Ra’iisul Wasaare Ku-Xigeenka Xukuumadda Jamhuuriyadda Federaalka Soomaaliya, Mudane Saalax Axmed Jaamac, ayaa si weyn loogu soo dhaweeyey Gobolka Minnesota ee dalka Maraykanka halkaas oo uu kula kulmi doono jaaliyadda Soomaaliyeed ee ku nool gobolkaas.

Mudane Saalax Axmed Jaamac ayaa inta uu joogo Minnesota waqti la qaadan doona bulshada Soomaaliyeed ee gobolkaas ku dhaqan, isaga oo warbixin ka siin doona xaaladda guud ee dalka, horumarka laga gaaray dhinacyada kala duwan, sida amniga, dhaqaalaha, la dagaallanka Khawaarijta iyo dadaallada dowladda ee dib u dhiska, nabadeynta, iyo horumarinta adeegyada bulshada.

Shabeellaha hoose:-Ciidanka Xoogga Dalka Soomaaliyeed oo garab ka helaya Ciidamada AUSSOM, gaar ahaan qeybta Uganda ayaa maanta Kooxda Khawaarijta ka xoreeyey tuulooyin ka tirsan degmada Awdheegle kuwaas oo kala ah Shaamgare iyo Raqayle ee gobolka Shabeellaha Hoose.

Dagaal kooban oo ka dhacay tuuloyinkaan ayaa lagu jabiyay Khawaarijta, waxana howlgalkaan uu soo bilowday saakay aroor hore, iyadoo Ciidanka Qaranka iyo kuwa AUSSOM si xirfad leh u wajaheen goobihii ay Khawaarijtu isku dayeen inay ku dhuuntaan.

Intii uu hawlgalka socday, maleeshiyaadka Khawaarijta ayaa laga saaray godadkii ay ku dhuumanayeen, iyadoona qasaare culus lagu gaarsiiyay halka qaar kalena ay baxsadeen, waxana howlgalkaan uu qeyb ka yahay Duufaanta Aamusan wejigiisa saddexaad.

Maamulka Safaaradda Soomaaliya ee Dalka Yemen ayaa maanta dib u bilowday bixinta baasaboorka Soomaaliga oo lagama maaramaan u ah howlaha dhinaca socdaalka iyo aqoonsiga jinsiyadda dadka Soomaalida ah.

Safiirka Safaaradda Soomaaliya ee Dalka Yemen  C/Xakiim Maxamed Axmed oo ka hadlay kulankii bixinta adeegaan ayaa sheegay in la bilaabay wajigii koowaad ee muwaadiniinta Soomaalida lagu siinayo baasaboorka dalka,kadib markii muddo sided sano ah ay sugaayeen in ay helaan adeegaan.

Safiirka ayaa xusay in muwaadiniin gaaraya 71 ruuux ay qaateen baasaboorka Soomaaliga ah,isla markaana ay jiraan tiro badan oo weli ku sugan Dalka Yemen oo sugaaya  adeegaan,kadib markii uu Danjire C/Xakiim Maxamed uu tilmaamay in la sameeyay baaritaanno lgu xaqiijinaayo a in ay yihiin dad Soomaali ah.

Bixinta adeegga baasaboorka Soomaaliga ah ayaa la filayaa in muwaadiniinta uu u fududeeyo sidii ay dalka Yemen uga soo bixi lahaayeen,isla markaana ay dib ugu soo noqon lahaayeem gudaha dalka.

Afhayeenka Ciidanka ee Wasaaradda Gaashaandhigga Sheekh Abuukar Macalin ayaa Kulan baraarujin ah oo la xiriiray habsami u gudashada waaibaadka qaran la qaatay ciidamada xoogga ee ku sugan degmada Mahadaay oo ka tirsan Gobolka Sg/Dhexe.

Afhayeenka ayaa ku ammaanay ciidanka sida ay diyaarka ugu yihiin adkeynta iyo ilaalinta amniga shacabka ku sugan degmadaasi , isagoo ku booriyay in ay halkaasi ka sii wadaan dadaalada ku aadan la dagaalanka kooxaha khawaarujta ee ku dhuumaaleysanaya deegaanada Sh/Dhexe.

Afhayeenka Ciidanka ee Wasaaradda Gaashaandhigga waxa uu ka dalbaday dadka deegaanka mahadaay iyo guud ahaan kuwa Sh/Dhexe in ay ciidanka gacan ku siiyaan howlgalada looga horjedo khawaarijta iyo sidii gabi ahaan looga sifeyn lahaa gobolkaasi.

Ra’iisul Wasaare kuxigeenka XFS Saalax Axmed Jaamac iyo wafdi uu hoggaaminayo ayaa lagu soo dhoweeyay Garoonka Diyaaradaha Magaalada Minneapolis Gobolka Minnesota  ee dalka Mareykanka .

Wafdigaan oo safar shaqo ku jooga dalka Mareykanka ayaa lagu wadaa in maanta ay la kulmaan jaaliyadda Soomaalida ee ku dhaqan magaaladaasi,iyagoo ka warbixin doona xaaladda dalka iyo horumarada kala duwan ee ay ku tallaabsatay dowladda Soomaaliya.

wafdi uu hoggaaminayo R/Wasaare kuxigeenka XFS waxaa mudada sadexda cisho ah ee ay joogaan Mareykanka ay sidoo kale ka hadli doonaan qorshaha isbadalka qaran ee ay waddo xukuumadda dan qaran iyo muhiimadda ay leedahay xoojinta dowladnimada iyo nidaamka federaaliska.

