Wasiirka wasaaradda Waxbarashada, Hiddaha iyo Tacliinta sare ee dowladda Federaalka Soomaaliya ayaa maanta soo dhaweeyey arday u dhalatay dalka Suudaan oo deeq waxbarasho ka helay Dowladda Soomaaliya, kuwaas oo waxbarashadooda sare ku qaadan doona Jaamacadda Ummadda Soomaaliyeed.

Dowladda iyo shacabka Soomaaliyeed waxa ay mar walba xusuusanyihiin xiriirka walaaltinimo iyo taariikhda dheer ee ay la leeyihiin dalka Suudaan, oo leh abaal aan la illaawi karin.

Todobaadyada soo socdo waxaa dalka soo gaari doona arday kale oo reer Suudaan ah iyadoo kuwa maanta yimid ay ahaayeen qeybtii ugu horreysay.

Ra’iisul wasaare ku xigeenka Xukuumadda Federaalka Soomaaliya mudane Saalax Axmed Jaamac ayaa maanta xafiiskiisa ku qaabilay Danjiraha Boqortooyada Sacuudiga Carabiya u fadhiya Soomaaliya mudane Axmed bin Maxamed Al-muwalad.

Kulanka ayaa diiradda lagu saaray xoojinta xiriirka laba-geesoodka ah ee Soomaaliya iyo Boqortooyada Sacuudiga, iyadoo labada masuul ay isku raaceen adkeynta iskaashi ku qotoma amniga, dhaqaalaha, iyo mashaariicda horumarineed.

Ra’iisul wasaare ku-xigeenka ayaa uga mahadceliyay Dowladda Boqortooyada Sacuudi Carabiya garab-istaagga iyo taageerada joogtada ah ee ay siiyaan Soomaaliya.

Guddiga horumarinta Adeegga Bulshada, arrimaha Bani’aadanimada, Warfaafinta iyo Dhaqanka ee Aqalka Sare ayaa maanta kormeer shaqo ku tagay xarunta Guddiga Qaranka ee Shaqaalaha Rayidka Dowladda, iyagoo gudanaya waajibaadkooda la xiriira korjoogtaynta iyo la xisaabtanka hay’adaha dowladda.

Kormeerka waxaa diiradda lagu saaray hannaanka shaqo ee Guddiga Qaranka ee Shaqaalaha Rayidka Dowladda.

Xubnaha guddiga waxay warbixin guud ka dhageysteen Guddoomiyaha Guddiga, Mudane Xasan Abshir Maxamed, iyagoo su’aalo ka weydiiyay arrimaha shaqaalaha, tayeynta xirfadda, wada-shaqeynta hay’adaha dowladda, habraacyada kala beddelka iyo shaqo-gelinta, iyo arrimo kale oo la xiriira maamulka shaqaalaha rayidka.

Intaa kaddib, xubnaha guddiga oo uu hoggaaminayay Guddoomiyaha Guddiga, Sanatar Cismaan Maxamed Maxamuud (Dufle), ayaa kormeer ku sameeyey waaxyaha muhiimka ah sida maamulka, tirakoobka, tababarka, qorsheynta, iyo diiwaangelinta, si ay u qiimeeyaan hufnaanta iyo habsami-u-socodka shaqada Guddiga.

Ugu dambayn, Guddoomiye Dufle ayaa sheegay in shaqaalaha rayidku yihiin laf-dhabarka iyo mishiinka dhaqaajiya howlaha dowladda, isla markaana wuxuu maamulka iyo shaqaalaha Guddiga Qaranka ee Shaqaalaha Rayidka Dowladda ku bogaadiyay dadaalkooda, kuna dhiirrigeliyay inay sii xoojiyaan howlaha lagu horumarinayo shaqaalaha rayidka ah.

Wasiirka Arrimaha Dibadda iyo Iskaashiga Caalamiga ee XFS, Mudane Cabdisalaam Cabdi Cali, ayaa maanta magaalada Muqdisho si rasmi ah uga furay Shirka Madasha Maalgashiga iyo Bandhigga Qurbe-joogta Soomaaliyeed.

