Madaxweynaha maamulka Galmudug, Mudane Axmed Cabdi Kaariye ayaa ka qayb galay Munaasabad ay  Galmudug kula wareegtay Xaruntii loo diyaariyay Xafiiskii Siyaasadda Qaramada Midoobay ee Galmudug, kaasi oo si guud dalka oo dhan, shaqadiisu ku egtahay Oktoobar 2026.

Madaxweynaya ayaa hay’adaha kale ee Qaramada Midoobay ugu baaqay in ay ka faa’iideystaan Xafiisyadan, si loo xoojiyo adeegga loo hayo Bulshada Reer Galmudug.

Munaasibada waxaa ka qayb galay Wakiilka Gaarka ee Xoghayaha guud ee QM u qaabilsan Soomaaliya, mudane James Swan.

Maxkamadda Racfaanka Gobolka Galgaduud ayaa xukun dil toogasho ah ku riday Cabdi Cusmaan Cabdullaahi iyo Gallad Axmed Xuseen, sidoo kale Ayuub Maxamed Cabdi ayey maxkamaddu ku riday xukun shan sano oo xabsi ah.

Ragga ay manta xukuntay Maxkamadda Racfaanka Gobolka Galgaduud ayaa lagu helay inay ka dambeeyeen dilka hooyo iyo sedax gabdhood oo ay dhashay, falkaas oo ka dhacay deegaanka Qaayib ee gobolka Galgaduud.

Go’aankan ayaa yimid kaddib dhagaysi ay maxkamaddu u samaysay doodda qareennada difaaca, caddeymaha xeer ilaalinta iyo marqaatiyaal la hor keenay.

Maxkamaddu wax ayaa sheegtay in xukunkan uu yahay mid caddaalad u horseedaya qoyska dhibbanayaasha iyo bulshada Galmudug.

Wasiirka Kalluumeysiga iyo Dhaqaalaha Buluugga ah ee Dowladda Federaalka Soomaaliya, Mudane Axmed Xasan Aadan, ayaa si rasmi ah magaalada Muqdisho uga daahfuray Nidaamka Maareynta Macluumaadka Kalluumaysiga (FIMS).

Mashruuca cusub ee FIMS, oo lagu ururinayo una lagu maareynayo xogta kalluumaysiga, ayaa noqonaya tallaabo muhiim ah oo lagu xoojinayo maamulka iyo habeynta xogta waaxda kalluumaysiga, taas oo suuragelinaysa in la helo tirokoob sax ah oo nidaamsan.

Nidaamkani wuxuu gacan ka geysan doonaa dejinta go’aanno ku dhisan caddayn, iyo horumarinta siyaasado ku saleysan cilmi-baaris, si loo hormariyo waaxda kalluumaysiga ee dalka.

Guddoomiyaha Hay’adda Maareynta Musiibooyinka, Mudane Maxamuud Macalin Cabdulle, ayaa xarunta SoDMA ku qaabilay wafdi sare oo ka socday hay’adda Plan International, kaas oo ay hoggaaminaysay Agaasimaha Gobolka Hoosaadka Bariga Dhexe, Bariga Afrika iyo Koonfurta Afrika Marwo Angela Muriithi.

Shir ay yeesheen labada dhinac ayaa looga hadlay saadaasha abaarta soo foolka leh, xoojinta iskaashiga labada hay’adood, iyo kor u qaadista nidaamyada digniinaha hore iyo jawaabaha degdegga ah ee heerka bulshada.

Sidoo kale labada dhinac ayaa isku raacay in la dardargeliyo diyaargarowga, la xoojiyo is-weydaarsiga xogta iyo faafinta digniinaha hore, isla markaana la diyaariyo soo-jeedimo lagu ballaarinayo iskaashiga, si uu ula jaanqaado mudnaanta qaranka ee maareynta musiibooyinka.

Dhinaca kale masuuliyintaan ayaa adkeeyay xiriirka istaraatiijiga ah ee labada hay’adood si wax looga qabto xaaladaha degdegga ah, islamarkaana loo abuuro fursado wadajir ah.

Guddoomiyaha Guddiga Madaxa-Bannaan ee Doorashooyinka Qaranka iyo Soohdimaha, mudane Cabdikariim Axmed Xasan, oo shir jaraa’id ku qabtay xarunta dhexe ee Guddiga, ayaa ku dhawaaqay jadwalka doorashada golaha deegaanka ee gobolka Banaadir.

Guddoomiye Cabdikariim Axmed Xasan ayaa hoosta ka xariiqay in shacabka gobolka Banaadir 25-ka bisha soo socoto u dareeri doonaan dooraahada golaha deegaanka si ay codkooda ugu doortaan mas’uuliyiintii hoggaamin lahayd.

“25 bisha soo socota waxaa Gobolka Banaadir looga dareeri doonaa doorasho qof iyo cod ah.” Guddoomiye Cabdikariin Axmed Xasan,”.

Xisbigada ka qeyb galaya dooraahada golaha deegaanka gobolka Banaadir ayaa wada olole xooggan oo ay shacabka ku weydiisanayaan codkooda.