Agaasimaha guud ee Wasaaradda Warfaafinta XFS Cabdullaahi Xayir Ducaale oo ka qeybgalay kulanka todobaadka warbaahinta qaranka ayaa ka warbixiyay qodobbo muhiim ah oo la xiriiriay fursadaha dalxiiska ee ka jira dalka iyo kaalinta ay ka ciyaari karaan horumarka dalka .

Agaasimaha Guud ayaa xusay in ay dhowaan soo bandhigeen fursado ku aadan dalxiiska dalka iyo sida looga qeybqaadan karo taabagalinta mashruucyo kuwa dalxiiska ah oo laga hirgaliyo degmooyinka dalka iyo caasimadda Soomaaliya.

Agaasimaha guud ayaa yiri” Dalkeenna waxa uu leeyahay goobo caan ah oo ku wanaagsan dalxiiska,sidaa daraadeed haddii aan kordhinno dalxiiska waxaa kordhaya dhaqaalaha dalka iyo fursadaha shaqo ee ay heli karaan umadda.

Agaasimaha guud ee Wasaaradda Warfaafinta XFS Cabdullaahi Xayir Ducaale waxa uu gabagabadii qiray in  dalxiisku uu yahay furaha ana albaabka maalgashiga,sidaa aawadeedna waxa uu ku taliyay in la sameeyo gobo dalxiis oo ay ku jiraan dhismooyin waaweyn oo hoteello ah,beero kuwa xayawaanaadka ah iyo xaafado ilqabad leh oo ku tetsan xeebaha badda.

Wasiirka Wasaaradda Kalluumeysiga iyo Dhaqaalaha Buluugga ah ee XFS Mudane Axmed Xasan Aadan ayaa kulan muhiim ah la qaatay Madaxa Bankiga Adduunka ee Soomaaliya, Mr. Hideki Matsunaga.

Dhinacyadaasi waxaa mudadi uu socday kulankooda ay kaga wadahadleen sidii loo xoojin lahaa iskaashiga u dhexeeya Wasaaradda iyo Bankiga Adduunka.

Kullankaan waxaa si gaar ah diiradda loogu saaray horumarka laga sameeyey Mashruuca Badmaal, gaar ahaan dhinacyada horumarinta kaabayaasha kalluumeysiga, dib-u-habaynta shuruucda la xiriirta kalluumeysiga, iyo awood-siinta dhalinyarada iyo haweenka ku hawlan kalluumaysiga dalka.

Wasiirka iyo Madaxa Bangiga adduunka ee Soomaaliya waxa ay wadahadal kadib isku raaceen in la sii wado wadashaqaynta wanaagsan ee u dhexeeysa labada dhinac.

Muddo sanad ah waxaa dalka ka socda mashruuc xagga kalluumeysiga ah oo ay taageerayaan Bangigga Adduunka,kaas oo ay si weyn uga faa’iideysteen bulshada kalluumeysatada ee Soomaaliyeed.

Taliyaha Ciidanka Booliiska Soomaaliyeed Sarreeye Guuto Asad Cismaan Cabdullaahi ayaa la kulmay Safiirka Midowga Yurub (EU) ee Soomaaliya Francesca Di Mauro.

Kulanka ayaa looga hadlay dhismaha xoojinta iyo wada shaqeynta Hay’adaha Amniga oo Boliisku qeyb ka yahay ,derdergelinta dedaalada dib loogu habaynayo Ciidanka Daraawiishta oo loo diyaariyey in loo diro deegaanada laga xoreeyey Khawaariijta si howlaha Nabad ilaalinta deegaanadaa qeybtooda uga qaataan.

Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa qaabilay Guddoomiyaha Golaha Wakiiladda ee Dowlad Goboleedka Waqooyo-Bari Mudane Aadan Cabdullaahi Aw-Xasan oo ay wehliyaan Guddoomiye kuxigeenka koowaad ee Golaha Wakiiladda Dowlad Goboleedka Waqooyi-Bari Amran Axmed Xasan iyo sidoo kale Xildhibaano ka tirsan Golaha Wakiiladda ee dowlad goboleedkaasi.

Guddoomiyaha Golaha Wakiiladda ee Dowlad Goboleedka Waqooyo-Bari Mudane Aadan Cabdullaahi Aw-Xasan oo ugu horeyn Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya uga mahadceliyay qaabilaadiisa ayaa uga warbixiyay doorashadii ka dhacday maamulkaasi, xaaladda deegaanadda maamulka Waqooyi-Bari, taageeradda ay u baahanyihiin Xildhibaanadda Golaha Wakiiladda ee Dowlad Goboleedka Waqooyi-Bari ee isugu jirta tababarada iyo aqoon kororsiga Xildhibaanadda iyo sidoo kale howlwadeenadda Golaha Wakiiladda ee Dowlad Goboleedka Waqooyo-Bari.

Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) oo ugu horeyn bogaadiyay dadaaladii laga soo maray dhisida maamulka Waqooyi-Bari ayaa sheegay Golaha Shacabka ee Baarlamaanka Jamhuuriyadda Federaalka Soomaaliya uu soo dhoweynayo sidoo kalena uu dhiiragelinayo Guddoonka Iyo Xildhibaanadda Golaha Wakiiladda ee Dowlad Goboleedka Waqooyi-Bari, sidoo kale waxa uu sheegay in Golaha Shacabka uu diyaar u yahay sidii loo taageeri lahaa golaha wakiilada ee maamulkaasi si ay u gutaan howlaha horyaala.