Intii lagu guda jiray furitaanka madasha, Wasiir Cabdisalaam ayaa xusay in qurbe-joogta Soomaaliyeed ay aas-aaseen ganacsiyo kala duwan oo door muuqda ka qaata kobcinta dhaqaalaha dalka. Wuxuu ku bogaadiyey kaalinta ay ka qaadanayaan dib-u-dhiska dalka, isaga oo tilmaamay in Dowladda Federaalka ay ka go’an tahay dhiirri-gelinta maalgashiga ay dalka ayku sameynayaan qurbe-joogta Soomaaliyeed.

Wasiirka ayaa sidoo kale carabka ku adkeeyay in qurbe-joogta Soomaaliyeed ay dalka dib ugu soo diraan ama maalgashaan in ka badan $2 bilyan sanadkii, taas oo ah laf-dhabarta dhaqaalaha qoysaska Soomaaliyeed iyo waxsoo saarka koboca dhaqaalaha guud ee dalka.

Guddoomiyeyaasha ururada siyaasadeed ee Towfiiq iyo Ramaas ayaa olole wacyigelin iyo cod-raadis ah ka sameeyay degmooyin kala duwan oo ka tirsan gobolka Banaadir, iyagoo bulshada ku booriyey inay ka qayb qaataan doorashada tooska ah ee dalka ka bilaabanaysa.

Ururka Siyaasadeedka Towfiiq ayaa olole doorasho ka sameeyay degmooyinka Kaaraan, Xamarweyne, Shangaani, Cabdicasiis iyo Gubadley, halka Ururka Siyaasadeedka Ramaas uu olole ka sameeyay qaar ka mid ah degmooyinka gobolka Banaadir. Ololeyashan ayaa ujeedadoodu tahay in bulshada si toos ah loola xiriiro, codkooda loo helo, lana fahmo baahiyahooda dhabta ah.

Cali Maxamed Nuur (Maandiirshe) ayaa yiri “Maanta dalku doorasho ayuu aaday, waa soo dhamaatay dad aanan dooran oo talada noo jaangooya,” isagoo muujinaya muhiimadda ay leedahay ka qayb qaadashada doorashada si ay bulshada u helaan awood ay ku saameeyaan horumarinta adeegyada deegaanka.

Guddoomiyeyaasha ururadu waxay caddeeyeen in ololahan uu yahay mid loogu talagalay in si toos ah bulshada loola xiriiro, loona fahmo baahiyahooda, isla markaana ururradu ay diyaar u yihiin inay wax ka qabtaan adeegyada bulshada iyo dhibaatooyinka ka jira haddii codkooda la taageero.

Qaahira: Wasiirka Gaashaandhigga Xukuumadda Federaalka Soomaaliya, Mudane Axmed Macallin Fiqi oo ay weheliyaan Taliyaha Ciidanka Xoogga Dalka, Sarreeye Gaas Odawaa Yuusuf Raage, iyo saraakiil sare oo kale, ayaa ka qeyb galay daah-furka Bandhigga Afraad ee Difaaca Masar (EDEX 2025). Bandhiggan oo soconaya muddo afar maalmood ah ayaa ka dhacaya Xarunta Carwada Caalamiga ah ee Masar (EIEC) ee magaalada Qaahira.

Madaxweynaha Masar, Cabdel Fataax Al-Sisi, ayaa si rasmi ah u daah-furay bandhigga, waxaana ka soo qeyb galaya wufuud ka kala socota in ka badan 100 dowladood, iyo in ka badan 450 shirkadood oo ka mid ah hormuudka soo-saarka difaaca iyo amniga caalamka. Waa bandhigga keliya ee daboola labada gobol ee Afrika iyo Bariga Dhexe, waxaana lagu soo bandhigayaa tignoolajiyad iyo qalab casri ah oo dhanka difaaca iyo amniga ah.

Wafdiga Dowladda Soomaaliya ayaa inta uu socdo bandhiggu kulamo doceedyo kala duwan la yeelan doona madaxda ka qeyb galaysa Bandhigga 4-aad ee Difaaca Masar.