayaa booqday deegaanno ku dhow degmada Awdheegle, halkaas oo ay howlgal ka dhan ah Khawaarijta ka wadaan Ciidamada Qaranka, wuxuunna ku bogaadiyay ciidamada uu kula kulmay deegaannada uu kormeeray guulaha ay gaareen iyo jabka culus oo ay gaarsiiyeen Khawaarijta naf-lacaariga ah.

Dhanka kale, Taliyaha ayaa geesiyaasha is-garabsanaya faray in ay soo afjaraan goobaha gabaadka ay ka dhiganayaan cadowga.

Waxaa howlgalka kormeerka Taliyaha ku wehelinayay Taliyaha Sector-ka 1-aad ee howlgalka Midowga Afrika ee taageerada iyo xasillinta Soomaaliya (AUSSOM) iyo saraakiil kale oo ka tirsan Xoogga Dalka.

Gobolka Shabeellaha Hoose, waxaa si dardar leh uga socda wajiga saddexaad ee howlgalka “Duufaanta Aamusan”, kaas oo jab culus lagu gaarsiiyay khawaarijta.

Madaxweynaha Jamhuuriyadda Federaalka Soomaaliya Dr. Xasan Sheekh Maxamuud oo wareysi siiyay Telefishinka Al-Carabiya ayaa sharaxaad kooban ka bixiyay muhiimadda Soomaaliya ay u leedahay kursiga ay ku yeelatay Golaha Ammaanka ee Qaramada Midoobay tan iyo 1972-kii.

Hadda, waa markii labaad oo dib loogu doortay Soomaaliya xubin aan joogta ahayn oo ka tirsan Golaha.

Madaxweynaha ayaa wareysigiisa ku sheegay doorar muhiim ah oo ay Soomaaliya ka ciyaarto Qaramada Midoobay iyo ururada kale ee xubinta ka tahay Soomaaliya.

“ Sida aan horay u sheegay, Waxaan leedahay doorar badan oo aan ka ciyaarno Qaramada Midoobay, Waxaan nahay waddan Afrikaan ah kana mid ah saddexda dal ee matalaya Midowga Afrika, sidaas daraateed waxaa naga go’an inaan difaacno mabaadii’da iyo arrimaha Midowga Afrika, waxaanna xubin ka nahay Jaamacadda Carabta, waxaa na saaran mas’uuliyad ah inaan matalno danaha dalalka Carabta markasta oo arrimahooda miiska ay yimaadaan,”.

Sidoo kale, wareysiga uu bixiyay madaxweynaha JFS ayuu kaga hadlay qadiyadda Falastiin iyo mowqifkiisa arrimaha socda maanta.

” Maanta qadiyadda Falastiin waa hormuudka mowqifkeenna waa mid cad oo joogta ah, Sidoo kale, waxaa xubin ka nahay Ururka Iskaashiga Islaamka, waanna waajib na saaran difaaca arrimaha quseeya dunida Islaamka, sidaas awgeed, Soomaaliya waxaa saaran mas’uuliyado kala duwan, Waxaan u joognaa inaan u adeegno danaha shacabka iyo dalalka aan matalno,” ayuu yiri madaxweyne Xasan Sheekh.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo safar shaqo ku jooga dalka Mareykanka ayaa booqday Xarunta Safaaradda Soomaaliya ee dalkaasi.

Madaxweynaha ayaa kormeeray waaxyaha adeeg bixinta Safaaradda iyo xafiisyada mas’uuliyiinta, isaga oo dhageystay warbixin ku saabsan adeegyada loo qabto Muwaadiniinta Soomaaliyeed, isla markaana ku bogaadiyay Diblumaasiyiinta iyo Howlwadeennada Safaarada shaqada wanaagsan ee ay u hayaan dalkooda.
      

𝐍𝐚𝐢𝐫𝐨𝐛𝐢:-Wasiirka Maaliyadda Xukuumadda Federaalka Soomaaliya Mudane Biixi Imaan Cige ayaa magaalada Nairobi kulan muhiim ah kula qaatay safiirrada dalalka saaxiibada caalamka ee Soomaaliya xiriir dhow la leh, Kulanka ayaa diiradda lagu saaray xoojinta iskaashiga dhinacyada dhaqaalaha, taageerada dib-u-habeynta maaliyadda, iyo horumarinta xiriirka saaxiibtinimo ee Soomaaliya iyo beesha caalamka.

Wasiirka Maaliyadda XFS ayaa intii uu socday kulanka waxa uu uga mahadceliyay safiirrada taageerada joogtada ah ee ay Soomaaliya ay la garab taagan yihiin, isaga oo carabka ku adkeeyay muhiimadda ay u leedahay in si daahfuran loo wada shaqeeyo, si loo xaqiijiyo guulaha laga gaaray dib-u-habeynta maaliyadda iyo barnaamijyada horumarinta dhaqaalaha, xili ay Dowladdu dadaal xoogan galinayso sidii loo heli lahaa mashaariic horumarineed oo wax tar leh.

Safiirrada beesha caalamka ayaa dhankooda ku bogaadiyey horumarka dowladda Soomaaliya ka sameysay dib-u-habeynta dhaqaalaha iyo casriyeynta hannaanka dakhli uruurinta kadib qorshihii deyn cafinta iyada oo ay balan qaadeen in ay sii wadi doonaan taageerada ay ku garab taagan yihiin shacabka iyo dowladda Soomaaliyeed, si loo xaqiijiyo mustaqbal dhaqaale oo waara.